Kut Fwin Lungse In Eis Mol, Kut Enenu In Akkalemye Sifwanu Leumi!
“A met nu kemwa su srike in akutun, elos sifwanu liyelosyung in ma nu kemwa.”—1 KORINT 9:25.
1. Fwal nu ke Efesus 4:22-24, fuka million puspis lun met elos fwak aok nu sin Jeova?
KOM fwin sie sin Met Lo lun Jeova su Baptais tari, kom akkalemye nu sin met nu kemwa la kom insemwomwo in sroang nu ke akutun su me mol nu ka’u pa moul ma patpat. Kom fwak aok, in oru ma lungse lun Jeova. Meet liki kut mwolela moul lasr nu sin Jeova, pus inmaslosr enenu in ekulla ma puspis ke oiyen moul lasr meyen kut lungse in oru mwolela lasr in paye, a me akinsemwomwoye God. Kut fwasr tokin kas in kai lal Poul nu sin met Kristian: “Tu komwos in sisla met matu, fwal nu ke oiyen moul lomwos meeta, su kolukla fwal nu lung lun kikiap . . . A komwos in nukomang met sasu, su fwal nu sin God orekla tari in sumwosmwos a mutal lun paye.” (Efesus 4:22-24) In kas saye, meet liki kut fwak aok, ku meet liki kut mwolela moul lasr nu sin God, kut enenu meet in fwak mo ke inkanek koluk lun moul lasr in pal meeta.
2, 3. Fuka 1 Korint 6:9-12 el akkalemye ke kain in ekla luo su kut enenu in oru kut fwin lungse in eis insemwomwo lun God?
2 Kutu nu ke orekma lun moul meeta su enenu in sisla sin met nu kemwa su akola in ekla Met Lo lun Jeova selngaweyuk ke Kas lun God. Poul el akkalemye kutu nu ke ma inge ke leta lal nu sin met Korint, el fwak: “Wangin met kosro inmaslon met lolap, ku met alu nu ke me srulela, ku met kosro inmaslon met payuk, ku met lung in ikwe, ku mokul su orekma koluk nu sin mokul, ku met pusrapasr, ku met rapku, ku met srui, ku met aksruksruk koluk, ku met eis laesla, fwa eis usru lalos in togusrai lun God.” Tok el akkalemye pa la met Kristian nu kemwa in century se meet elos ekulla na paye oiyen moul lalos, el tafwela in fwak: “A kutu sumwos ou inge meet.” Loang akmwoye ke kas se inge, meet.—1 Korint 6:9-11.
3 Poul el akkalemye la oasr ekla puspis saye enenu pa in orek, meyen el tafwela: “Ma nu kemwa tia oul nu sik; a tia ma nu kemwa fwal nu sik.” (1 Korint 6:12) Ke ma inge, met puspis ke len inge su lungse in ekla Met Lo lun Jeova elos liye me enenu in fwak mo ke ma puspis su fwinne oul tusruktu tia arulanu yok sripe. Saap ma inge arulanu sisla pal a kutongyelos in suk ma puspis su arulanu yok sripe.
4. Met Kristian su mwolela tari elos insese kel Poul ke mea?
4 Mwolela nu sin God enenu in orek ke insemwomwo, a tia ke srungesr, su akkalemye oanu me kise na yok na pa inge. Met Kristian su mwolela tari elos insese kel Poul, su fwak kas inge tokin el ekla met tuma lutlut lal Kraist: “Ke Su, ma luk nu kemwa tula liki yu, a Nga oekla ma inge oanu kutkut, tu Nga in eis Kraist.” (Filippai 3:8) Poul el insemwomwo in fwak mo ke ma puspis su tianu arle yok sripe tu el lan ku in tafwela in fwak aok nu sin God.
5. Ke kain in akutun fuka Poul el wi a kutangla, a fuka kut ku in oru pa ou inge?
5 Poul el akkalemye sifwanu leumi ke kasrusr lal ke akutun in ngun a ke saflaiye el ku in fwak: “Nga meuni tari meun mwo, Nga aksafyela kasrusr luk, a Nga srukye ku lalalfongi. Ke pal se inge la nu tok sie tefuro sumwosmwos lemla sane yu, su Leum, met nununku sumwos, el e fwa ase nu sik in len sa, a tia nu sik mukena, a ouyepa nu selos nu kemwa su lungse sikme lal.” (2 Timote 4:7, 8) Ya kut ku in fwak pa kas inge ke pal fwasru? Aok, kut ku in oru ou inge fwin ke lalalfongi kut akkalemye sifwanu leumi ke kut tafwela in kasrusr nu ke safla ke akutun oanu met Kristian.
Sifwanu Leumi in Oru Ma Mwo
6. Mea se inge sifwanu leumi, a ke kain in an luo fuka kut enenu in orekmakin ma inge?
6 Kas Hibru a kas Greek su langasyukla nu ke “sifwanu leumi” in Baibel ku in kalmekin, oasr ku lun sie met in kutongyel sifwanu. Pal nu kemwa ma inge el akkalemye ku lun sie met in kutongyel sifwanu in oru ma koluk. Tusruktu, arulanu kalem la kut enenu pa sifwanu leumi kut fwin lungse in orekmakin manosr in oru ma mwo. Pal nu kemwa, oasr kena lun met sesumwos in oru ma koluk, ke ma inge kut enenu in meuni kain in meun luo. (Ekklisiastis 7:29; 8:11) Ke pal se kut kurunginkutyung sifwanu in tia oru ma koluk, kut enenu pa in mokleyuk in oru ma mwo. Aok, in kurunganang manosr tu in oru mwo pa sie inkanek mwo emeet in fwasr liki ma koluk.
7. (a) Kut ku in pre ke mea, oanu Devid el oru? (b) In nunku ke mea fwa kasre kut in in akkalemye sifwanu leumi yok?
7 Arulanu kalem, sifwanu leumi el arulanu yok sripe kut fwin lungse in akpayeye mwolela lasr nu sin God. Kut enenu pre oanu Devid el oru meet: “Kom in oru insiuk in nasnas, O God, a aksasuye sie ngun sumwos in Nga.” (Sam 51:10) Kut ku in nunku ke ma lane puspis su tuku ke kaifweung in fwasr liki ma fokfok su ku in akkolukye manosr. Nunku ke ma koluk su ku in sikyuk kut fwin tia fwasr liki ma inge: mas upa ke manosr, futoto inmaslon met su akkolukyeyuk, a mise fwinne kom srakna fwusr. Ke inkanek saye, nunku ke ma lane puspis su tuku ke kaifweung lom in srukye inkanek lun moul su Jeova el lungse kom in oasr ka. Tusruktu, lela kut in tia mulkunla la insiesr arulanu kutasrik. (Jeremaia 17:9) Kut enenu in kaifweung in lain me purakak lun insiesr su pilesru oaru lasr in akos ma sap lun Jeova.
8. Kain in ma paye fuka experience el luti kut? Sang me pupulyuk.
8 Kut nu kemwa etu la ikwe munas el srike pal nu kemwa in akmunasye moniyuk lasr in ngun. Ke sie me pupulyuk, nunku ke orekma in luti ke Togusrai. Jeova el arulanu engun ke insemwomwo lun met in akesrui ke orekma se inge su ku in molela moul. (Sam 110:3; Mattu 24:14) Apkurun kut nu kemwa akilen la, lutlut in etu fuka in luti nu sin kutu met tia fwusesr. Ma inge el siyuk—a siyuk pal nu kemwa nu sesr—in sifwanu leumi ke manosr, in “uni” ma inge a “akpusisilyel oanu met kulansap se,” a tia lela ma inge in mokle kut in suk inkanek fwusesr a tia luti.—1 Korint 9:16, 27; 1 Tessalonik 2:2.
“In Ma Nu Kemwa
9, 10. Mea kut ku in toeni nu ke orekmakinyen “sifwanu leumi in ma nu kemwa”?
9 Kai lun Baibel in orekmakin “sifwanu leumi in ma nu kemwa” akkalemye la oasr ma yok su kut enenu in oru sayen orekma in kutongye mulat lasr a in fwasr liki orekma lun kosro. Saap kut pulakin la kut kutangla tari in akkalemye sifwanu leumi ke ma inge, a fwin ou inge, kut enenu in sang kulo. Aok, a fuka ke kutu akmwuk su luman me enenu ke sifwanu leumi tia arulanu kalem? Ke sie me pupulyuk, lela kut in fwak la kut moul ke sie an kasrup su akmwuk lun moul arulanu mwo. Ya tia sie inkanek lalmetmet in fwak mo ke kain in oiye su lungse in moli ma puspis su tia eneneyuk? Arulanu mwo fwin papa a nine elos luti tulik nutulos in tia moli kutena ma su elos liye ke sripen ma inge sie me purakak muta, elos ku in eis fwin elos lungse, a oasr mani lalos in oru ou inge. Paye, tu in fukoko me luti inge, papa a nine elos enenu in akkalemye me srikasrak mwo.—Luk 10:38-42.
10 In lutlut in moul fwinne wangin ma puspis inge su kom lungse el ku in akkeye kaifweung lom. Ma inge ku in kasre kut pa in akkalemye insemwomwo ke ma puspis su oasr yurosr tari a in pakoten nu sin kutu met su wangin ma inge, tia ke sripen elos lungse in oru ou inge, a ke sripen wangin ku lalos in eis ma inge. Paye, sie inkanek fwokpap el lain oiye pengpeng lun met su lungse in fwak “kom enenu in mwo nu sum sifwanu” ku “fwal nu sum in eis ma mwo emeet.” Me purakak lun met kuka ke fwal se inge lungse in purakak kena lun sie met in akinsemwomwoyel sifwanu, tusruktu elos oru ou inge meyen elos lungse mani lalos ke business in kapek. Kain in luma se inge ku in kutongye kaifweung lasr in akkalemye sifwanu leumi. Sie magasin ke sie an kasrup in an Europe el fwak: “Fwin orekma in kurunganang kena koluk arulanu upa nu sin met puspis su muta in keok ke sripen moul sikasrup, ma inge upa liki nu sin met puspis su muta ke an kasrup puspis su milk a honey surorla liki we!”
11. Efu enenu in lutlut in oru ma se fwinne wangin ma lane su tuku ka, tusruktu mea oru ma inge in arulanu upa?
11 Kut fwin pulakin ma upa in akilen piye ma kut lungse a ma kut enenu na paye, saap oasr ma kut enenu in oru tu kut in tia oru kutena ma su tia mwo. Ke sie me pupulyuk, kut fwin lungse in kutongye kena lasr in moli ma pukanten alukela ma fwal, saap kut ku in sulela in tia eis kutena ma ke inkanek lun sowemol, ku ke pal se kut orek shopping, kut ku in wis na lupan mani su kut akola in orekmakin. Esam la Poul el fwak “a moul mutal wi inse misla me laesla lulap.” El tafwela in fwak: “Tu kut tia wise kutena ma nu ke fwal se inge, a ouyepa kut koflanu wisla kutena ma liki. A, fwin oasr yurosr me mongo a nuknuk, lela kut in inse misla ke ma inge.” (1 Timote 6:6-8) Ya kut inse misla ke ma oasr yurosr? In lutlut fuka in moulkin moul fwusesr, sukosok liki me utuk toasr su tia eneneyuk ke sripen kena sufwal—ke kutena ma—enenu ku a sifwanu leumi. Aok, sie me lutlut pa inge su arulanu yok sripe.
12, 13. (a) Ke inkanek puspis fuka meeting nu kemwa lun met Kristian el siyuk pa nu sesr ke sifwanu leumi? (b) Ke kain in an puspis fuka kut enenu in akkapye sifwanu leumi?
12 In wi ke meeting nu kemwa lun met Kristian, toeni lulap, a convention nu kemwa, enenu pa sifwanu leumi. Ke sie me pupulyuk, kain in oiye mwo inge arulanu yok sripe in kasru nunuk lasr in tia forfor ke lusen pal in program. (Soakas 1:5) Enenu pa sifwanu leumi in loang yok nu sin met sramsram a in tia mama nu sin met su muta seskesr. In aksumwosye schedule lasr tu kut in ku in sa tuku enenu pa sifwanu leumi. Sayen ma inge, sifwanu leumi eneneyuk pa in pakiye pal in akola nu ke meeting a in akesrui ke pal in meeting.
13 Orekmakinyen sifwanu leumi ke ma srisrik puspis akkeye ku lasr in oru ou inge ke ma lulap puspis. (Luk 16:10) Ke ma inge, arulanu mwo na paye kut fwin luti kut sifwanu in ridi Baibel a me rid nu kemwa su tuku ke Baibel pal nu kemwa, lutlutkin ma inge a nunku ke ma kut lotela tari! Sie inkanek lalmetmet na paye kut fwin luti kut sifwanu in taran ke kain in orekma sufwal in sukok mani, kamwuk, a kain in oiye puspis su tia fwal, a arulanu mwo pa kut fwin kai kut sifwanu in fwak mo ke kain in orekma puspis su ku in pusrela pal saok lasr in oru orekma lun God! In kafofo pal nu kemwa ke orekma lun Jeova sie me kasru yok lain ma puspis su ku in oru kut in som liki paredais in ngun lun Jeova su ku in liyeyuk ke congregation nu kemwa lal fwin fwalu nu fon.
Komwos In Kapkapek ke Inkanek lun Sifwanu Leumi
14. (a) Fuka tulik srisrik nu kemwa elos ku in lutlut in akkalemye sifwanu leumi? (b) Kain in me insemwomwo puspis fuka ku in tuku fwin tulik srisrik el lutlut ke kain me lutlut inge ke elos srakna srik?
14 Sie awowo su tufwanu isusla el tia etu sifwanu leumi. Sie me rid su aketeye ke oiye lun awowo el aketeye: “Sifwanu leumi el tia sifwanu sikyuk ku sifwanu tuku nu sin sie met. Awowo a tulik srisrik nu kemwa enenu kasru a kolyuk lun papa a nine in mutamwauk ke lutlut lalos ke sifwanu leumi. . . . Ke kasru lun papa a nine fuka in orekmakin ma inge, sifwanu leumi el kapkapek nu sin tulik ke lusen pal in lutlut lal ke loom lutlut.” Sie lutlut ke tulik srisrik su yiu akosr matwe akkalemye la elos nu kemwa su lutlut in orekmakin sifwanu leumi “pal nu kemwa elos kapek ke sie inkanek mwo, elos pengpeng liki kutu tulik, lungse in lutlut ke ma puspis, pulaik a kain in met fwusr su kom ku in lalalfongi.” Elos nu kemwa su tia lutlut ke ma se inge “elos luman asor pal nu kemwa, fwusesr in fuleak a likkeke. Elos fwusesr in munasla ke ma upa a fwasr liki orekma yok puspis.” Arulanu kalem, in ekla sie met matu mwo, tulik srisrik el enenu in lutlut in orekmakin sifwanu leumi.
15. Wangin sifwanu leumi ku in akilenyuk ke mea, su tia fwal nu ke nien sun su oakiyuki in Baibel?
15 In oupanu, kut fwin lungse in ekla sie met Kristian su matu in ngun, kut enenu in lutlut fuka in akkalemye sifwanu leumi. Kut srakna awowo in ngun fwin wangin yurosr kain in oiye se inge. Baibel el kai kut in “elan met matu in nunuk.” (1 Korint 14:20) Nien sun lasr pa in “sun lalalfongi siefwunnu, a etu Mwen nutin God, nu ke met mwo matwe, nu ke srikasrak in lupan ma seseslanu in Kraist.” Efu? “Tu kut in tia sifwil tulik, ikik ke nua a mokuikui ke eng in lutlut nu kemwa, ke sruf lun met, in kutasrik, kolla nu ke me kikiap lun ma koluk.” (Efesus 4:13, 14) Arulanu kalem, lutlut in orekmakin sifwanu leumi yok sripe nu ke ku lasr in ngun.
In Akkapye Sifwanu Leumi
16. Fuka Jeova el sang kasru?
16 In akkapye sifwanu leumi, kut enenu kasru lun God, a kut ku in eis ma inge. Kas lun God el oanu sie selngun sumwosmwos, su akkalemye nu sesr piye kut enenu in ekla, a el ase nu sesr kas in kai fuka in oru ou inge. (Jemes 1:22-25) Sie un met lili arulanu insemwomwo pa in sang kasru. Met Kristian elder nu kemwa enenu in mongfwusesr in sang kasru lalos. Jeova el akola in sang kasru ke inkanek lun ngun mutal lal kut fwin siyuk ke pre. (Luk 11:13; Rom 8:26) Ke ma inge, lela kut in orekmakin me kasru inge ke insemwomwo. Me kasru su oasr ke sra 27 ku in kasru kom.
17. Kain in kas in akkeye fuka Soakas 24:16 el ase nu sesr?
17 Sie me insemwomwo na paye in etu la Jeova el aksaokye kaifweung lasr ke pal se kut lungse in akinsemwomwoyel! Ma inge enenu in mokle kut in tafwela ke kaifweung lasr in akkapye sifwanu leumi lasr. Fwinne kut tukulkul ke pal puspis, lela kut in tia fuleak ke kaifweung lasr. “Tu sie met sumwosmwos ikori pal itkosr, a sifwil tuyuk.” (Soakas 24:16) Pal nu kemwa kut kutangla in akinsemwomwoye Jeova, oasr sripe se lasr in insemwomwo. Kut ku in lalalfongi pa la Jeova el insemwomwo nu sesr. Sie Met Lo el fwak la meet liki el mwolela moul lal nu sin Jeova, el oakiye la pal nu kemwa el kutongyel sifwanu in tia sismok ke lusen wik se, el orekmakin mani su el tia orekmakin in moli paip in moli me enenu lal in akinsemwomwoyel sifwanu.
18. (a) Mea ku in toeni nu ke meun lasr ke sifwanu leumi? (b) Kain in kas in akkeye fuka Jeova el wise?
18 Yok liki nu kemwa, kut enenu in esam la toeni nu ke sifwanu leumi pa ma kut nunku a ma kut pula. Kut ku in liye ma inge ke kas lun Jisus: “Tu kutena met su ngetung nu sin mutan se in lungse fwasr nu yurol, el tufwanu orek kosro yurol insiel.” (Mattu 5:28; Jemes 1:14, 15) El su etu tari in kutongye nunuk lal a pulakin lal el e fwa koneak la arulanu fwusesr sel in kutongye manol nu fon. Ke ma inge, lela kut in akkeye kut sifwanu ke kaifweung lasr tia in fwasr liki ma koluk mukena a ouyepa in nunku ke ma inge. Ke pal se ma koluk sikyuk ke nunuk lasr lela kut in sisla ma inge ke pal na sa. Kut ku in fwasr liki me srifwe ke kut pre a ngetuk nu sel Jisus pal e nu kemwa. (1 Timote 6:11; 2 Timote 2:22; Hibru 4:15, 16) Ke kut kaifweung na paye ke ku lasr kemwa, kut fwasr tokin kas in kai lun Sam 55:22: “Filiye me utuk lom fwin Jeova, a el e fwa kasre kom. El koflanu filiye met sumwosmwos tu in mokuikui.”
Ya Kom In Esam
• Ke inkanek luo fuka kut enenu in akkalemye sifwanu leumi?
• Mea kalmen kut akkalemye “sifwanu leumi in ma nu kemwa”?
• Kain in me kasru puspis fuka in akkapye sifwanu leumi kom koneak ke lusen pal in lutlut lasr?
• Sifwanu leumi el mutamwauk oya?