Fwasr Nu Meet Nu Ke Saflaiyen Kutangla!

“Liye! soko ors fwasrfwasr, a el su muta fwe oasr sie pus yurol; a etukyung nu sel sie tefuro, a el fwasrot in kutangla, a el fwa kutangla.”​—FWAKYUK 6:2.

1. Kain in ma sikyuk fuka ke pal fwasru Jon el liye ke arurumu?

KE KASRU lun God met sap Jon el liye in pal meeta ke ma fwa sikyuk ke pal fwasru in yiu 1,800 kutu a el akkalemye ke mutamweyen oasr tari lun Kraist ke tron lal oanu sie Togusra. Jon el enenu in lalalfongi la ma el liye ke arurumu e fwa akpayeye. Oasr me akpayeye kalem lasr ke pal su akkalemyeyuk la kas palu inge ke mutamweyen kolyuk lun Jisus sikyuk tari in yiu 1914. Ke mutun lalalfongi, kut liye Jisus Kraist el “fwasrot in kutangla, a el fwa kutangla.”

2. Mea pulakin lal Devil ke pal se Togusrai oakiyuki, a mea ma inge akpayeye?

² Tokin oakiyuki lun Togusrai, Setan el sisila liki in kosrao, oru el an kaifweung in meun wiken koskosrok lulap tusruktu el tia ku in kutangla. (Fwakyuk 12:7-12) Koskosrok lal oru fwal se inge in upa liki meeta. U lun met nu kemwa mutamwauk in musalla. Nu sin Met Lo lun Jeova ma inge sie me akpayeye kalem la Togusra lalos el fwasrot in kutangla “a el fwa kutangla.”

Sie Un Met ke Fwalu Sasu Orekla

3, 4. (a) Kain in ekla puspis fuka orekla nu ke akmwuk lun congregation lun met Kristian tokin oakiyuki lun Togusrai, a efu ma inge nu kemwa eneneyuk? (b) Ma lane fuka tuku ke ekla puspis inge, oanu Isaia el palye?

³ Tokin oakiyuki lun Togusrai, pa inge pal in wisla congregation lun met Kristian su sifwil akkeyeyuk​—su ingenu oasr kunokon lalos su yokyokelik ke Togusrai—​nu ke sie luma fwal nu ke akmwuk lun congregation lun met Kristian ke century se meet. Ke ma inge, ke issue se lal ke June 1 a 15, 1938, Tauer In San el tuni ke oiyen orekma lun un met Kristian. Tok, ke issue lun December 15, 1971, el sifwil pa aketeye kalem ke Governing Body ke len lasr ke sie me lutlut ke “Sie Governing Body su Siena Liki sie Legal Corporation.” In 1972, un met elder elos sulosola in sang kasru a kol ke kais sie congregation in an nu kemwa.

⁴ Sifwil oakiyuki lun met kol ke inkanek fwal akkeyeak na paye congregation lun met Kristian ke inkanek yok. Siepa me kasru ke ma inge pa akmwuk su orekla sin Governing Body in luti met elder nu kemwa ke kunokon lalos, wekunang akpa ke inkanek in oru nununku. Kakasrisrik kapkapek ke akmwuk lun u lun God fwin fwalu a fwako mwo lun ma inge akkalemyeyuk ke kas palu meet in Isaia 60:17: “Ke brass Nga fwa wise gold, a ke mwusra Nga fwa wise silfer, a ke sak brass, a ke eot mwusra; Nga fwa oru pa met roso lun misla a leum lun sumwosmwos.” Kapkapek mwo inge akkalemye me insewomwo mutal nu selos nu kemwa su akkeye ke moniyuk lun Togusrai lal.

5. (a) Oiye fuka Setan el akkalemye ke me insemwomwo lun Jeova nu sin met Lal? (b) Fwal nu ke Filippai 1:7, oiye fuka met lun Jeova elos akkalemye ke mulat lal Setan?

⁵ Loang mwo nu ke inkanek lun lungse a kolyuk su God el sang nu sin met kulansap lal tokin oakiyuki lun Togusrai su Setan el liye. Ke sie me pupulyuk, in yiu 1931 u srisrik inge lun met Kristian elos sulkakin la elos tia Bible Students mukena. A, fwal nu ke ma simusla in Isaia 43:10, elos Met Lo lun Jeova! Fwinne sie plan lal pa inge ku tia, Devil el orala kolyai lulap su wangin ma oanu fwin fwalu nu fon. Fwinne ke an puspis su pal nu kemwa pengpeng ke sukosok in alu, oanu an United States, Canada, a Germany, Met Lo lun Jeova elos mokleyuk pal nu kemwa ke court in suk sumwos a sukosok lalos in alu a in srukye na ma inge. In 1988, U.S. Supreme Court el kalweni case 71 lun Met Lo lun Jeova, oasr luo tafwu tolu ke ma inge oakiyuki tari in akkeye Met Lo lun Jeova. Ke len inge, fwin fwalu nu fon, meeting puspis ke court tafweyuklana, oanu ma sikyuk ke century se meet, enenu in oasr “aksumwosye a in akkeye mwosasu.”​—Filippai 1:7.

6. Ya me kutong a wangin lun sukosok in oru orekma kutongye met lun Jeova in fwasr nu meet? Sang me pupulyuk.

⁶ Ke lusen yiu 1930 kutu, len puspis ke Meun Lulap Akluo, oru akmwuk lun guferment pangpang dictatorial elos in filiye me kutong ku tolukinye orekma lun Met Lo lun Jeova fwin an Germany, Spain, a Japan, su pa inge ma tolu na su touyuk sayen ma puspis su sikyuk. Tusruktu, in yiu 2000, mutanfwal tolu inge mukena oasr met orekma moniyuk ke Togusrai su apkurun nu ke 500,000. Apkurun in pal siengoul ke pisen Met Lo lun Jeova fwin fwalu nu fon in yiu 1936! Arulanu kalem la, me kutong a me lain puspis in sang tulokinye met lun Jeova ke kapkapek lalos ye koko lun Met Kol lalos inge, Jisus Kraist su kutangla, tia ku in kutangalosla.

7. Kain in ma yok fuka sikyuk in yiu 1958, a kain in ekla lulap fuka sikyuk mutamwauk ke pal inge?

⁷ Fuka lupan kaksakinyeyen se inge su arulanu kalem ke usyen mukuikui sikyuk ke pal inge, su in yiu 1958, in an New York City orekla sie toeni lulap lun Met Lo lun Jeova su yok emeet ke sifwe se inge Divine Will International Assembly, su pisen met su wi oasr ke 253,922. Ke 1970 orekma lalos ikakla nu ke mutanfwal tolu su akkalemyeyuk lung inge, sayen an inge su eteyuk meet East Germany. Tusruktu, Met Lo lun Jeova srakna wangin sukosok lalos ke an lulap lun Soviet Union a kutu an su kamwuk nu sel ke sripen u se inge Warsaw Pact. Ke len inge, in an puspis inge su muta meet ye koko lun Communist, oasr pise su pus liki tafwu million sin Met Lo lun Jeova su arulanu moniyuk ke orekma elos muta we.

8. Mea fwokin me insemwomwo lun Jeova nu sin met lal, a mea Tauer In San ke 1950 el aketeye ke ma se inge?

⁸ Met Lo lun Jeova elos akinsemwomwoyeyuk ke kapkapek lalos meyen elos tafwela na in “suk meet togusrai lun God a ma sumwosmwos lal.” (Mattu 6:33) Ke sie inkanek su arulanu paye, kas palu lal Isaia akpayeyuk tari: “El su srik fwa ekla siu, a el su fwusr sie mutanfwal ku. Nga Jeova fwa aksaye in pal se.” (Isaia 60:22) A kapkapek el srakna tafweyukla. Oanu ke lusen yiu siengoul somla, pisen met kafofo su akkeye kolyuk lun Togusrai kapkapek piselos pus liki 1,750,000 met. Elos inge nu kemwa ipen sie u su Tauer In San ke 1950 el akkalemye ou inge: “God el akola ke pal inge sie un met ke fwal sasu. . . . U se inge fwa sasla nu ke Armagedun, . . . u se meet su oru orekma ke ‘fwalu sasu’ . . . , elos oru orekma ke inkanek fwal a takla fwal nu ke kolyuk lun God, meyen elos etu tari akmwuk puspis lun u sa.” Me lutlut inge el aksafyela ke kas inge: “Ke ma inge, fwasr nu meet, ke ku, kut nu kemwa akesrui, oanu ipen fwalu sasu!”

9. Fuka ma puspis su Met Lo lun Jeova elos lotela ke lusen yiu puspis arulanu yok sripe na paye?

⁹ Ke pal inge, un met inge ke fwalu sasu elos lutlut ke oiyen orekma nu kemwa ke inkanek mwo a ku su arulanu yok sripe ke pal inge a ke sie pal in musa in sifwil akmwoye fwalu se inge tokin Armagedun. Ke sie me pupulyuk, Met Lo lun Jeova elos lotela tari in orala toeni lulap puspis ke inkanek fwal a takla, in sang kasru ke pal in ongoiye, a in musa loom puspis ke pal sa. Kain in orekma inge nu kemwa orala met puspis in liye Met Lo lun Jeova ke kaksak a akfulat.

Akmsumwosye Nunuk Koluk lun Met

10, 11. Sang me pupulyuk su aketeye nunuk koluk orek nu sin Met Lo lun Jeova aksumwosyeyuk.

¹⁰ Fwinne ou inge, srakna oasr kutu met su akkolukye Met Lo lun Jeova a fwak la elos moulkin moul tia fwal nu ke akmwuk lun met. Ma inge sikyuk ke sripen lalalfongi lun Met Lo su tuku ke Baibel, oanu, ma ke ituk sra, tia wi lalos ke kutena u su amei ku lain sie sin sie, a ke oiyen moul nasnas. Tusruktu met puspis misinge elos mutamwauk in akilen la sie inkanek fwal in tuni akmwuk a nunuk lun Met Lo lun Jeova. Ke sie me pupulyuk, sie taktu fwin an Poland el pang ke telefon ke administrative office lun Met Lo lun Jeova a el fwak la el a kutu met orekma su welul ke hospital elos oru sramsram yok ke lusen aur puspis ke me sramsram ke ituk sra. Me sramsram yok lalos touyuk ke sie article su sikyuk ke sie newspaper fwin an Poland pangpang Dziennik Zachodni. “Nga ku in fwak na paye la Nga asor meyen orekmakinyen sra ke inkanek sufwal orek ke akmwuk in ono,” taktu se inge fwak. “Ma inge enenu in ekla, a Nga engun meyen oasr sie met su ikasla me sramsram inge. Nga lungse me lutlut yok ke ma se inge.”

¹¹ Ke lusen sie pal in conference su orek ke yiu tari’a, met lulap puspis ke ono su tuku fwin an Canada, Europe, a Israel, a United States elos sramsramkin sie me lutlut su orekla in kasru taktu puspis ke oiyen kasru met mas fwinne tia orekmakin sra nu selos. Akkalemyeyuk ke meeting inge, su orekla fwin an Switzerland, la, tia oanu ma met puspis elos nunku, met mas puspis su ituk sra a mise pus liki met mas su tia ituk sra. Met Lo nu kemwa su mas elos tofwoki liki loom ono sa liki met mas su ituk sra, a ke ma inge srikla molin ono lalos.

12. Sang me pupulyuk su aketeye ke kutu sin met pengpeng elos kaksakin oaru lun Met Lo lun Jeova ke kaifweung lalos in tia wi ke kutena u su lain sie sin sie ke politic.

¹² Kas in kaksak puspis akkalemyeyuk pa ke oiye lun Met Lo lun Jeova su elos akkalemye ke lusen pal in Meun Lulap Akluo, su ke pal inge elos tia wi ke kutena u su lain sie sin sie fwinne elos sun ma upa yok ye koko koluk lun Nazi. Video se inge Jehovah’s Witnesses Stand Firm Against Nazi Assault, orekla sin Met Lo lun Jeova a sritelkinyuk ke pal se meet ke Ravensbrück concentration camp in an Germany ke November 6, 1996, eis kas in kaksak puspis. Ke pal in mutamwauk lun pitse sepanu inge su sritelkinyuk ke concentration camp koluk inge Bergen-Belsen ke April 18, 1998, director lun Center for Political Education in Lower Saxony, Dr. Wolfgang Scheel, el fwak: “Ke sie me akmwekin lulap pa ke me sramsram paye lun fwalu ke, Met Lo lun Jeova elos akkalemye srunga lalos ke National Socialism yok liki ma alu puspis su ekin Kristian elos oru. . . . Ke kutena ma kut pula ke me luti a moniyuk ke alu lun Met Lo, kaifweung lalos in tu ku ke lusen pal lun Nazi purakak akfulat.”

13, 14. (a) Kain in nununku mwo fuka akkeye met Kristian in pal meeta su tuku sin sie met su kut tia nunku mu el ku in oru ou inge? (b) Sang me pupulyuk puspis ke kas mwomwo su orekmakinyuk nu sin met lun God ke pal inge.

¹³ Ke pal se sulela lun kutu met pengpeng ku court puspis orekla in akkeye Met Lo lun Jeova ke me sramsram yok, ma inge kunausla nunuk srisri lun met a kasru met puspis in srukye nunuk sumwos nu sin Met Lo. Pal nu kemwa ma inge ikasla nu selos pal mwo in sramsram nu sin met puspis su srunga in long meet. Kain in orekma lun kutu met inge ku kutu court fwal in eis kaksak, a Met Lo lun Jeova elos arulanu sang kulo ka. Ma inge akismakinye kut ke ma sikyuk ke century se meet fwin an Jerusalem. Ke pal se Sanhedrin, court fulat lun met Ju, elos lungse in uniye met Kristian nu kemwa ke sripen orekma in luti moniyuk lalos, Gamaliel, “sie met luti lun met sap, su met e nu kemwa kaksakin,” el sang kas in sensen a fwak: “Komwos met Israel, komwos sifwanu liyekomwosyung ke ma komwos nunku in oru nu sin met inge. . . . Fwasr liki met inge, a nik komwos ikololosi; (tu papu se inge ku orekma se inge fwin ma sin metu, a fwa langasyukla; a fwin ma sin God me, komwos koflanu kunausla;) saap konoiyukyuk komwos in meun lain God.”​—Orekma 5:33-39.

¹⁴ Oanu Gamaliel, oasr met pengpeng puspis su tufwanu srukak pusralos in akkeye sukosok ke alu lun Met Lo lun Jeova. Ke sie me pupulyuk, sie chairman meet lun International Academy for Freedom of Religion and Belief el akukuin in fwak: “Sumwos in alu lun sie alu tia enenu in tulokinyuki ke sripen lalafongi lal siena liki ku met puspis elos tia insese ka ku tia fwal nu ke ma elos pala in oru.” A sie professor ke lutlut lun science ke alu ke university of Leipzig el siyuk kusensiyuk yok ke sie ofus su government lun an German el oakiye in orala investigation in suk a tuni alu srisrik puspis su muta ye koko lun met, el fwak: “Efu alu srisrik mukena pa enenu in tuniyuk a tia alu lulap luo lun Roman Catholic a Lutheran Church?” Kut ku in konaok topuk ke kusensiyuk inge ke kas lun sie met lulap meet ke guferment lun an German, su simusla: “Wangin alollo la kutu met su moniyuk ke alu lalos alukela ma fwal pa purakak met kol lun guferment in oakiye ofus inge.”

Nu Sin Su Kut Ku In Siyuk ke Mongle?

15, 16. (a) Efu ma Gamaliel el oru tia ku in on nu tok ma patpat? (b) Fuka met pengpeng tolu saye arulanu srik pa ku lalos in sang kasrel Jisus?

¹⁵ Ma Gamaliel el fwak in pal meeta akkalemye ma paye la sie orekma su oasr kasru sin God tia ku in musalla. Wangin alollo la met Kristian in pal meeta elos eis ma lane ke kas lal inge ye mutun Sanhedrin, aok elos tia mulkunla pa la arulanu paye kas lal Jisus ke met tuma lutlut lal su sun kolyai. Orekma lal Gamaliel tolokinye plan lun met kol lun alu in uniye met tuma lutlut lun Jisus, tusruktu ma inge tia akwanginyela kolyai su elos oru nu selos, meyen kut ku in rid: “A elos porongo kas lal, a ke elos pangonmu met sap nu yurolos, elos srunglulos a fulak nu selos tu elos in tia kaskas in en Jisus, a fulelosla.”​—Orekma 5:40.

¹⁶ Ke pal se Jisus el muta ye mutun met nununku, Pontius Pilate, su tia ku in konaok kutena ma koluk in el, el srike in tulala Jisus. Tusruktu el tia kutangla. (Jon 18:38, 39; 19:4, 6, 12-16) Fwinne met luo su wi Sanhedrin, pangpang Nicodemus a Joseph lun an Arimathea, su tia srunga Jisus, elos kofla na in kutongye court inge in tia oru ma koluk nu sel Jisus. (Luk 23:50-52; Jon 7:45-52; 19:38-40) Me kasru su metu elos ku in oru fwin elos srukak pusralos in kasru met kulansap lun Jeova​—ke kutena sripe—​tia ku in on nu tok. Fwalu se inge fwa tafwela na in srunga met tuma lutlut paye lun Kraist, oanu ma elos oru nu sel meet. Me kasru su on nu tok ma patpat ku in tuku mukena sin Jeova.​—Orekma 2:24.

17. Kain in nunuk sumwos fuka Met Lo lun Jeova elos srukye, tusruktu efu elos tia munasla ke sulela lalos in tafwela in luti ke peng mwo?

¹⁷ Ke sie nunuk sumwos, Met Lo lun Jeova elos etu la me kolyai ku in fwala na. Me lain inge ku in tui kena pal se Setan a akmwuk lal wanginla. Fwinne ou inge, kolyai inge, fwinne tia mwo, tia ku in kutongye Met Lo lun Jeova ke kunokon lalos in luti ke Togusrai. Efu elos in ou inge, ke oasr kasru nu selos su tuku sin God? Elos ngetuk nu sin Met Kol pulaik lalos, Jisus Kraist, oanu me srikasrak sumwosmwos.​—Orekma 5:17-21, 27-32.

18. Kain in ma upa fuka srakna sano met lun Jeova ke pal fwasru, tusruktu elos lalalfongi ke kain in safla fuka?

¹⁸ Ke mutamwauk me, alu paye sun me lain yok. Ke lusen pal na futoto, alu paye pa nien sun ke meun lulap lun Gog, su pangpang Setan ke sie oiye koluk lal tokin el sisila liki an in kosrao. Tusruktu, alu paye fwa kutangla. (Ezekiel 38:14-16) “Togusra lun fwal nu kemwa,” ye koko lun Setan, “elos inge fwa meun nu sin Lam, a Lam el fwa kutngalosla.” (Fwakyuk 16:14; 17:14) Aok, Togusra lasr el fwasrot nu ke kutangla safla a tia pat toko, “el fwa kutangla.” Sie me sang yok na paye nu sesr in fwasr welul, meyen kut etu la kitin pal lula wangin kutena met su ku in lain met su alu nu sin Jeova ke pal se elos fwak: “God el wi kut”!​—Rom 8:31; Filippai 1:27, 28.

Ya Kom Ku In Aketeye?

• Mea Jeova el oru meet in akkeye congregation lun met Kristian tokin oakiyuki lun Togusrai?

• Mea Setan el oru in sang kutongye Kraist ke fwasrot lal in kutangla, tusruktu mea sikyuk?

• Kain in nunuk sumwos fuka enenu in oasr yurosr ke orekma mwo lun kutu met pengpeng su tia Met Lo?

• Mea Setan el akola in oru ke lusen pal na futoto, a safla ke mea?

[Picture on page 28]

Toeni lulap puspis sie inkanek in akkalemye fwasr nu meet lun met lun Jeova

[Pictures on page 30]

Kaifweung lun Met Lo in tia wi ke kutena u su lain sie sin sie ke lusen pal in Meun Lulap Akluo srakna sang kaksak nu sin Jeova