Met Fwusr Komwos In Kaksakin Jeova!
“Kaksakin Jeova fwalu me, . . . mokul fwusr a ouyepa mutan fwusr.”—SAM 148:7, 12.
1, 2. (a) Met fwusr puspus elos etu kain in masap fuka puspus su tia lela nu selos in oru ke kutena ma? (b) Efu ku met fwusr puspus tia enenu in seakos masap lun papa a nine kiyelos su elos sapkin nu selos?
MET fwusr elos etu pal nukemwa la oasr ma puspus su tia lela nu selos in oru. Pus selos ku in fwak nu sum la piye matwe fwal su elos enenu in sun meet liki papa a nine kiyelos fwa lela nu selos in sifwana fwasr sasla ke soko inkanek ku in lela nu selos in sifwana orala akwuk ke pal in motul ke fong ku pal fwal in utuk sitosa. Oasr pal, met fwusr elos ku in pulakin mu pal nukemwa me top nu ke me siyuk puspus lalos pa, “Sano, kom ku in oru ma inge ke pal kom matula.”
2 Met fwusr, komwos etu la papa a nine kiyomwos elos pulakin mu sie inkanek sumwos a lalmetmet in oru akwuk mwo inge, pa in karungin komwos sifwana. Oayepa, komwos etu na paye la Jeova el akinsemwomwoyeyuk ke komwos akos papa a nine kiyomwos. (Kolosse 3:20) Tusruktu, ya kom pulakin mu kom soenna insemwomwokin moul lom meyen oasr ma puspus su fwakyuk nu sum in tia oru ke sripen kom srakna srikla? Ya ma yok sripe nukemwa su sapkinyuk nu sum kom tia ku in oru ne ke kom matula? Kain in nunak inge tia paye. Oasr sie orekma ke pal inge su arulanu yok sripe liki kutena orekma su kom sano. Ya komwos met fwusr ku in wi ke orekma inge? Aok komwos ku in wi, a yok liki ma inge God Fulatlanu el sifwana sulikomwos in oru orekma inge.
3. Jeova el suli met fwusr puspus in oru orekma yok sripe fuka, a kusensiyuk puspus fuka kut fwa aketeye ingena?
3 Kain in orekma fuka kut sramsramkin? Loang nu ke sifwen me sramsram se inge: “Kaksakin Jeova fwalu me, . . . mokul fwusr a ouyepa mutan fwusr, met matu a wekunang tulik.” (Sam 148:7, 12) Fus inge akkalemye ke orekma mwomwo su komwos ku in oru. Komwos ku in kaksakin Jeova. In oana met fwusr, ya komwos lungse in wi oru orekma inge? Met fwusr puspus elos arulanu lungse in oru. In liye la efu arulanu fwal in oasr pulakin oinge, lela kut in aketeye kusensiyuk tolu. Ma se meet, efu ku kom enenu in kaksakin Jeova? Ma se akluo, fuka kom ku in kaksakunul ke inkanek mwomwo? Ma se aktolu, nge pal mwo in mutamwuk kaksakin Jeova?
Efu Kut Enenu in Kaksakin Jeova?
4, 5. (a) In fwal nu ke Sam ak 148, kut oasr ke ma sikyuk mwolena fuka? (b) Fuka ma orekla puspus su tia ku in kaskas ku sang me top elos ku in kaksakin Jeova?
4 Sripe se ma yok emeet in sang kaksak nu sin Jeova pa ke sripen el Met Orekutla. Sam ak 148 el kasre kut in nunku yok ke ma paye inge. Kom srike nunku: Kom fwin sun sie u lulap lun met su arulanu etu in onkin on kato, mea pulakin lom nu ka? Fuka fwin kas nu kemwa ke on su kom long el kas paye, el akkalemye nunak mwo su oasr kalme mwo ka, a oasr me akengan a me akkeye ka? Ya kom lungse in lutlutkin kas ke on inge a kom wi on kin? Aok pus sesr fwa oru oinge. Paye, Sam ak 148 el akkalemye la kom oasr ke kain in oiya inge tusruktu oasr pa ma yok sripe liki oiya inge. Sam inge el akkalemye ke sie u lulap, su elos nukemwa tukeni kaksakin Jeova ke inse sefwanna. Tusruktu, ke kom ridi sam inge, kom ku in liye pa sie ma sakuruk. Mea se inge?
5 Ma nukemwa su sang kaksak nu sin God akkalemyeyuk in Sam 148 elos tia ku in kaskas ku sang me top. Ke sie me pupulyuk, kut ridi ke fwat, malem, itue puspus, sno, eng, a eol puspus elos kaksakin Jeova. Ke inkanek fuka ma orekla puspus inge su wangin moul elos kaksakin Jeova? (Fus 3, 8, 9) Aok, ke inkanek sepana inge nu ke sak nukemwa, ma orekla in mwea, a kosro nukemwa elos oapana ke ma elos oru. (Fus 7, 9, 10) Ya kom wi muta liye ke pal se ma fwatu e tilli, ku kom ngetak nu lung liye malem ke pal se el raunla takek inmasrlon itu puspus in kosrao ku kom insemwomwokin pusren kosro puspus su sritel ku kom arulanu lut in liye ke sie an su kato a mwolena? Ke ma inge kom “long” tari on in kaksak lun ma orekla puspus. Ma nukemwa su Jeova el orala akesmakinye kut la el pa Met Orekutla a el kulanu, a wangin sie oana el in kosrao a fwin fwalu su kulanu, lalmetmetlanu, a yok lungse yuro.—Rom 1:20; Fwakyuk 4:11.
6, 7. (a) Sam ak 148 el akkalemye ke ma orekla lalmetmet fuka puspus su sang kaksak nu sin Jeova? (b) Efu ku kut ku in mokleak in kaksakin Jeova? Sang me pupulyuk.
6 Sam ak 148 el akkalemye pa ke ma orekla su lalmetmet elos sang kaksak nu sin Jeova. In fus 2, kut ridi la “met meun,” ku lipufon nukemwa lun Jeova in kosrao elos kaksakin Jeova. In fus 11, met ku a pengpeng, oana togusra puspus, a met nununku puspus, elos suliyuk in wi ke orekma inge in kaksakin Jeova. Fwin lipufon kulanu elos pulakin insemwomwo in kaksakin Jeova , ya fwal kut metu in fwak mu kut arulanu fulat in oru orekma in sang kaksak nu sin Jeova. Ke fus 12 a 13, komwos met fwusr suliyuk pa komwos in wi ke orekma inge in kaksakin Jeova. Ya komwos akkeyeyuk a kaifweang in oru orekma inge?
7 Nunku ke sie me pupulyuk. Fwin oasr met kawuk se lom su arulanu sumat ke sritel, ke art, ku sumat ke on, ya kom fwa sramsramkunul nu sin sou lom a kutupa met kawuk lom? Paye kom fwa oru. Aok, in lotela ke ma puspus su Jeova el orala ku in kasre kut pa in fwakak ma puspus nu sin met puspus. Ke sie me pupulyuk, Sam 19:1, 2 el akkalemye la itu nukemwa in kosrao “okiot kas.” Nu sesr, ke kut nunku ke ma sakuruk puspus su Jeova el orala, paye la kut tia ku in tui in sramsramkin nu sin met puspus ke orekma inge lun God lasr.
8, 9. Ke sripe fuka puspus Jeova el lungse kut in kaksakunul?
8 Sie pa sripe yok emeet in kaksakin Jeova pa ke sripen el lungse kut in oru ma inge. Efu? Ya ke sripen el enenu kas in kaksak sin metu? Mo. Saap oasr pal kut metu enenu in long kas in kaksak, tusruktu nu sin Jeova el fulat liki kut na paye. (Isaia 55:8) El etu na paye ku lal a oiya mwomwo nukemwa lal. (Isaia 45:5) Fwinne oinge, el lungse kut in kaksakunul a el insemwomwo ke kut oru ma inge. Efu? Meyen oasr sripe luo. Ma se meet, el etu la kut enenu in kaksakinul. El orekutla in oasr me enenu lun ngun lasr, in oasr me enenu nu ke orekma lun alu. (Mattu 5:3) In liye kut la kut oru orekma inge el sang me akinsemwomwo nu sin Jeova, oana ke me akinsemwomwo nu sin papa a nine ke elos liye kom kang mongo su elos etu mu mwo nu sum.—Jon 4:34.
9 Ma se akluo, Jeova el etu la met puspus elos enenu in long la kut sang kaksak nu sel. Met sap Poul el simusla kas inge nu sin mokul fwusr se inge Timote: “Kom in sifwana taron kom a me luti lom. Kom in mutana in ma inge, tu in oru oinge kom fwa sifwana molikomla a ouyepa elos su long kom.” (1 Timote 4:16) Paye la, kom fwin luti kutu met kel Jeova God, kom sang kaksak nu sel, elos fwa ku pa in etu Jeova. Etauk oinge ku in kol nu ke molela ma patpat lalos!—Jon 17:3.
10. Efu kut lungse in kaksakin God lasr?
10 Oasr siepa sripe in kaksakin Jeova. Esam me pupulyuk ke sie met kawuk lom su sumat in oru ma puspus. Kom fwin long kas in akkoluk lun met puspus kel, akkolukye e mwomwo lal, ya kom fwa tia akkalemye lungse yok lom in akkalemye ma paye ke oiya mwomwo lal? Ke inkanek oinge, met puspus ke pal inge elos akkolukye Jeova. (Jon 8:44; Fwakyuk 12:9) Ke ma inge, elos su lungse el elos arulanu lungse in fwakak ma paye kel, elos aksumwosye kaskas kikiap su met puspus elos fwakak kel. Ya kom lungse in akkalemye lungse lom nu sin Jeova a akkalemye la kom lungse el oana Met Kol lom a tia Setan pa ma kom lungse? Kom ku in oru ma inge nukemwa ke kom sang kaksak nu sin Jeova. Kusensiyuk toko pa, kom e kaksakunul fuka?
Fuka Kutu Met Fwusr Elos Sang Kaksak nu sin Jeova
11. Me pupulyuk puspus fuka oasr in Baibel akkalemye la met fwusr elos ku in sang kaksak nu sin Jeova ke inkanek mwomwo?
11 Baibel el akkalemye la ke pal puspus oasr met fwusr su sang kaksak nu sin Jeova ke inkanek mwo. Ke sie me pupulyuk, oasr sie mutan Israel fwusr su itukyung nu in an Siria oana met sruo. El pulaik in sang ma lo nu sin mutan leum lal kel Elaisa met palu lun Jeova. Kas lal kol nu ke sie mwenmwen, a sie ma lo mwomwo su akkalemyeyuk nu sin leum lal. (2 Togusra 5:1-17) Jisus el oayepa sang ma lo ke el tulik srisrik. Ke ma sikyuk nukemwa ke el fwusr su ku in simusyukla in Ma Simusla, Jeova el sulela sie ma in sikyuk kel Jisus, ke pal se el yea 12, ke Jisus el siyuk kusensiyuk puspus nu sin met luti puspus lun alu ke temple lun Jerusalem a elos arulanu lut ke etauk lal ke inkanek puspus lun Jeova.—Luk 2:46-49.
12, 13. (a) Mea Jisus Kraist el oru in temple ke kitin pal meet liki el mise, a mea orekma lal el oru nu sin met puspus su muta we? (b) Mea pulakin lal Jisus ke kas in kaksak su akkalemye sin tulik mokul puspus?
12 Ke el matula, Jisus el akkeye tulik puspus in sang kaksak nu sin Jeova. Ke sie me pupulyuk, kutu len meet liki el mise, Jisus el eis pal in muta ke temple lun Jerusalem. Baibel el akkalemye la el oru “orekma sakuruk” we. El siselosla su kuka a moli in temple su oru an mutal inge in oana lufin met pusrapasr. El oayepa akkeyela met kun a met ul puspus. Met nukemwa su oasr we, yokna met kol puspus lun alu, elos enenu in akkeyeyuk in kaksakin Jeova a Mwen natul, Messaia inge. Tusruktu, sie me asor meyen met puspus in len ingo elos tia sang kaksak nu sin God. Elos etu la Jisus el supweyukme sin God, tusruktu elos sangeng sin met kol puspus lun alu inge. Tusruktu, oasr sie u lun met elos kaskas ke pulaik. Ya kom etu su met puspus inge? Baibel el fwak: “A ke met tol fulat a met sim elos liye ma sakuruk su [Jesus] el oru, a tulik su wowoyuk in tempel a fwak: ‘Molikutla, kut pre, Mwen natul Devid!’ elos mulat a fwak nu sel [Jisus]: ‘Ya kom long ma elos inge fwak?’ ”—Mattu 21:15, 16, NW; Jon 12:42.
13 Met tol fulat puspus inge elos lungse Jisus elan akmisye tulik mokul puspus su sang kaksak nu sel. Ya Jisus el sapkin tulik mokul puspus inge in misla? Mo el tia akmisyelos. Jesus el fwak nu sin met tol puspus: “Aok. Ya komwos tiana rid ma inge: ‘Liki oalin tulik srisrik a tulik fwusr’ kom oakiye ku? Kalem la, Jisus a Papa tumal elos insemwomwo ke kas in kaksak lun tulik mokul puspus inge. Tulik puspus inge elos oru ma su enenu in orek sin met matu puspus in pal ingo. Ke nunak lun tulik inge nukemwa, elos kalem ke ma elos liye ka. Elos liye mokul inge ke el orala ma sakuruk puspus, el kaskas wi pulaik a lalalfongi, a el akkalemye lungse paye nu sin God a nu sin metu. El pa met se su el akkalemye tari, “Mwen natul Devid,” Messaia se su mwoleyukla. Tulik srisrik inge akinsemwomwoyeyuk ke lalalfongi lalos, a oasr pa pal mwomwo lalos in akpayeye kas palu.—Sam 8:2.
14. Fuka me sang puspus su oasr yurin met fwusr oralos in fwal in kaksakin God?
14 Mea kut ku in lotela ke me pupulyuk puspus inge? Me lutlut ka pa fwinne tulik srisrik elos ku in sang kaksak nu sin Jeova ke inkanek mwomwo. Oasr yurolos ku inge in liye ma paye ke inkanek mwo a fusrasr, paenang elos ku in akkalemye lalalfongi lalos ke inse paye a ke oiya lun kaifweang. Oasr pa yurolos me sang inge su akkalemyeyuk in Soakas 20:29: “Mwolanu lun met fwusr ku lalos.” Aok, met fwusr oasr yurumwos ku su God el sot nu sumwos, pa inge ma mwo lomwos su komwos ku in orekmakin in kaksakin Jeova God. Fuka komwos ku in orekmakin mwo me sang inge?
Fuka Kom Ku In Sang Kaksak Nu Sin Jeova?
15. In sang kaksak nu sin Jeova ke inkanek mwo, nunak fuka eneneyuk?
15 Orekma mwo in sang kaksak nu sin God tuku ke insie. Kom tia ku in kaksakin Jeova ke inkanek mwo kom fwin oru ma inge mukena meyen kutu met elos lungse kom in oru ma inge. Esam, masap su yok emeet pa: “Kom fwa lungse Jeova God lom ke insiom kemwa, a ke ngunum kemwa, a ke nunkom kemwa.” (Mattu 22:37) Ya kom sifwana etu Jeova ke inkanek lun lutlut lom sifwana ke Kas lal? Fwako mwo ke orekma inge in lutlut ke Kas lun God pa kom ku in akkeye lungse lom nu sin Jeova. Ke pal se kom orala tari niyen sun lom ku nunak lom kalem a fukoko, na kom akola tari in sang kaksak nu sin Jeova ke inkanek mwomwo.
16, 17. Fuka oiya mwo el ku in sang kasru nu ke orekma in kaksakin Jeova? Sang me pupulyuk.
16 Inge, meet liki kom nunku ke ma kom fwa fwak, nunku la fuka kom e fwa akkalemye orekma lom. Fwin mutan Israel fwusr ke len lal Elaisa el akkalemye oiya koluk pal nukemwa, wangin sunak, ku el tia paye ku el seoaru, ya kom nunku mu met Syria su oana leum lal elos fwa long kas lal ke met palu lun Jeova? Saap elos tia. Ke inkanek sepana inge, metu elos long kas lom elos fwin liye kom la kom akkalemye sunak, paye, a oiya mwomwo. (Rom 2:21) Nunku ke sie me pupulyuk.
17 Mutan fwusr se su yea 11 matwel in an Portugal el sun ma upa ke loom lutlut ke pal in akfulatye holidays ku len in akfulat su ku in kunausla nunak ku pulakin lal su el etu tari ka ke akwuk lun Baibel. El aketeye ke inkanek kulang nu sin met luti lal la efu ku el enenu in tia wi ke me akfulat, tusruktu met luti lal el kaskas koluk nu sel. Tok, met luti sa el srike ke pal puspus in akmwekinyel, akkolukye alu lal. Fwinne oinge, mutan se inge el tia fuleak a el srakna akkalemye oiya mwo nu sel. Yea puspus somla, sister fwusr inge el oru orekma in kulansap lal oana sie regular pioneer, sie met orekma su orekmakin ao 70 ke kais sie malem. Ke sie toeni lulap, el liye met puspus su eis baptais a el akilen sie selos. Mutan se su baptaisla inge pa met luti lal ke loom lutlut! Tokin elos asruila a tung sie sin sie, mutan se inge el fwak nu sin sister fwusr se inge la el tia na ku in mulkunla oiya mwomwo lun sister se inge. Oasr sie Met Lo el sang ma lo nu sel, a met luti se inge el srumon ke oiya mwomwo lun tulik lutlut se lal inge in pal meeta. Fwako mwo ke orekma inge pa, sie lutlut ke Baibel mutamwauk in orek nu sel, a mutan luti se inge el eis ma paye lun Baibel. Oana ma kut liye ke me pupulyuk inge, oiya lom ku in orala inkanek mwomwo in kaksakin Jeova!
18. Mea sie met fwusr el ku in oru fwin el tufwal in mutamwauk in sramsram ke Baibel a ke Jeova God?
18 Ya kom pula kutu pal mu upa nu sum in sramsramkin ma kom lalalfongi nu sin tulik lutlut su wi kom ke loom lutlut? Met fwusr puspus pulakin pa oiya inge. Tusruktu kom ku in oru inkanek nu sin tulik lutlut puspus tu elos fwa ku in siyuk ke lalalfongi lom. Ke sie me pupulyuk, fwin ku, efu ku kom tia us me rid puspus su tuku ke Baibel a ridi ma inge ke pal in mongle ke infwulwen len ku kutupa pal su kom ku in oru ma inge? Tulik lutlut su wi kom elos ku in siyuk la mea kom ridi an. In sang me top a srumon nu selos ma kom liye mu akinsemwomwoye ku akkeye kom ke sie me lutlut ku ke sie buk su kom ridi, kom ku in liye la kom a tulik lutlut ma wi kom elos ku in engankin pa me sramsram mwomwo inge. Esam in siyuk kusensiyuk puspus, kom in mu ku in liye la mea tulik lutlut su wi kom el lalalfongi ka. Loang akmwoye ke el kaskas, a akkalemye nu sel ma kom lotela tari ke Baibel. Met fwusr puspus elos sang kaksak nu sin Jeova ke loom lutlut. Orekma inge oralos in pulakin insemwomwo yok a kasru met puspus in etu Jeova.
19. Fuka met fwusr elos ku in kapkapek ke orekma in luti lalos ke sie loom nu ke sie loom?
19 Orekma in luti ke sie loom nu ke sie loom pa sie inkanek su arulanu mwo in kaksakin Jeova. Kom fwin soenna wi ke orekma inge, efu ku kom tia oakiye niyen sun lom in wi ka? Kom fwin wi ke pal inge, ya kom lungse in oakiye niyen sun puspus in kasre kom sifwana? Ke sie me pupulyuk, fwal kom in suk la inkanek fuka kom ku in akmwoye me sramsram lom a tia in orekmakin me sramsram oana sie pal nukemwa. Kom ku in siyuk sin papa a nine kiyom a sin met lili puspus su oasr tari experience lalos in kasre kom ke oiya inge. Suk in lotela la fuka kom ku in orekmakin yok Baibel, in oru return visit mwomwo, a in mutamwauk sie lutlut ke Baibel. (1 Timote 4:15) Ke kom orekmakin pal yok lom in kaksakin Jeova ke inkanek puspus inge, kom fwa arulanu kapkapek ke orekma inge, a kom fwa insemwomwokin yok orekma in luti lom.
Nge Kom Enenu in Mutamwauk in Kaksakin Jeova?
20. Efu ku tia enenu nu sin met fwusr in pulakin mu elos arulanu fwusrla in kaksakin Jeova?
20 Ke kusensiyuk tolu ke me lutlut inge, me top nu ke kusensiyuk safla inge pa fusrasr emeet. Loang nu ke me top sumwos lun Baibel: “Esam pa Met Orekomla in len in fwusr lom.” (Ekklisiastis 12:1) Aok, pal in mutamwauk in kaksakin Jeova pa ingena. Saap kom fwak pal nukemwa: “Nga srakna tulik fwusr in sang kaksak nu sin Jeova. Nga srakna nukin ma nga fwa oru. Nga enenu in sano ne ke Nga matula.” Oasr pa tulik fwusr puspus pula ma inge a tia tufwana kom pa met fwusr se meet su fwak ma inge. Ke sie me pupulyuk, oasr sie met fwusr su pangpang Jeremaia el fwak nu sin Jeova kas inge: “We, Leum Jeova! Liye nga tia etu fuka in kaskas, tu nga tulik.” Jeova el sifwil pa fwak nu sel la el tia enenu in sangeng. (Jeremaia 1:6, 7) Ke inkanek oapana inge, kut tia enenu in sangeng kut fwin wi ke orekma in kaksakin Jeova. Jeova el ku in kasre kut a el ku in akwanginyela me sensen nu kemwa su sun kut.—Sam 118:6.
21, 22. Efu ku met fwusr nukemwa su kaksakin Jeova elos pupulyukkinyuk nu ke aunfong, a efu ku me pupulyuk inge el sie me akkeye?
21 Kut kaifwe met fwusr nukemwa, tu komwos in: Tia pulakin sangeng ku alolo in sang kaksak nu sin Jeova! Inge ke komwos srakna fwusr pa inge pal mwo in wi ke orekma saok emeet inge su orek fwin fwalu nufon misenge. Kom fwin wi oru orekma inge, kom ekla sie ma saok a mwolena, ke sou lulap lun ma moul nukemwa in kosrao a fwin fwalu su sang kaksak nu sin Jeova. Jeova el insemwomwo meyen kom wi ke sou lulap inge. Loang mwo nu ke kas inge su met sim lun sam el fwak nu sin Jeova: “Met sram elos insemwomwo in esaloswot sifwana in len in ku lom. In oasku lun mutal, liki insien lututeng, oasr yurum len in met fwusr lom oanu aunfong.”—Sam 110:3.
22 Aunfong su arulanu saromromelik ke kalem lun lututeng el akkalemye sie pitsa mwolena, ya tia oinge? Elos me akinsemwomwoye, saromrom, a paye kut tia ku in oekla ma inge meyen arulanu pusla. Pa inge oiya su Jeova el liye ke met fwusr nukemwa su oaru in kaksakin Jeova ke pal in ma upa inge. Paye la, sulela lom in kaksakin Jeova oru insiyel in engan. (Sam 27:11) Ke ma inge, met fwusr nukemwa komwos kaksakin Jeova ke inkanek nukemwa.
Kom E Topuk Fuka?
• Mea kutu sripe mwomwo nu ke orekma in kaksakin Jeova?
• Mea kutu me pupulyuk in Baibel su akkalemye la met fwusr elos ku in kaksakin Jeova ke inkanek mwo?
• Fuka met fwusr elos ku in kaksakin Jeova ke pal inge?
• Nge met fwusr elos enenu in mutamwauk in sang kaksak nu sin Jeova, a efu?
[Pictures on page 25]
Fwin met kawuk se lom el sumat in oru orekma puspus, ya kom fwa tia akkalemye ma inge nu sin met puspus?
[Picture on page 27]
Tulik lutlut puspus su wi kom saap elos insemwomwokin lalalfongi lom
[Picture on page 28]
Kom fwin lungse in kapkapek ke orekma in luti lom, siyuk ke me kasru sin Met Lo su oasr experience yok ke orekma inge