Efu Kut Enenu In Sekalani In Pre?
“Komwos in pre a tia sisla. Komwos in sang kulo in ma nu kemwa.”—1 Tessalonika 5:17, 18.
1, 2. Fuka Daniel el akkalemye la el arulanu aksaokye pal mwo lal in pre, a mea ma inge el oru nu ke futoto lal nu sin God?
OASR fasin lal met palu Daniel in pre nu sin God pal tolu in len se. El utyuk nu in loom sel a sikukmutunti sisken windo su ikakla nu leyen siti lun Jerusalem, a el pre we. (1 Togusra 8:46-49; Daniel 6:10) Fwinne ma sap orekla tari su sapkinyuk nu sin met nu kemwa in tia pre nu sin kutena met, a nu sel Daraius mukena, togusra lun Media, tusruktu Daniel el tia fuleak ku tui in pre. Fwinne el oasr ke me sensen ku tia, mokul se inge el pre nu sin Jeova pal e nu kemwa.
2 Mea nunuk lun Jeova nu sel Daniel? Ke pal se lipufon Gebriel el tuku in sang topuk nu ke pre lal Daniel, el pangnol Daniel “sie met su arulanu kulu” ku “sie mokul su arulanu kulu.” (Daniel 9:20-23; The New English Bible) Ke kas palu lal Ezekiel, Jeova el pangnol Daniel oanu sie met sumwosmwos. (Ezekiel 14:14, 20) Arulanu kalem la, ke lusen moul lal nu fon, pre lal Daniel kol nu ke sie moul futoto nu sin God, su fwinne Daraius el akilen ma inge.—Daniel 6:16.
3. Oanu experience lun sie missionary el lungse in akkalemye, fuka pre ku in kasre kut in srukye na oaru lasr?
3 Pre pal nu kemwa ku in kasre kut pa in etu fuka in sun me srifwe yok. Ke sie me pupulyuk, loang nu ke ma sikyuk sel Harold King, sie missionary in an China su lisyukla a sapkinyuk in muta ke sie nien kapur upa ke lusen yiu limekosr. Ke ma sikyuk inge nu sel, Brother King el fwak: “Saap elos sriyukla liki met, tusruktu, wangin kutena met su ku in sriyukla liki God. . . . Ke ma inge, ye mutun kutena met su alukela liki cell luk ku infwokil in kapur luk, Nga sikukmutunti pal tolu in len se a pre ke pusra lulap, Nga esamal Daniel, su oasr ke me sramsram lun Baibel. . . . Nga akilen la ke pal inge ngun mutal lun God el kolla nunuk luk ke ma saok emeet a oru Nga in pulakin misla. Pre el ase na paye sik ku a me pwarak!”
4. Kain in kusensiyuk fuka ke pre kut akola in sramsramkin ke me lutlut inge?
4 Baibel el fwak: “Komwos in pre a tia sisla. Komwos in sang kulo in ma nu kemwa.” (1 Tessalonika 5:17, 18) Ke kut nunku nu ke kas in kai inge, lela kut in loang akmwoye nu ke kusensiyuk inge: Efu kut enenu in loang akmwoye ke pre lasr? Mea sripe puspis lasr paenang kut osun nu sin Jeova pal e nu kemwa? A mea kut enenu in oru kut fwin pulakin la kut sufwal in osun nu sin God ke pre ke sripen sesumwos lasr?
Musaiyuk Oiyen Kamwuk Ke Inkanek lun Pre
5. Kain in oiyen kamwuk sakuruk fuka pre el ku in kasre kut in eis?
5 Ya kom lungse Jeova in nunke kom oanu met kamwuk se lal? El sramsram kel Ebream ke oiye se inge. (Isaia 41:8; Jemes 2:23) Jeova el lungse kut in akkapye kain in moul futoto inge nu sel. El suli kut in kalukyung nu sel. (Jemes 4:8) Ya me solsol inge oru kut in nunku yok ke me sang lun pre? Arulanu upa in orala sie appointment in sramsram nu sin sie met kol pengpeng lun guferment, paenang saap kut nunku la kut tia ku in ekla na paye met kamwuk lal! Aok, Met su Orala kosrao a fwalu el kaifwe kut in sukosok in sunol ke pre, pal nu kemwa kut lungse ku ke pal nu kemwa kut enenu in oru ou inge. (Sam 37:5) Pre lasr pal nu kemwa ku in kasre kut in futoto nu sin Jeova.
6. Mea me srikasrak lun Jisus el lungse in luti kut ke me enenu in “pre pal e nu kemwa”?
6 Tusruktu, arulanu fwusesr na paye sesr in mulkunla pre! Ma upa nu kemwa lun moul su sun kut ke len nu kemwa arulanu fwusesr in purakak nunuk lasr paenang ma inge oru kut in tia kaifweung in sramsram nu sin God. Jisus el kaifwe nu sin met tuma lutlut lal in “sekalani in pre,” a el sifwanu oru ou inge. (Mattu 26:41) El fwinne kafofo pal nu kemwa ke ma puspis mutamwauk ke lututeng nu ke eku, tusruktu, el pakiye pal lal in sramsram nu sin Papa tumasr in kosrao. Kutupal, Jisus el tukakek “ke lututeng meet liki lenelik,” in pre. (Mark 1:35) Kutupal, el mukena som nu ke sie an ke saflaiyen len tu el an ku in sramsram nu sin Jeova. (Mattu 14:23) Jisus el pakiye pal in pre lal pal nu kemwa, paenang kut enenu pa in oru ou inge.—1 Piter 2:21.
7. Kain in luma a ma sikyuk puspis fuka mokle kut in sramsram nu sin Papa tumasr in kosrao ke len nu kemwa?
7 Oasr pal mwo puspis lasr in pre ke kais sie len ke kut sun ma upa, me srifwe, a ke kut oru sulela lasr. (Efesus 6:18) Ke kut suk kolyuk lun God ke moul lasr kemwa, moul in kamwuk lasr nu sel fwa kapkapek na paye. Fwin met luo su arulanu kamwuk sie sin sie elos sun ma upa, ya ma inge tia orala me kapur in kamwuk lalos in ku liki meet? (Soakas 17:17) Ma inge arulanu paye pa nu sesr ke pal se kut fungla nu sin Jeova a eis kasru lal.—2 Kronikel 14:11.
8. Fwin ke me srikasrak lal Niemaia, Jisus, a Hanna, mea kut ku in lotela ke lusen pre lasr?
8 Sie me insemwomwo na paye in etu la God el tia filiye lupan pal ku lusen pal su kut ku in orekmakin in sramsram nu sel ke pre! Niemaia el silaklak in pre ke misla meet liki el sramsram ke me siyuk lal nu sin togusra lun an Persia. (Niemaia 2:4, 5) Jisus el oru pa sie pre futoto ke pal se el siyuk sin Jeova in sang nu sel ku in akmoulyeak Lazarus. (Jon 11:41, 42) Ke siepa ma sikyuk, Hanna el, “sukalang pre nu sin Jeova” ke pal se el pre insiel nu sel. (1 Samuel 1:12, 15, 16) Pre lasr ku in futoto ku loes fwal nu ke me enenu a ma sikyuk.
9. Efu ku kut enenu in toeni ke pre lasr sang kulo nu kemwa ke ma nu kemwa su Jeova el oru nu sesr?
9 Pre puspis in Baibel akkalemye sang kulo a akilenyen mwal fulat a orekma sakuruk nu kemwa lun Jeova. (Exodus 15:1-19; 1 Kronikel 16:7-36; Sam 145) Ke sie arurumu, met sap Jon el liye met elder 24—pa inge pise nu fon lun met Kristian akmusrala ke kunokon lalos in kosrao—elos kaksakin Jeova, a fwak: “Fwal nu sum, Jeova lasr a God lasr, tu kom in eis mwolanu a kaksak a ku, tu kom orala ma nu kemwa, a ke lungse lom elos on, a orekla tari.” (Fwakyuk 4:10, 11) Oasr sripe lasr kemwa pa in sang kaksak nu sin Met Orekutla pal nu kemwa. Papa a nine elos arulanu insemwomwo na paye ke pal se tulik nutulos sang kulo ke insielos kemwa ke ma elos oru nu sel! In nunku ke insemwomwo ke lungkulang lun Jeova a in akkalemye kulo nu ke ma inge pa sie inkanek in akkapye oiyen pre lasr.
“Komwos in Pre a Tia Sisla”—Efu?
10. Mea pre el ku in oru in akkeye lalalfongi lasr?
10 Pre pal e nu kemwa arulanu yok sripe ke lalalfongi lasr. Tokin el sang me pupulyuk ke me enenu nu sin met in “pre a tia sisla,” Jisus el siyuk: “Tusruktu, ke Mwen nutin met el tuku, ya el fwa konoiyukyuk lalalfongi fwin fwalu?” (Luk 18:1-8) Pre mwomwo su tuku ke inse arulanu akkeye lalalfongi. Ke pal se met patriarch Ebream el matou a sonna oasr tulik nutul, el sramsram nu sin God ke ma se inge. In topukol, Jeova el siyuk meet nu sel in ngetuk nu in kosrao a oekla itu nu kemwa, el fwin ku. Tokin ma inge God el akkeyel Ebream: “Fute lom e fwa ou inge.” Fwokin ma inge? Ebream el “lalalfongi Jeova, a el oek ma inge nu sel oanu ma sumwosmwos.” (Genesis 15:5, 6) Kut fwin ikasla insiesr nu sin Jeova ke pre, eis kas in akkeye lal su tuku ke Baibel, a aksol, el e fwa akkeye lalalfongi lasr.
11. Fuka pre ku in kasre kut in aksumwosye ma upa puspis lasr?
11 Pre el ku in kasre kut pa fuka in aksumwosye ma upa puspis. Ya moul lasr ke len nu kemwa oanu me utuk toasr a luma a ma sikyuk su kut sun arulanu upa? Baibel el akkalemye nu sesr: “Filiye me utuk lom fwin Jeova, a el e fwa kasre kom. El koflanu filiye met sumwosmwos tu in mokuikui.” (Sam 55:22) Ke pal se kut enenu in oru sulela upa, kut ku in etawi me srikasrak lun Jisus. El orekmakin fong fon se nu fon ke pre meet liki el sulela a pakiye met sap 12 lal. (Luk 6:12-16) A ke fong se meet liki el mise, Jisus el insieneung ma lulap in pre a ma inge orala “fiyol ekla oanu tulik sra lulap su putatla nu in foko.” (Luk 22:44) Mea fwokin ma inge? “Longyuk tari el ke sangeng sin God lal.” (Hibru 5:7) Kaifweung lasr in pre su tuku ke insiesr fwa ku in kasre kut in muteng ke ma upa a me srifwe puspis.
12. Fuka akmwuk lun pre el akkalemye la Jeova el nunke kut?
12 Siepa sripe efu kut enenu in kalukyung nu sin Jeova ke inkanek lun pre pa, meyen el lungse in kalukot nu yurosr. (Jemes 4:8) Ke pal se kut ikasla insiesr nu sin Jeova ke pre, ya kut tia akilen la el arulanu nunku ke me enenu lasr a el kurungin kut? Kais sie sesr akilen lungse lun God ke inkanek puspis. Jeova el tia pakiye ku sang kunokon nu sin kutena met in aolul in long pre nu kemwa lun met kulansap lal su elos akkalemye nu sel oanu Papa tumalos in kosrao. (Sam 66:19, 20; Luk 11:2) A el suli kut in ‘likiye nu kemwa sensen lasr nu fwel, tu el kurungin kut.’—1 Piter 5:6, 7.
13, 14. Mea sripe puspis paenang kut enenu in pre pal e nu kemwa?
13 Pre el ku in ase nu sesr moniyuk lulap ke orekma lun forfor a akkeye kut ke pal se srunga a me lain mokle kut in fuleak. (Orekma 4:23-31) Pre el ku in kurungin kut pa in tu “lain kutasrik lun Devil.” (Efesus 6:11, 17, 18) Ke pal se kut kaifweung in muteng nu ke ma upa nu kemwa in len nu kemwa kut ku in siyuk sin God in akkeye kut. Toeni nu ke pre lun Jisus nu sin Jeova su el ase nu sesr oanu me srikasrak se pa me siyuk in “eskutla liki ma koluk,” Setan su Devil.—Mattu 6:13.
14 Kut fwin kaifweung in pre ke kasru in kutongye kena koluk lasr, kut fwa ku in pula kasru lun Jeova. Kas paye inge oasr yurosr: “God el oaru, su fwa tia liki komwos in srifweyuk yok liki ku lomwos, a in me srifwe el fwa oru inkanek in kaengla tu komwos in ku ka.” (1 Korint 10:13) Met sap Poul el sifwanu pulakin me kasru lun Jeova su arulanu akkeyel ke inkanek puspis. “Nga ku in oru ma nu kemwa in el su akkeye yu,” pa inge ma el fwak.—Filippai 4:13; 2 Korint 11:23-29.
Sikalani in Pre Fwinne Oasr Munas Lom
15. Mea sikyuk fwin oiye lasr el sufwal nu ke akmwuk lun God?
15 Kut fwin lungse God in long pre lasr, kut enenu in tia srunga kas in kai su tuku ke Kas Lal. “A kutena ma kut siyuk ka, kut eis sel,” met sap Jon el simusla, “meyen kut liaung ma sap lal, a oru ma su me insemwomwo ye mutal.” (1 Jon 3:22) Tusruktu, mea sikyuk, fwin oiye lasr el tia sun akmwuk lun God? Edam a If elos mwukla tokin elos oru ma koluk ke imae lun Eden. Saap kut ku in mokleyuk pa in mwukla “liki mutun Jeova” a tui in pre. (Genesis 3:8) “Pal nu kemwa, Nga koneak la step sesumwos emeet lun met nu kemwa su som liki Jeova a u lal pa elos tui in pre,” pa inge ma Klaus el fwak, sie met fwafwasyesr ke lusen yiu puspis. (Hibru 2:1) Pa inge ma sikyuk nu sel José Ángel. El fwak: “Apkurun nu ke yiu alkosr, Nga pre na kais kutu pal nu sin Jeova. Nga pula tu Nga arulanu sufwal in sramsram nu sel, fwinne Nga srakna nunkel oanu Papa tumasr in kosrao.”
16, 17. Sang me srikasrak fuka pre pal e nu kemwa ku in kasre kut in kutangla liki munas lasr in ngun.
16 Kutu sin met inmaslosr saap pulakin la kut sufwal in pre ke sripen munas lasr in ngun ku ke sripen kut putatla nu ke ma koluk. Tusruktu, pa inge na paye pal su kut enenu in orekmakin me insemwomwo nu kemwa su tuku ke pre. Jona el som liki kunokon lalos. Tusruktu, ‘ke pal in ongoiye lal el pang nu sin Jeova, a El topuk nu sel. El pang liki insien Sheol, a Jeova el long pusrel.’ (Jona 2:2) Jona el pre, Jeova El topkol, a Jona el sifwil akkeyeyukla in ngun.
17 José Ángel el pre pa ke kasru. El esam: “Nga ikasla insiuk a Nga siyuk sin God in nunuk munas nu sik. A el kasre yu na paye. Nga tia lalalfongi la Nga ku in sifwil foloko nu ke ma paye fwin tia ke kasru lun pre. Ke pal inge, Nga pre pal nu kemwa ke len nu kemwa, a Nga ngetuk nu ke pal inge.” Kut enenu in pulakin sukosok in sramsram nu sin God ke ma koluk lasr a siyuk sel in nunuk munas nu sesr ke inse pusisel. Ke pal se Togusra David el fwakak ma koluk lal, Jeova el nunuk munas nu ke ma koluk lal. (Sam 32:3-5) Jeova el lungse in kasre kut, a tia in liskutla. (1 Jon 3:19, 20) A pre lun met matu in congregation ku in kasre kut in ngun, meyen me siyuk lalos ke inkanek lun pre “yok orekma la.”—Jemes 5:13-16.
18. Kain in lalafongi fuka met kulansap lun God elos ku in srukye fwinne arulanu yok tafongla lalos?
18 Ya oasr kutena papa su lisyukla tulik nutul su sunol ke inse pusisel in siyuk ke kasru tokin el oru sie ma tafongla? Me pupulyuk ke tulik engunyar se akkalemye la fwinne arulanu yok ma tafongla su kut oru, Papa tumasr in kosrao el arulanu insemwomwo kut fwin foloko nu sel. (Luk 15:21, 22, 32) Jeova el kaifwe nu sin met nu kemwa su tafongla in pangnol, “tu el fwa arulanu nunuk munas ke ma koluk lalos.” (Isaia 55:6, 7) Fwinne Devid el oru kain in ma koluk upa puspis, tusruktu el pangnol Jeova, a fwak: “Lipsre pre luk, O God; a nik kom mwukla liki me siyuk luk.” El ouyepa fwak: “Eku a lutu, a infwulwen len, Nga fwa torkaskas, a sao, a el [Jeova] fwa long pusrek.” (Sam 55:1, 17) Me akkeye na paye pa inge!
19. Efu ku tia sumwos in nunku la pre lasr nu kemwa su tia eis topuk elos inge me akpayeye la God el tia insese ka?
19 A fuka fwin me siyuk lasr tia sa in eis topuk? Fwin ou inge, kut enenu in tuni fwin me siyuk lasr fwal nu ke ma lungse lun Jeova a kut siyuk ma inge in en Jisus. (Jon 16:23; 1 Jon 5:14) Met tuma lutlut Jemes el sramsram ke kutu met Kristian su tia eis topuk ke pre lalos ke sripen elos “siyuk koluk.” (Jemes 4:3) Ke inkanek saye, kut tia enenu in silaklak in fwak la pre lasr nu kemwa su tia silaklak in eis topuk akkalemye la God el tia insese ka. Kutupal, Jeova el lela met kulansap oaru lal in tafwela in siyuk ke ma se ke pre ke lusen sie pal meet liki el sang topuk ka. “Siyuk, a a fwa etukot nu sumwos,” Jisus el fwak. (Mattu 7:7) Ke ma inge, kut enenu in “sikalani in pre.”—Rom 12:12.
Pre Pal E Nu Kemwa
20, 21. (a) Efu kut enenu in sikalani in pre ke “len safla inge”? (b) Mea kut ku in eis ke pal se kut osun nu sin Jeova len nu kemwa ke tron lun lungkulang lal?
20 Me srifwe a ma upa yokyokelik na paye ke “len safla” se inge, a ma inge ku in akilen ke “sie pal su arulanu upa in muteng.” (2 Timote 3:1) A me srifwe puspis arulanu fwusesr in akkafofoye nunuk lasr. Tusruktu, pre lasr pal e nu kemwa ku in kasre kut in fwasr pal nu kemwa ke inkanek sumwos lun ngun fwinne oasr ma upa, me srifwe, a me asor yok. Pre lasr ke len nu kemwa nu sin Jeova ku in wise me kasru su kut enenu.
21 Jeova, el “su long pre,” el tia kafofo tu in wanginla pal in long kut. (Sam 65:2) Lela kut in tia kafofo na paye tu in wanginla pal lasr in sramsram nu sel. Kamwuk lasr nu sin God pa ma saok emeet su oasr yurosr. Lela kut in aksaokye ma inge a tia pilesru. “Ke ma inge, lela kut in pulaik in kalukyung nu ke tron lun kulang, tu kut fwa eis pakoten, a konoiyukyuk kulang in kasre kut in pal enenu.”—Hibru 4:16.
Fuka Kom Ku In Topuk?
• Mea kut ku in lotela sel met palu Daniel ke lupan saok lun pre?
• Fuka kut ku in akkeye kamwuk lasr nu sin Jeova?
• Efu kut enenu in sikalani in pre?
• Efu ku pulakin sufwal tia enenu in kutongkuti tu kut in tia pre nu sin Jeova?
[Picture on page 12]
Niemaia el oru pre futoto meet liki el sramsram nu sin togusra
[Picture on page 13]
Hanna “el oru pre loeloes nu sin Jeova”
[Pictures on page 14]
Jisus el pre fong fon se meet liki el sulela a pakiye met sap 12 lal
[Pictures on page 16]
Pal mwo puspis in pre ku in sikyuk ke len nu kemwa