“Kafweang in Sano”—Tu Pal in Nununku Summu Tari!
Me akuteye ke me lutlut inge el fwal nu ke buk srisrik inge Keep on the Watch! (Kaifweang in Sano!) su akkalemyeyuk tari ke toeni lulap lun district su orek fwin fwalu nu fon ke yea 2004/05.
“Ke ma inge sano . . . tu komwos tia etu in len su Leum lomwos fwa tuku.”—MATTU 24:42.
1, 2. Nu ke mea Jisus el pupulyukkin tuku lal?
MEA kom fwa oru kom fwin etu la sie met pusrapasr el oasr ke an sum a suk ma puspus su el ku in pusre, kunausla loom u a utyuk nu ke loom puspus ke an sum? In sang me karungin nu sin met nukemwa su kom lungse a ke ma saok lom, kom enenu in tia motul, loang akmwoye a sano pal nukemwa. Kom enenu in loang akmwoye a sano pal nukemwa meyen, sie met pusrapasr el tia supwema sie leta in akkalemye la nga el fwa tuku. Paye la, el fwa tuku ke inkanek su arulanu misla a met elos tia etu.
2 Ke pal puspus, Jisus el orekmakin inkanek puspus lun sie met pusrapasr oana me pupulyuk lal. (Luk 10:30; Jon 10:10) Ke ma sikyak puspus su orek ke lusen len safla a in wekunang pa ma puspus su fwa sikyak meet liki tuku lal in oru nununku, Jisus el akkalemye ke kas in sensen inge: “Ke ma inge sano, tu komwos tia etu in len su Leum lomwos fwa tuku. A komwos in etu ma se inge, tu met kato lun loomu fwin etu in aur su met pusrapasr fwa tuku, el lukun sano, a tia lela loom sel in musalla.” (Mattu 24:42, 43) Aok, Jisus el pupulyukkin tuku lal nu ke tuku lun sie met pusrapasr—ke pal su met elos tia nunku ka.
3, 4. (a) Mea eneneyuk nu ke kas in sensen lun Jisus ke tuku lal? (b) Kusensiyuk puspus fuka sikyak?
3 Me pupulyuk se inge el fwal, meyen ke pal in tuku lun Jisus fwa tia eteyuk. Meet liki ma inge, ke kas palu, Jisus el fwak: “A wanginu met etu ke len sa a aur sa, a tia lipufon in kosrao, ku Mwen, a Papa mukena.” (Mattu 24:36) Ke ma inge, Jisus el kaifwe met nukemwa su longol: “Ke ma inge komwos ouyepa ako.” (Mattu 24:44) Elos nukemwa su porongo kas in sensen lun Jisus elos enenu in akola, akkalemye oiya fwal, ke kutena pal su el fwa oru nununku lun Jeova.
4 Oasr kutu kusensiyuk su sikyak: Ya kas in sensen lun Jisus el fwal nu sin met lun fwalu mukena, ku met Kristian elos enenu pa in “sano pal nukemwa”? Efu ku arulanu yok sripe in “sano pal nukemwa,” a mea eneneyuk nu ka?
Me Sensen nu sin Su?
5. Kut etu fuka la kas in sensen inge in “sano pal nukemwa” el kas in sensen nu sin met Kristian paye?
5 Paye la tuku lun Leum el oana ke tuku lun met pusrapasr su tia eteyuk sin met nukemwa lun fwalu, su srunga in long ku pilesru kas in sensen ke me kunausten ku ma upa su fwa tuku. (2 Piter 3:3-7) Tusruktu, e fuka nu sin met Kristian? Met sap Poul el simusla nu sin met lulalfongi nukemwa: “Tu komwos sifwana arulana etu tu len lun Leum a fwa tuku oana sie met pusr ke fong.” (1 Tessalonika 5:2) Kut tia enenu in akkalemye nunak luo ke “len lun Jeova el fwa tuku.” Tusruktu ya ma inge aksrikyela ma su eneneyuk nu sesr in sano ke pal nukemwa? Loang akmwoye nu ka la ke Jisus el fwakak kas in sensen inge nu sin met tuma lutlut nukemwa lal el fwak oinge: “Tu in sie aur komwos tia nunku ka Mwen nutin met El fwa tuku.” (Mattu 24:44) Meet liki ma inge, Jisus el kaifwe nu sin met tuma lutlut nukemwa lal in suk Togusrai pal nukemwa, Jisus el sang kas in sensen: “Ke ma inge komwos in ako pa, tu Mwen nutin met El a tuku in aur se su komwos tia nunku ka.” (Luk 12:31, 40) Ya tia kalem la Jisus el nunku pa ke met tuma lutlut nukemwa lal ke pal se el fwak kas in sensen inge: “Sano pal nukemwa”?
6. Efu kut enenu in “sano pal nukemwa”?
6 Efu ku kut enenu in “sano pal nukemwa” a “akoela pal nukemwa”? Jisus el akuteye: “Na met luo fwa muta in imae: fwa utukla sie, a filiye sie; mutan luo fwa ilil ke sie me ilil: fwa utukla sie a filiye sie.” (Mattu 24:40, 41) Met nukemwa su akpayeye la elos akoela fwa “utukla,” ku moliyukla, ke pal se met nukemwa su tia kulansapu God fwa kunausyukla. Met puspus elos fwa “filiyuki” nu ke len in kunausten meyen elos kafweang in suk inkanek in akinsemwomwoyelos sifwana. Oasr met puspus su wi ke u inge su wekunang pa elos nukemwa su in pal meeta etu ke kas lun God inge tusruktu elos tia kaifweang in sano.
7. Ke sripen kut tia etu la nga safla e fwa tuku, mea kut enenu in oru?
7 Ke sripen kut tia etu ke len safla lun akwuk matu inge paenang ma inge ase pal mwomwo nu sesr in akkalemye la kut kulansapu God ke nunak paye. Fuka in oinge? Saap ke sripen nunkeyen len safla nunkeyuk mu e fwa tia sa tuku. Oasr sie me asor, fwin kutu sin met Kristian su nunku oinge elos lela oiyen moniyuk lalos ke orekma in kulansap nu sin Jeova in munasla. Tusruktu, ke inkanek lun mwulela lasr, kut lungse na paye in orekmakin moul lasr in kulansapu Jeova ke oiya nukemwa a ke pal nukemwa. Elos nukemwa su etu kel Jeova elos akilen la tia ku in akinsemwomwoyel fwin orekma in kulansap lasr nu sel akkalemyeyuk ke inkanek moniyuk meet liki len safla tuku. El liye ma nukemwa su oasr ke insie.—1 Samuel 16:7.
8. Fuka lungse lasr nu sin Jeova akkeye kut in sano pal nukemwa?
8 Meyen kut lungse na paye Jeova, kut koneak la me insemwomwo yok pa in oru ma lungse lal. (Sam 40:8; Mattu 26:39) A kut lungse in kulansupal Jeova ma patpat. Me fwinsrak inge el srakna saok fwinne kut enenu in sano pat kutu srisrik liki ma kut nunku. Yok liki nukemwa, lela kut in sano pal nukemwa meyen len lun Jeova el sie luma su arulanu yok sripe in akpayeye akwuk lal. Lungse paye lasr in akinsemwomwoye God akkeye kut in orekmakin kas in kai ke Kas lal a in suk meet Togusrai lal ke moul lasr. (Mattu 6:33; 1 Jon 5:3) Lela kut in akkalemye la fuka orekma in sano lasr pal nukemwa ku in kasru sulela nukemwa su kut orala a ke inkanek su kut moulkin moul lasr ke kais sie len.
Moul Lom el Oasr Oya?
9. Efu ku oasr me enenu nu sin met puspus lun fwalu in akilen yok sripaiyen pal lasr?
9 Met puspus ke pal inge elos akilen la oasr ma upa a me keok puspus su sikyak aklutye metu su akilenyuk len nukemwa, a elos tia insemwomwokin inkanek su elos moulkin moul lalos. Tusruktu, ya elos etu na paye ke kalmeyen ma puspus su sikyak fwin fwalu? Ya elos akilen la kut moul ke “saflaiyen akwuk lun ma puspus”? (Mattu 24:3, NW) Ya elos akilen la orekma lun met puspus elos nunku kelos sifwana, sulallel , a wanginla lungse lalos nu sin God su ku in akpayeye la pa inge me akul nu ke “len safla”? (2 Timote 3:1-5) Oasr me enenu yok nu selos in etu a akilen la yok sripaiyen ma sikyak inge nukemwa a in nunku ke inkanek in moul lalos la oasr oya.
10. Mea kut enenu in oru tu kut in kafweang in sano pal nukemwa?
10 Fuka kut, oiya fuka kut akkalemye ke ma sikyak nukemwa fwin fwalu? Kais sie len kut enenu in oru sulela puspus lasr nu ke niyen orekma lasr, ke mano fukoko lasr, sou lasr, a ke alu lasr. Kut etu ke ma Baibel el fwak, a kut kafweang in orekmakin ma inge. Ke ma inge, kut enenu in siyuk sesr sifwana: ‘Ya Nga nunkela yok ke ma lun ikwa in oreyu in tia oru niyen sun luk ke ma lun ngun? Ya Nga lela lalmetmet lun fwalu, in pa ma yok sripe se emeet, in kufusla sulela su nga orala? (Luk 21:34-36; Kolosse 2:8) Kut enenu in akkalemye la kut lulalfongi Jeova ke insiesr kemwa a in tia fungla nu ke etauk lasr sifwana. (Soakas 3:5) Ke inkanek oinge, kut fwa “sruokye ku moul ma patpat” pal nukemwa—moul ma patpat ke fwal sasu lun God.—1 Timote 6:12, 19.
11-13. Mea kut ku in lotela ke me srikasrak puspus su sikyak (a) in len lal Noa? (b) in len lal Lot?
11 Oasr me srikasrak puspus su oasr pa me sensen nu ka in Baibel su ku in kasre kut in sano pal nukemwa. Nunku ke ma sikyak in len lal Noa. Ke lusen pal loeloes meet liki God el oru nununku lal, el orala akwuk mwo tu in oasr kas in sensen su akkalemyeyuk nu sin met nukemwa. Tusruktu, met puspus elos tia loang nu ka, Noa a sou lal mukena nunku yok ka. (2 Piter 2:5) In sramsramkin ma inge, Jisus el fwak: “A oana in len lal Noa, a fwa oinge ke Mwen nutin met El tuku. Tu oana in len ingo meet liki sronot elos mongo a nim, elos mari a sang in mari, nu ke len se ke Noa el sroak nu fwin oaku; a elos tia etu nu ke pal se sronot tuku, a wiselosla nukemwa; a fwa oinge ke Mwen nutin met el tuku.” (Mattu 24:37-39) Mea kut ku in lotela ka? Fwin kutena sesr el lela ma puspus lun fwalu—fwinne orekma ke len nukemwa—in akkolukye orekma nukemwa lasr in ngun su God el kaifwe kut in oru meet ke moul lasr, kut enenu in nunku yok la fuka kut moulkin moul lasr.—Rom 14:17.
12 Nunku pa ke len lal Lot. Lot a sou lal elos muta ke siti lun Sodom, a siti se inge el kapkapek a oasr me kasrup puspus tusruktu oiyen met puspus su muta we tia mwo. Jeova el supwela lipufon lal in kunausla an se inge. Lipufon inge el kaifwel Lot a sou lal in kaengla liki an Sodom a elos in tia tapulla. Ke sripen elos akkeyeyuk sin lipufon inge, elos som liki siti se inge. Tusruktu, mutan kiyel Lot el srakna nunku yok ke loom sel in an Sodom. El tia akos, a el tapulla, a ke sripe se inge el mise. (Genesis 19:15-26) Jisus el sang kas in sensen nu sesr ke pal fwasru lasr, el fwak: “Esam mutan kiel Lot.” Ya kut porongo kas in sensen inge?—Luk 17:32.
13 Elos nukemwa su porongo kas in sensen lun God elos moliyukla. Pa inge ma sikyak nu sel Noa a sou lal a nu sel Lot a an luo natul. (2 iter 2:9) Ke kut nunku yok ke me sensen su oasr ke me srikasrak puspus inge, kut akkeyeyuk pa ke akwuk lun me molela su oasr ke me sensen inge nu sin met nukemwa su lungse ma sumwosmwos. Ma inge ku in akkeye insiyesr nu ke fwinsrak paye nu ke pal se akpayeyuk mwulela lun God ke “kosrao sasu a fwalu sasu” su “yen sumwosmwos on we.”—2 Piter 3:13.
‘Pal in Nununku Summu Tari’!
14, 15. (a) Mea weang nu ke “pal” in nununku? (b) Mea eneneyuk in akkalemye ‘sangeng sin God a in sang mwolena nu sel’?
14 Ke kut kafweang in sano, mea kut ku in tupan? Buk inge lun Baibel su pangpang Fwakyuk el akkalemye la fuka akwuk lun God fwa akpayeyuk ke kais sie step ku ke kais sie luma. In akfwalye orekma lasr in fwal nu ke ma akkalemyeyuk inge arlana yok sripe kut in akpayeye kut sifwana la kut akoela. Oasr kas palu su akkalemye kalem ke ma nukemwa su fwa sikyak “in len lun Leum,” su fwa mutamwauk ke pal se Kraist el srusrngiyuki oana togusra in kosrao in yea 1914. (Fwakyuk 1:10) Fwakyuk el purakak nunak lasr in loang akmwoye nu sin sie lipufon su itukyang nu sel sie kunokon tu “peng mwo ma patpat el fwa fwakak.” El fwak ke pusra lulap: “Komwos in sangeng sin God, a sang mwolanu nu sel; tu aur in nununku Lal summu.” (Fwakyuk 14:6, 7) “Pal” in nununku inge el sie lusen pal su futoto tia loes; wekunang nu ka pa orekma in fwakak a in oru ku akpayeye nununku nukemwa su akkalemyeyuk ke kas palu inge. Kut moul ingena ke lusen pal inge.
15 Ke pal inge, meet liki saflaiyen pal in nununku, kut kaifweyuk: “Sangeng sin God a sang mwolena nu sel.” Mea eneneyuk nu ka? Sangeng paye nu sin God enenu in oru kut in forla liki ma koluk. (Soakas 8:13) Kut fwin sunakin God, kut fwa ku in porongel ke sunak paye. Kut tia enenu in arlena kafofo ke orekma puspus saye a tia oru orekma in ridi Kas lal, Baibel, pal nukemwa. Kut fwa tia pulesru in nunku mu tia yok sripe kas in kai lal in wi ke meeting nukemwa lun met Kristian. (Hibru 10:24, 25) Kut fwa aksaokye kunokon lasr in sulkakin peng mwo lun Togusrai lun Kraist oana Messaia a kut fwa oru ma inge ke inkanek moniyuk. Kut fwa lulalfongi Jeova pal nukemwa a ke insiyesr kemwa. (Sam 62:8) Ke sripen kut akilen la Jeova pa God Fulatlanu in kosrao a fwalu, kut akfulatyel ke kut akpusiselye kut sifwana nu ke kolyuk lal ke lusen moul lasr. Ya kom akkalemye na paye sangeng lom nu sin God a sang mwolena nu sel ke inkanek nukemwa inge?
16. Efu kut ku in fwak la orekma in nununku lain Babulon Lulap su akkalemyeyuk in Fwakyuk 14:8 el mutamwauk in akpayeyuk?
16 Fwakyuk sapta 14 el akkalemye pa kutu oiya su fwa sikyak ke pal in nununku. Babulon Lulap, ku u lun alu kikiap nukemwa, akkalemyeyuk meet: “A lipufon se pa akluo, el fwasr tukol, a fwak: ‘Musalla! Musalla Babulon Lulap!’” (Fwakyuk 14:8) Aok, ke nunak a liye lun God, Babulon Lulap el musalla tari. In yea 1919, met kulansap akmusrala puspus lun Jeova elos aksukosokyeyukla liki sruo lun met luti a orekma puspus lun Babulon ku alu kikiap, su sruokye met puspus a mutanfwal puspus ke lusen tausen puspus yea. (Fwakyuk 17:1, 15) Ke ma inge elos ku in orekmakunulos sifwana in sang kasru in akkeye alu paye. Orekma in sulkakin peng mwo lun Togusrai lun God fwin fwalu nu fon mutamwauk in akpayeyuk in pal sa.—Mattu 24:14.
17. Mea kut enenu in oru in illa liki Babulon Lulap?
17 Oasr kutupa ip yok sripe ke nununku lun God nu sin Babulon Lulap. Kunausten safla lal apkurun in tuku ku sikyak. (Fwakyuk 18:21) Ke sripe inge, Baibel el kaifwe nu sin met yen nukemwa: “Illa lukel [Babulon Lulap] . . . tu komwos in tia eis ipen ma koluk lal.” (Fwakyuk 18:4, 5) Fuka kut ku in illa liki Babulon Lulap? Oasr pa ma eneneyuk sayen in tui ku tila wi ke alu kikiap. Me akkoluk lun Babulon oasr ke me akfulat ku kofwa puspus a fasin puspus, ke oiya lun fwalu in eis a insese ke orekma lun kosro, ke me akengan su akkeye orekma lun enutnut, a kutupa ma saye. In kafweang in sano, arulanu yok sripe in oru orekma nukemwa lasr a lungse lun insiyesr, kut in sang me akpayeye nu ka la kut srikutla na paye tari liki Babulon Lulap ke inkanek nukemwa.
18. In oana ma akkalemyeyuk in Fwakyuk 14:9, 10, mea met Kristian elos enenu na paye in fwasr liki?
18 In Fwakyuk 14:9, 10, oasr kutupa oiya nu ke ‘pal in nunuku’ su akkalemyeyuk. Oasr siepa lipufon el fwak: “Sie met fwin alu nu sin kosro sokoe, a eis akul fwin mutunsrol, ku paul, el fwa ouyepa nim wain in mulat lun God.” Efu? “Kosro lemnak sogo a akul lal” el lumeyuk nu ke kolyuk lun metu, a met kol puspus su tia akilen ku lun Jeova. Met Kristian elos etu la elos tia enenu in lela elos in sifwana akkolukyeyuk ku in eis akul, ke oiya ku orekma, su ma inge el oana orekma in kulansap nu selos su srunga in akilen sumwos ke kolyuk lun God paye, Jeova. Met Kristian elos etu pa la Togusrai lun God el oakiyuki tari in kosrao, a ma inge e fwa aksafyela kolyuk nukemwa lun metu, a ma inge fwa tu ma patpat.—Daniel 2:44.
Nik Kom Lela Nunak in Kafweang Lom in Tula!
19, 20. (a) Ke kut futotoeni nu ke saflaiyen len safla, mea kut ku in lulalfongi la Setan el fwa kafweang oru? (b) Sulela fuka lasr kut lungse na paye in oru?
19 Ke kut futotoeni nu ke saflaiyen len safla, ma upa puspus a me srife puspus fwa yokyokelik. Ke kut srakna muta ke akwuk matu inge a ke kut sun ma upa su tuku ke oiyen sesumwos lasr sifwana, kut akmunasyeyuk ke oiya puspus su oana munas lun mano, oiyen matou, mise lun met su kut lungse, pulakin toasr, pulakin asor ke sripen met puspus elos tia insemwomwo in loang mwo nu ke kafweang lasr in sulkakin Kas lun God, a ke kutupa sripa saye. Nikmet mulkunla la Setan el fwa orekmakin kain in ma upa nukemwa su kut pula in oru kut in fuleak—in tui ke orekma in sulkakin peng mwo ku in tui in moulkin moul fwal nu ke akwuk sumwos lun God. (Efesus 6:11-13) Tia pa inge pal su kom enenu in lela nunak in kafweang lom in tula meyen kut moul tari ke saflaiyen len safla!
20 Jisus el etu tari la kut fwa sun kain in ma upa puspus su paenang kut in fuleak, ke ma inge el kai kut: “Ke ma inge sano . . . tu komwos tia etu in len su Leum lomwos fwa tuku.” (Mattu 24:42) Ke ma inge, lela kut in loang mwo pal nukemwa la kut oasr oya ke pal inge. Lela kut in karungin kut sifwana liki orekma kutasrik nukemwa lal Setan su ku in oru kut in tila alken ku moniyuk nu ke ma paye ku in munasla a fuleak. Lela kut in oru sulela lasr in sulkakin peng mwo lun Togusrai lun God ke moniyuk yok a in oasr lungse paye in oru ma inge. Ke inkanek nukemwa, lela kut in sruokye pal nukemwa nunak in moniyuk ku kafweang lasr ke kut porongo kas in sensen lun Jisus: “Sano pal nukemwa.” In oru ma inge, kut sang mwolena nu sin Jeova a oasr fwinsrak lasr in wi met puspus su fwa eis me insemwomwo ma patpat nukemwa.
Kom E Topuk Fuka?
• Kut etu fuka la kas in sensen lal Jisus in “kaifweang in sano” fwal nu sin met Kristian paye nukemwa?
• Kas in sensen puspus fuka tuku ke me srikasrak lun Baibel ku in kasre kut in “kaifweang in sano”?
• Mea se inge, pal in nununku, a mea kut kaifweyuk in oru meet liki saflaiyen ma inge?
[Picture on page 5]
Jisus el pupulyukkin tuku lal nu ke tuku lun sie met pusrapasr
[Picture on page 6]
Kunanela lun Babulon Lulap el apkurun me
[Pictures on page 7]
Lela kut in akpayeye sulela lasr in oru orekma in luti ke moniyuk yok a oasr lungse paye in oru ma inge