Mutan Kristian Oaru—ma Saok Su Alu Nu Sin God
“Kulang me kutasrik, a oasku ma losrongten; a sie mutan su sangeng sin Jeova, el fwa kaksakinyuk.”—SOAKAS 31:30.
1. Fuka nunuk lun Jeova ke ma kato fwin srikeyuk nu ke ma fwalu se inge nunku?
FWAL se inge arulanu loang yok ke likin mano, yokna kut fwin sramsram ke mutan. Tusruktu, Jeova el loang yok nu ke ma lu, su ku in oru in arulanu kato ke pal in matou. (Soakas 16:31) Ke ma inge, Baibel el kaifwe nu sin mutan: “A yun lomwos in tia yun lik ke purakla aunsuf, a me mwalmwal orek ke gold, ku akpusye nuknuk, a lela komwos in sifwanu yunala insiomwos, ke nuknuk su e tia kulamwi ke fulpap a ngun okak, su yoklanu molo ye mutun God.”—1 Piter 3:3, 4.
2, 3. Fuka mutan puspis elos sang kasru ke kapkapek lun peng mwo in century se meet, a fuka ma inge akkalemyeyuk ke kas palu?
2 Kain in ngun mwomwo inge akkalemyeyuk sin mutan puspis in Baibel. In century se meet, kutu mutan inge oasr kunokon in kulansap nu sin Jisus a met sap lal. (Luk 8:1-3) Tok, mutan Kristian elos ekla met luti moniyuk; kutu selos sang kasru yok nu sin mokul Kristian puspis su kol, wekunang met sap Poul; a kutu selos akkalemye kulang mwolanu, ke pal se elos akmwesasye loom selos ke tukeni lun congregation.
3 Me akpayeye su akkalemye la Jeova el orekmakin mutan ke inkanek sakuruk in akpayeye akmwuk lal akkalemyeyuk meet in Baibel. Ke sie me pupulyuk, Joel 2:28, 29 el palye la mokul a mutan, met fwusr a met matu, elos fwa eis ngun mutal a akesrui ke orekma in sulkakin Togusrai. Kas palu se inge el mutamwauk in akpayeye in Pentecost 33 C.E. (Orekma 2:1-4, 16-18) Kutu sin mutan su akmusrala ke ngun mutal lun God elos eis me sang sakuruk, kain in me sang inge pa elos ku in palye. (Orekma 21:8, 9) Ke moniyuk lalos ke orekma lun forfor, u lulap inge, lun met meun in ngun orekla sin sister oaru puspis elos sang kasru yok ke kapkapek lun pisen met Kristian in century se meet. Aok, akpurun nu ke 60 C.E., met sap Poul el simusla la peng mwo el “lutiyuk nu sin met e nu kemwa ye kosrao.”—Kolosse 1:23.
Kaksakinelos ke Pulaik, Moniyuk, a Kulang Lalos
4. Efu ku oasr sripe mwomwo lal Poul in sang kaksak nu sin mutan puspis ke congregation lun met Kristian in century se meet?
4 Oanu sie me srikasrak, met sap Poul el arulanu sang kulo ke orekma lun forfor su orekla sin kutu mutan—oanu met liang Kristian ke len inge elos aksaokye orekma lun forfor su orekla sin mutan moniyuk puspis. Kutu nu ke enen mutan inge su Poul el srukak pa “Traifina a Traifosa, su orekma nu sin Leum,” a “Persis met kulu, su orekma yok in Leum.” (Rom 16:12) Euodia a Sintike, Poul el simusla, “elos wi yu orekma in mwosasu.” (Filippai 4:2, 3) Priska, wikin mokul tumal inge, Akuila, elos wi pa Poul ke orekma. Priska a Akuila, elos “likiye kaiwelos” kel Poul, paenang ma inge moklel in simusla: “Tia Nga mukena sang kulo nu selos a ouyepa surs nu kemwa lun met Pegan.”—Rom 16:3, 4; Acts 18:2.
5, 6. Ke inkanek puspis fuka Prisila el oakiye sie me srikasrak mwo nu sin sister nu kemwa ke len inge?
5 Mea sripen moniyuk a pulaik lal Prisila? Me sramsram su akkalemyeyuk efu ku el moniyuk a pulaik ku in liyeyuk in Orekma 18:24-26, ke fus se inge kut ku in rid la el akesrui nu sin mokul tumal ke pal se el kasrel Apolus, su lalmetmet in kas, ke inkanek sumwos lun ma paye. Ke ma inge, arulanu kalem la Prisila el sie met lutlut mwo ke Kas lun God a ke me luti lun met sap. Ke sripe se inge, el akkapye sie kain in oiye mwo su kasrel in ekla met saok ye mutun God, nu sin mokul tumal a nu ke congregation in pal meeta. Oupanu ma saok ke len inge pa mutan Kristian puspis su moniyuk in lutlut ke Baibel a eis me mongo in ngun su Jeova el sang nu selos ke inkanek lun “met kulansap oaru.”—Luk 12:42.
6 Akuila a Prisila elos arulanu kulang. Poul el muta in loom selos ke pal se ma el welulos orekma, tu orekma lalos in oru loom nuknuku in an Korint. (Orekma 18:1-3) Ke pal se seanyen se inge el som nu Efesus a tok in an Rom, elos tafwela in akkalemye kulang lun met Kristian, elos akmwesasye loom selos ke meeting lun congregation. (Orekma 18:18, 19; 1 Korint 16:8, 19) Nimfas a Mary nine kiel Jon Mark elos akmwesasye pa loom selos ke meeting lun congregation.—Orekma 12:12; Kolosse 4:15.
Sie Ma Saok ke Len Inge
7, 8. Kain in record mwomwo fuka ke orekma mutal oasr yurin mutan Kristian puspis ke len inge, a elos ku in lalalfongi nu ke mea?
7 Oanu ma sikyuk in century se meet, mutan Kristian oaru puspis ke len inge elos wi akesrui ke akpayeye lun akmwuk lun God, yokna ke orekma in fwakak a luti. A sie record na mwomwo pa oasr ke sister puspis inge! Loang akmwoye ke me srikasrak lal Gwen, su oaru in kulansap nu sin Jeova ke lusen yiu 50 kutu nu ke pal in mise lal in yiu 2002. “Moniyuk lal Gwen oanu sie met fwakak a met luti arulanu pengpeng ke siti lasr,” pa inge ma mokul tumal el fwak. “Ke nunuk lal, oasr fwinsrak lun met nu kemwa in eis lungse a mwolela lun Jeova. Oaru lal nu sin God, ke u lal, a ke sou lasr—toeni nu ke ma inge pa kas in akkeye lal ke pal se kut asor na upa—me akkeye na paye pa inge nu sik a nu sin tulik nutik ke lusen pal in tukeni nu sie lasr nu fon. Kut arulanu asroela.” Gwen a mokul tumal elos payuk ke lusen yiu 61.
8 Siengoul tausen puspis lun mutan Kristian, met lolap a met payuk, elos kulansap oanu met kulansap pioneer a missionary, elos insemwomwo tari ke ma oasr yurolos a elos kafofo in sulkakin peng mwo lun Togusrai ke territory puspis, ke siti kafofo puspis nu ke an loeslanu fwalu. (Orekma 1:8) Pukanten selos tia nunku in oasr loom selos ku tulik nutulos meyen elos lungse in kulansap nu sin Jeova ke inkanek yok. Kutu selos akkeye mokul tumalos ke pal se elos kulansap oanu sie met fwafwasyesr, a tausen puspis sin sister elos kulansap ke Bethel homes fwin fwalu nu fon. Wangin alollo, mutan inge nu kemwa su kisekin moul lalos pa sie selos su “ma saok lun mutanfwal nu kemwa” su nekla loom sin Jeova ke mwolanu.—Haggeai 2:7.
9, 10. Fuka kutu met in sou elos akkalemye insemwomwo lalos ke me srikasrak mwo lun mutan Kristian payuk a nine kielos?
9 Paye, oasr kunokon lun mutan Kristian puspis su elos enenu in kurunganang; fwinne ou inge, elos suk meet ma lun Togusrai ke moul lalos. (Mattu 6:33) Sie sister pioneer lolap el simusla: “Ke sripen lalalfongi fukoko a me srikasrak mwo lun nine kiuk paenang Nga ekla sie regular pioneer. Paye, el pa partner na mwomwo luk oanu sie pioneer.” Sie mokul el fwak ou inge ke mutan kiel, su oasr tulik mutan limekosr nutul: “Loom sesr nasnas pal nu kemwa. Bonnie el oru ma inge fwal a tia okarkar meyen el lungse sou lasr in loang yok ke ma lun ngun. Kurungin mwomwo lal ke mokuikui lun mani lasr kasru yu in oru orekma na ke part-time ke lusen yiu 32, paenang ma inge kasre yu in orekmakin pal yok ke sou luk a ke ma lun ngun. Mutan kiuk el luti pa tulik nutusr ke ma saok su tuku ke moniyuk in oru orekma. El arulanu fwal ke kas in kaksak luk.” Ke len inge Bonnie a mokul tumal elos tukeni orekma ke world headquarters lun Met Lo lun Jeova.
10 Sie mokul el sim sie leta ke mutan kiel, su nine kien tulik ekasr su matu tari: “Oiye mwo emeet su Nga kaksakin a lungse na paye sel Susan pa lungse yok lal nu sin God, wekunang lalmetmet, pakomuta, a oaru. El pulakin pal nu kemwa la Jeova el fwal in eis ma mwo emeet pal nu kemwa su kut ku in sang nu sel—sie kain in akmwuk pa inge su el orekmakunul sifwanu oanu met kulansap lun God a sie nine.” Ke sripen kasru lun mutan se inge, paenang mokul tumal el ku in eis kunokon puspis ke ma lun ngun in congregation, el kulansap oanu met elder, pioneer, substitute circuit overseer, a member lun Hospital Liaison Committee. Arulanu yok sripe na paye kain in mutan inge nu sin mokul tumalos, nu sin met lili Kristian wielos, a yok liki nu kemwa nu sin Jeova!—Soakas 31:28, 30.
Mutan Saok Puspis Su Wangin Mokul Tumalos
11. (a) Fuka Jeova el akkalemye nunuk yok lal nu sin mutan oaru puspis, yokna nu sin mutan katinmas? (b) Mutan Kristian nu kemwa su katinmas a kutu sister oaru su wangin mokul tuma elos ku in lalalfongi nu ke mea?
11 Pal nu kemwa, Jeova el akkalemye nunuk yok lal ke insemwomwo lun mutan katinmas. (Duteronomi 27:19; Sam 68:5; Isaia 10:1, 2) El tia ekla. El tafwela in akkalemye insemwomwo tia nu sin mutan katinmas mukena a ouyepa nu sin nine puspis su wangin mokul tumalos a mutan puspis su lolap ke sripen elos sulela in oru ou inge ku ke sripen wangin mokul Kristian fwal su elos ku in payuk sa. (Malakai 3:6; Jemes 1:27) Kom fwin sie selos su oaru in kulansap nu sin Jeova fwinne wangin kasru su tuku sin sie mokul Kristian tumom, kom ku in lalalfongi la kom soak ye mutun Jeova.
12. (a) Fuka kutu sister Kristian elos akkalemye oaru lalos nu sin Jeova? (b) Kutu sin sister wiesr elos mongfwusesr nu ke kain in pulakin fuka?
12 Ke sie me pupulyuk, loang akmwoye nu sin sister Kristian wiesr su tia payuk ke sripen oaru in akos kai lun Jeova in payuk “mukena in Leum.” (1 Korint 7:39; Soakas 3:1) Kas lun God el akkalemye nu selos: “Kom [Jeova] fwakomyuk oaru nu selos su oaru.” (2 Samuel 22:26, New World Translation) Aok, pus inmaslolos, akilen la tia fwusesr in muta na lolap. Sie sister el fwak: “Nga sulela in payuk mukena in Leum, tusruktu Nga tung ke pal se Nga liye kamwuk puspis luk elos payuk nu sin mokul Kristian mwomwo, a Nga muta na lolap.” Siepa sister el fwak: “Nga kulansap tari nu sin Jeova ke lusen yiu 25. A kaifweung in oaru nu sel pal e nu kemwa, tusruktu me asor sun yu pal nu kemwa.” El tafwela in fwak: “Sister puspis su oanu Nga enenu kas in akkeye.” Fuka kut ku in kasre kain in met oaru inge?
13. (a) Mea kut ku in lotela ke me srikasrak lun tulik mutan nutul Jepta? (b) Ke kutupa inkanek fuka kut ku in akkalemye nunuk yok lasr nu sin sister nu kemwa su lolap in congregation lasr?
13 Sie inkanek in oru ou inge ku in liyeyuk ke sie me srikasrak in pal meeta. Ke pal se tulik mutan nutul Jepta el sisla pal mwo lal in payuk, met in an lal elos akilen la el kisekin moul lal sifwanu. Mea elos oru in akkeyel? “Tu an nutul Israel elos som yiu nu kemwa in esam a kaksakin an nutul Jepta met Giliad ke len akosr in yiu se.” (Met Nununku 11:30-40, NW) In oupanu, kut enenu in sang kas in kaksak nu sin sister lolap nu kemwa su oaru in akos ma sap lun Jeova.a Mea siepa inkanek su kut ku in oru in akkalemye nunuk yok lasr nu selos? Ke pre lasr kut enenu in siyuk sin Jeova in akkeye kain in sister kulu inge in tafwela nu ke oaru lalos in kulansap. Elos fwal in eis kas in akkeye a etu la Jeova a met nu kemwa in congregation insemwomwo nu selos.—Sam 37:28.
Fuka Nine Su Mukena Muta Ku In Kutangla
14, 15. (a) Efu ku nine Kristian nu kemwa su oasr tulik nutulos a mukena muta elos enenu in siyuk sin Jeova ke kasru? (b) Fuka papa ku nine su mukena muta elos ku in orekma fwal nu ke ma elos siyuk ke pre?
14 Mutan Kristian puspis su oasr tulik nutulos a mukena muta elos sun pa ma upa puspis. Tusruktu, elos ku in forla nu sin Jeova in siyuk kasru ke inkanek in kurunganang tulik nutulos fwal nu ke ma sap lun Baibel. Paye, fwin kom mukena muta a oasr tulik nutum kom tia ku in oru orekma lun nine a orekma lun papa in pal siefwunnu pal e nu kemwa. Fwinne ou inge, Jeova el e fwa kasre kom ke kunokon puspis lom kom fwin ngetuk nu sel ke lalalfongi. Ke sie me pupulyuk: Kut lumala la kom wis ma toasr puspis su kom moli ke sto nu ke apartment lom su oasr lung. Ya kom kaifweung na in orekmakin me fwan fwinne kom etu la oasr elevator su futoto nu ka. Paye, kom fwa tia oru ou inge! Oupanu, lela kom in tia mukena srukak me toasr yok ke insiom kom fwin ku in siyuk sin Jeova in kasre kom. Aok, Jeova el suli kom in pangnol. Sam 68:19 el fwak: “Jeova lan kaksakinyuk, su wis me utuk lasr len nu kemwa.” Oupanu, 1 Piter 5:7 el suli kut in likiye nu kemwa sensen lasr nu sin Jeova “tu el kurungin kut.” Ke ma inge, fwin ma upa a me sensen arulanu aktoasrye kom, filiye me utuk lom nu sin Papa tumom in kosrao, oru ou inge “pal e nu kemwa.”—1 Tessalonika 5:17; Sam 18:6; 55:22.
15 Ke sie me pupulyuk, kom fwin sie nine, wangin alollo la kom nunku yok ke me purakak koluk nu sin tulik nutum ke loom lutlut, ku nu ke me srifwe ke lalalfongi lalos su elos ku in sun. (1 Korint 15:33) Fwal ma kom oru inge. Tusruktu, ma inge kom ku in sramsramkin pa ke pre. Aok, efu kom a tulik nutum tia pre nu sin God ke ma se inge meet liki elos som nu ke loom lutlut, saap tokin komwos sramsramkin text ke len se? Pre kalem lom su tuku ke insiom, sie me purakak fukoko ke nunuk lun tulik nutum. Yok liki nu kemwa, kom akola moul lom in eis me insemwomwo lun Jeova ke pal se kom mongfwusesr in filiye Kas lun God nu ke insien tulik nutum. (Duteronomi 6:6, 7; Soakas 22:6) Esam, “mutun Jeova suiye met sumwosmwos, a srel nu ke kaifwe lalos.”—1 Piter 3:12; Filippai 4:6, 7.
16, 17. (a) Mea sie tulik mokul el fwak ke lungse su nine kiel el akkalemye? (b) Fuka nunuk lun nine ke ma lun ngun purakak tulik nutul?
16 Loang akmwoye ke me srikasrak lal Olivia, sie nine su oasr tulik onkosr nutul. Mokul tumal su tia lalalfongi el likiye sou tokin isusla lun tulik safla nutul, fwinne ou inge, Olivia el eis kunokon lal ke insemwomwo in sang akpa nu sin tulik nutul ke inkanek lun God. Ke pal se ma inge sikyuk, mwen se nutul Olivia, su e Darren, su ke pal inge el yiu 31 matwe a kulansap oanu sie met Kristian elder a pioneer, el srakna oasr ke yiu akosr kutu matwe lal. In toeni nu ke me fosrnga lal Olivia, Darren el sun kain in mas upa su el srakna akkolukyel nu ke pal inge. Ke pal se nunku ke pal in fwusr lal, Darren el simusla: “Nga srakna esam ke pal se Nga muta ke bed lun loom ono a sano nine kiuk ke insemwomwo. El muta siskuk a rid Baibel nu sik len nu kemwa. Na el on kin on lun Togusrai su oasr sifwe ‘Kut Kulo Nu Sum Jeova.’b Nu ke len inge, pa inge on lun Togusrai su Nga arulanu lungse.”
17 Lalalfongi a lungse lal Olivia nu sin Jeova sang kasru yok ke kutangla lal oanu sie nine su mukena muta. (Soakas 3:5, 6) Oiye mwomwo lal akkalemyeyuk ke nien sun su el filiye nu sin tulik nutul. “Nine el akkeye kut pal nu kemwa in oru nien sun lasr ke orekma lun forfor pal nu kemwa in luti,” Darren el fwak. “Ke sripe se inge, akosr sin sister wiuk elos sroang nu ke orekma lun forfor pal nu kemwa oanu sie pioneer. Fwinne ou inge, nine el tia orek fulang nu ke ma inge nu sin kutena met. Nga kaifweung in etawi oiye mwolanu puspis lal.” Paye, tia tulik nu kemwa elos kapek in kulansap nu sin God oanu ma sikyuk nu sin tulik nutul Olivia nu kemwa. Tusruktu, fwin sie nine el oru ma nu kemwa ke ku lal in moulkin moul fwal nu ke ma sap lun Baibel, el ku in lalalfongi na paye la oasr yurol me kasru a kolyuk lun Jeova.—Sam 32:8.
18. Fuka kut ku in akkalemye la kut engunkin me sang lun Jeova ke congregation lun met Kristian?
18 Me kasru yok lun God el ase nu sesr ke inkanek lun congregation lun met Kristian, ke program lal ke me mongo in ngun, a sin “me sang nu sin metu” su matu in ngun. (Efesus 4:8) Met elder oaru elos kaifweung na paye in musaiyuk congregation, in loang nu ke me enenu lun “met mukaimtal a mutan katinmas ke ongoiyelos.” (Jemes 1:27) Ke ma inge kaifweung in futoto nu sin met lun God, nikmet sifwanu srella.—Soakas 18:1; Rom 14:7.
Oiye Mwomwo Su Tuku ke Pusisel
19. Efu ku oiye pusisel lun sie mutan tia akkalemye la el munas, a mea me srikasrak in Baibel su akkalemye ma inge?
19 Jeova el orala mutan oanu me kasru lun mokul. (Genesis 2:18) Ke ma inge, pusisel lun mutan nu sin mokul tumal tia akkalemye la el srik lukel. A, ma inge sang mwolanu nu sin mutan, sang nu sel pal mwo in orekmakin me sang puspis nu sel a lalmetmet lal fwal nu ke lungse lun God. Soakas sapter 31 el akkalemye kain in kunokon a orekma puspis lun sie mutan mwomwo in an Israel in pal meeta. El kasru met enenu, eoki sie nien grepu, a molela an. Aok, “insien mokul tumal . . . lalalfongel, a el tia enenu ma laesla.”—Fus 11, 16, 20.
20. (a) Fuka sie mutan Kristian el nunku ke ku lal, ku me sang nu sel su tuku sin God? (b) Kain in oiye mwo fuka Ester el akkalemye, a fuka Jeova el orekmakunal ke sripe se inge?
20 Sie mutan pisesel su sangeng sin God el tia suk in akkeyel siefwanu in amei nu sin mokul tumal. (Soakas 16:18) El tia suk in ekla met pengpeng ke sripen orekma lal fwin fwalu se inge, a el orekmakin me sang su tuku sin God, pa inge in kulansap nu sin kutu met—nu sin sou lal, met lili Kristian wiel, met tulan lal, a yok liki nu kemwa, nu sin Jeova. (Galetia 6:10; Taitus 2:3-5) Loang akmwoye ke me srikasrak lal Kasra Ester in Baibel. El fwinne arulanu kato lumal, tusruktu el fwokpap a inse pusisel. (Ester 2:13, 15) Ke pal se el payuk, el akkalemye akfulat yok nu sin mokul tumal inge, Togusra Ehasuirus, a el tia oanu mutan kiel meet su pangpang, Vashtai. (Ester 1:10-12; 2:16, 17) Ester el arulanu pusisel pa ke kas in kai lal Mordikai, cousin se lal su matu lukel, ke ma yok puspis—el fwinne ekla tari sie kasra. Tusruktu, tia kalme la el munas! El pulaik in lain Heman, sie mokul silolel ku su orala plan in uniye met Ju nu kemwa. Jeova el orekmakunul Ester ke inkanek sakuruk in molela met lal.—Ester 3:8–4:17; 7:1-10; 9:13.
21. Fuka sie mutan Kristian el ku in arulanu saok ye mutun Jeova?
21 Arulanu kalem, in pal meeta, a ke len inge, mutan puspis su sangeng sin God elos akkalemye oaru lalos nu sin Jeova mukefwunnu a ke alu lal. Ke ma inge, mutan nu kemwa su sangeng sin God elos saok ye mutun Jeova. Sister Kristian puspis lela Jeova ke inkanek lun ngun mutal lal in akkapye komwos nu ke sie kain in “alu” mwomwo, su “akola nu ke orekma mwo nu kemwa.” (2 Timote 2:21; Rom 12:2) Nu sin met saok inge su alu nu sin God, Kas lun God el fwak: “Sang nu sel fwokin paul, a lela orekma lal in kaksakunal in mutunoaoa.” (Soakas 31:31) Lela ma inge in arulanu paye nu sin kais sie sunwos.
[Footnotes]
a Fwin ke inkanek in sang kain in kas in kaksak inge, srike liye The Watchtower lun March 15, 2002, sra 26-8.
b On 212 ke buk in on inge Sing Praises to Jehovah, orekla sin Met Lo lun Jeova.
Ya Kom Esam?
• Fuka mutan Kristian puspis ke century se meet elos sang me akpayeye la elos saok ye mutun Jeova?
• Fuka sister puspis ke pal lasr elos oru moul lalos in saok ye mutun God?
• Ke inkanek puspis fuka Jeova el akkeye nine nu kemwa su mukena muta a kutu sister su wangin mokul tumalos?
• Fuka sie mutan el ku in akkalemye akfulat ke akmwuk lun sifwe?
[Box on page 17]
Me Srikasrak Puspis Su Fwal In Nunkeyuk
Ya kom lungse in tuni kutu pa me srikasrak in Baibel ke mutan oaru puspis? Fwin aok, nunuk munas ridi ma simusla puspis su akkalemyeyuk tenu. Ke kom nunku ke met puspis inge su simusyukla tenu, srike in akilen ma sap puspis su kom ku in orekmakin ke inkanek yok in moul lom.—Rom 15:4.
◆ Serah: Genesis 12:1, 5; 13:18a; 21:9-12; 1 Piter 3:5, 6.
◆ Mutan Israel Kulang: Exodus 35:5, 22, 25, 26; 36:3-7; Luk 21:1-4.
◆ Debora: Met Nununku 4:1–5:31.
◆ Rut: Rut 1:4, 5, 16, 17; 2:2, 3, 11-13; 4:15.
◆ Mutan lun An Sunem: 2 Togusra 4:8-37.
◆ Mutan Phoenician: Mattu 15:22-28.
◆ Marta a Mary: Mark 14:3-9; Luk 10:38-42; Jon 11:17-29; 12:1-8.
◆ Tabita: Orekma 9:36-41.
◆ Tulik mutan akosr lal Filip: Orekma 21:9.
◆ Fipe: Rom 16:1, 2.
[Picture on page 15]
Ya kom sang kas in kaksak nu sin sister nu kemwa su lolap su akos ma sap lun God ke oaru?
[Picture on page 16]
Kain in me siyuk fuka kut ku in oru ke pre meet liki tulik nutulos elos som nu ke loom lutlut?