Me Sramsram Ke Ma Lun Ngun Musaiyuk Met

“Komwos in tia lela kas fokfok in som liki oalumwos, a kutena su mwo, kas in musaiyuk fwal nu ke enenu, tu in sang kulang nu sin su porongo.”​—EFESUS 4:29.

1, 2. (a) Fuka lupan saok lun ku lun met in sramsram? (b) Fuka met kulansap lun Jeova elos kena in orekmakin ku lalos in sramsram?

“KU LUN met in kaskas sie ma lukma; sie me sang pa inge su tuku sin God, sie menmen.” Pa inge ma Ludwig Koehler sie met lexicographer el simusla. Saap kut tianu arle loang ke me sang saok inge lun God. (Jemes 1:17) Tusruktu lela kut in nunku ke ma tula yok ke pal se stroke el kunausla ku lun sie met su kut lungse in sramsram ke lalmetmet. “Oasr inkanek a akmwuk in sramsram sakuruk lasr su oru kut in futoto sie sin sie,” pa inge ma Joan el aketeye, mokul tumal el tufwanu keok ke stroke. “Nga arulanu asroela sramsram lasr nu sin sie sin sie!”

² Sramsram inmaslon met se met se ku in akkeye oiyen kamwuk, aksumwosye me fos, akkeye met asor, akkeye lalalfongi, a akinsemwomwoye moul lun metu​—tusruktu akmwuk in sramsram tia ku in siefwanu akpayeye ma inge nu kemwa. Togusra lalmetmet Solomon el tuni: “Oasr kutu su kaskas mongkeke oanu fwakfuk lun sie kutlas, a loan met lalmetmet, moul mwo.” (Soakas 12:18) Oanu met kulansap lun Jeova, kut lungse inkanek in sramsram lasr in akkeye a musaiyuk kutu met a tia in akngalaye ku kunausla kutu met. Kut lungse pa in orekmakin loasr in kaksakin Jeova, ke orekma lun forfor a ke sramsram lasr nu sin kutu met. Met sim lun Sam el on: “In God kut konkun in lusen len nu kemwa, a kut fwa sang kulo nu ke em ma patpat.”​—Sam 44:8.

3, 4. (a) Kain in ma upa fuka kut nu kemwa sun ke ku lasr in sramsram? (b) Efu ku yok sripe ku lasr in sramsram?

³ Met tuma lutlut Jemes el sang kas in sensen ke “loasr,” “wangin met ku in akmunaye loa.” El akesmakinye kut: “Tu in ma puspis kut nu kemwa tukulkul. Kutena met fwin tia tukulkul in kas, el inge met fwal, a el ku pa in kutkutong manol nu fon.” (Jemes 3:2, 8) Wangin met sumwosmwos inmaslosr. Ke sripe se inge, fwinne kut lungse na paye in orekmakin loasr ke inkanek sumwos, kas lasr tia pal nu kemwa me akkeye kutu ku sang kaksak nu sin Met Orekutla. Ke ma inge, kut enenu in taran ke ma kut fwak. Sayen ma inge, Jisus el fwak: “Tu kas losrongten nu kemwa ma metu fwak, elos fwa fwakak ka in Len in Nununku; tu kom fwa aksumwosyeyuk ke kas lom, a ke kas lom kom fwa lisyukla.” (Mattu 12:36, 37) Aok, God paye el nununke kut fwal nu ke ma kut fwak.

⁴ Sie inkanek in fwasr liki lisrek pa in akkapye sie kain in oiye su insemwomwo in sramsramkin ma lun ngun. Me lutlut el aketeye fuka kut ku in oru ou inge, kain in me sramsram fuka kut ku in sramsramkin, a, kain in me lane fuka kut ku in eis su tuku ke me sramsram su ku in musaiyuk met.

Loang Akmwoye nu ke Ma Oasr ke Insiesr

5. Fuka insiesr el sang kasru yok in akkeye me sramsram su ku in musaiyuk kutu met?

⁵ In akkapye sie kain in oiye mwo su lungse in sramsramkin ma mwomwo su musaiyuk met, kut enenu meet in akilen la ma nu kemwa kut fwak akkalemye ma oasr ke insiesr. Jisus el fwak: “Tu oalu kaskas ke ma puspis su oan inse.” (Mattu 12:34) Pal nu kemwa, kut lungse in sramsram ke ma puspis su yok sripe nu sesr. Ke ma inge, kut enenu in siyuk sesr sifwanu: ‘Mea sramsram luk el lungse in akkalemye ke ma oasr ke insiuk? Ke pal se Nga muta yurin sou luk ku met lili wiuk in lalalfongi, ya me sramsram lasr oakiyuki nu ke ma lun ngun ku kut sramsram yok ke sritel, nuknuk, pitse mokuikui, mongo, ke ma sasu su Nga tufwanu moli, ku ke ma puspis su tianu arle yok sripe?’ Saap kut tia akilen la, moul lasr a nunuk lasr oakiyuki nu ke ma su tia yok sripe. Kut fwin aksumwosye a sulela ma yok emeet, ma inge ku in akkapye oiyen sramsram lasr a moul lasr.​—Filippai 1:10.

6. Mea ip lun nunuk meet ke inkanek in sramsram lasr?

⁶ Siepa inkanek in akkapye akmwuk in sramsram lasr pa ke kut kalweni me lutlut ke nunuk lasr. Kut fwin kaifweung in nunku ke ma lun ngun, kut ku in koneak la kut akola pal nu kemwa in sramsramkin ma inge. Togusra Devid el liye ma paye ke ma se inge. El on: “Lela kas in oalik a nunuk insiuk in mwo ye mutom, O Jeova.” (Sam 19:14) A met on Asaph el fwak: “Nga fwa nunkauk pa ke orekma lom [God] nu kemwa, a nunku ke ma kom orala.” (Sam 77:12) Sie inse a nunuk su loang yok ke ma paye lun Kas lun God fwa sesesla ke kas in kaksak. Jeremaia el tia ku in kutongyel sifwanu in tia kaskas ke ma puspis su Jeova el luti nu sel. (Jeremaia 20:9) Kut ku in oru pa ou inge kut fwin nunku pal nu kemwa ke ma lun ngun.​—1 Timote 4:15.

7, 8. Kain in me sramsram fuka arulanu mwo su ku in musaiyuk met?

⁷ Lutlut mwo lasr pal nu kemwa ke ma lun ngun ase nu sesr sifwe srisrik puspis su kut ku in orekmakin oanu me akkeye kut fwin sramsram nu sin kutu met. (Filippai 3:16) Toeni lulap, convention, meeting lun congregation, me rid sasu, koanon len a comment lal, ma inge nu kemwa ase nu sesr eot saok puspis in ngun su arulanu kato a ma inge kut ku in sang nu sin kutu met. (Mattu 13:52) Experience nu kemwa lasr ke orekma lun forfor oanu met Kristian me purakak na paye in ngun!

⁸ Togusra Solomon el arulanu insemwomwo a lut ke kain in sak nu kemwa, kain in kosro nu kemwa, kain in mwon nu kemwa, a kain in ik nu kemwa su el liye in an Israel. (1 Togusra 4:33) El arulanu insemwomwo in sramsramkin orekma sakuruk puspis lun God. Kut ku in oru pa ou inge. Met kulansap lun Jeova elos insemwomwo in sramsramkin kain in me sramsram puspis, tusruktu ma lun ngun pa me sramsram yok pal nu kemwa lun met su nunku yok ke ma lun ngun.​—1 Korint 2:13.

“Komwos in Nunku ke Ma Inge”

9. Kain in kas in kaifwe fuka Poul el sang nu sin met Filippai?

⁹ Ke kutena sifwen sramsram, me sramsram lasr ku in musaiyuk kutu met fwin ma inge fwal nu ke kas in kaifwe lal met sap Poul nu ke congregation in an Filippai. El simusla: “Kutena ma su paye, kutena ma su sumwos, kutena ma su sumwosmwos, kutena ma su nasnas, kutena ma su mwo oiye, kutena ma su pengpeng mwo, a fwin oasr kutena me kaksak, komwos in nunku ke ma inge.” (Filippai 4:8) Ma puspis su Poul el srukak arulanu yok sripe paenang el fwak “komwos in nunku ke ma inge.” Kut enenu in nekla nunuk lasr a insiesr ke ma inge. Aok, lela kut in liye fuka loang akmwoye lasr ke kais sie ke ma alkosr inge su Poul el srukak ku in kasre kut ke sramsram lasr nu sin kutu met.

10. Fuka kut ku in toeni ma paye nu ke me sramsram lasr?

¹⁰ Kut fwin lungse in etu fwin ma se el paye, kut enenu mukena me lutlut sumwos a tia sito. Ma inge el sramsram ke ma sumwos a sumwosmwos, oanu ma paye su ku in konoiyukyuk ke Kas lun God. Ke ma inge, ke pal se kut sramsram nu sin kutu met ke ma paye lun Baibel su purakak insiesr, ke me sramsram su arulanu akkeye kut, ku ke kas in kai su tuku ke Ma Simusla su ku in kasre kut, kut nunku ke ma puspis su paye. Ke inkanek saye, kut srunga “ ‘etauk’ in kikiap,’ su oanu luman paye tusruktu, sito. (1 Timote 6:20) A kut srunga in tatafla lisrek nu sin kutu met ku sromon experience su metu tia ku in akilen fwin paye ku sito.

11. Mea ma puspis su mwo oiye kut ku in toeni nu ke me sramsram lasr?

¹¹ Kutena ma su sumwos pa kain in me sramsram su yok sripe a nasnas, a tia ma wangin sripe. Toeni nu ke ma inge pa me sramsram yok ke orekma lun forfor lasr oanu met Kristian, ke pal in ongoiye su kut muta inge, a ke me enenu nu sesr in srukye sie oiye nasnas. Ke pal se kut sramsram ke ma yok sripe inge nu kemwa, kut akkeye kaifweung lasr in tia motul in ngun, in oaru pal nu kemwa, a in tafwela in luti ke peng mwo. Paye, experience mwomwo puspis ke orekma lun forfor lasr a ke ma sikyuk in len lasr su akismakinye kut la kut moul ke len safla ase nu sesr kain in me sramsram puspis su ku in purakak kutu met.​—Orekma 14:27; 2 Timote 3:1-5.

12. Fwal nu ke kas in kai lal Poul nu sesr in nunku ke sumwos a nasnas, mea ma inge su kut enenu in fwasr liki?

¹² Kas se inge ma sumwosmwos ku in kalmekin, sumwosmwos ye mutun God​—sun akmwuk fulat lal. Kutena ma su nasnas el ku in kalmekin nasnas in nunuk a oiye. In kunausla enen kutu met ke kas kikiap, aksruksruk fokfok, ku kas fokfok su oasr kalme luo tia enenu in orekmakin ke me sramsram lasr. (Efesus 5:3; Kolosse 3:8) Ke nien orekma ku ke loom lutlut, met Kristian nu kemwa elos som liki un met su mutamwauk in toeni kas fokfok inge ke me sramsram lalos.

13. Sang me srikasrak ke me sramsram su sramsramkin ma puspis su mwo a pengpeng mwo.

¹³ Ke pal se Poul el kaifwe nu sin met in sramsramkin kutena ma su mwo oiye, el lungse in akkalemye ma puspis su ku in wise me insemwomwo a me purakak ke lungse a el lain srunga, men, ku mulat. Kutena ma su pengpeng mwo el sramsram ke kain in me sramsram mwomwo nu kemwa. Toeni nu ke me sramsram inge pa, me sramsram ke moul lun met lili wiesr mokul a mutan oaru su ku in liyeyuk pal nu kemwa ke Tauer In San a Awake! magasin. Efu ku kom tia sromon nu sin kutu met pulakin lom tokin kom ridi me sramsram inge su ku in akkeye lalalfongi lun met? A fuka sie me insemwomwo na paye in long kapkapek in ngun lun kutu met! Kain in me sramsram inge ku in musaiyuk lungse a inse siefwunnu lun congregation.

14. (a) In akkalemye ma mwo el siyuk sesr in mea? (b) Fuka kut ku in toeni nu ke kas lasr kas in kaksak puspis?

¹⁴ Poul el sramsram ke “kutena ma mwo.” Kutena ma mwo el sramsram ke ma mwo puspis ku oiyen moul nasnas. Kut enenu in taran a orala inkanek in sramsram lasr in fwal nu ke akmwuk lun Ma Simusla a el tia som liki ma sumwosmwos, nasnas, a mwo. Kutena me kaksak ku in kalmekin “fwal in eis kaksak.” Kom fwin long sie me sramsram mwo ku liye sie me srikasrak mwo in congregation, kom enenu in sramsramkin ma inge​—nu sin met su oru ou inge a nu sin kutupa met. Met sap Poul el kaksakin pal nu kemwa oiye mwo puspis lun met lili wiel in lalalfongi. (Rom 16:12; Filippai 2:19-22; Failimon 4-7) A, paye, ma orekla nu kemwa lun Met Orekutla fwal in eis kaksak. Ma inge nu kemwa ase nu sesr me sramsram puspis su kut ku in orekmakin in musaiyuk kutu met.​—Soakas 6:6-8; 20:12; 26:2.

Akesrui ke Me Sramsram Su Ku in Musaiyuk Kutu Met

15. Kain in ma sap fuka su tuku ke Ma Simusla sang kunokon nu sin papa a nine in oru sramsram mwomwo nu sin tulik nutulos?

¹⁵ Duteronomi 6:6, 7 el fwak: “A kas inge, su Nga sapkin nu sum misenge, fwa on insiom; a kom fwa alken in luti ma inge nu sin tulik nutom, a kom fwa kaskas ka ke kom muta in loom sum, a ke kom fwasr inkaneku, a ke kom onu, a ke kom tukakek.” Arulanu kalem, ma sap inge el siyuk sin papa a nine in oru sramsram mwo, ke ma lun ngun nu sin tulik nutulos.

16, 17. Mea papa a nine Kristian elos ku in lotela ke me srikasrak lun Jeova a Ebream?

¹⁶ Kut ku in nunku ke sramsram loeloes lun Jisus nu sin Papa tumal in kosrao ke pal se elos sramsram ke kunokon lal fwin fwalu. “Papa su supeyume, el ase nu sik ma sap, ma Nga fwak, a ma Nga fwa kaskas ka,” Jisus el fwak nu sin met tuma lutlut lal. (Jon 12:49; Duteronomi 18:18) Met patriarch Ebream el orekmakin aur puspis in sramsram nu sel Isaak mwen nutul fuka Jeova el akinsemwomwoyelos a papa matu tumalos. Paye, kain in me sramsram inge sang kasru yok nu sin Jisus a Isaak in akpusisilyelos sifwanu in oru ma lungse lun God.​—Genesis 22:7-9; Mattu 26:39.

¹⁷ Tulik nutusr nu kemwa elos enenu pa kas in akkeye. Papa a nine elos enenu in pakiye pal in sramsram nu sin tulik nutulos fwinne elos arulanu kafofo. Fwin ku, efu kom tia pakiye pal in tukeni mongo fwinne pal se ke len se? Ke lusen pal in mongo ku tokin ma inge, oasr pal mwo yok lun sou in sramsram su ku in akkeye na paye ku lun ngun in sou.

18. Sromon sie experience su akkalemye ma lane yok su tuku ke me sramsram mwo inmaslon papa a nine a tulik.

¹⁸ Alejandro, sie pioneer su yiu 20 matwe, el esam me alollo su oasr yurol ke pal se el yiu 14 matwe. El fwak: “Ke sripen me purakak su tuku sin tulik lutlut a met luti su tia lalalfongi ke God a ke ma paye lun Baibel. Paenang papa a nine kiuk elos arulanu mongfwusesr in sramsram nu sik ke lusen aur puspis. Sramsram lasr inge kasre yu na paye tia in kutangla liki alollo luk mukena ke lusen pal in ma upa, a, ma inge el kasre yu pa in oru sulela mwo ke moul luk.” A fuka ke pal inge? Alejandro el tafwela: “Nga srakna muta in loom sesr. Tusruktu, moul kafofo lasr oru in arulanu upa nu sik a nu sin papa tumuk in tukeni muta sramsram. Ke ma inge, kut pakiye in tukeni mongo pal se ke wik se in nien orekma lal. Nga arulanu aksaokye na paye pal in sramsram lasr inge.”

19. Efu kut nu kemwa enenu in sramsram sie sin sie ke ma lun ngun?

¹⁹ Ya kut tia aksaokye pal mwo lasr in sramsramkin ma lun ngun nu sin met lili wiesr in lalalfongi? Kain in pal mwo in sramsram inge kut ku in koneak ke meeting nu kemwa, ke orekma lun forfor, ke pal in asrouki a ke lusen pal in fwafwasryesr. Poul el fwinsrak pal nu kemwa in sramsram nu sin me Kristian in an Rom. “Tu Nga kena liye komwos,” el simusla nu selos, “pa inge, tu Nga fwa ku in wi komwos akpwaryeyuk in komwos, kut nu kemwa ke lalalafongi lun sie sin sie, lalalfongi lomwos a lalalfongi luk.” (Rom 1:11, 12) “Me sramsram ke ma lun ngun nu sin met lili Kristian wiesr el akfwalye sie me enenu saok,” pa inge ma Johannes el fwak, el sie met Kristian elder. “Ma inge akpwarye inse a akfwusesrye me utuk toasr ke len nu kemwa. Pal nu kemwa Nga siyuk nu sin met matou in sromon nu sik moul lalos a mea kasrelos in srukye na oaru lalos. Ke lusen yiu puspis, Nga sramsram tari nu sin met matou puspis, a kais sie selos ase nu sik lalmetmet a kalem su akinsemwomwoye na paye moul luk.”

20. Mea kut enenu in oru kut fwin osun nu sin met su luman mwekin?

²⁰ A fuka fwin kutu met elos luman srunga in loang kom fwin srukak me sramsram ke ma lun ngun? Lela kom in tia fuleak. Saap kom ku in koneak kutu pal mwo ke pal fwasru. “Sie kas fwakyuk fwal oanu appel in gold,” Solomon el fwak. (Soakas 25:11) Akkalemye lalmetmet nu selos nu kemwa su mwekin. “Papu insien metu oanu kof loal, a met etauk fwa amakunak.”a (Soakas 20:5) Yok liki nu kemwa, nikmet lela oiye lun kutu met in kutongkowi in tia sramsram ke ma puspis su purakak insiom.

Me Sramsram ke Ma lun Ngun Wise Me Insemwomwo

21, 22. Kain in ma lane fuka kut ku in eis kut fwin akesrui nu ke me sramsram in ngun?

²¹ “Komwos in tia lela kas fokfok in som liki oalumwos,” Poul el kai, “a kutena su mwo, kas in musaiyuk, fwal nu ke enenu, tu in sang kulang nu sin su porongo.” (Efesus 4:29; Rom 10:10) Saap enenu kaifweung in ekulla me sramsram sufwal nu ke me sramsram sumwos, tusruktu me insemwomwo su tuku ka arulanu yok. Me sramsram ke ma lun ngun kasre kut in akkalemye lalalfongi lasr nu sin kutu met a musaiyuk un met lili wiesr.

²² Ke ma inge, lela kut in orekmakin me sang nu sesr in sramsram in akkeye kutu met a in kaksakin God. Kain in me sramsram inge e fwa sropon me insemwomwo nu sesr a me akkeye nu sin kutu met. Yok liki nu kemwa, ma inge e fwa oru insien Jeova in engun meyen Jeova el loang nu ke ma kut fwak a el arulanu engun kut fwin orekmakin loasr ke inkanek sumwos. (Sam 139:4; Soakas 27:11) Ke pal se kut sramsram pal nu kemwa ke ma lun ngun, kut ku in lalalfongi na paye la Jeova el e fwa tia mulkunkutla. Ke pal se el sramsram kelos nu kemwa su kulanasap nu sin Jeova in len lasr, Baibel el fwak: “Na elos su sangeng sin Jeova kaskas nu sin sie sin sie, a Jeova el lipsre a long. A sie buk in esmakin simusla ye mutal, ke elos su sangeng sin Jeova, a su nunku ke el.” (Malakai 3:16; 4:5) Arulanu yok sripe na paye kut fwin oru me sramsram lasr in me akkeye na paye nu sin kutu met ke ma lun ngun!

[Footnote]

Fuka Kom Topuk?

• Mea me sramsram lasr akkalemye ke moul lasr sifwanu?

• Kain in me sramsram fuka su ku in musaiyuk met kut ku in sramsramkin?

• Kain in ip yok fuka me sramsram el ku in oru nu ke sou a ke congregation lun met Kristian?

• Kain in ma lane fuka ku in tuku ke me sramsram su ku in musaiyuk kutu met?

[Pictures on page 8]

Me sramsram su ku in musaiyuk kutu met oakiyuki nu ke  . . .

“kutena ma su paye”

“kutena ma su sumwos”

“kutena ma su sumwosmwos”

“kutena ma su mwo oiye”

[Credit Lines]

Video cover, Stalin: U.S. Army photo; Creator book cover, Eagle Nebula: J. Hester and P. Scowen (AZ State Univ.), NASA

[Picture on page 9]

Pal in mongo pa sie pal mwomwo in sroang nu ke me sramsram ke ma lun ngun