“Sie Pal In Misla” Apkurun!

“Oasr pal ke ma nu kemwa, . . . sie pal in meun a sie pal in misla.”​—EKKLISIASTIS 3:1, 8.

1. Kain in luma fuka sikyuk ke lusen century ak20 ke meun a misla?

APKURUN met nu kemwa in lungse misla, ke sripe mwo. Century ak20 akmwuk lun misla el srik liki kutena century ke me sramsram lun fwalu. Sie me asor yok pa inge, meyen sramsram a kaifweung in oasr misla in pal inge yok liki meeta. In 1920 u se inge League of Nations oakiyuki. In 1928 u se inge Kellogg-Briand Pact, su akmwuki in kurungin mokuikui lun meun oanu “in nawu suk inkanek nu kemwa in kurungin misla tokin Meun Lulap I,” a “apkurun mutanfwal nu kemwa fwin fwalu” akkeyela . . . a insese in akalemye lain nu ke meun in oanu sie kofwen me orekma nu ke akmwuk lun sie an.” In yiu 1945 u se inge United Nations el oakiyuki in aol League of Nations su tianu oru orekma fwal nu ke akmwuk.

2. Mea nien sun lun United Nations, a fuka lupan kutangla lal?

² Oanu League, nien sun lun United Nations pa in oakiye misla nu fwin fwalu nu fon. Tusruktu naweyuk mwo lal arulanu sufwal. Paye, wanginla meun misinge fwin fwalu in oanu meun lulap luo lun fwalu su somla. Tusruktu, oasr meun srisrik puspis su arulanu kunausla misla lun tausen puspis met, kunausla ma lalos, a pal nu kemwa moul lalos. Ya kut ku in fwinsrak ku lalalfongi mu United Nations el ku in akmwoyela century ak21 nu ke “sie pal in misla”?

Sropon Misla Na Paye

3. Efu misla na paye tia ku in sikyuk fwin oasr srunga?

³ Misla inmaslon met a mutanfwal tia sikyuk mukena ke sripen wangin asupangi lun sie sin sie. Ya sie met el ku in eis misla na paye yurin met su el srunga? Mo meyen fwal nu ke 1 Jon 3:15: “Kutena met su srunga met lel el sie met akmas.” Oanu me sramsram lun fwalu ke len lasr akkalemye, la srunga pa yok emeet e arulanu fwusesr in paenang orekma silolel.

4. Su mukena ku in pulakin misla, a efu?

⁴ Meyen Jeova pa “God lun misla,” paenang misla el ku in tuku nu sin met na su lungse God a akfulatye na paye ma sap sumwosmwos lal. Arulanu kalem, Jeova el tia sang misla nu sin met nu kemwa. “ ‘Wangin misla,’ God luk el fwak, ‘nu sin met koluk.’ ” Ma inge sikyuk meyen met koluk elos srunga in lela moul lalos in oan ye koko lun ngun mutal lun God, su fwokin ma inge pa misla.​—Rom 15:33; Isaia 57:21; Galetia 5:22.

5. Mea ma inge su tia fwal met Kristian paye in nunku?

⁵ In orek meun lain met​—oanu met puspis su ekin Kristian elos oru ke century ak20 inge—​ma inge tia sumwos nu sin met Kristian paye in oru. (Jemes 4:1-4) Paye, elos meun lain me luti kikiap su lain God, tusruktu kain in meun inge orek in sang kasru aksumwosye met, a tia akkeokyelos. In kolyai kutu met ke sripen siena alu lalos ku in akkeokye met ke sripen el ma ke siena an tia fwal nu ke oiyen met Kristian paye. “Komwos fwin ku oanu on yuromwos,” Poul el kaifwe nu sin met Kristian fwin an Rom, “komwos misla yurin met nu kemwa.”​—Rom 12:17-19; 2 Timote 2:24, 25.

6. Piye an siefwunnu misla paye ku in konoiyukyuk ke len inge?

⁶ Ke len inge, misla paye ku in konoiyukyuk mukena inmaslon met su alu paye nu sin Jeova mukena. (Sam 119:165; Isaia 48:18) Wangin kutena akmwuk lun politic ku in akkolukye misla lalos, meyen elos tia wi ke politic in an nu kemwa. (Jon 15:19; 17:14) Meyen elos “tukeni akfwalyeyuk tari in nunuk siefwunnu a in papu siefwunnu,” paenang wangin kutena kain in akmwuk lun alu ku in kunausla misla lalos. (1 Korint 1:10) Misla mwomwo su Met Lo lun Jeova elos engunkin in len inge fwal in lumeyuk nu ke sie menmen su God el ase fwal nu ke mwolela lal: “Nga fwa oru pa met roso lom misla a leum lom sumwosmwos.”​—Isaia 60:17; Hibru 8:10.

Efu Ku “Sie Pal in Meun”?

7, 8. (a) Elos fwinne muta in misla, mea nunuk lun Met Lo lun Jeova ke pal lasr? (b) Mea kofwen me meun yok nu ke meun lun met Kristian?

⁷ Fwinne oasr misla yurolos, Met Lo lun Jeova elos nunku ke pal inge la “sie pal in meun.” Aok, tia meun na paye, meyen kom fwin orek ku wi me aksangeng ke me sramsram in Baibel ke inkanek lun kofwen me meun, na ma inge lain kas in solsol lun God inge “el su lungse lela elan eis kof in moul tia mol. (Fwakyuk 22:17) Wangin orekma ku lun eyeinse in sang ekulla alu lun kutu met! Meun su Met Lo lun Jeova elos oru pa meun in ngun mukena. Poul el simusla: “Tu me meun kut meun ka tia ma lun ikwe, a ku ye mutun God nu ke sukela an ku.”​—2 Korint 10:4; 1 Timote 1:18.

⁸ Ma se ma yok emeet ke “Kofwen me meun lasru” pa “kutlas lun ngun, su kas lun God.” (Efesus 6:17) Kutlas se inge arulanu kasru ku. “Tu kas lun God moul a ku a kosra liki kutlas su oasr luo muta, a fwakisye nu ke srela lun inse a ngun, a lun kupas a marro, a sa in akilen nunuk a papu lun inse.” (Hibru 4:12) Ke kut orekmakin kutlas inge, met Kristian elos ku in sukela “nunku a ma nu kemwa su fulat su akfulatye lain etauk lun God” (2 Korint 10:5) Ma inge ku in kasrelos in akkalemye me luti kikiap, orekma koluk, a lalmetmet su akilenyuk sin met a tia sin God.​—1 Korint 2:6-8; Efesus 6:11-13.

9. Efu ku wangin mongle ke meun lasr in lain kena koluk lun ikwe?

⁹ Siepa kain in meun in ngun pa in lain kena koluk lun ikwe. Met Kristian nu kemwa elos fwasr tokin me srikasrak lal Poul, su fwak: “A Nga uni monuk, a akkosye saap ke kutena ma, tokin Nga fwakak mwosasu nu sin met ngie, Nga fwa sifwanu pilesreyuk.” (1 Korint 9:27) Sapkinyuk nu sin met Kristian fwin an Kolosse in uniye “laamwos su on fwalu, kosro fokfok, lung lun ikwe, lungse koluk, a rapku, su alu nu ke me srulela.” (Kolosse 3:5) A sie met sim lun Baibel Jud el kaifwe nu sin met Kristian in “akkeye komwos in srukye ku lalalfongi su etukyung tari nu sin met mwo.” (Jud 3) Efu kut enenu in oru ou inge? Poul el topuk: “Tu komwos fwin moul fwal nu ke ikwe, komwos fwa mise; a komwos fwin uniye orekma lun monumwos ke ngun, komwos fwa moul.” (Rom 8:13) In fwal nu ke kas inge, e fwa wangin mongle ke meun lasr in lain kena koluk.

10. Mea sikyuk ke yiu 1914, su kol nu ke luma fuka in pal na futoto?

¹⁰ Aok siepa sripe la efu ku len lasr misinge ku in lumeyuk nu ke sie pal in meun el sikyuk ke sripen “len in foloksak lun God lasr” arulanu apkurun in tuku. (Isaia 61:1, 2) In 1914, pa inge pal pakiyuki lun Jeova in oakiye Togusrai lun Messaia a in lela elan orek meun lain akmwuk lun Setan. Lusen pal su etukyung nu sin met in srike kain in kolyuk nu kemwa su wangin kasru lun God ka aksafyeyukla ke pal se ingo. Apkurun met nu kemwa elos in tia eis kolyuk lun Messaia, elos srungel a tia Esel, oanu met puspis elos oru ke century se meet. (Orekma 28:27) Ke ma inge, me lain nu ke Togusrai, Kraist el enenu in tuyuk in “Leum inmaslon met lokwalok lal.” (Sam 110:2) Sie me insemwomwo, ke Fwakyuk 6:2 el mwolela ka la el e fwa “aksafyela kutangla lal.” Ma inge el e fwa oru ke “meun lun len lulap lun God, Ku Liki Ku . . . , su pangpang in kas Hibru Ar-Magedun.”​—Fwakyuk 16:14, 16.

“Sie Pal in Kaskas” Tuku Tari

11. Efu Jeova el arulanu mongfwusesr, tusruktu mea e sikyuk na paye ke saflaiye?

¹¹ Mutamwauk ke 1914 ekla lulap ke mokuikui lun metu, ke lusen yiu 85 somla. Jeova el arulanu mongfwusesr na paye nu sin metu. El oru Met Lo lal in akilen na paye ke oiyen enenu yok lun pal’u. Million puspis lun moul oasr ke me sensen. Met puspis inge enenu in eis kas in sensen meyen Jeova . . . el tia lungse tu kutena in tula, a tu met nu kemwa in auliyuk. (2 Piter 3:9) Fwinne ou inge, ke pal na futoto “Leum Jisus el fwa sikme in kosrao me wi lipufon in ku lal.” Na elos nu kemwa su srunga peng mwo lun Togusrai lun God fwa sun “foloksak” su Jisus el akola in sang “nu selos su tia etu God a nu selos su tia akos mwosasu lun Leum Jisus.”​—2 Tessalonika 1:6-9.

12. (a) Efu ku akmwuk in suk la pal nge mutamwauk lun ongoiye lulap wangin sripe? (b) Kain in me sensen fuka Jisus Kraist el fwak ke ma se inge?

¹² Nge mongfwusesr lun Jeova e fwa safla? In suk in etu ke pal in mutamwauk lun “ongoiye lulap” wangin sripe. Meyen Jisus el akkalemye na paye la: “A wanginu met etu ke len sa a aur sa.” Tusruktu, el kaifwe: “Ke ma inge sano, tu komwos tia etu in len su Leum lomwos fwa tuku. . . . Ke ma inge komwos ouyepa ako, tu in sie aur komwos tia nunku ka Mwen nutin met el fwa tuku.” (Mattu 24:21, 36, 42, 44) Kalem na paye aketeye inge, kalmen ma inge pa len nu kemwa kut enenu in loang nu ke ma sikyuk fwin fwalu a esam pal nu kemwa ke mutamweyen ongoiye lulap. (1 Tessalonika 5:1-5) Sie me sensen yok na paye kut fwin nunku mu ma inge fwusesr tianu me sensen, a suk in moulkin kain in moul su pangpang moul insraelik insemwomwo a sano na in liye la mea sikyuk nu ke ma puspis fwa ku in akpayeyuk! Jisus el fwak: “A komwos in sifwanu sismouk, saap insiomwos sesesla ke oasras, a srui, a nunkala lun fwal se inge, a len sa sa tuku nu fwomwos oanu sie me kaisrip.” (Luk 21:34, 35) Ke ma inge kut ku in lalalfongi na paye: “Eng akosr” lun kunausten su ke pal inge “lipufon akosr” lun Jeova srukye, elos fwa tia srukye ma inge nu tok ma patpat.​—Fwakyuk 7:1-3.

13. Mea met inge su piselos apkurun nu ke onkosr million elos akilen?

¹³ Ke sripen len in foloksak el arulanu apkurun me, paenang kas lal Solomon ke “sie pal in kaskas” oasr kalme yok ka. (Ekklisiasts 3:7) Meyen elos akilen la pa inge sie pal in kaskas, paeneng apkurun nu ke onkosr million Met Lo lun Jeova elos moniyuk in sramsramkin ke mwolanu lun God ke kolyuk a ke kas in sensen nu ke len in foloksak lal. Elos kisekin moul lalos sifwanu ke len inge oanu un met meun lun Kraist.​—Sam 110:3; 145:10-12.

Elos Su Sramsram ke “Misla, a Wangin Misla”

14. Kain in met palu kikiap fuka sikyuk ke lusen century akitkosr B.C.E.?

¹⁴ Ke lusen century akitkosr B.C.E., Met palu lun God Jeremaia a Ezekiel elos akkalemye kas in nununku na sumwos lain Jerusalem ke sripen inkanek koluk a seakos lal nu sin God. Kunanela su elos palye akpayeyuk in yiu 607 B.C.E., fwinne met kol pengpeng a fukoko lun alu elos lain met tutafpo inge lun God. Met kol kemwa akkalemye la elos “met palu lalfon [su] . . . keapela metu [lun God], a fwak, ‘Misla!’ a wangin misla.”​—Ezekiel 13:1-16; Jeremaia 6:14, 15; 8:8-12.

15. Ya kain in met palu inge ke pal meeta ku in liyeyuk pa ke len inge? Aketeye.

¹⁵ Oanu “met palu lalfon” ke pal ingo, apkurun met kol nu kemwa lun alu ke len inge elos tia pa sang kas in sensen nu sin met ke len in nununku lun Jeova su apkurun in tuku. A, elos orala sie pitse mwo in akkalemye la u puspis lun politic elos ku in oru in oasr misla a wangin sangeng. Elos kena ma lulap in akinsemwomwoye met liki God, elos fwakak kas in akengun nu sin met lalos fwal nu ke ma elos lungse in long a elos tia aketeye ke Togusrai lun God su akmwuki tari a ke kolyuk lun Togusra Messaia el apkurun in aksafyela orekma lal. (Daniel 2:44; 2 Timote 4:3, 4; Fwakyuk 6:2) Met palu kikiap, elos ouyepa sramsramkin “misla, a wangin misla.” Tusruktu kaifweung lalos fwa ekla ke pal sa nu ke me sangeng lulap ke pal se elos liye mulat koskosrok lun El su elos pilesru a nu sel su akkolukye in El. Met kol lun alu kikiap nu kemwa fwin fwalu, su akkalemyeyuk in Baibel oanu mutan kosro, fwa kunausyukla ke fwakak kikiap lalos ke misla.​—Fwakyuk 18:7, 8.

16. (a) Met Lo lun Jeova elos orala kain in record fuka? (b) Fuka siena lalos lukelos su wowoyuk ke “misla, a wangin misla”?

¹⁶ Mwolela kikiap nu ke misla su met kol pengpeng a ku puspis elos oru tia ku in akmunasye la lalalfongi lun met nu kemwa su filiye lalalfongi lalos nu ke mwolela lun God ke misla paye. Ke lusen century se kutu somla, Met Lo lun Jeova elos orala record in oanu met su akkeye Kas lun God ke paye a oaru, met pulaik in lain met lokwalok lun alu kikiap, a met akkeye ke Togusrai lun God. Elos tia akmutolye met in mutol misla ke sripen kas mwomwo lalos ke misla, a elos kaifweung in ikasla mutalos nu ke ma paye ke len inge la pa inge sie pal in meun.​—Isaia 56:10-12; Rom 13:11, 12; 1 Tessalonika 5:6.

Jeova El Mutamwauk in Kaskas

17. Mea kalmen Jeova el mutamwauk in kaskas ke pal na sa?

¹⁷ Solomon el fwak: “God el fwa nununku met sumwosmwos a met koluk, tu oasr sie pal we ke nunuk nu kemwa a ke orekma nu kemwa. (Ekklsiastis 3:17) Aok, oasr pal pakiyuki nu sin Jeova in oru nununku lal nu ke alu kikiap a ke “togusra lun fwalu [su] sifwanu takla . . . lain Jeova a lain met akmusrala lal.” (Sam 2:1-6; Fwakyuk 16:13-16) Fwin pal inge sikyuk, len in “misla” lun Jeova safla. (Sam 83:1; Isaia 62:1; Jeremaia 47:6, 7) Ke inkanek in Togusra lun Messaia mutamwauk in kol, Jisus Kraist, el mutamwauk in “kaskas” ke kas siefwunnu su oru met lokwalok lal mukena ku in kalem ka: “Jeova el fwa illa oanu sie met ku. El fwa purakak moniyuk lal oanu sie met meun. El fwa wowoyuk, el fwa sala ke pusra lulap; el fwa oru ma ku lain met lokwalok lal. ‘Nga srukye pat misla luk. Nga nuna okak. A sroukyuwi. Inge Nga fwa wowoyuk oanu mutan su keok ke isus; Nga fwa mal a momong toeni. Nga fwa sukela eol a toktoku, a akpaoyela maasrik we nu kemwa; a Nga fwa oru infwalu tuka a fwa akpaoyela lulu. A Nga fwa wise met kun ke sie inkanek su elos tia etu ka; in innek su elos tia etu ka Nga fwa kololos; Nga fwa oru losr kalem ye mutulos, a an ku, sumwos. Ma inge Nga fwa oru, a Nga fwa tia fwasr lukelos.’ ”​—Isaia 42:13-16.

18. Ke inkanek fuka met lun God elos fwa “tia kaskas”?

¹⁸ Ke pal se Jeova el ‘kaskas’ in akkeye sumwos lal oanu sie God, met lal elos tia sifwil enenu in kaskas in akkeyel. Pa inge pal in “misla” lalos. Elos oru ma met kulansap lun God in pal meeta oru, kas se inge fwal nu selos: “Komwos fwa tia enenu in anwuk in meun se inge. Komwos tuyuk, a tu misla, a liye molela lun Jeova yuromwos.”​—2 Kronikel 20:17.

19. Kain in me sang fuka etukyung nu sin ma wiyen Kraist ke pal na futoto?

¹⁹ Pa inge sie pal mwo in aksafyeyukla Setan a u lal! Met usru yurin Kraist su muta tari in mwolanu lalos fwa welul ke meun se inge in eis kutangla ke sumwosmwos, fwal nu ke mwolela inge: “A God lun misla el fwa sa in longye Setan ye niomwos.” (Rom 16:20) Misla se su kut sano ke lusen pal loes fwa akmwuki ke saflaiye.

20. Mea e fwa orek ke pal na futoto?

²⁰ Fuka mwoiyen moul insemwomwo nu sin met nu kemwa su usru fwalu a tia mise ke pal se Jeova el akkalemye ku lulap lal! Ke pal na futoto met nu kemwa fwa tukeni nu sie mokul a mutan sumwosmwos kemwa in pal meeta su oasr fwinsrak nu ke sifwil moulyuk elos eis. In Kolyuk lun Kraist ke Tausen Se Yiu e fwa oasr “sie pal in eoki . . . , sie pal in akkeye . . . , sie pal in musaiyuk . . . , sie pal in isras . . . , sie pal in onsrosro . . . , sie pal in kafwis a . . . sie pal in lungse.” Aok, “sie pal in misla” ma patpat”!​—Ekklisiastis 3:1-8; Sam 29:11; 37:11; 72:7.

Mea Topuk Lom?

◻ Misla ma patpat tuku ya me?

◻ Efu Met Lo lun Jeova elos nunku ke pal lasr misinge oanu “sie pal in meun”?

◻ Nge met lun God elos “kaskas,” a nge elos fwa “misla”?

◻ Fuka a nge Jeova el mutamwauk in kaskas?

[Box/​Pictures on page 13]

Oasr Pal Pakiyuki lun Jeova In

◻ purakak Gog in orek meun nu sin met lun God.​—Ezekiel 38:3, 4, 10-12

◻ filiye ke insien met kol lun politic in kunausla Babulon Lulap.​—Fwakyuk 17:15-17; 19:2

◻ orala payuk lun Lam.​—Fwakyuk 19:6, 7

◻ oakiye mutamweyen meun lun Ar–Magedun.​—Fwakyuk 19:11-16, 19-21

◻ kaprilye Setan nu ke mutamwauk in kolyuk lun Jisus ke lusen Tausen se Yiu.​—Fwakyuk 20:1-3

Ma inge nu kemwa simusyukla fwal a sramsramkinyuk in Ma Simusla. Kut ku in lalalfongi na paye la ma limekosr inge fwa orek ke pal fwal nu ke pal pakiyuki lun Jeova a fwal nu ke sulela lal.

[Pictures on page 15]

Kolyuk lal Kraist ke lusen Tausen Yiu fwa sie pal . . .

in isras . . .

in kafwis . . .

in lungse . . .

in eoki . . .

in onsrosro . . .

in musaiyuk . . .