“Komwos In Kalukyung Nu Yurin God, A El E Fwa Kalukot Nu Yurumwos”
Meet A Tok Moul Lal Ekla Na Paye
TIA mwo a oanu wangin sripen moul lal Matsepang! El sie mutan fwusr in an Lesotho, sie mutanfwal su ku in konoiyukyuk ke center lun South Africa. Matsepang el kapek ke sou lun Catholic. Tusruktu, el tia eis kasru in kapkapek futoto nu sin God, ke lusen yiu puspis el akkolukyeyuk sin nun puspis su orekmakin mani oanu me eyeinse koluk in moklel in oru orekma lun kosro.
Ke sripe se inge, Matsepang el arulanu asor ke alu a el kofla in lalalfongi ke sie Met Orala su lungse a nunku na paye ma orekla lal. Ke sripen pilesru a me keok su el eis sin kutu met, Matsepang el arulanu asor a pulakin la wanginla sripen moul lal. El kapek oanu sie met silolel upa su lungse in akngalye kutu met. Ma inge kol nu ke oiye su arulanu koluk.
Ke saflaiye Matsepang el wi ipen sie un met koluk su orek pusrapasr nu sin met su wi fwafwasyesr ke train. Elos sruokilye a lisyukla in muta nu in kalpous in an South Africa. Tok kutu, elos utukla Matsepang nu ke an lal, Lesotho, ke an se inge el tafwela ke orekma koluk lal, nimnim alukela ma fwal, orekma silolel, a kosro.
Ke sie pal in asor upa lun moul lal, Matsepang el pre nu sin God ke kasru. El mwolela ou inge, “God, fwin Nga moul, Nga oru ma nu kemwa in kulansap nu sum.”
Tia pat toko, missionary lun Met Lo lun Jeova elos sunol Matsepang. Elos kaifwe nu sel in oru lutlut ke Baibel. Ke lusen pal in lutlut lal, el akilen la God el loang mwo a kurungin met. Aok, el akilen la Setan, “su papa tuman met kikiap,” el orekmakin kutasrik a kikiap in purakak met in nunku la wangin sripen moul lalos a orelos in lalalfongi la Jeova el tia ku in lungse met ke kutena pal.—Jon 8:44; Efesus 6:11.
Aok, tia ou inge, Matsepang el arulanu engun na paye ke pal se el lotela la kut ku in sifwil srukye sie kain in moul nasnas kut fwin auliyuk nu ke ma koluk lasr, siyuk nunuk munas nu sin God, a kaifweung in akinsemwomwoyel! El kasreyuk in akilen la “God el yok liki insiesr” a nunke kut ke sie inkanek su siena liki nunuk lasr ke moul lasr sifwanu.—1 Jon 3:19, 20.
Matsepang el arulanu engun in liye kas lun met on Devid: “Jeova el muta, a molelosla su toasr in ngun ke ma koluk lalos.” (Sam 34:18) Oanu sie selos “su toasr in ngun,” el akilen la Jeova el tia som liki met kulansap lal, fwinne kutu selos pulakin la wanginla sripen moul lalos. Sie me pwarak na paye sel in etu la God el kurunganang sip nutul a sang me enenu lalos ke pal in ma upa. (Sam 55:22; 1 Piter 5:6, 7) El arulanu akkeyeyuk pa ke kas inge: “Komwos in kalukyung nu yurin God, a el fwa kalukot nu yurumwos.”—Jemes 4:8.
Ku lun Kas lun God, ku Baibel, mutamwauk in kalem ke moul lal Matsepang ke lusen pal na futoto. El mutamwauk in wi meeting lun met Kristian pal nu kemwa a el sisla orekma koluk lal nu kemwa su tia fwal nu ke Ma Simusla. Mea fwokin ma inge? El tia sifwil pulakin la el sufwal ke lungse a insemwomwo lun God. Mutamwauk ke pal in Baptais lal oanu sie Met Lo lun Jeova, el orekmakin tausen puspis aur ke orekma lun forfor lun met Kristian in sulkakin peng mwo lun Togusrai. Fwinne oasr kinet ke insiel ke sripen ma sikyuk in pal meeta, tusruktu, Matsepang el arulanu engun a insemwomwo ke moul mwomwo lal ke pal inge. Sie me akpayeye pa inge ke ku lun Kas lun God in aksasuye moul lun met!—Hibru 4:12.
[Blurb on page 31]
“God, fwin Nga tia mise, Nga Oru ma nu kemwa ke ku luk in kulansap nu sum”
[Box on page 31]
Ma Sap lun Baibel El Orekma
Ma sap a akmwuk lun Baibel su akpwarye met puspis su sun me keok ke sripen orekma silolel pa:
“Ke nunuk puspis insiuk, kas in parak lom [God] akengunye yu.” (Sam 94:19) “Kas in pwarak” lun Jeova su ku in konoiyukyuk in Kas lal sie sropon me akkeye yok na paye. In nunku ke ma inge ke lusen pal in kalweni ke ma kut lotela tari a ke lusen pre ku in kasre kut in sisla nunuk puspis ke insiesr a musaiyuk lalalfongi nu sin God oanu sie kamwuk su akilen kut.
“El akmolyelos su musalla insielos, a puela kinet kelos.” (Sam 147:3) Kut fwin engunkin pakoten lun Jeova a me sang lal in afwunye ma koluk lasr ke inkanek lun me kise lango lun Jisus, kut ku in lalalfongi la kut ku in osun nu sin God ke pre a kut pulakin la insiesr tia liskutla. Ma inge ku in wise me insemwomwo yok a misla in nunuk.
“Wangin sie met ku in fwasru nu yuruk [Jisus Kraist], Papa su supeyume el fwin tia amakunul; a Nga fwa akmoulyelak in len se safla.” (Jon 6:44) Ke inkanek lun ngun mutal lal a ke inkanek lun orekma in luti ke Togusrai, Jeova el kasru kut in som nu yurin Mwen nutul a ase nu sesr fwinsrak nu ke moul ma patpat.