Akos Sie Me Lutlut Saok nu Sin Tulik Srisrik?
“PAPA a Nine Elos Lungse Met nu Kemwa, Tia Tulik Su Akos Na.” Kas se inge ku in ridiyuk ke sie headline lun sie newspaper. Sie report tuku ke sie survey su orekla fwin an New Zealand, su akkalemye la “percent 22 topuk ke survey elos akkalemye la tulik nu kemwa enenu in eis lutlut in akos in loom selos.” Survey se inge ouyepa konaok la papa a nine puspis ke len inge elos lalalfongi la arulanu yok sripe in luti tulik srisrik ke fasin mwo, in sifwanu etu in oru ma se, a in eis kunokon.
Ke pal inge su met puspis elos sifwanu nunku kelos a rapku, tia me lut la met puspis elos alollo ke akos a in luti ma inge nu sin tulik srisrik. Tusruktu, ya akos lun tulik srisrik enenu in nunkeyuk mu “tia fwal nu ke pal lasr” a “ma lun met in pal meeta” mukena? Ku akos el sie me lutlut yok su tulik nu kemwa enenu in lutlut a eis ma lane ka? Yok liki nu kemwa, mea nunuk lun Jeova God, El su Oakiye akmwuk lun sou, ke akos lun tulik nu sin papa a nine, a mea kutu ma lane su ku in tuku ke akos?—Orekma 17:28; Efesus 3:14, 15.
“Tu Ma Inge Sumwos”
Nu sin met Kristian in century se meet ke congregation lun Efesus, met sap Poul el simusla: “Tulik srisrik komwos in akos papa tumomwos a nine kiomwos in Leum, tu ma inge sumwos.” (Efesus 6:1) Ke ma inge, sripe se yok ke akos pa, ma inge fwal nu ke akmwuk mutal ke ma sumwos. Oanu Poul el fwak, “ma inge sumwos.”
Fwal nu ke ma inge, kut ku in liye la Kas lun God akkalemye la kai su tuku sin papa a nine ke inkanek lun lungse oanu sie me yun kato, “oanu sie tefuro mwo nu fwin sifwom, a me purak nu ke kaiwum,” a oanu Me akinsemwomwoye Leum.” (Soakas 1:8, 9; Kolosse 3:20) Tia oanu ma inge, seakos nu sin papa a nine kol nu ke mulat lun God.—Rom 1:30, 32.
“Tu e Fwa Mwo Nu Sum”
Poul el akkalemye ma lane su tuku ke akos ke pal se el simusla: “ ‘Akfulatye papa tumom a nine kiom; ma inge ma sap se meet oasr mwoleaung ka: ‘Tu a fwa mwo nu sum, a tu in loes moul lom fwin fwalu.’ ” (Efesus 6:2, 3; Exodus 20:12) Ke inkanek puspis fuka akos nu sin papa a nine ku in kol nu ke me insemwomwo?
In mutamwauk ka, ya tia paye la papa a nine elos matu tari a yok experience lalos? Saap fwinne elos tia etu computer ku kutu me lutlut in loom lutlut, tusruktu elos etu oiyen moul a la fuka in kutangla ke ma upa puspis lun moul. A fuka met fwusr, aok nunuk sumwos su tuku sin met matu wangin yurolos. Ke ma inge elos silaklak pal nu kemwa in oru sulela lalos, pal nu kemwa sulela lalos tuku ke me purakak lun kutu tulik su oanu matwelos, su kol nu ke ma upa. Aok, ke sie inkanek sumwos Baibel el fwak: “Lalfon kapuri insien sie tulik.” Fuka in aksumwosye ma inge? “Sikal in kai fwa lusla loes lukel.”—Soakas 22:15.
Ma lane su tuku ke akos ku in alukela futoto lun papa a nine a tulik srisrik nutulos. Nu ke akmwuk lun met tu in orekma mwo a in oasr kapkapek ka, enenu in oasr akesrui, a ma inge tuku ke akos. Ke sie me pupulyuk, pa ke moul in payuk, insemwomwo in kasru, liki na in siyuk ma puspis a tia nunku ke met ngie pa srupon misla, insemwomwo, a engun. Ke nien orekma, akos lun met orekma pa yok emeet nu ke me enenu lun kutena business ku orekma. Fwin ke ma sap lun guferment a akmwuk, akos eneneyuk tia ke sripen kai, a ma inge ku in orala kurunginyuk mwo a wangin me sensen ka.—Rom 13:1-7; Efesus 5:21-25; 6:5-8.
Met fwusr nu kemwa su seakos ku su fulat lukelos pal nu kemwa elos me srungeyuk nu sin metu. Tusruktu, lutlut in akos ke pal inge nu sin fwusr ku in sang me insemwomwo ke lusen moul lun met se. Sie me insemwomwo na paye pa inge in lutlut ke ma inge ke pal in fwusr!
Me Sang Lulap Su Tuku ke Akos
Akos el tia wise mukena me insemwomwo a futoto lun kais sie met in sou a kutupa ma lane, a el ouyepa wise foundeson mwomwo su kut ku in musaela akmwuk futoto nu sin met nu kemwa—a nu inmaslon met a Met Su Orekutla. Oanu “Met Orala Ma Nu Kemwa” el su “sropon moul,” oasr sumwos lun Jeova God in siyuk sesr in akos.—Ekklisiastis 12:1; Sam 36:9.
Kas se inge “akos” a kain in luma puspis ka lal sikyuk pal 160 in Baibel. In wekunang ma inge, oasr me sramsram puspis su piselos oasr ke foko foko ke ma sap lun God, inkanek lal, nununku lal, a akmwuk lal, ma inge nu kemwa akkalemye ke akos. Wangin alollo la God el nunku yok ke oiyen akos oanu sie me enenu nu ke eisyen insemwomwo lal. Aok, akos el sie me enenu in sang musaiyuk futoto nu sin Jeova. (1 Samuel 15:22) Sie me asor, fwin oasr kena lun met in seakos a tia in akos. “Nunuk lun insien met koluk ke pal el tulik,” pa inge ma Baibel el fwak. (Genesis 8:21) Ke ma inge, me lutlut ke akos enenu in lutlutkinyuk tia ke pal in tulik mukena, a ke lusen moul lasr nu kemwa. In oru ou inge ku in wise me insemwomwo yok.
Esam, oanu met sap Poul el fwak, ma sap in akos papa a nine el tuku wikin mwolela luo inge, “tu e fwa mwo nu sum a tu in loes moul lom fwin fwalu.” Sie me akpayeye ke mwolela inge ku in konoiyukyuk in Soakas 3:1, 2: “Mwen nutik nik kom mulkunla ma lo luk, lela insiom in liaung ma sap luk, tu lusen lenu, a yiu lun moul, a misla, elos fwa esani nu sum.” Me sang lulap nu selos nu kemwa su akos pa sie moul futoto nu sin Jeova ke pal inge a moul ma patpat ke sie fwalu sasu su oasr misla.—Fwakyuk 21:3, 4.
[Pictures on page 30, 31]
Akos wise futoto su oasr insemwomwo ke sou, ke nien orekma, a yurin Jeova