Report Lun Met Fwakelik Peng Lun Togusrai
“Nga Lungse In Kulansap Nu Sin God”
“ILLA lukel, met luk.” Pa inge kas lun lipufon su met sap Jon el long ke century se meet. In len lasr misinge million puspis sin met fwokpap elos topuk nu ka a kaengla liki “Babulon Lulap,” pa inge un alu kikiap nu kemwa. (Fwakyuk 18:1-4) Sie selos pa Wilner lun an Haiti, su sromon experience lal.
“Nga isusla in 1956 ke sie sou su arulanu fukoko ke alu lun Catholic ke sie mura lun an St. Marc, Haiti. Nunku ke insemwomwo lun sou luk ke pal se Nga sie sin met tolu su sulosola ke an luk in wi ke sie lutlut ke sie seminary in St. Michel de l’Atalaye, Haiti. Na, in yiu 1980, elos supwekutla nu in an Stavelot, Belgium, in akyokye akpa lasr. Kut wi pa lutlut in an wi ke sie Catholic university.
“Ke mutamwauk Nga arulanu pwar in wi sroang nu ke orekma lun met tol. Sie len ke an in mongo, met tol su kurungin u lasr el siyuk sik in muta kitin pal meyen oasr ma el lungse in fwak nu sik. Nunku ke lut lulap luk ke pal se el akkalemye nu sik la el lungse yu a el ke osun nu sik in mano! Nga lainul ke ma el lungse in oru nu sik a Nga arulanu supwar ke ma sikyuk inge. Nga sim leta nu sin sou luk a akkalemye nu selos ma sikyuk nu sik, a tokin malem ekasr Nga som liki seminary fwinne elos arulanu toasr. Nga koneak sie an in muta ke mura a Nga tafwela in lutlut ke profession saye.
“Ke pal se Nga foloko in an St. Marc, Nga tia sifwil lalalfongi ke alu lun Catholic. Aok, Nga srakna lungse in kulansap nu sin God, tusruktu Nga nukin ma Nga enenu in oru. Nga som nu ke alu lun Adventist, ke alu lun Ebenezer, a ke alu lun Mormon. Nga tula na paye ke ma lun ngun.
“Na, Nga esam la ke pal se ma Nga wi ke seminary in an Belgium, Nga ridi Crampon Bible. Ke Baibel inge Nga koneak la oasr en God. Ke ma inge Nga orekmakin el a Nga pre nu sin God in kasre yu in koneak alu paye.
“Tia pat toko, Met Lo lun Jeova luo elos tuku a muta ke mura luk. Elos misla, lungse in akfulatye kutu met, a arulanu mwo oiye lalos. Nga arulanu insemwomwo ke oiyen moul lalos. Sie len, sie sin Met Lo lun Jeova inge el suli yu in wi ke me akfulat lalos ke Memorial ke mise lun Kraist su elos oru ke yiu nu kemwa. Nga arulanu engun ke toeni lalos a Nga insese in lutlut Baibel nu sin Met Lo. Tokin malem onkosr, Nga mutamwauk in lalalfongi la Nga koneak tari inkanek sumwos in kulansap nu sin God. Nga mwolela moul luk nu sin Jeova a Nga baptaisla ke November 20, 1988.”
Tokin sie pal, Wilner el sroang nu ke orekma lun forfor pal nu kemwa oanu sie pioneer. Ke len inge, el kulansap oanu sie met elder lun congregation. El a mutan kiel wekunang tulik luo nutultul, elos insemwomwo in kulansap ke congregation.
[Picture on page 19]
Ke inkanek in rid Baibel, Wilner el koneak la en God pa Jeova