“Lalmetmet Oasr Yurin Met Fwokpap”

“Mea Jeova el suk sum a in . . . fwasr wi inse fwokpap yurin God lom?”​—MAIKA 6:8.

1, 2. Mea se inge fwokpap, a fuka ma inge siena liki fulang?

SIE MET SAP pengpeng el srunga in purakak met in loang nu sel alukela ma fwal. Sie met nununku pulaik lun an Israel el pangnol sifwanu srik emeet in loom sin papa tumal. Mokul se su yok emeet inmaslon met nu kemwa su moul fwin fwalu el akilen la oasr saflaiyen ku lal. Mokul inge nu kemwa akkalemye fwokpap.

² Fwokpap el siena liki fulang. Met fwokpap se el etu lupan ku a etu lal a el tia akfulatyel sifwanu. El tia inse fulat, fulang, ku nunku ke mwal lulap, a sie met fwokpap el etu lupan ku lal a ma el tia ku in oru. Ke ma inge, el akfulatye a nunku ma kutu met elos nunku a pulakin.

3. Ke inkanek fuka lalmetmet on “yurin met fwokpap”?

³ Ke sie sripe mwo Baibel el fwak: “Lalmetmet on yurin met fwokpap.” (Soakas 11:2) Sie met fwokpap el lalmetmet meyen el fwasr tokin inkanek su God el lungse, a el fwasr liki ngunin inse fulat su kol nu ke mwekin. (Soakas 8:13; 1 Piter 5:5) Lalmetmet su tuku ke fwokpap akkalemyeyuk ke inkanek in moul lun met kulansap puspis lun God. Lela kut in tuni me srikasrak tolu su akkalemyeyuk ke paragraph se meet.

Poul​—Sie ‘Met Orekma’ a Met ‘Tutafpo’

4. Kain in me sang fuka ke orekma Poul el engunkin?

⁴ Poul el sie met pengpeng inmaslon met Kristian in pal meeta, a kut kalem ka la efu ou inge. Ke orekma lun forfor lal, el fwafwasyesr ke lusen tausen puspis mail ke mwea a ke an, a el oakiye congregation puspis. In toeni nu ke ma inge, Jeova el akinsemwomwoyel Poul in liye arurumu puspis a me sang in sramsramkin kain in kas pukanten. (1 Korint 14:18; 2 Korint 12:1-5) El ouyepa pakilyel Poul in simusla leta 14 su ingenu oasr ke Ma Simusla lun Kristian Greek. Arulanu kalem, fwal in fwak mu orekma lal Poul yok liki orekma lun kutu met sap.​—1 Korint 15:10.

5. Fuka Poul el akkalemye la oasr yurol nunuk fwokpap ke moul lal sifwanu ?

⁵ Ke sripen Poul el fwasr tokin orekma lun met Kristian, paenang kutu sin met elos nunku in liyel muta ke sie an fulat a met nu kemwa kaksakunul, a in akkalemye mwal lal. Tusruktu, tia ou inge, meyen Poul el fwokpap. El oral sifwanu “srik liki met sap nu kemwa,” a el ouyepa fwak: “A Nga kupansumwol tu elos in pangon yu met sap, meyen Nga nu kolyai tari surs lun God.” (1 Korint 15:9) Oanu sie met su akkeokye met Kristian, Poul el tia mulkunla la ke sripen lungkulang lun God mukena paenang el futoto nu sel, a el sufwalkin in eis engunkin sie me sang lun orekma. (Jon 6:44; Efesus 2:8) Ke ma inge, Poul el tia pulakin la orekma lulap lal ke orekma lun forfor oru el an fulat liki kutu met.​—1 Korint 9:16.

6. Fuka Poul el akkalemye fwokpap ke orekma lal nu sin met Korint?

⁶ Fwokpap lal Poul arulanu kalem ke oiye su el akkalemye nu sin met Korint. Kalem la, kutu selos arulanu purakak inse sin met su elos nunku mu met sropu pengpeng oanu, Appolos, Sifas, a Poul. (1 Korint 1:11-15) Tusruktu, Poul el tia siyuk ke kas in kaksak lun met Korint ku siyuk ke kas in akfulat lalos. Ke pal se el muteta nu yurolos, el tia tuku nu yurolos ke “kaskas lalmetmet, arulanu mwo.” A, Poul el fwak ou inge nu sel sifwanu a nu sin met nu kemwa su welul: “Lela met in nunku ou inge kasr oanu kut met orekma lun Kraist, a met tutafpo ke ma lukma lun God.”a​—1 Korint 2:1-5; 4:1.

7. Fuka Poul el akkalemye fwokpap fwinne ke pal in sang kai?

⁷ Poul el akkalemye fwokpap ke pal se el sang kai upa a kas in kol. El kaifwe nu sin met lili Kristian wiel ke inkanek lun “kulang lun God” a ke “lungse” a tia ke ku lal oanu sie met sap su oasr mwal la. (Rom 12:1, 2; Failimon 8, 9) Efu Poul el oru ou inge? Meyen el nunku na paye moul lal oanu sie ‘met orekma yurin’ met lili wiel, a el tia oral oanu sie ‘leum fwin lalalfongi lalos.’ (2 Korint 1:24) Wangin alollo fwokpap lal Poul pa kasrel tu lan arulanu kulu nu sin congregation lun met Kristian fwin an Korint ke century se meet.​—Orekma 20:36-38.

Sie Nunuk Fwokpap ke Me Sang nu Sesr

8, 9. (a) Efu kut enenu in akkalemye nunuk fwokpap ke moul lasr sifwanu? (b) Fuka met nu kemwa su oasr kunokon yok ku in akkalemye fwokpap?

⁸ Poul el oakiye sie me srikasrak mwo nu sin met Kristian in len inge. Ke kutena kunokon su pakiyuki nu sesr, lela tu in wangin kutena sesr in nunku mu kut fulat liki kutu met. “Tu sie met fwin nunku el sifwanu fulat, ke el tia ou inge,” Poul el simusla, “el sifwanu keapella.” (Galetia 6:3) Efu? Meyen “met nu kemwa orek ma koluk a tia sun mwolanu lun God.” (Rom 3:23; 5:12) Aok, lela kut in tia mulkunla in kutena pal la kut nu kemwa usru ma koluk a mise su tuku sel Edam. Kutena kunokon ku me sang ke orekma su oasr yurosr tia akfulatye kutyak liki an pusisel su kut muta ingenu. (Ekklisiastis 9:2) Oanu ma sikyuk nu sel Poul, ke inkanek lun lungkulang mukena lun God papaenang metu ku in futoto nu sel, elos sufwal nu ke kutena me sang ke orekma.​—Rom 3:12, 24.

⁹ Ke kut akilen ma inge, sie met fwokpap el tia fulang a srumwosr ke me sang ke orekma su oasr yurol. (1 Korint 4:7) Ke pal se elos sang kai ku kas in kol, el oru ou inge oanu sie met orekma yurolos​—a tia in oanu sie leum. Aok, tia sumwos nu sin kutena met su usrnguk ke sie orekma in siyuk kas in kaksak ku lan kaifwe nu sin met lili wiel in lalalfongi in akfulatyel. (Soakas 25:27; Mattu 6:2-4) Kas in kaksak fwal enenu in tuku mukena sin kutu met fwal nu ke lungse lalos sifwanu​—a tia enenu in siyukyuk selos. Fwin ma inge tuku, lela kut in tia nunku la kut fulat liki alukela ma fwal.​—Soakas 27:2; Rom 12:3.

10. Aketeye fuka met puspis su luman pusisel elos “kasrup na paye in lalalfongi.”

¹⁰ Fwin filiyuki nu sesr sie kunokon, inse fwokpap ku in kasre kut in tia nunku yok liki ma fwal ke moul lasr sifwanu, oanu kut akkalemye la congregation el kapek mukena ke sripen kaifweung a usrnguk lasr. Ke sie me pupulyuk, saap kut arulanu sumat in luti. (Efesus 4:11, 12) Aok, kut fwin fwokpap kut enenu in akilen la me lutlut yok emeet su kut ku in eis ke meeting tia tuku ke me sramsram su orek ke stage. Ke sie me pupulyuk, ya kom tia akkeyeyuk ke pal se kom liye papa ku nine su mukena muta elos tuku pal nu kemwa ke Kingdom Hall a wis tulik nutulos? Ku met asor su oaru in tuku nu ke meeting fwinne elos pulakin la oanu wanginla sripen moul lalos? Ku met fwusr su kaifweung kapkapek in ngun elos fwinne muta ye me purakak koluk in loom lutlut ku ke an saye? (Sam 84:10) Met inge nu kemwa saap tianu kalem orekma lalos. Me srifwe ke oaru lalos su elos sun saap tia eteyuk sin met puspis. Tusruktu, “kasrup lalos in lalalfongi” saap oanu sie selos su muta in pengpeng. (Jemes 2:5) Aok, ma yok liki nu kemwa ke saflaiye pa oaru su akinsemwomwoye Jeova.​—Mattu 10:22; 1 Korint 4:2.

Gidion​—“Srik Liki Nu Kemwa” in Loom Sin Papa Tumal

11. Ke inkanek fuka Gidion el akkalemye fwokpap ke pal se el sramsram nu sin lipufon lun God?

¹¹ Gidion, sie mokul fwusr fukoko ke sruf lun Manassa, el moul ke lusen pal in ma upa ke me sramsram lun Israel. Ke lusen yiu itkosr, met lun God elos muta ye koko silolel lun met Midian. Tusruktu, pal lun Jeova tuku in aksukosokye met lal. Ke ma inge sie lipufon sikme nu sel Gidion a fwak: “Jeova el wi kom, kom met ku a pulaik.” Gidion el sie met fwokpap paenang el tianu akkalemye la el arulanu insemwomwo ke kas mwolanu inge nu sel su el tia nunku in tuku. A, ke kas in akfulat el fwak nu sin Lipufon: “O, leum luk, Jeova el fwin wi kut, na efu ma inge nu kemwa ku sikyuk nu fwesr?” Lipufon el kaskas nu sel a fwakak nu sel Gidion: “Molela Israel liki paul Midian.” Fuka topuk lal Gidion? El tia silaklak in eis kunokon inge oanu pa inge sie pal mwo lal in ekla met pengpeng se fwin an’u, a Gidion el topuk a fwak: “O Jeova, Nga fwa molela Israel ke mea? Liye! Sou luk sikasrup liki nu kemwa sel Manassa, a Nga srik liki nu kemwa in loom sin papa tumuk.” Oiye fwokpap na paye pa inge!​—Met Nununku 6:11-15.

12. Fuka Gidion el akkalemye lalmetmet ke pal se el oru kunokon lal?

¹² Meet liki el supwela Gidion nu ke meun, Jeova el srifwel. Ke inkanek fuka? El sapkin nu sel Gidion in kunausla loang lal Beal lun papa tumal a pakiye sak mutal su on siske. Kain in orekma inge enenu pulaik, tusruktu Gidion el akkalemye pa fwokpap a liyaten ke pal se el oru ou inge. El tia oru ou inge ye mutun met nu kemwa, a el akpayeye kunokon lal inge ke eku in pal se ke wangin met su ku in akilen ma el akola in oru. El oru met kulansap siengoul in welul​—saap in oru kutu in topang ke pal se el kunausla loang a sak mutal su on siske.b Ke kutena ma sikyuk, ke insemwomwo lun Jeova, Gidion el akpayeye kunokon lal, a tokin ma inge God el orekmakunul in molela met Israel liki met Midia.​—Met Nununku 6:25-27.

Akkalemye Fwokpap a Lalmetmet

13, 14. (a) Fuka kut ku in akkalemye fwokpap fwin sie me sang ke orekma etuku nu sesr? (b) Fuka Brother A. H. Macmillan orala sie me srikasrak mwo ke fwokpap?

¹³ Oasr ma pukanten kut ku in lotela ke oiye fwokpap lal Gidion. Ke sie me pupulyuk, oiye fuka kut in akkalemye fwin sie me sang ke orekma etuku nu sesr? Ya kut nunku meet ke pengpeng, ku in met eteyuk se su ku in sikyuk? Ku kut akkalemye fwokpap a kut pre ke kut tuni akmwoye fwin kut ku in akpayeye ma enenu ke kunokon sa? Brother A. H. Macmillan, su aksafyela orekma lal fwin fwalu in yiu 1966, el oakiye sie me srikasrak mwo ke ma se inge. Sie pal C. T. Russell, president se meet lun Watch Tower Society, el siyuk sel Brother Macmillan ke ma el nunku ke met su ku in kol ke orekma el fwin wangin. Ke sramsram lalos, Brother Macmillan el tia akkalemyel sifwanu oanu el pa met su fwal in kol, fwinne oasr pal mwo lal in oru ou inge. Ke saflaiye, Brother Russel el kaifwe nu sel Brother Macmillan in nunku la el fwin ku in oru kunokon inge. “Nga arulanu lut na paye,” pa inge ma Brother Macmillan el simusla tokin yiu ekasr. “Nga nunku na paye ma inge, a Nga pre ka ke lusen sie pal meet liki Nga fwak nu sel ke saflaiye la Nga engun in oru ma nu kemwa ke ku luk in kasrel.”

¹⁴ Tia pat toko, Brother Russell el mise, el likiye mwesas ofus lun president lun Watch Tower Society. Ke sripen Brother Macmillan pa in charge ke lusen pal in forfor safla lal Brother Russell in luti, paenang sie brother el fwak nu sel: “Mac, oasr pal mwo lom na paye in eis nu sum sifwanu ofus lun president. Kom pa met tutafpo lal Brother Russel el fwin wangin, a el sapkin nu sesr kemwa in oru orekma lasr fwal nu ke ma kom fwak. Aok, el som tari a el e tia sifwil foloko. Luman kom pa mokul se a tafwela ma inge.” Brother Macmillan el topuk: “Brother, tia pa inge inkanek in liye ma inge. Orekma lun Leum pa inge a kunokon se su kom ku in eis ke u lun Leum pa ma se su el lungse in sot nu sum; a Nga etu la tia Nga pa mokul se a fwal nu ke orekma se inge.” Na Brother Macmillan el akkeye kutu met in eis kunokon inge. Oanu Gidion, el fwokpap ke nunuk lal​—sie kain in nunuk su arulanu mwo nu sesr kemwa in etawi.

15. Mea kutu inkanek mwo su kasre kut in akkalemye lalmetmet ke pal se kut luti kutu met?

¹⁵ Kut enenu in akkalemye pa fwokpap ke inkanek in oru kunokon lasr. Gidion el lalmetmet a el tia srike in akmulatye met su lainul fwin tia eneneyuk. In oupanu, ke orekma in luti lasr, kut enenu in fwokpap a lalmetmet ke inkanek in sramsram lasr nu sin kutu met. Paye, kut wi ke sie meun in ngun in “sukela an ku” a “sukela nunuk.” (2 Korint 10:4, 5) Tusruktu, lela kut in tia pilesru kutena met ku moklelos in lain me sramsram su kut wis. A, kut enenu in akfulatye ma elos nunku, akkalemye ma su kut ku in insese, a loang mwo nu ke ma mwo su tuku ke me sramsram lasr.​—Orekma 22:1-3; 1 Korint 9:22; Fwakyuk 21:4.

Jisus​—Me Srikasrak Yok Emeet ke Fwokpap

16. Fuka Jisus el akkalemye la oasr yurol sie nunuk fwokpap ke moul lal sifwanu?

¹⁶ Me srikasrak mwo emeet ke fwokpap pa Jisus Kraist.c El arulanu futoto nu sin Papa tumal, Jisus el tia alollo in akilen la oasr kutu luma a ma sikyuk su wangin ku lal ka. (Jon 1:14) Ke sie me pupulyuk, Ke pal se nine kiel Jemes a Jon elos siyuk sel el an oru tulik mokul luo nutul in muta siskel Jisus ke Togusrai lal, Jisus el fwak: “A in muta lepouk leyut, a lepouk lese, tia ma luk in sot.” (Mattu 20:20-23) Ke siepa pal, Jisus el sukosok in fwak: “Nga koflanu sifwanu oru kutena ma . . . tu Nga tia suk ma lungse luk sifwanu, a ma lungse lal su supeyume.”​—Jon 5:30; 14:28; Filippai 2:5, 6.

17. Fuka Jisus el akkalemye fwokpap ke orekma lal nu sin kutu met?

¹⁷ Jisus el fulat liki met sumwosmwos ke inkanek nu kemwa, a oasr yurol ku su fulat liki met nu kemwa, ma inge tuku sin Papa tumal, Jeova. Ou inge, Jisus el fwokpap ke orekma lal nu sin met tuma lutlut lal. El tia aklutyelos alukela ma fwal ke lalmetmet lal. El akkalemye la el nunku ke pulakin lalos a el pakomutalos a el akilen ma enenu lalos oanu sie met. (Mattu 15:32; 26:40, 41; Mark 6:31) Ke ma inge, Jisus el fwinne sumwosmwos, el tia suk met in oru orekma oanu el. El tia siyuk alukela liki ma met tuma lutlut lal ku in oru, a el tia filiye me utuk toasr fwin piselos su tia ku in utuk. (Jon 16:12) Tia me lut, met puspis elos futoto nu sel meyen el sang mongle nu selos!​—Mattu 11:29.

Etawi Me Srikasrak lal Jisus ke Fwokpap

18, 19. Fuka kut ku in etawi fwokpap lal Jisus ke (a) inkanek lasr in nunku kut sifwanu, a (b) ke oiye su kut akkalemye nu sin kutu met?

¹⁸ Fwin mokul se inge su fulat liki nu kemwa su moul fwin fwalu meet el akkalemye fwokpap, na fwal pa nu sesr in akkalemye ou inge ke inkanek yok. Pal nu kemwa met sesumwos elos srunga in akilen la wangin ku lalos su su on nu tok ma patpat. Tusruktu, in etawi Jisus, met Kristian nu kemwa elos kaifweung in fwokpap. Elos tia inse fulat paenang elos tia srunga in sang kunokon nu selos su fwal ka; ku elos fulang a srunga in eis kas in kai nu selos su pakiyuki in oru ou inge. Meyen elos akkalemye ngunin akesrui, paenang elos lela ma nu kemwa in congregation in “orek in oiye fwal, a in takla.”​—1 Korint 14:40.

¹⁹ Inse fwokpap mokle kut pa in srukye nunuk sumwos ke ma lungse lasr nu sin kutu met in oru a in nunku ke ma enenu lalos. (Filippai 4:5) Saap oasr yurosr etauk a ku ke ma se su wangin sin kutu met. Tusruktu, kut fwin fwokpap, kut a tia sano pal nu kemwa kutu met in oru oanu ma kut lungse elos in oru. Meyen kut etu la kais sie met tia oanu sie ku lalos, paenang ke inkanek lun fwokpap kut lela ma tafongla lun kutu met in fwasr liki kut. Piter el simusla: “A yok liki nu kemwa komwos in lungse sie sin sie, tu lungse afwunye ma koluk puspis.”​—1 Piter 4:8.

20. Mea kut enenu in oru in kutangla liki kena in fulang?

²⁰ Oanu ma kut lotela tari, lalmetmet oasr yurin met fwokpap. A fuka fwin kom konaok la pal puspis oasr kena lom in akkalemye inse fulat a fulang? Lela kom in tia munasla. A fwasr tokin me srikasrak lal Devid, su pre: “Srukye pa met kulansap lom liki ma koluk lun inse fulang; nikmwet lela ma inge in kutangyula.” (Sam 19:13) Ke kut etawi me srikasrak ke lalalfongi lun mokul puspis inge oanu Poul, Gidion, a​—yok liki nu kemwa—​Jisus Kraist, kut ku in pula na paye ma paye lun kas inge: “Lalmetmet on yurin met fwokpap.”​—Soakas 11:2.

[Footnotes]

Ya Kom Esam?

• Mea se inge fwokpap?

• Fuka kut ku in etawi fwokpap lal Poul?

• Mea kut ku in lotela ke fwokpap ke me srikasrak lal Gidion?

• Fuka Jisus el akkalemye me srikasrak yok emeet ke fwokpap?

[Picture on page 25]

Fwokpap lal Poul arulanu akfutotoyel nu sin met lili Kristian wiel

[Picture on page 27]

Gidion el orekmakin lalmetmet ke pal se el oru ma lungse lun God

[Picture on page 28]

Jisus, Mwen nutin God, el akkalemye fwokpap ke ma nu kemwa el oru