Akfulatye El Su Fulat Liki Kom
“Komwos in oru fwal nu sin met nu kemwa, komwos in lungse met lili, komwos in sangeng sin God, komwos in akfulatye togusra.”—1 PITER 2:17.
1, 2. Fuka nunuk lun met puspis ke ku su fulat lukelos misinge? A efu?
“OASR sumwos nu kemwa lun tulik. Wangin sunak nu sin papa a nine,” sie nine el fwak ke asor lal. “Lain Ku su Fulat liki Kom” pa inge ma simusla ke sie sticker ke sitosa. Pa inge ma luo ke oiye su arulanu pengpeng ke len inge, oanu komwos etu tari. Wangin sunak sin papa a nine, met luti, met lulap ke nien orekma, a met lulap ke guferment arulanu pengpeng fwin fwalu nu fon misinge.
2 Kutu met elos ku in fwak, ‘Elos su muta ke nien muta fulat tia fwal nu ke sunak luk.’ Kutupal, arulanu upa nu sin sie met in tia insese ke kas inge. Pal nu kemwa kut ku in long a ridi news ke met lulap ke guferment su arulanu koluk, met lulap ke orekma su rapku, met luti sufwal, a papa a nine koluk. Sie me insemwomwo, meyen arulanu supus met Kristian su srukye kain in nunuk inge nu sin met nu kemwa su kol in congregation.—Mattu 24:45-47.
3, 4. Efu met Kristian nu kemwa enenu in akkalemye akfulat nu selos nu kemwa su oasr mwal fulat?
3 Oanu met Kristian, oasr “sripe yok” lasr in akfulatye met nu kemwa su fulat liki kut. Met sap Poul el sapkin nu sin met Kristian in “akos nu ke ku su fulat lukelos; tu wangin ku a ma sin God mukena; a ku su on ma God el lela.” (Rom 13:1, 2, 5; 1 Piter 2:13-15 New World Translation) Poul el ouyepa akkalemye sie sripe fwal in pusisel nu ke ku su fulat liki kut in sou: “Mutan kie komwos in akpusisilye komwos nu sin mokul tumomwos, oanu fwal in Leum. Tulik, komwos in akos papa tumomwos a nine kiomwos in ma nu kemwa, tu ma inge me akinsemwomwoye Leum.” (Kolosse 3:18, 20) Met elder nu kemwa lun congregation elos fwal nu ke akfulat lasr meyen ‘ngun mutal pakilosi in ekla met sropu, in kurunganang congregation lun God.’ (Orekma 20:28) Kut akfulatye Jeova paenang kut akfulatye met su fulat liki kut. Paye, in pusisel nu ke ku lun Jeova pa enenu yok emeet ke moul lasr.—Orekma 5:29.
4 Ke kut nunku ke ku lun Jeova su fulat liki nu kemwa, lela kut in tuni me srikasrak lun kutu met su tia akfulatye met su fulat lukelos a me srikasrak lun kutu met su oru ou inge.
Wangin Sunak Kol nu ke Me Asor
5. Kain in oiye fuka su wangin sunak Maikal el akkalemye nu sel Devid, a ma inge kol nu ke mea?
5 Ke me sramsram ke moul lal Togusra Devid, kut ku in liye la mea Jeova el nunku nu sin met nu kemwa su pilesru akmwuk lun God. Ke pal se Devid el sapkin nu sin met lal in wisla tuptup lun Jeova nu Jerusalem, mutan kiel “Maikal, el liyel Devid Togusra ke el srosro a onsrosro ye mutun Jeova; a el srungel insiel.” Maikal el enenu in akilen la Devid el tia sifwen sou mukena a el ouyepa togusra lun an’u. Fwinne ou inge, el akkalemye pulakin lal ke kas su wangin sunak ka: “Fuka lupan mwo togusra lun Israel misinge, su sifwanu igasak misinge ye mutun mutan kulansap lun met kulansap lal, oanu sie met losrongten su sifwanu igasalak a tia mwekin!” Ke sripen ma el oru inge, Maikal el tia isus tulik nu ke el mise.”—2 Samuel 6:14-23.
6. Mea nunuk lun Jeova ke oiye lal Kora su wangin sunak nu sin met akmusrala lal?
6 Sie me srikasrak koluk su wangin sunak nu sin met kol su God el pakiye pa me sramsram kel Kora. Oanu sie met Kohathite, sie me sang yoklanu nu sel in oru orekma nu sin Jeova in loom alu! Fwinne ou inge, el srakna suk tafongla lal Moses a Aaron, elos su akmusrala sin God in kol mutanfwal Israel. Kora el akesrui nu sin kutu met fwisrak lun Israel a elos fwak kas in lain nu sel Moses a Aaron: “Komtel akfulatye komtel yok liki ma fwal, ke met in u se inge nu kemwa elos met mutal, aok elos nu kemwa, a Jeova el muta inmaslolos. Ke ma inge efu komtel ku in akfulatye komtel fwin u lun Jeova?” Mea Jeova el nunku ke oiye lal Kora a met nu kemwa su welul? God el liye orekma lalos oanu sie luma kupatol nu sel Jeova sifwanu. Tokin el liye fwalu ke el mangelik a okmalosla met nu kemwa su welul, Kora a met fwisrak 250 nu kemwa anwuki ke e su tuku sin Jeova me.—Oekyuk 16:1-3, 28-35.
7. Ya oasr kutena sripe lun “met sap fulatlanu” in akkolukye mwal lal Poul?
7 Ke congregation lun met Kristian ke century se meet, oasr kutu met su pilesru kolyuk lun theocratic. “Met sap fulatlanu” in congregation lun Korint elos akkalemye pilesru lalos nu sel Poul. Elos akkolukye ku lal in sramsram, a fwak: “Manol munas fwin liyeyuk, a kas lal piles.” (2 Korint 10:10; 11:5) Fwinne Poul el sumat ku tia ke sramsram, arulanu fwal in kaksakunul meyen el sie met sap. Tusruktu, ya inkanek in sramsram lal Poul pilesr na paye? Sramsram lal su simusyukla in Baibel orala me akpayeye la el arulanu mwo in sramsram in pal meeta. Aok, ke sripen sramsram futoto lal nu sel Herod Agrippa II, “lalmetmet ke ma nu kemwa . . . inmaslon met Ju,” Poul el purakak togusra se inge in fwak: “Kom apkurun in eis insiuk tu Nga sie met Kristian”! (Orekma 13:15-43; 17:22-34; 26:1-28) Aok, met sap fulatlanu fwin an Korint elos kikiap in fwak la el pilesr ke kas lal! Mea nunuk lun Jeova ke oiye lalos? Ke kas lal nu sin met sropu ke congregation lun Efesus, Jisus el sramsram mwo ke met puspis su srunga in loang nu sin met su ‘pangnolos sifwanu met sap, a elos tia.’—Fwakyuk 2:2.
Akfulatyelos Elos Fwinne Sesumwos
8. Fuka Devid el akkalemye la el akfulatye mwal su Jeova el sang nu sel Soul?
8 Oasr me srikasrak puspis in Baibel ke met puspis su akfulatye met su fulat lukelos, fwinne met inge orekmakin ku lalos ke inkanek sesumwos. David pa sie sin me srikasrak mwo inge. Togusra Soul, su el kulansap nu se, el sok ke kutangla lal Devid a suk in unilye. (1 Samuel 18:8-12; 19:9-11; 23:26) Tusruktu, fwinne oasr pal mwo lal in uniye Soul, Devid el fwak: “Jeova lan ikolyuwi tu Ngan tia oru ma se inge nu sin leum luk, su Jeova el moswella!” (1 Samuel 24:3-6; 26:7-13) Devid el etu la Soul el tafongla, tusruktu el lela Jeova in oru nununku nu sel. (1 Samuel 24:12, 15; 26:22-24) El tia kaskas koluk kel ku in fwak ma pilesru kel Soul.
9. (a) Mea pulakin lal Devid ke pal se Soul el oru ma koluk nu sel? (b) Efu kut ku in fwak la sunak lal Devid nu sel Soul arulanu paye a wangin kutasrik?
9 Ya Devid el pulakin asor yok ke pal se akkolukyeyuk el? “Tu met silolel . . . suk ngunik,” David el tung nu sin Jeova. (Sam 54:3) El ikasla insiel nu sin Jeova: “Moliyula liki met lokwalok luk, O God luk . . . Met ku elos tukeni lain yu, tia ke sito luk, ku koluk luk, O Jeova. Elos kasrusr a akoelos sifwanu a wangin metik. Ngetalik a kasru yu, a liye.” (Sam 59:1-4) Ya oasr pal kom pulakin pa ou inge—fwinne wangin kutena ma koluk kom oru nu sin met su fulat liki kom, a el tafwela na in akkeokye kom? Devid el tia pilesrel Soul. Ke pal in mise lal Soul, el tia akkalemye insemwomwo lal, a Devid el orala sie eoksra: “Soul a Jonetan eltal met lung a met insemwomwo ke eltal moul . . . Eltal sa liki igul, eltal ku liki laion. Komwos an natul Israel, tung kel soul.” (2 Samuel 1:23, 24) Sie me srikasrak mwo na paye pa inge ke akfulat paye nu sin met akmusrala lun Jeova, fwinne Soul el oru ma koluk nu sel Devid!
10. Kain in me srikasrak mwo fuka Poul el oakiye ke akfulat lal nu ke ku su God el sang nu sin governing body, a ma inge kol nu ke mea?
10 Ke pal lun met Kristian, ku in ouyepa konaok me srikasrak mwo puspis lun met su akfulatye ku su akmwuki sin God. Ke sie me pupulyuk pa Poul. El akkalemye sunak ke ma governing body ke congregation lun met Kristian elos sulela ke century se meet. Ke lusen pal in muteta safla lal Poul nu in an Jerusalem, governing body elos kaifwe nu sel lan aknasnasyel sifwanu fwal nu ke akmwuk lun ma sap in akkalemye la el tia srunga Ma Sap lal Moses. Poul el ku in fwak: ‘Met lili wiuk inge elos kaifwe nu sik meet in som liki Jerusalem ke pal se moul luk oasr ke me sensen. Na, ke pal inge elos lungse Nga in akkalemye ye mutun metu la Nga sunakin Ma Sap lal Moses. Nga sim tari sie leta nu sin met Galetia a kaifwe nu selos in tia sifwil akpusisilyelos nu ke Ma Sap lal Moses. Fwin Nga som nu ke tempel, kutu met elos e fwa fos ke ma Nga oru a nunku la Nga wi elos su kosroila.” Tusruktu, arulanu kalem la Poul el tia nunku ou inge. Meyen wangin kutena ma sap lun met Kristian el e kunausla, paenang el akfulatye a akos kai lun governing body ke century se meet. Fwokin ma inge pa, Poul el moliyukla liki un met Ju koluk, a tia pat toko el muta ke nien kapur ke lusen yiu luo. Ke saflaiye, ma lungse lun God orekla. Poul el sang ma lo nu sin met lulap ke guferment fwin an Caesarea a tok el som nu Rom ke kasru lun guferment in sang ma lo nu sel Sisar.—Orekma 9:26-30; 21:20-26; 23:11; 24:27; Galetia 2:12; 4:9, 10.
Ya Kom Akkalemye Sunak?
11. Fuka kut ku in akkalemye akfulat ke ku su fulat liki kut?
11 Ya kom akkalemye sunak nu selos nu kemwa su fulat liki kom? Sapkinyuk nu sin met Kristian nu kemwa in “sang ma fwal nu selos . . . sunak nu sin su fwal in sunakin. Paye, tia in moli tax mukena pa enenu nu ke pusisel lasr ke “ku su fulat liki kut,” a kut enenu in akfulatye met ku inge ke inkanek lun kas a orekma lasr. (Rom 13:1-7) Oiye fuka kut akkalemye kut fwin osun nu sin met kol lun guferment su luman silolel? Fwin an Chiapas State, Mexico, met lulap ke guferment ke sie an we elos eisla imae lun sou 57 lun Met Lo lun Jeova meyen met Kristian inge elos tia wi kutu me akfulat lun alu fwin an we. Ke meeting puspis su elos oru in aksumwosye ma upa inge, met lo lun Jeova elos nukomang nuknuk fwal a nasnas, elos sramsram ke inkanek su oasr sunak a akfulat. Tokin yiu se, nununku akkeye me insemwomwo nu selos. Oiye mwo lalos inge purakak me akfulat lun kutu met su liye ke ma sikyuk inge paenang kutu selos lungse pa in ekla Met Lo lun Jeova!
12. Efu arulanu yok sripe nu sin mutan su payuk nu sin met silalalfongi in akkalemye “sunak yok?”
12 Fuka kom ku in akkalemye sunak nu ke ku su God el oakiye in sou? Tokin el sramsramkin ke me srikasrak lun Jisus ke mongfwusesr in keok, met sap Piter el fwak: “Ouyepa mutan kie, komwos in akos mokul tumomwos, tu kutena fwin tia akos kas lun God, elos fwa kolyuk fwinne wangin kas ke oiyen mutan kielos, ke elos liye oiye mwo lomwos wikin sunak lulap.” (1 Piter 3:1, 2; Efesus 5:22-24 NW) Ke fus inge Piter el akkalemye ke ma saok su tuku ke pusisel lun mutan kie nu sin mokul tumal wikin “sunak lulap,” fwinne kutu mokul elos tia orala mwo in fwal nu ke kain in sunak inge. Sie oiyen sunak mwo lun mutan kie ku in ekulla insien mokul tumal su tia lalalfongi.
13. Fuka mutan kie nu kemwa elos ku in akfulatye mokul tumalos?
13 Ke kutu fus sisken fus inge, Piter el orekmakin me srikasrak lal Sera, su mokul tumal pangpang, Ebream, el orala sie me srikasrak mwomwo nu ke lalalfongi. (Rom 4:16, 17; Galetia 3:6-9; 1 Piter 3:6) Ya mutan payuk nu kemwa su oasr mokul tuma su lalalfongi elos enenu in oru nu selos akfulat a sunak srik liki sunak a akfulat nu sin mokul tuma su tia lalalfongi? A fuka kom fwin tia insese nu sin mokul tumom ke kutu ma sikyuk? Jisus el sang kai su ku in orekmakinyuk ke sie inkanek yok: “A kutena met su fwa akkosye kom in fwasr ke sie mail, kom oelul fwasr ke luo. Ya kom akfulatye mokul tumom ke kom welul ke ma el lungse? Fwin upa in oru ou inge, in fwal nu sel ke ma kom pulakin ka. Lela kom in tia nunku mu el etu tari ma kom pulakin. Tusruktu, ke pal se kom fwakak nu sel ma kom lungse, oru ma inge ke sunak. Baibel el fwak: “Lela kas lomwos in kulang pal e nu kemwa, solela ke sol, tu komwos fwa ku in etu fuka fwal in topuk nu sin kais sie met.”—Kolosse 4:6.
14. Mea ma inge su enenu in toeni nu ke akfulat nu sin papa a nine?
14 A fuka tulik nutum? Kas lun God el sapkin nu selos: “Tulik srisrik, komwos in akos papa tumomwos a nine kiomwos in Leum, tu ma inge sumwos; Akfulatye papa tumom a nine kiom ma inge ma sap se meet oasr mwoleung ka.” (Efesus 6:1-3 NW) Tuni akmwoye meyen in akos sie papa a nine a oupanu ke ‘akfulat nu sin papa a nine kiom.’ Kas Greek su orekmakin “akfulat” ku in kalmekinyuk pa nu ke “aksaokye” ku “oakiye sie moul nu ka.” Ke ma inge, in akos, oasr ma enenu saye su kom enenu in oru a tia in akos mukena ke ma sap lun papa a nine su kom tia engun ka. God el siyuk sum in akfulatye papa a nine kiom a in aksaokye kas in kai lalos.—Soakas 15:5.
15. Fuka tulik srisrik nu kemwa elos ku in srukye akfulat lalos fwinne elos pulakin la papa a nine kielos oru ma tafongla?
15 Fwin papa a nine kiom elos oru ma se in aksrikyela akfulat lom nu selos, na mea kom enenu in oru? Srike in liye ma se ma fwal nu ke nunuk lalos. Ya elos tia “oswekomla” a sot me enenu lom? (Soakas 23:22) Ya elos tia orekmakin lungse lalos nu sum? (Hibru 12:7-11) Orekmakin sunak nu sin papa a nine kiom, aketeye ke ngunin kulang ma kom pula. Elos fwinne topuk ke inkanek su kom tia lungse, kaifweung in tia sramsram nu selos ke inkanek kupatol. (Soakas 24:29) Esamul Devid ke el srukye na akfulat lal nu sel Soul ke togusra se inge el som liki kas in kai lun God. Siyuk sin Jeova in kasru kom ke pulakin lom. “Fwakak insiomwos ye mutal,” Devid el fwak. “God el nien molela nu sesr.”—Sam 62:8; Eoksra 3:25-27.
Akfulatyelos Su Kol
16. Mea kut ku in lotela ke me srikasrak lun met luti kikiap a lipufon?
16 Met elder lun congregation elos pakiyuki ke ngun mutal, fwinne ou inge, elos srakna sesumwos a ku in tafongla. (Sam 130:3; Ekklisiastes 7:20; Orekma 20:28; Jemes 3:2) Ke sripe se inge, saap kutu sin met in congregation elos ku in pulakin toasr lalos nu sin met elder. Oiye fuka kut ku in akkalemye fwin kut pulakin la oasr ma sikyuk in congregation su tia aksumwosyeyuk? Srike liye ma su tia oanu sie inmaslon met luti kikiap ke century se meet a lipufon: “Elos [met luti kikiap] pulaik a likeke, elos tia langengeng a sangeng in kaskou nu ke ma fulat, tu lipufon, su liki in ku a mwal, elos tia kaskas akkolukyelos ye mutun Jeova.” (2 Piter 2:10-13) Fwinne met luti kikiap elos tia sangeng in kaskou nu sin “met fulat”—met elder su oasr kunokon ke congregation lun met Kristian ke century se meet—tusruktu lipufon elos tia kaskas koluk lain met luti kikiap su paenang in oasr srisrielik inmaslon met lili. Lipufon, su oasr mwal fulat a yok in akilen nununku sumwos liki met, elos etu mea ma sikyuk in congregation. Aok, ke sripen “sunak lalos nu sin Jeova,” elos lela God in oru nununku.—Hibru 2:6, 7; Jud 9.
17. Fuka lalalfongi lom ku in orekma ke pal se kom sun sie ma upa a kom pulakin la met elder elos tafongla?
17 Fwinne oasr luma su tia aksumwosyeyuk fwal nu ke ma enenu, ya tia fwal nu sesr in lalalfongi Jisus Kraist su sifwen congregation lun met Kristian? Ya el tia etu luma a ma sikyuk ke congregation lal fwin fwalu nu fon? Ya tia fwal nu sesr in akfulatye ma el sapkin a akilen ku lal in aksumwosye ma inge? Aok, ‘ka su kut, kut su oru nununku met tulan lasr?’ (Jemes 4:12; 1 Korint 11:3; Kolosse 1:18) Efu kom tia sang nu sin Jeova me fosrnga lom ke inkanek lun pre?
18, 19. Mea kom enenu in oru kom fwin pulakin la sie elder el tafongla?
18 Ke sripen sesumwos lun met, ma upa a me fos ku in sikyuk. Saap oasr sie pal met elder el ku in tafongla, akfosrye met puspis. Silaklak lun nunuk lasr in aksumwosye ma inge tia aksumwosyela mwo ma sikyuk inge. Saap ma kut oru inge ku in akyokyelik ma upa sa. Elos nu kemwa su oasr liyaten in ngun yuro elos sano Jeova in aksumwosye a in sang kai su eneneyuk ke pal el pakiyuki a ke inkanek lal.—2 Timote 3:16; Hibru 12:7-11.
19 A fuka kom fwin pulakin keok asor ke kutu ma sikyuk? Lela kom in tia sramsramkin ma inge nu sin kutu met in congregation, a ke inkanek lun sunak efu kom tia osun nu sin met elder in suk kasru? Ke sie inkanek sumwos su tia suk ma tafongla lun kutu met, aketeye nu selos pulakin lom. Pal nu kemwa akkalemye “pakoten sie sin sie,” a orekmakin inkanek in akfulat ke kom sramsram nu selos. (1 Piter 3:8) Lela kom in tia akkalemye kas upa in akngalye kutu, a lalalfongi ke matwe lalos in ngun oanu met Kristian. Akkalemye insemwowo ke kutena kas in akkeye su tuku ke Baibel su elos sot nu sum ke kulang. A fwin srakna oasr me aksumwos su enenu in orek, akkalemye lalalfongi la Jeova el fwa kol met elder in oru mea ma mwo a ma sumwos.—Galetia 6:10; 2 Tessalonika 3:13.
20. Mea kut akola in tuni akmwoye ke me lutlut toko?
20 Aok, oasr pa ma saye su enenu in sramsramkinyuk ke akfulat a sunak nu selos nu kemwa su fulat liki kut. Ya tia met inge nu kemwa su filiyuki ke mwal fulat enenu pa in akfulatye met nu kemwa su muta ye koko lalos? Lela kut in tuni ma inge ke me lutlut toko.
Fuka Kom Ku In Topuk?
• Sripe mwo fuka oasr yurosr in akfulatyelos nu kemwa su oasr mwal fulat?
• Mea nunuk lun Jeova a Jisus nu selos nu kemwa su tia akfulatye ku su tuku sin God?
• Kain in me srikasrak mwo fuka oasr yurosr ke met nu kemwa su akfulatye ku su fulat lukelos?
• Mea kut enenu in oru fwin sie met su fulat liki kut el tafongla?
[Picture on page 8]
Sera el arulanu akfulatye mwal lal Ebream a el arulanu insemwomwo
[Picture on page 9]
Maikal el tia akfulatye mwal lal Devid oanu sie sifwe a togusra
[Picture on page 11]
“Ikolyuwi, . . . tu Ngan tia oru ma se inge nu sin leum luk su Jeova el moswella!”
[Picture on page 12]
Efu kom tia filiye fosrnga lom ye mutun Jeova ke pre?