Baibel El Ku in Kasru Ke Moul in Payuk Lom

MOUL IN PAYUK​—nu sin met puspis, kas se inge me purakak mwo ke nunuk. Nu sin kutu met, ma inge purakak ngal ke insielos. “Nga pula tu Nga oanu met divorce se fwinne Nga srakna payuk,” pa inge ma mutan se el fwak. “Nga pula na paye la Nga oanu sie met su mukena muta a asor pal nu kemwa.”

Mea paenang orala met luo in wanginla futoto sie sin sie fwinne ke mutamwauk elos mwolela in lungse a akfulatye sie sin sie? Sie sripen ma inge pa srik lutlut lalos ke me enenu nu sin met payuk. “Kut payuk fwinne wangin kutena ma kut etu ka,” pa inge ma sie medical journalist el fwak.

Pisen met inge su etu moul in payuk arulanu supus, ma inge elos konaok ke sie lutlut su orekla sin The National Marriage Project, sie lutlut pa inge lun Rutgers University in an New Jersey, U.S.A. “Pus sin met ke lutlut inge elos kapek ke sie sou su wangin insemwomwo ku papa a nine kielos elos divorced,” pa inge ma director lun project inge el simusla. “Elos etu na paye mea kalmen payuk koluk, tusruktu elos tia arulanu etu mea luman payuk mwomwo. Kutu met inge elos ku in fwak a aketeye la moul payuk el mwo fwin el ‘tia oanu sie ke moul in payuk lun papa a nine kielos.’ ”

Ya met Kristian nu kemwa elos tia sun ku sukosok ke ma upa ke moul in payuk? Mo. Ke ma paye, kutu sin met Kristian in century se meet elos enenu na paye kas in kai nu selos in “tia suk in tulala” liki moul in payuk lalos. (1 Korint 7:27) Arulanu kalem, kutena payuk lun met luo su sesumwos ku in sun ma upa kais kutu pal, tusruktu, oasr me kasru nu sesr. Mokul tuma a mutan kie nu kemwa elos ku in akkapye futoto lalos sie sin sie elos fwin orekmakin ma sap lun Baibel.

Paye, Baibel el tia sie buk su sramsramkin mukena moul in payuk. Tusruktu, meyen el sie buk su etuku sin Met su oakiye moul in payuk, paenang kut ku in lalalfongi la ma sap a akmwuk nu kemwa lal ku in kasre kut. Ke inkanek lal met palu Isaia, Jeova God el fwak: “Nga Jeova, God lom, Su luti nu sum ma kom fwa insemwomwo ka, su kol kom ke inkanek su fwal tu kom in fwasr we. O ke kom in nu porongo ma sap luk! Na misla lom oanu sie infwal, a sumwosmwos lom oanu nua in mwea.”​—Isaia 48:17, 18.

Ya lungse su oasr inmaslon kom a mutan kiom mutamwauk in wanginla? Ya kom pula la kom sremla ke sie kain in moul in payuk su wanginla lungse? Sie mutan su payuk ke lusen yiu 26 el fwak: “Insengal su tuku ke kain in moul in payuk inge arulanu upa in aketeye. El tia tui a oasr pal nu kemwa.” Efu ku kom tia suk inkanek in aksumwosye ma inge liki na in fuleak ke kain in moul in payuk inge? Me lutlut se toko el fwa akkalemye nu sin mokul tuma a mutan kie fuka ma sap lun Baibel ku in kasru moul in payuk lalos ke sie an su arulanu yok​—ke kunokon lalos.