“Leum, Luti Nu Sesr In Pre”

“Sie sin met tuma lutlut el fwak nu sel: ‘Leum, luti nu sesr in pre.’ ”​—LUK 11:1.

1. Efu ku sie sin met tuma lutlut lun Jisus el siyuk sel in lotel fuka in pre?

Sie pal in yiu 32 C.E., sie sin met tuma lutlut lun Jisus el Liyel ke El pre. El tia ku in long ma Jisus el fwak ke pre a siyuk sin Papa tumal, saap el pre in misla. Fwinne ou inge, ke pal se Jisus el tari, met tuma lutlut inge el fwak nu sel: “Leum, luti nu sesr in pre.” (Luk 11:1) Mea purakak insiel in siyuk ou inge? Pre el sie ip saok lun moul a alu lun met Ju. Koanon Ma Simusla lun Hibru pa pre puspis ke buk lun Sam a oasr pa ma saye. Ke ma inge, met tuma lutlut inge el tia siyuk in eis lutlut ke ma el tia etu ku ke ma se su el sonna oru. Wangin alollo el arulanu etu ke pre mwosounkas lun met kol lun alu lun met Ju. Tusruktu ke pal inge, el liye inkanek lun Jisus in pre, a el akilen la oasr ma tia oanu sie su arulanu yok inmaslon pre mwosounkas mutal lun met rabai puspis a ke inkanek lun Jisus in pre.​—Mattu 6:5-8.

2. (a) Mea ma inge su akkalemye la Jisus el tia sapkin nu sesr in kalweni na pal nu kemwa kas nu kemwa su el fwak ke pre su el ase nu sesr oanu me srikasrak se? (b) Efu kut arulanu lungse in etu fuka in pre?

² Malem 18 kutu somla meet liki pal inge, ke Me Sramsram lal Fwin Eol, Jisus el sang nu sin met tuma lutlut lal sie me srikasrak su elos ku in orekmakin ke pal in pre lalos. (Mattu 6:9-13) Kalem la met tuma lutlut inge el wangin ke pal inge, ke ma inge Jisus el sifwil kalweni ke kulang me lutlut yok nu kemwa ke pre inge. Aok el tia kalweni ma inge ke kas nu ke kas, ma inge akkalemye la el tia sang nu sel sie kain in me srikasrak ke pre su el enenu in kalweni na pal nu kemwa fwinne el tia nunku ke kalme. (Luk 11:1-4) Oanu met tuma lutlut inge meet su tia akkalemyeyuk el, kut nu kemwa enenu pa in eis lutlut fuka in pre meyen ma inge ku in kasru kut in futoto nu sin Jeova. Ke ma inge, lela kut in tuni pre inge su el ase nu sesr oanu me srikasrak se, oanu ma met sap Mattu el simusla. Koanon pre inge pa me siyuk itkosr, ma tolu ka el sramsram ke akmwuk lun God a ma akosr ka el sramsram ke me enenu lun sie met ke ma lun ngun a ma lun ikwe. Ke me lutlut inge, kut e fwa tuni me siyuk tolu meet.

Sie Papa Su Lungse

3, 4. Ke pal se kut pang Jeova “Papa tumasr” mea ma inge lungse in akkalemye?

³ Ke mutamwauk me, Jisus el akkalemye la pre lasr nu kemwa enenu in akkalemye sie moul futoto wikin sunak nu sin Jeova. Ke pal se el sramsram yok ke met tuma lutlut lal su tukeni nu sie futoto sel sisken fwin eol, Jisus el fwak nu selos in pang nu sin Jeova oanu “Papa tumalos in kosrao.” (Mattu 6:9) Fwal nu ke sie scholar, fwin Jisus el orekmakin kas Hibru ku kas Aramaic pengpeng, kas se ma el orekmakin ke “Papa” pa fwal nu ke pang lun sie awowo nu sin papa tumal, ‘sie kain in kas lun sie tulik.’ Paenang in pang nu sin Jeova oanu “Papa tumasr” ma inge akkalemye sie moul futoto lasr nu sel wikin lalalfongi.

⁴ Ke pal se kut fwak “Papa tumasr,” kut akilen la kut wi ke sie sou lulap lun mokul a mutan su akilen Jeova oanu Sie Met Sang Moul. (Isaia 64:8; Orekma 17:24, 28) Met Kristian nu kemwa su ngun mutal el moswela elos inge nu kemwa ma nutla oanu “mwen nutin God,” a elos inge nu kemwa ku in “pang nu sel: ‘Abba, Papa!’ ” (Rom 8:14, 15) Million puspis sin met elos ekla met asrouki oaru lalos. Elos inge nu kemwa mwolela tari moul lalos nu sin Jeova a sang akul nu ke mwolela lalos ke inkanek lun baptais ke kof. “Sip ngie” inge nu kemwa ku in osun pa nu sin Jeova in en Jisus a elos ku in pang nu sel “Papa tumasr.” (Jon 10:16; 14:6) Kut ku in osun nu sin Papa tumasr in kosrao pal nu kemwa ke inkanek lun pre in kaksakunal, in sang kulo nu sel ke ma mwomwo nu kemwa su el ase nu sesr, a in sisla me toasr lasr nu kemwa nu sel a lalalfongi la el kurungin kut.​—Filippai 4:6, 7; 1 Piter 5:6, 7.

Lungse Nu Ke En Jeova

5. Mea me siyuk se meet ke pre su el ase nu sesr oanu me srikasrak se, a efu ku ma inge arulanu sumwos?

⁵ Me siyuk se meet pa ma yok emeet. El fwak: “Em in akmutalyeyuk.” (Mattu 6:9) Aok, in akmutalye en Jeova pa enenu in yok emeet nu sesr meyen kut lungse el a kut srunga kas in akkoluk nu kemwa su elos filiye nu ke el. Orekma in lain lal Setan a ke pal se el purakak seanyen se meet in seakos Jeova God ma inge arulanu akkolukye el a ma inge sang alollo ke inkanek in kol lun God in kosrao a fwalu. (Genesis 3:1-6) Sayen ma inge, ke lusen century puspis, en Jeova akkolukyeyuk ke sripen orekma koluk nu kemwa a me luti kikiap lun met nu kemwa su fwakak mu elos aolul.

6. Mea ma inge su kut tia oru kut fwin siyuk ke pre in akmutalye en Jeova?

⁶ Pre lasr in akmutalye en Jeova el akkalemye ke an se ma kut sulela in tu ke me sramsram lulap ke sumwos lal in kol in kosrao a fwalu​—aok kut akkeye na paye sumwos lun Jeova in kol in kosrao a fwalu. Jeova el lungse kosrao a fwalu in oanu me muta lun ma orekla lalmetmet nu kemwa su lungse a insemwomwo in akpusisilyelos sifwanu ke kolyuk lal meyen elos lungse el a lungse ma nu kemwa su aoliyen enel. (1 Kronikel 29:10-13; Sam 8:1; 148:13) Lungse lasr nu ke en Jeova ku in kasre kut in fwasr liki kutena orekma su ku in akfokfokye e mutal inge. (Ezekiel 36:20, 21; Rom 2:21-24) Ke sripen misla in kosrao a fwalu a met nu kemwa su muta ka oakiyuki nu ke orekma in akmutalye en Jeova a pusisel nu ke kolyuk lal, paenang pre lasr inge “em in akmutalyeyuk” pa sie inkanek in akkalemye lalafongi la akmwuk nu kemwa lun Jeova e fwa akpayeye ke mwolanu a kaksak lal.​—Ezekiel 38:23.

Togusrai Su Kut Siyuk ke Pre

7, 8. (a) Mea Togusrai se inge su Jisus el luti nu sesr in siyuk ke pre? (b) Mea kut ku in lotela ke Togusrai inge ke buk lun Daniel a Fwakyuk?

⁷ Me siyuk akluo ke pre su el ase nu sesr oanu me srikasrak se pa: “Togusrai lom in tuku.” (Mattu 6:10) Me siyuk inge arulanu futoto ke me siyuk se meet. Kofwen orekma lun Jeova in akmutalye e mutal lal pa Togusrai ye koko lun Messaia, pa inge guferment lal in kosrao, su Mmwen nutul, Jisus Kraist, pa Togusra su pakiyuki. (Sam 2:1-9) Kas palu lun Daniel el akkalemye Togusra lun Messaia oanu “sie eot” tufwala “fwin eol.” (Daniel 2:34, 35, 44, 45) Eol se inge el aoliyen kolyuk lun Jeova in kosrao a fwalu, ke ma inge, eot se inge su lumeyuk nu ke Togusrai, pa inkanek sasu in akkalemye kolyuk lun Jeova in kosrao a fwalu. Ke kas palu se inge, eot se inge el ‘ekla soko eol lulap, a nekla fwalu nu fon,’ ma inge akkalemye la Togusrai lun Messaia el aoliyen kolyuk mutal lun God su kol fwalu nu fon.

⁸ Met nu kemwa su akola in welul Kraist ke Togusrai guferment inge pa 144,000, elos inge “moliyukla liki metu” a elos fwa met tol a togusra lun Kraist. (Fwakyuk 5:9, 10; 14:1-4; 20:6) Daniel el sramsram ke met inge nu kemwa oanu “met mwo sran el su Fulat Liki Nu Kemwa,” elos su akola in welul Kraist oanu Sifwelos, elos akola in eis “togusrai a mwal, a pengpeng lun Togusrai ye kosrao . . . Togusrai lal sie togusrai su on ma patpat, a fwal nu kemwa fwa kulansap a aksol.” (Daniel 7:13, 14, 18, 27) Pa inge aketeye sumwos ke guferment in kosrao su Kraist el luti nu sin met tuma lutlut lal in siyuk ke pre.

Efu Kut Srakna Enenu in Siyuk ke Pre ke Tuku lun Togusrai?

9. Efu ku arulanu fwal nu sesr in siyuk ke pre ke tuku lun Togusrai lun God?

⁹ Ke pre lal su el ase nu sesr oanu me srikasrak se, Kraist el luti nu sesr in pre a siyuk ke tuku lun Togusrai lun God inge. Kas palu lun Baibel akkalemye la Togusrai lun Messaia oakiyuki tari in kosrao in yiu 1914.a Ke ma inge, ya fwal kut fwin tafwela in siyuk ke pre ke “tuku” lun Togusrai inge? Aok, meyen ke kas palu lun Daniel, eot se su aoliyen Togusrai lun Messaia el akola in sun guferment nu kemwa lun politic su aoliyen me srulela lulap. Eot se inge su apkurun in tuku a sun me srulela inge, el e kunausela me srulela se inge a musalsalla. Kas palu lun Daniel el fwak: “Togusrai se inge fwa tia filiye mwal ka nu sin siepa mutanfwal. A a musalsallu a kunausla togusrai inge nu kemwa, a a fwa tu ma patpat.”​—Daniel 2:44.

10. Efu kut arulanu lungse Togusrai lun God in tuku?

¹⁰ Kut lungse na paye Togusrai lun God in tuku in kunausla akmwuk koluk lun Setan meyen ma inge ku in kalmekin la e mutal lun Jeova e fwa akmutalyeyuk a met nu kemwa su lain kolyuk mutal lun Jeova e fwa wanginla. Kut kaifweung na paye in pre: “Togusrai lom in tuku,” a panu met sap Jon, kut fwak pa: “Amen! Fwasru, Leum Jisus.” (Fwakyuk 22:20) Aok, lela Jisus in tuku in akmutalye en Jeova a in akkeye sumwos Lal in kol, fwin ou inge, kas lun met sim lun Sam ku in akpayeye: “Tu elos fwa ku in etu tu kom mukena, su Em pangpang Jeova, kom el su Fulatlanu fwin fwalu nu fon.”​—Sam 83:18.

“Ma Lungse Lom in Orek”

11, 12. (a) Mea kut siyuk ke pal se kut pre ke ma lungse lun God “in kosrao in orek pa fwin fwalu”? (b) Mea pa kutu kalme ke pal se kut siyuk ke pre ke ma lungse lun God in orek?

¹¹ Tokin ma inge Jisus el luti nu sin met tuma lutlut lal in pre: “Ma lungse lom in orek, oanu in kosrao, ou inge fwin fwalu.” (Mattu 6:10) Kosrao a fwalu orekla ke sripen lungse lun Jeova. Ma orekla kulanu in kosrao elos fwak: “Fwal nu sum, Jeova God lasr, tu kom in eis mwolanu a kaksak a ku, tu kom orala ma nu kemwa a ke lungse lom elos on, a orekla tari.” (Fwakyuk 4:11) Oasr akmwuk lun Jeova ke “ma on lung, a ke ma on fwalu.” (Efesus 1:8-10) Ke kut pre ke ma lungse lun God in orek, ke ma paye kut siyuk sin Jeova in akpayeye akmwuk lal. Sayen ma inge, kut akkalemye pa la kut lungse na paye in liye la ma lungse mutal pa akpayeye in kosrao a fwalu.

¹² Ke inkanek lun pre inge kut ouyepa akkalemye insemwomwo lasr in akfwalye moul lasr nu ke ma lungse lun Jeova. Jisus el fwak: “Me mongo nak in oru ma lungse lal su supeyume, a in aksafyela orekma lal.” (Jon 4:34) Oanu Jisus, kut nu kemwa su Kristian mwoleyukla tari, kut arulanu insemwomwo in oru ma lungse lun God. Lungse lasr nu sin Jeova a nu sin Mwen nutul mokle kut in tia sifwil muta “in orekma koluk lun met, a nu ke lungse lun God.” (1 Piter 4:1, 2; 2 Korint 5:14, 15) Kut kaifweung in tia oru kutena ma su kut etu la tia fwal nu ke ma lungse lun Jeova. (1 Tessalonika 4:3-5) Ke pal se kut molela pal ke ridi Baibel a lutlut, kut “tafwela in etu mea lungse lun Jeova,” wikin ma inge pa akesrui mwo ke orekma in luti ke “peng mwo lun togusrai.”​—Efesus 5:15-17; Mattu 24:14.

Ma Lungse lun Jeova in Kosrao

13. Fuka ma lungse lun God akpayeyuk tari meet liki Setan el lainul?

¹³ Ma lungse lun Jeova in kosrao akpayeye tari meet liki sie sin ma orekla nutul in ngun el lainul a ekla nu ke Setan. Buk lun Soakas el akkalemye Mwen se meet nutin God oanu sie met lalmetmet. Ma inge akkalemye la ke lusen yiu puspis su kut tia ku in oekla, Mwen siefwunnu isusla nutin God el “engun pal e nu kemwa ye mutal,” el insemwomwo in oru ma lungse lun Papa tumal. Ke saflaiye, el ekla oanu sie “met orekma usnguk” ke pal in orekla lun ma puspis “in kosrao a fwalu, ma liyeyuk a ma koflanu liyeyuk.” (Soakas 8:22-31; Kolosse 1:15-17) Jeova el orekmakin Jisus oanu Kas, ku Met Kaskas lal.​—Jon 1:1-3.

14. Mea kut ku in lotela ke Sam 103 ke inkanek lun lipufon in akpayeye ma lungse lun Jeova in kosrao?

¹⁴ Met sim lun Sam el akkalemye la kolyuk lun Jeova el fulat liki ma orekla lal nu kemwa a lipufon puspis in kosrao elos porongo kas in luti lal a ma el sapkin nu selos nu kemwa in oru. Kut ku in rid: “Jeova el oakiye ku me muta lal in kosrao; a togusrai lal leum fwin ma nu kemwa. Akengunye Jeova, komwos lipufon lal, su kui in ku, su akpayeye kas lal, in porongo pusren kas lal. Akengunye Jeova, komwos nu kemwa un met lal, komwos met orekma lal, su oru ma lungse lal. Akengunye Jeova, komwos nu kemwa orekma lal, in an nu kemwa el leum fwe.”​—Sam 103:19-22.

15. Ke pal se Jisus el eis ku lal in Togusrai lal ma inge el orekma fuka ke ma lungse lun God in kosrao?

¹⁵ Tokin orekma in lain lal, Setan el srakna ku in som nu in kosrao oanu buk lun Job el akkalemye. (Job 1:6-12; 2:1-7) Tusruktu, buk lun Fwakyuk el palye la pal se e fwa tuku la Setan a dimon lal elos e fwa sisilosla liki in kosrao me. Pal inge el tuku tokin Jisus Kraist el eis ku lal in Togusrai in yiu 1914. Mutamwauk ke pal inge, wanginla an lun met koluk inge nu kemwa in kosrao. Elos sisila nu fwalu. (Fwakyuk 12:7-12) Wanginla kas in akukuin su ku in sifwil sikyuk in kosrao, pusren kas in kaksak mukena nu sin “Lam,” Jisus Kraist, a kas in kaksak pusisel mukena nu sin Jeova pa ku in longyuk we. (Fwakyuk 4:9-11) Paye ma lungse lun Jeova el akpayeye tari in kosrao.

Ma Lungse lun Jeova Fwin Fwalu

16. Fuka pre se su el ase nu sesr oanu me srikasrak se lain me luti lun Kristendom ke fwinsrak lun metu?

¹⁶ Alu nu kemwa lun Kristendom elos tia lela fwalu in wi ke akmwuk lun God, meyen elos fwak la met mwo nu kemwa elos som nu in kosrao. Tusruktu, Jisus el luti nu sesr in pre: “Togusrai lom in tuku. Ma lungse lom in orek, oanu in kosrao, ou inge fwin fwalu.” (Mattu 6:10) Ya kut ku in fwak fwinne ke mwemwe, la ma lungse lun Jeova el akpayeye tari misinge nu fwin fwalu su arulanu nenela ke orekma silolel, nununku sesumwos, mas, a mise? Mo, tia ku in ou inge! Ke ma inge, kut enenu in tafwela in siyuk ke pre la, ma lungse lun God in orek fwin fwalu, fwal nu ke mwolela su met sap Piter el simusla: “A oanu mwoleuang lal, kut sano kosrao sasu, [Togusrai guferment lun Messaia ye koko lun Kraist] a fwal sasu, [un met sumwosmwos] yen sumwomwos on we.”​—2 Piter 3:13.

17. Mea akmwuk lun Jeova nu fwalu?

¹⁷ Oasr akmwuk lun Jeova ke pal se el orala fwalu. El moklel met palu Isaia in simusla: “Tu ou inge Jeova su Orala kosrao, el su Lumala fwalu a orala, Su oakiye a tia orala yen mesis, Su lumala tu met in muta we: ‘Nga Jeova, a wangin siepa.’ ” (Isaia 45:18) God el filiye seanyen se meet ke sie imae paredais a el sapkin nu selos: “Komwos in kapek a yokelik a nekla fwalu, a kutangla.” (Genesis 1:27, 28; 2:15) Arulanu kalem, akmwuk lun Met Orekutla ke fwalu se inge pa met sumwosmwos in muta ka, met su pusisel ke kolyuk lun Jeova a in moul ma patpat ke sie Paredais su Kraist el mwolela.​—Sam 37:11, 29; Luk 23:43.

18, 19. (a) Mea ma inge su enenu in orek meet liki ma lungse lun God e fwa orek fwin fwalu? (b) Mea kutu koanon pre lun Jisus el ase nu sesr oanu me srikasrak se e fwa sramsramkinyuk ke me lutlut toko?

¹⁸ Ma lungse lun Jeova ke fwalu se inge tia ku in akpayeye fwin oasr met koluk su muta ka su lain kolyuk lal. Ke pal se el orekmakin un met meun lal su tia ku in liyeyuk su muta ye koko lun Kraist, God el e fwa “kunauselosla su kunausla fwalu.” Akmwuk koluk nu kemwa lal Setan, alu kikiap lal, politics koluk lal, akmwuk rapku lun business, a un met meun nu kemwa, e fwa wanginla ma patpat. (Fwakyuk 11:18; 18:21; 19:1, 2, 11-18) Sumwos lun Jeova in kol e fwa akkeyeyuk a el akmutalyeyuk. Ma inge nu kemwa kut siyuk ke pre ke pal se kut fwak: “Papa tumasr su in kosrao, em in akmutalyeyuk. Togusrai lom in tuku. Ma lungse lom in orek, oanu in kosrao, ou inge fwwin fwalu.”​—Mattu 6:9, 10.

¹⁹ Tusruktu, ke pre lal su el ase nu sesr oanu me srikasrak se, Jisus el akkalemye la kut ku in pre a siyuk pa ke me enenu lasr sifwanu. Kutu koanon inge ke me luti lal ke pre e fwa sramsramkinyuk ke me lutlut toko.

[Footnote]

Ke Inkanek lun Kalweni

• Efu ku arulanu fwal nu sesr in pang nu sin Jeova “Papa tumasr”?

• Efu ku arulanu yok sripe nu sesr in pre ke orekma in akmutalye en Jeova?

• Efu kut pre ke Togusrai lun God in tuku?

• Mea kalme ke pal se kut pre ke ma lungse lun God in orek fwin fwalu oanu in kosrao?

[Picture on page 19]

Pre lun Jisus el siena liki pre mwosounkas lun met Farisi

[Picture on page 20]

Met Kristian nu kemwa elos pre ke Togusrai lun God in tuku, el in akmutalyeyuk, a ma lungse lal in orek