Fuka Kutu Met Elos Eis Topuk Lalos

MILLION puspis sin met elos pre. Pus selos lalalfongi la elos ku in eis topuk ke pre lalos. Kutu selos alollo fwin God el long na paye pre lalos. Oasr pa kutu met su suk topuk ke kusensiyuk lalos tusruktu elos tia nunku in akkalemye me siyuk lalos nu sin God ke inkanek lun pre.

Baibel el akkalemye la God paye el “Met su long pre.” (Sam 65:2) Kom fwin pre, ya kom etu na paye fwin pre lom el som sumwos nu sin God paye? Ya pre lom el sie kain in pre su God el e fwa sang top ka?

Nu sin met puspis in an nu kemwa fwin fwalu, topuk lalos pa aok! Fuka elos eis topuk lalos? A mea elos lotela ka?

God​—Su El?

Sie met luti ke loom lutlut in an Portugal su eis lutlut lal sin nun a met tol puspis el arulanu oaru ke alu lal. Ke pal se alu lal el ekulla a sisla kutu orekma su el lotela tari a nunku meet mu arulanu yok, el mutamwauk in fos. Fwafwasyesr lal in an saye kasrel in etu inkanek lun met Oriental ke alu, a el mutamwauk in nunku fwin oasr God paye siefwunnu. Inkanek fuka el enenu in orekmakin ke alu? Ke pal se el siyuk kusensiyuk nu sin met tol lal ke ma puspis in Baibel, elos tia loang nu ke kusensiyuk lal, paenang el arulanu asor.

Alu lun Catholic ke siti lun met luti inge el orala me rid srisrik se su sang kas in sensen nu sin met Catholic nu kemwa in tia sramsram nu sin Met Lo lun Jeova. Aok, kusensiyuk lal oan na. Sie len, ke pal se Met Lo lun Jeova elos tuku nu ke srungal lal, el porongo a el akkalemye insemwomwo ke ma el long. Pa inge pal se meet el sramsram nu selos.

In eis topuk ke kusensiyuk puspis lal, mutan se inge el mutamwauk in lutlut Baibel sin Met Lo. Kais sie wik, el simusla kusensiyuk puspis lal su el siyuk nu selos fwin elos tuku. El lungse in etu en God, fwin oasr God paye siefwunnu, el fwin insese ke alu nu ke me srulela, a ma puspis pa saye. El liye la topuk nu kemwa su el eis tuku ke Baibel, a tia tuku ke nunuk na lalos, ke ma inge el arulanu lut a insemwomwo ke ma el lotela inge nu kemwa. Kais kutu srisrik, el mutamwauk in eis topuk nu ke kusensiyuk puspis lal. Ke len inge, el alu nu sin Jeova in ngun a paye, oanu Jisus el fwak “met alu paye” elos e fwa oru ou inge.​—Jon 4:23.

Me Keok​—Efu?

Mokul se inge Job el muteng ke sie me keok upa. Tulik nutul nu kemwa mise ke sie eng upa, a el ekla met sikasrup se. El sun pa kain in mas upa su arulanu ngal a kas upa su tuku sin kamwuk kikiap lal. Ke pal in ma upa inge nu kemwa lal, Job el kaskas ke inkanek sufwal. (Job 6:3) Tusruktu, God el nunku ke luma a ma sikyuk nu sel. (Job 35:15) El etu ma oasr ke insiel Job a sang nu sel Job kai su el enenu. El oru pa ou inge nu sin met ke len inge.

In an Mozambique, Castro el yiu siengoul matwe ke pal se nine kiel mise. El arulanu asor. “Efu el enenu in mise a som liki kut?” el kusensiyuk. El fwinne kapek ke sie sou su oasr sangeng sin God, tusruktu ke pal inge, el pula tu ma nu kemwa wanginla sripe. Mea ma ku in akpwarye nunuk lal a insiel? El koneak me pwarak ke pal se el ridi Baibel srisrik a sramsramkin ma inge nu sin brother wiel su matu lukel.

Kais kutu srisrik, Castro el mutamwauk in akilen la nine kiel el mise, tia ke sripen nununku sesumwos lun God, a ke sripen moul sesumwos su el usru. (Rom 5:12; 6:23) Mwolela lun Baibel ke sifwil moulyuk sang nu sel me insemwomwo yok meyen el liye la sifwil moulyuk el sie me akpayeye la el ku in sifwil liye nine kiel. (Jon 5:28, 29; Orekma 24:15) Sie me asor, meyen tokin yiu akosr papa tumal el mise pa. Tusruktu, ke pal inge mongfwusesr lal Castro ke ma sikyuk inge mwo liki meet. Ke len inge, el lungse Jeova a el oaru in orekmakin moul lal in kulansap nu sin God. Insemwomwo su el koneak arulanu kalem nu sin met nu kemwa su etel.

Met puspis su tula met su elos lungse ke mise elos koneak me pwarak ke Baibel siefwunnu su akpwarye Castro. Kutu met su pulakin ma upa yok ke sripen orekma silolel lun met koluk elos kusensiyuk, oanu Job el oru meet: “Efu met koluk elos ku moul?” (Job 21:7) Ke pal se metu elos porongo ke ma God el fwak in sang topuk nu ke kusensiyuk lalos su ku in konoiyukyuk in Kas Lal, elos lotela la inkanek lun God in aksumwosye ma puspis, sang kasru na paye ke insemwomwo lalos.​—2 Piter 3:9.

Barbara, su kapek in an United States, el tia pula na paye me aksangeng su tuku ke meun. Tusruktu el kapek ke pal se oasr meun lulap fwin fwalu nu fon. Report puspis ke orekma silolel ke pal in meun akkalemyeyuk ke news ke len nu kemwa. Ke lusen pal in lutlut lal ke loom lutlut, el arulanu lut ke me sramsram lun fwalu su luman sikyuk pal nu kemwa ke pal a ke inkanek su metu tia nunku. Efu ma inge sikyuk? Ya God el nunku ke ma sikyuk inge? El lalalfongi la God el oasr, tusruktu el alollo ke ma el pula nu sin God.

Aok, ma Barbara el nunku ke oiye moul mutamwauk in ekla ke sripen asrouki lal nu sin Met Lo lun Jeova. El porongo nu selos. El wi ke meeting ke Kingdom Hall. El wi ke toeni lulap lalos pangpang convention. Sayen ma inge, ke pal se el siyuk kusensiyuk, el tuni la el tia eis kain topuk puspis su tia oanu sie nu sin kais sie Met Lo. A, Met Lo nu kemwa elos aketeye ke inkanek siefwunnu meyen nunuk lalos tuku ke Baibel.

Met Lo lun Jeova elos akkalemye me akpayeye su tuku ke Baibel su akkalemye la fwalu nu fon oan ke ku lun Setan su Devil, el pa met kol lun fwal se inge, a fwal se inge akkalemye ngun lal. (Jon 14:30; 2 Korint 4:4; Efesus 2:1-3; 1 Jon 5:19) Elos aketeye la ma sikyuk nu kemwa su akfosrye Barbara akkalemyeyuk tari in Baibel in pal meeta. (Daniel, sapter 2, 7, a 8) God el akkalemye tari ma inge meet meyen oasr ku lun God in liye ma e sikyuk ke pal fwasru el fwin lungse in oru ou inge. Kutu nu ke ma sikyuk inge God el oru. Kutu el lela na in sikyuk. Met Lo inge el akkalemye nu sel Barbara la Baibel el palye pa ke sie fwal sasu yen sumwosmwos oan we, su wanginla me keok.​—2 Piter 3:13; Fwakyuk 21:3, 4.

Kais kutu srisrik, Barbara el mutamwauk in akilen la fwinne Jeova el tia sropon me keok lun met, el tia pa kutongye ma inge ke sripen el lungse in patokye met in akos ma sap lal fwinne elos srunga in oru ou inge. (Duteronomi 30:19, 20) Barbara el sulela in lutlut ke ma God el siyuk sel a in moul fwal nu ka. El ouyepa koneak nu sin Met Lo lun Jeova kain in lungse su Jisus el fwak oanu sie akul lun met tuma lutlut paye lal.​—Jon 13:34, 35.

Kom ku in eis pa ma lane su tuku ke me kasru nu kemwa su kasrel.

Tia pakiyuki tari nu sin met nu kemwa su akkalemyeyuk ke me lutlut inge in eis sie moul insemwomwo. Fwinne ou inge, elos koneak la oasr akmwuk mwomwo lun Jeova God nu sin met nu kemwa su sulela in akos ma sap lal ke insemwomwo. (Orekma 10:34, 35) Wikin akmwuk lal inge pa moul ma patpat ke sie fwal su wangin meun, a sukosokla liki mas a sral​—aok, sukosokla liki mise. (Isaia 2:4; 25:6-8; 33:24; Jon 3:16) Ya pa inge ma lungse lom? Fwin aok, kom ku in akyokye lutlut lom fuka in koneak key ke sie moul insemwomwo kom fwin wi ke toeni in lutlut Baibel ke Kingdom Hall lun Met Lo lun Jeova. Solsol kom in oru ou inge.

[Picture Credito Line on page 4]

Hiker: Chad Ehlers/Index Stock Photography