Fuka in Akkeye Moul in Payuk Lom

NUNKU ke sie loom su arulanu musalla ke sripen pilesru. Sroal ka musalla, roof el musalla pa, a fwinne likinum arulanu fokfok. Arulanu kalem, loom se inge musalla ke sripen paka puspis ke lusen yiu puspis, a yokyokelik ma musalla lal meyen wangin met su loang ka. Ya fwal tari in kunausla loom se inge? Mo, tia enenu. Fwin foundation lal srakna fukoko a ma lu nu kemwa srakna ku, na loom se inge ku in sifwil orala ku aksasuyeyuk.

Ya ma sikyuk ke loom inge akismakinye kom ke luman moul in payuk lom? Ke lusen yiu puspis, ya moul in payuk lom oanu el sun tari paka pukanten su arulanu upa. Saap sie sumtel ku komtel kemwa tia loang nu ke moul in payuk lomtel. Saap ma kom pula oanu ma Sandy el pula. Tokin el payuk ke lusen yiu 15, pa inge ma el fwak: “Ma siefwunnu pa kut ku in fwak fwinne, kut tia insese ke ma puspis, in payuk mukena sie sin sie. A ma inge tia fwal.”

Fwinne moul in payuk lom el sun tari kain in luma se inge, tusruktu, lela kom in tia silaklak in fwak la kom enenu tari in aksafyela moul in payuk lom. Saap, srakna oasr fwinsrak in sifwil akkeyeyuk moul in payuk lom. Ma inge oakiyuki nu ke kaifweung inmaslon kom a mutan kiom. Kaifweung a kena lun kais sie met ku in sang kasru yok in akkeye moul in payuk ke pal in me srifwe. Tusruktu, mea se inge kaifweung? A fuka Baibel el ku in kasru kom in akkeye ma inge?

Sie Kain in Pulakin ke Kunokon

Fwal nu ke sie dictionary, kunokon el sramsram nu ke “sie kain in kena ku lungse in oru.” Kutupal, kas se inge kunokon orekmakinyuk nu ke ma se, oanu sie agreement ke business.

Fwinne oiyen payuk el tia oanu business se su met nu kemwa su wi, kutupal tia nunku sie sin sie, tusruktu, toeni nu ke kaifweung lom a kena lom in kurunganang ma inge pa sie orekma ku kunokon. Wangin alollo kom a mutan kiom orala mwolela ye mutun God a met in tukeni muta ke pal in ma upa a ke pal in engun. Jisus el fwak: “Tu el su oralosla [mokul a mutan] ke mutamwauk el oralos met mokul a met mutan, a fwak, ‘Ke ma inge, sie met el fwa fwasr liki papa a nine, a fwa fulyung nu sin mutan kiel.’ ” Jisus el tafwela: “Ke ma inge, ma God el fwalseni, lela met in tia eselik.” (Mattu 19:4-6) Ke ma inge, ke pal se ma upa sikyuk, lela kom a mutan kiom in kaifweung in akfulatye a akpayeye mwolela su komwos oru sie sin sie.a Sie mutan el fwak: “Ma mwomwo nu kemwa mutamwauk in sikyuk tokin kut tui in nunku ke divorce oanu pa inge mukefwunnu pa topuk ke ma upa lasr.”

Tusruktu, oasr pa kunokon saye su seanyen se elos enenu in oru sayen kunokon lalos in kurunganang moul in payuk lalos. Mea pa me enenu saye?

Akesrui Ke Orekma in Akkeye Kunokon lun Seanyen Payuk

In oru kunokon ke moul in payuk tia ku in kalmekin la wanginla fos inmaslon seanyen se ke sripen elos insese pal nu kemwa. Ke pal se fos sikyuk, kaifweung eneneyuk in aksumwosye ma upa inge tia ke sripen mwolela lun seanyen se, a ke sripen futoto lalos sie sin sie. Nu sin mokul a mutan, Jisus el fwak: “Eltal inge ekla ikwe siefwunnu.

Mea kalmen ekla “ikwe siefwunnu” nu sin mokul tumom ku mutan kiom? Met sap Poul el simusla la “mokul tuma elos in lungse pa mutan kielos oanu manolos sifwanu.” (Efesus 5:28, 29) Ke ma inge, kas se inge “ikwe siefwunnu” ku in kalmekin la ke pal se kom nunku ke insemwomwo lun mutan kiom oanu kom nunku ke insemwomwo lom sifwanu.

Kutu sin seanyen su tia insemwomwo elos tukeni muta ke sripen tulik nutulos ku ke sripen mani. Fwinne fwal in eis kaksak kain in moul in payuk inge su on na, tusruktu, kom enenu in esam la nien sun lom pa in futoto sie sin sie ke sripen lungse, a tia ke sripen tukeni muta a tia fwasreik.

Tia Rapku

Ke moul payuk su arulanu mwo a fukoko mokul a mutan elos akkalemye kain in ngun su akola in kisekin moul lalos nu sin sie sin sie. Fuka kom ku in akkalemye kain in ngun inge?

Lela kom in tia loang nu ke kusensiyuk inge, ‘Me insemwomwo fuka Nga ku in eis ke moul in payuk luk?’ a, kom enenu in siyuk sum sifwanu, ‘Mea ma Nga ku in oru in akkeye moul in payuk luk?’ Srike in tuni mokuikui lom ke lusen wik se somla. Pal ekasr kom akkalemye oiye kulang in akinsemwomwoye mutan kiom ku mokul tumom? Ke pal se mokul tumom ku mutan kiom el sramsram, ya kom porongo​—fwinne kom pulakin la kom luman srunga in oru ou inge? Ma ekasr ke orekma su kom oru akpwarye mokul tumom ku mutan kiom liki na in akpwarye kom sifwanu?

Orekma in kisekin moul lom sifwanu arulanu akkeye moul in payuk lom meyen ma inge el akkalemye la kom aksaokye moul in payuk lom a kom lungse ma inge in tia musalla.

In Nunku ke Moul In Payuk Oanu Sie Kain in Akmwuk Su Ku In On Nu Tok

Jeova God el arulanu aksaokye sumwosmwos. Paye, Baibel el fwak: “Kom [Jeova] fwa fwakkomyuk sumwosmwos nu selos su sumwosmwos.” (2 Samuel 22:26) Sumwosmwos nu sin God pal e nu kemwa kapsreni nu ke sumwosmwos ke akmwuk lun payuk su el oakiye.​—Genesis 2:24.

Fwin kom a mutan kiom arulanu sumwosmwos sie sin sie, na kom e fwa insemwomwo meyen kom pulakin la moul in payuk lom e ku in on na. Kom fwin nunku ke malem puspis toko, yiu puspis toko, a ke pal fwasru toko, oanu kom ku in liye ke pitse la komtel srakna tukeni muta.

Ke len in payuk lom, kom oru sie mwolela ke insiom, tia ke akmwuk lun payuk, a kom oru ou inge nu sin sie met su moul​—nu sin mutan kiom ku mokul tumom. Ma sikyuk inge enenu in me purakak yok nu ke inkanek in nunuk lom a ke orekma lom oanu sie met su payuk tari. Ya kom tia insese la kom enenu in muta na yurin mokul tumom ku mutan kiom tia ke sripen kom lalalfongi mukena ke akmwuk mutal lun payuk, a ouyepa ke sripen kom lungse na paye mokul ku mutan su kom payuk sa?

[Footnote]

[Box/Picture on page 5]

Ke Moul in Payuk, Me Enenu ke Kaifweung in Kurunganang Ma Inge Pa . . .

● Kunokon “Ke kom mwolela, kom moli. Mwo tu kom tia mwolela, liki kom fwin mwolela a tia moli.”​—Ekklisiastis 5:4, 5.

● Akesrui “Luo mwo liki sie . . . Tu elos fwin ikori, sie e fwa srukak met kamwuk lal.”​—Ekklisiastis 4:9, 10.

● Kisekin Moul Lom “Insemwomwo in sang yok liki insemwomwo in eis.”​—Orekma 20:35.

● Sie Nunuk Ke Pal Fwasru Su Wangin Safla “Lungse . . . el muteng in ma nu kemwa.”​—1 Korint 13:4, 7.