Kinet lun Meun

“WANGIN KUTENA met su ku in kutangla ke meun,” pa inge sie solse su wi ke Meun Lulap II el fwak. “Met uh kuf mukena.” Met puspis a insese nu fwak se lal inge. Molin ma tuku ke sripen meun arulanu yok; kemwanu sin met su kutangla a met kuf elos eis ma koluk yok. Fwinne tokin safla meun se met puspis elos tafwela na in keok ke kinet lun mano a inse su tuku ke sripen meun.

Kain in kinet fuka? Meun el ku in aksrikyela pisen met ke sie an, orala wanginla papa a nine kien tulik puspis a orala pa mutan katinmas pukanten. Met puspis su tia mise ke meun inge oasr kinet upa ke manolos, wekunang kinet a asor lun insielos. Million sin met elos ekla met sikasrup ku met kaeng ke tia ke lungse lalos. Ya kut nunku ke lupan koskosrok a me asor yok su ku in onnu ke insien met nu kemwa su moula ke meun?

Kinet Su Onnu

Kinet ku me akkoluk inge su orekla nu ke insien met ke sripen meun a onnu fwinne meun inge tari, a wanginla pusren likisik, a met meun nu kemwa folokla nu loom selos. Fwil lun met toko elos e pulakin srunga upa sie sin sie. Ke ma inge, kinet su meun se el orala ku in sifwil kol nu ke siepa meun toko.

Ke sie me pupulyuk, Treaty of Versailles, su elos signie ke 1919 in aksafyela Meun Lulap I, oakiye sie akmwuk fwin an Germany su orala met lal in pulakin la ma inge arulanu upa a oanu sie foloksak. Fwal nu ke The Encyclopædia Britannica, akmwuk nu kemwa su simusyukla ke treaty “purakak mulat inmaslon met German a ma inge moklelos in suk foloksak.” Tokin yiu ekasr, “mulat su elos srukye ke treaty in misla se inge purakak Hitler in mutamwauk” a pa inge sie sripe inmaslon sripe puspis su kol nu ke Meun Lulap II.

Meun Lulap II mutamwauk fwin an Poland a fwasrelik nu ke an lun Balkan. Kinet lun u puspis fwin an inge su elos oru sie sin sie in yiu 1940 ikasla a akola inkanek nu ke meun fwin an Balkan in yiu 1990 kutu. “Koskosrok upa a kena in suk foloksak arulanu yokyokelik, a sun pal lasr,” pa inge comment lun sie newspaper lun an German, Die Zeit.

Kut fwin lungse met nu kemwa in muta in misla, kinet inge su tuku ke meun enenu in wanginla. Fuka ma inge ku in orek? Ke inkanek mukena lun Togusrai lun God ye koko lun Messaia. Baibel el mwolela la ke inganek lun guferment inge, God “el aksafyela meun nu ke saflaiyen fwalu.”​—Sam 46:9.

[Picture Credit Line on page 2]

COVER: Fatmir Boshnjaku

[Picture Credit Line on page 3]

U.S. Coast Guard photo; UN PHOTO 158297/​J. Isaac