Mongfwusesr Ye Me Srifwe Sang Kaksak Nu Sin Jeova

“Komwos fwin oru mwo, a keok ka, a mongwusesr, ma inge mwo ye mutun God.”​—1 PITER 2:20.

1. Ke sripen met Kristian paye nu kemwa elos nunku yok in moulkin moul fwal nu ke mwolela lalos, paenang kain in kusensiyuk fuka kut enenu in tuni?

MET Kristian nu kemwa elos mwolela tari moul lalos nu sin Jeova a elos lungse in oru ma lungse lal. In akpayeye mwolela lalos, elos kaifweung na paye in fwasr tokin Me Srikasrak lalos, Jisus Kraist, a elos orek ma lo nu ke ma paye. (Mattu 16:24; Jon 18:37; 1 Piter 2:21) Tusruktu, Jisus sifwanu a kutu sin met oaru elos sang moul lalos ku elos mise oanu sie martyr ke sripen lalalfongi lalos. Ya ma inge ku in kalmekin la met Kristian nu kemwa elos nunku in mise ke sripen lalalfongi lalos?

2. Mea nunuk lun met Kristian ke me srifwe a me keok?

² Oanu met Kristian, kut nu kemwa akkeyeyuk in oaru nu ke mise, a tia in mise ke sripen lalalfongi lasr. (2 Timote 4:7; Fwakyuk 2:10) Kalmen ma inge pa, fwinne kut insemwomwo in sun keok​—a, fwin eneneyuk, in mise—​ke lalalfongi lasr, tusruktu wangin kena lasr ku kut tia lungse in keok a mise. Kut tia insemwomwo ke me keok a kut tia engun ke ngal ku me mwekin. Tusruktu, ke sripen kut etu la me srifwe a kolyai ku in sikyuk na paye, paenang kut enenu in tuni mwo oiye se ma kut enenu in akkalemye fwin me srifwe a kolyai sun kut.

Oaru Ye Me Srifwe

3. Kain in me srikasrak puspis fuka in Baibel su sramsramkin kolyai kom ku in sromon? (Srike liye pok inge “Oiye Fuka Elos Akkalemye ke Kolyai,” ke sra toko.)

³ Kut ku in koneak me sramsram puspis in Baibel su akkalemye fuka met kulansap lun God in pal meeta elos sun me sensen puspis ke moul lalos. Kain in oiye puspis su elos akkalemye sang kasru nu sin met Kristian ke len inge elos fwin sun pa kain in ma upa inge. Srike in tuni ma oasr ke pok inge “Oiye Fuka Elos Akkalemye nu ke Kolyai,” a liye ma kom ku in lotela ka.

4. Mea kut ku in fwak ke ma Jisus a kutupa met kulansap oaru elos oru ke pal se elos muta ye me srifwe?

⁴ Fwinne Jisus a kutu met kulansap oaru lun God elos sun kolyai ke kain in inkanek puspis, su fwal nu ke luma a ma sikyuk, tusruktu arulanu kalem la elos tia filiye moul lalos ke me sensen fwin elos ku in oru ou inge. Fwin moul lalos oasr ke me sensen, elos akkalemye pulaik a lalmetmet. (Mattu 10:16, 23) Nien sun lalos pa in akkapye orekma in luti a in srukye oaru lalos nu sin Jeova. Oiye su elos akkalemye ke luma a ma sikyuk puspis sang me srikasrak nu sin met Kristian su ke len inge sun me srifwe a kolyai.

5. Kain in kolyai fuka sikyuk in an Malawi in yiu 1960 kutu, a oiye fuka Met Lo lun Jeova elos akkalemye ke ma se inge?

⁵ Met lun Jeova ke len inge elos sun kain in ma upa yok, sral ke ma puspis ke sripen meun, wangin sukosok, a kolyai upa. Ke sie me pupulyuk, in yiu 1960 kutu, Met Lo lun Jeova in an Malawi elos sun kolyai upa. Kingdom Hall puspis, loom puspis, sropon me mongo nelos, a business pukanten​—aok, ma lalos nu kemwa—​kunausyukla. Elos keok ke sripen anwuk upa a kutu ma koluk su orekla nu selos. Mea met lili wiesr elos oru? Tausen puspis selos enenu in kaengla liki mura lalos. Pukanten selos som nu ke insak in mwukla, a kutu selos som nu ke an Mozambique. Fwinne met oaru puspis elos mise, tusruktu oasr kutu selos su sulela in kaengla liki me sensen ke moul lalos, arulanu kalem la pa inge inkanek mwo emeet su elos enenu in oru ke kain in luma inge. Ke pal se elos oru ou inge, met lili elos fwasr tokin me srikasrak su Jisus a Poul elos oakiye meet.

6. Mea Met Lo in an Malawi elos tia fuleak in oru elos fwinne muta ye kolyai upa?

⁶ Fwinne met lili wiesr in an Malawi elos enenu in som liki an selos ku mwukla, tusruktu elos srakna suk a orekmakin akmwuk lun theocratic a elos tafwela nu ke orekma lalos oanu met Kristian ke ku lalos kemwa fwinne ma inge elos oru in lukma. Mea fwokin ma inge? Sie pise yok sasu ke met sulkakin Togusrai su oasr ke 18,519 elos sun meet liki sukosok lalos ke orekma etukla lukelos in yiu 1967. Fwinne srakna oasr me kutong ke sukosok lalos, a pus selos enenu in kaengla nu an Mozambique, tusruktu in yiu 1972 sie pise yok sasu ke pisen met orekma su oasr ke 23,398 elos reporti. Average lalos ke orekma lun forfor ke malem nu kemwa oasr ke aur 16. Wangin alollo, ma elos oru sang kaksak nu sin Jeova, a Jeova el akkeye a akinsemwomwoye na paye met lili oaru inge nu kemwa ke lusen pal in ma upa yok inge.a

7, 8. Mea sripe puspis paenang kutu selos sulela in tia kaeng, fwinne me lain upa wise ma upa puspis nu selos?

⁷ Ke inkanek saye, in an puspis su me lain sang ma upa, kutu sin met lili elos sulela in tia som liki an selos, fwinne elos ku in oru ou inge fwin elos lungse. In som liki an selos ku in aksumwosye kutu ma upa, tusruktu, ma inge ku in orala ma upa saye. Ke sie me pupulyuk, ya elos ku in osun nu sin met lili Kristian wielos tu elos in ku in eis me kasru in ngun a tia in mukena muta? Ya elos ku in kaifweung na in srukye akmwuk mwomwo lalos in lutlut ke ma lun fwinne elos kaifweung in oakiye moul sasu in an saye, ke sie an su mwo liki an lal meyen an inge ku in sang nu sel me enenu lal ke ma lun ikwe?​—1 Timote 6:9.

⁸ Kutu met elos sulela in tia som liki an selos meyen elos nunku ke insemwomwo in ngun lun met lili wielos. Elos sulela in muta a sun ma upa meyen elos lungse in tafwela na in luti ke territory lalos a tu elos in ekla sropon me akkeye nu sin met lili wielos in lalalfongi. (Filippai 1:14) Ke pal se elos oru sulela inge, kutu selos eis pal mwo in oasr ip lalos ke kutangla lun orekma lasr ke court in an selos.b

9. Mea ma puspis inge su met se el enenu in tuni el fwin lungse in muta ku el sulela in kaengla liki?

⁹ In muta ku som​—sulela pa inge lun met se met se. Paye, kain in sulela inge, kut ku in oru mukena tokin kut pre nu sin Jeova ke kasru lal. Tusruktu, ke kutena sulela su kut oru, kut enenu in esam kas lal met sap Poul: “Na ou inge kais sie sesr fwa fwakak kel sifwanu nu sin God.” (Rom 14:12) Oanu ma kut lotela tari ke mutamweyen me lutlut inge, ma Jeova el siyuk pa, kais sie met kulansap lal enenu in kaifweung in oaru ke kutena ma sikyuk. Kutu sin met kulansap lal elos sun me srifwe a kolyai ke pal inge; ma inge e fwa sikyuk nu sin kutu met toko. Met nu kemwa fwa srifweyuk ke kain in inkanek puspis, a wangin kutena met ku in fwak la elos sukosok ke ma se inge. (Jon 15:19, 20) Oanu met kulansap lun Jeova su mwolela tari, kut tia ku in pilesru me sramsram yok emeet ke orekma in akmutalye en God a ke sumwos lal in kol in kosrao a fwalu.​—Ezekiel 38:23; Mattu 6:9, 10.

“Tia Sang Ma Koluk Ke Ma Koluk”

10. Kain in me srikasrak fuka Jisus a met sap lal elos oakiye in pal meeta in kasre kut fuka in sun ma upa puspis a me lain?

¹⁰ Siepa ma sap saok su kut ku in lotela ke inkanek lun Jisus a met sap lal in sun ma upa pa, kut in tia suk foloksak nu sin met su akkeokye kut. Kut tia ku in koneak kutena me sramsram in Baibel su akkalemye la Jisus a met nu kemwa su fwasr tokol elos orala u lalos sifwanu in lain ku orekmakin ku lalos in lain met nu kemwa su akkeokyelos. A, siena ma elos oru, “komwos in tia sang ma koluk ke ma koluk nu sin sie met,” met sap Poul el kai nu sin met Kristian. “Met kulu, komwos in tia sifwanu foloksak, a sang an sin mulat lun God; tu simla tari: ‘Ma luk in foloksak; Jeova el fwak, Nga fwa moli.’ ” Sayen ma inge, “ma koluk in tia kutangkomla, a kom in kutangla ma koluk ke ma mwo.”​—Rom 12:17-21; Sam 37:1-4; Soakas 20:22.

11. Mea sie met historian el fwak ke oiye lun met Kristian in pal meeta su elos akkalemye nu ke State?

¹¹ Met Kristian in pal meeta elos filiye ke insielos kas inge. Ke buk nutul inge The Early Church and the World, met historian inge Cecil J. Cadoux el akkalemye oiye lun met Kristian nu ke guferment ke lusen pal inge 30-70 C.E. El simusla: “Wangin me akpayeye lasr su akkalemye la met Kristian elos kaifweung in orekmakin ku lalos in lain met lokwalok lalos su akkeokyelos. Ma yok emeet su elos ku in oru pa in selngawi met kol lalos ku in aklutyelos a aksupwaryelos ke inkanek in kaeng lalos. Tusruktu, ma met Kristian elos oru pal nu kemwa ke pal in kolyai pa, elos kaifweung na paye in akkalemye srunga lalos in akos kutena ma sap lun guferment su lain ma sap lun Kraist.”

12. Efu ku mongfwusesr in keok mwo liki na in suk foloksak?

¹² Ya kain in orekma inge ke inse pusisel pa sie inkanek lalmetmet in oru? Ya tia pa inge kain in orekma la fwin sie met el oru el arulanu fwusesr in kunausyukla? Ya tia sie inkanek lalmetmet in lain tu in kurunginelos sifwanu? Kut fwin sramsram ke nunuk lun met luman pa inge ma sikyuk na paye. Tusruktu, oanu met kulansap lun Jeova, kut lalalfongi la orekmakinyen kolyuk lun Jeova ke ma nu kemwa pa sie inkanek mwo emeet. Kut esam pal nu kemwa kas lal Piter: “A, komwos fwin oru mwo, a keok ka, a mongfwusesr, ma inge mwo ye mutun God.” (1 Piter 2:20) Kut lalalfongi la Jeova el arulanu etu na paye ma sikyuk nu kemwa a el tia lela ma inge in on nu tok ma patpat. Fuka kut ku in etu ma inge? Nu sin met lal su muta in sruo in an Babulon, Jeova el fwak: “Tu el su kalkomwosi kalye atron mutuk.” (Zekaraia 2:8) Luseka Jeova el lela met koluk in kalye atron mutal? Jeova el e fwa sang mongle ke pal pakiyuki lal. Kut lalalfongi na paye ke ma se inge.​—2 Tessalonika 1:5-8.

13. Efu ku Jisus el inse pusisel in lela met lokwalok lal in sroukilyel?

¹³ Ke ma inge, kut ku in ngetuk nu sel Jisus oanu me srikasrak lasr. Ke pal se el lela met lokwalok lal in sruokilyel ke imae lun Gethsemane, el oru ou inge tia ke sripen wangin ku lal in kurunganang moul lal sifwanu. Aok, el fwak nu sin met tuma lutlut lal: “Ku kom nunku mu Nga tia ku in siyuk sin Papa tumuk, a el fwa supwemu nu yuruk inge pus liki siengoul luo lijion lun lipufon? Na fuka Ma Simusla in akpayeyuk, tu e fwa ou inge?” (Mattu 26:53, 54) Akpayeyen ma lungse lun Jeova pa yok emeet sel Jisus, fwinne ma inge ku in kalmekin keok lal sifwanu. El lalalfongi na paye ke kas palu ke on lal Devid: “Tu kom fwa tia likiye ngunik in Sheol. Ku fulela met mutal lom in liye punoela.” (Sam 16:10) Yiu puspis toko met sap Poul el fwak kel Jisus: “Su ke engun filiyuki ye mutal, el keok fwin sak soko, a pilesru mekin, a muta lepo leyut lun tron lun God.”​—Hibru 12:2.

Engun in Akmutalye En Jeova

14. Mea engun se inge su akkeyel Jisus in sasla liki me srifwe puspis?

¹⁴ Mea engun se inge su akkeyel Jisus tu el an mongfwusesr a sasla nu ke me srifwe upa inge? Inmaslon met kulansap nu kemwa lun Jeova, Jisus, su Mwen kulu nutin God, pa nien sun yok emeet lal Setan. Ke ma inge, kaifweung lal Jisus in oaru ye me srifwe sang topuk yok ke kas in angon lal Setan nu sin Jeova. (Soakas 27:11) Ya kom nunku ke engun a insemwomwo su Jisus el pula tokin el sifwil moulyuk? Yok na paye insemwomwo lal, meyen el akilen la el akpayeye kunokon su etukyung nu sel oanu sie met sumwosmwos in akkeye sumwos lun Jeova in kol in kosrao a fwalu a in akmutalye El! Sayen ma inge, in muta “lepo leyut lun tron lun God” el sie me akfulat mwolanu a sropon me insemwomwo yok emeet nu sel Jisus.​—Sam 110:1, 2; 1 Timote 6:15, 16.

15, 16. Kain in kolyai upa fuka Met lo nu kemwa in an Sachsenhausen elos enenu in muteng, a mea ma inge su sang nu selos ku in oru ou inge?

¹⁵ Oupanu nu sin met Kristian nu kemwa, me insemwomwo pa nu selos in wi akesrui in akmutalye en Jeova ke inkanek lun mongfwusesr a muteng lalos ye me srifwe a kolyai, in fwasr tokin me srikasrak lun Jisus. Sie me srikasrak fwal ke ma se inge pa experience lun Met Lo puspis su muta in keok ke an in kapur koluk inge Sachsenhausen concentration camp a moula liki death march ke saflaiyen Meun Lulap akluo. Ke lusen pal in march ku fwasfwasyesr lalos, tausen puspis sin met in kalpous elos mise ke sripen wangin nuknuk fwal lalos su afwunye manolos, mas, sral ku elos uniye sin met solse pangpang SS guard. Met Lo lun nu kemwa su piselos oasr ke 230 nu fon, elos moul ke sripen elos tukeni nu sie pal nu kemwa a kasru sie sin sie fwinne elos filiye moul lalos sifwanu ke me sensen.

¹⁶ Mea ma inge su sang kasru nu sin Met Lo in muteng kain in kolyai upa inge? Tokin elos sun an su wanginla me sensen, elos akkalemye kulo lalos nu sin Jeova ke sie ma simusla su oasr sifwe inge “Sulela lun Met Lo lun Jeova su piselos oasr ke 230 a tuku ke an onkosr, su tukeni nu sie ke insak futoto nu ke an Schwerin lun Mecklenburg.” Ke sulela inge elos fwak: “Sie me srifwe na loeloes a upa nu sesr kemwa aksafyeyukla, a elos nu kemwa su moula liki, elos oanu sasla ke sie fwunyu in e, a wangin fwolin e fwofwoul fweltotal. (Srike liye Daniel 3:27.) Aok, elos arulena sesesla ke ku su tuku sin Jeova a elos arulanu moniyuk in sano kunokon sasu su tuku sin Togusra in akyokye orekma lalos ke ma lun ngun.”c

17. Kain in me srifwe puspis fuka met lun God elos sun ke len inge?

¹⁷ Oanu met 230 oaru inge, lalalfongi lasr nu kemwa srifweyuk pa tari, fwinne kut sonna “aksurorye sra in kaifweung lasr.” (Hibru 12:4) Tusruktu, me srifwe se ku in sikyuk ke kain in luma a inkanek puspis. Ku in kas in akkoluk su tuku sin tulik lutlut in loom lutlut, ku in me purakak in oru orekma lun kosro ku kutu ma koluk su tuku sin kutu tulik su oanu matwe lom. In toeni nu ke ma inge pa, kaifweung lom in tia etuk sra, in payuk mukena in Leum, ku, in kasre tulik nutum in kapek ke lalalfongi paye el fwinne muta ke sie sou su oasr kain in lalalfongi luo su kutupal ku in kol nu ke ma upa yok a me srifwe.​—Orekma 15:29; 1 Korint 7:39; Efesus 6:4; 1 Piter 3:1, 2.

18. Kain in me akpayeye fuka oasr yurosr su akkalemye la kut ku in mongfwusesr fwinne ke me srifwe yok emeet?

¹⁸ Aok, ke kutena me srifwe su sun kut, kut etu la kut keok ke sripen kut suk meet Jeova a Togusrai lal, a kut nunku ma inge oanu sie me sang a kut insemwomwo in muteng. Kut eis ku su tuku ke kas in akkeye lal Piter: “Fwin akkolukyeyuk komwos ke en Kraist, komwos in insemwomwo, tu ngun lun ma mwomwo a lun God on fwomwos.” (1 Piter 4:14) Ke ku lun ngun mutal lun Jeova, oasr ku lasr in mongfwusesr a muteng ke me srifwe yok puspis, ke mwolanu a kaksak lal.​—2 Korint 4:7; Efesus 3:16; Filippai 4:13.

[Footnotes]

Ya Kom Ku In Aketeye?

• Mea nunuk lun met Kristian ke me keok a kolyai?

• Mea kut ku in lotela ke inkanek su Jisus a kutupa met oaru elos akkalemye ke pal se elos muta ye me srifwe?

• Efu ku sie inkanek lalmetmet in tia suk foloksak ke pal se elos akkeokye kut?

• Kain in engun fuka akkeyel Jisus ke me srifwe nu kemwa su sunol, a mea kut ku in lotela ke ma se inge?

[Box/Pictures on page 23]

Oiye Fuka Elos Akkalemye ke Kolyai

• Meet liki met meun lal Herod elos tuku nu Betleem in uniye mokul awowo nu kemwa su matwelos oasr ke yiu luo nu ten, ke kasru lun lipufon, Josef a Mary elos kaeng a wisella awowo Jisus in an Ijipt.​—Mattu 2:13-16.

• Pal puspis ke lusen pal in orekma lun forfor lun Jisus, met lokwalok lal elos suk in unilye ke sripen ma lo fukoko lal. Jisus el kaengla lukelos ke ma sikyuk inge nu kemwa.​—Mattu 21:45, 46; Luk 4:28-30; Jon 8:57-59.

• Ke pal se met solse puspis a leum puspis lun solse elos tuku nu imae Gethsemane in sroukilyel Jisus, el akkalemyel sifwanu, a pal luo el fwak nu selos: “Ela Ngao.” El sapkin pa nu sin met tuma lutlut lal in tia lainelos a el lela un met koluk inge in sroukilyel a wisella.​—Jon 18:3-12.

• In an Jerusalem, elos sruokilyel Piter a kutu sin met tuma lutlut, elos unellosla, a sapkin nu selos in tia sifwil sramsram kel Kraist. Aok, tokin fulelosla, elos “fwasr liki . . . , a len nu kemwa in tempel a yen selos, elos tia tari in luti a fwakulak Jisus tu el Kraist.”​—Orekma 5:40-42.

• Ke pal se Soul, su tok el ekla met sap Poul, el lotela papu koluk lun met Ju su akola in unilye in an Damascus, met lili elos esel ke fong a koella likin potu in sie kuompal, a el kaeng.​—Orekma 9:22-25.

• Yiu puspis toko, Poul el sulela in tu ye mutun nununku lal Sisar, fwinne Governor Festus a Togusra Agrippa elos tia koneak kutena ma nu sel “fwal nu ke mise ku me kapur.​—Acts 25:10-12, 24-27; 26:30-32.

[Pictures on page 24, 25]

Fwinne elos mokleyuk ke ku in kaeng ke sripen kolyai upa, tausen puspis sin Met Lo oaru in an Malawi elos tafwela na ke insemwomwo in oru orekma lun Togusrai

[Pictures on page 25]

Engun in akmutalye en Jeova pa akkeye met oaru inge in mongfwusesr ke fwafwasyesr lun Nazi pangpang death march a nien kapur lulap pangpang concentration camps

[Credit Line]

Death march: KZ-Gedenkstätte Dachau, courtesy of the USHMM Photo Archives

[Pictures on page 26]

Me srifwe a ma upa puspis ku in sikyuk ke kain in luma puspis