Lela Me Asor Lulap in Tia Kutangkomla
“KE ma inge nik komwos nununkala ke lutu, tu lutu fwa nunkala ke ma la. Ma koluk in sie len fwal nu ke len sa.” (Mattu 6:34) Kai se inge tuku sin Jisus Kraist su arulanu fwal nu sesr kemwa su moul misinge ke pal kafofo a pal in me asor lulap.
Aok, paye, ya kut tia enenu in fosrnga ke ma upa puspis lasr, ke sulela su kut oru, ke orekma a kunokon lasr? Million puspis sin met elos pulakin asor yok, keok a toasr. Paenang ono se inge pangpang tranquilizers a sedatives sie me kuka su orala million puspis ke tala.
Piye Ka Inmaslon Plan Mwo a Me Asor Su Tia Enenu in Sikyuk
Kut enenu in orala plan a akola ke orekma, konokon, sulela, a ma upa lasr—kut fwinne enenu in sa oru ma inge ku tia. Baibel el kaifwe kut in “muta meet a oekla me mol” meet liki kutena ma yok. (Luk 14:28-30) Wikin ma inge pa srikeye kain in sulela puspis su kom akola in oru, tuni fwokin ma inge ke saflaiye, tuni la lupaka molo a pulanpal, la ku wangin elya a mani su kom orekmakin.
Fwinne met se el tuni luman ma e sikyuk, tusruktu tia me kasru mwo nu sel in nunku ke ma nu kemwa ma e sikyuk. Ke sie me pupulyuk, fwin tuniyuk misla insemwomwo lun sou in wangin me sensen sikyuk, kom a nunku ke ma kom enenu in oru fwin loom sum fururyuk. Kom a moli smoke detector se a me kunkun e se. Kom orala plan a tuni inkanek in kaengla sa liki loom sum. Tusruktu nge plan mwo inge e safla a nunuk yok, a fosnga yok mutamwauk? Kain in kena ou inge sikyuk ke pal kom mutamwauk in nunku ke keok puspis su ku in tuku ke oiye puspis, su pus ke ma inge tuku ke nunuk sesumwos. Nunuk sesumwos ku in akmunasye kom, ma inge ku in mokle kom in nunku la oasr ma kom mulkunla in oru ku kom tia oru ma nu kemwa in kurunganang sou lom. Kain in me keok inge su kom sifwanu oru ku in ekla me toasr yok na paye ke nunuk lom oru kom in tia ku in mutol.
Moses Tu Ye Mutul Fero
Jeova God el sang sie kunokon upa nu sin met palu lal pangpang Moses. Ma se meet, el enenu meet in tu ye mutun met Israel a moklelos in lalalfongi la Jeova el pakilye in kololos liki an Ijipt. Tokin ma inge, Moses el enenu in tu ye mutul Fero a siyuk sel lan aksukosokyela met Israel. Safla, Moses el enenu in kol sie u lulap su piselos oasr ke million puspis in fwasr sasla nu yen mwesis nu ke elos sun sie an met su muta we arulanu koluk. (Exodus 3:1-10) Ma inge nu kemwa me aksangeng nu sel, tusruktu ya Moses el lela kunokon puspis lal inge in nekla nunuk lal ke me fosnga yok su alukela ma fwal?
Paye, arulanu kalem la, Moses el nunku yok ke kutu ma. El siyuk sin Jeova: “Liye, ke Nga tuku nu yurin tulik nutul Israel, a Nga fwak nu selos, ‘God lun Papa tumomwos el supeyume nu yuromwos,’ a elos fwa fwak nu sik, ‘El a suon?’ Mea Nga fwa fwak nu selos? Jeova el sang nu sel top lal. (Exodus 3:13, 14) Moses el ouyepa nunku ke ma e fwa sikyuk fwin Fero el kofla in lalalfongel. Sulpa Jeova el sang topuk lal nu sin met palu. Sie ma upa safla—Moses el fwak la el “tia pa in kaskas.” Inkanek fuka enenu in orek ke ma inge? Jeova el sang nu sel Aaron in ekla met kaskas lal Moses.—Exodus 4:1-5, 10-16.
El akola meyen el eis top ke kusensiyuk puspis lal a ke sripen el lalalfongi sin God paenang Moses el oru ma nu kemwa Jeova el sapkin nu sel lan oru. El tia nunku ke ma e sikyuk el fwin sonol Fero in akkeokye nunuk lal, a Moses el “oru ou inge.” (Exodus 7:6) El fwin lela me fosrnga lulap in kutangala, ma inge el ku in akmunasye lalalfongi lal a pulaik lal in oru kunokon lal.
Inkanek fwal lal Moses in oru kunokon lal pa sie me srikasrak ke ma met sap Poul el pangon “nunuk sumwos.” (2 Timote 1:7; Taitus 2:2-6, NW) Fwin Moses el tia srukye nunuk sumwos, arulanu fwusesr nu sel in munasla ke kunokon lulap lal a el tia eisla ma inge.
Sifwanu Leumi ke Nunuk Lom
Oiye fuka kom akkalemye fwin moul lom ke len nu kemwa sun me srifwe ke lalalfongi ku me akmunas? Ya kom fwusesr in fosrnga ke kom nunku na ke me kutong a me srifwe su e fwa sikyuk? Ku kom nunku ma inge ke inkanek sumwos? Oanu kutu met elos fwak, ‘Nik kom sasla ke sos kom fwin sonna sun.’ Ke saflaiye kom tia enenu in sasla na paye ke sos soko inge ke nunuk lom! Ke ma inge efu kom enenu in fosrnga ke ma se su el tia sikyuk na paye? Baibel el fwak: “Toasr insien sie met oru in sumwoli.” (Soakas 12:25) Pal nu kemwa fwokin ma inge pa, sie met el pilesru in oru sulela, el sano meet nu ke na wanginla pal.
Ma koluk upa su sikyuk tuku ke me fosrnga yok alukela ma fwal ke ma lun ngun. Jisus Kraist el akkalemye la insemwomwo lun sie met ke “kas lun togusrai” ku in kopowiye ke sripen kutasrik lun me kasrup a “nunkulanu fwalu.” (Mattu 13:19, 22) Oanu kokol su kosrala kapek lun fute se a tia oswela fwako, oupanu me fosrnga su alukela ma fwal, ma inge ku in kosroila kapek lasr ke ma lun ngun a kut tia isus fwako nu ke kaksak lun God. Orekma in sifwanu akkeokye, ke inkanek lun nunuk sesumwos ku in kutongye sie met tu lan tia mwolela moul lal nu sin Jeova. Elos fosrnga, ‘A fuka fwin Nga tia ku in moul fwal nu ke mwolela luk?’
Met sap Poul el aketeye nu sesr la ke meun lasr in ngun, kut kaifweung in “wis nunuk nu kemwa in sruo nu ke akos lun Kraist.” (2 Korint 10:5) Met lokwalok lulap lasr, Setan su Devil, el arulanu insemwomwo na paye in orekmakin fosrnga lasr in akasorye kut a in akmunasye kut ke mano, pulakin, a ke ngunasr. El arulanu usnguk in orekmakin alollo in sang srukye met su tia etu in kurungin. Paenang Poul el ouyepa sang kas in sensen nu sin met Kristian tu elos in “tia sang an sin Devil.” (Efesus 4:27) Oanu “god lun fwal se inge,” Setan el kutangla in “akkunye nunuk lun met silalalfongi.” (2 Korint 4:4) Lela kut in tia sang kutena pal lal in sruokye nunuk lasr ye koko lal!
Oasr Kasru
Fwin oasr ma upa tulik srisrik el som nu yurin sie papa su kulang a lungse in eis kas in kasru a akkeye. Kut ku in oru oupanu in som nu yurin Papa tumasr su in kosrao, Jeova ke ma upa lasr. Paye, Jeova el suli kut in filiye me toasr a me fosrnga lasr nu sel. (Sam 55:22) Oanu sie tulik srisrik su tia sifwil fosrnga ke ma upa lal tokin papa tumal kasrel, kut tia enenu in filiye ma upa lasr mukena nu sin Jeova a kut enenu pa in likiye ma inge nu sel.—Jemes 1:6.
Fuka kut filiye me fosrnga lasr nu sin Jeova? Filippai 4:6, 7 el topuk: “Nik komwos nununkula in kutena ma, a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God; a misla lun God, su alukela ma eteyuk nu kemwa, fwa liaung insiomwos a nunkomwos in Kraist Jisus.” Aok, in topuk nu ke kaifweung a me siyuk lasr ke pre, Jeova el ku in wise nu sesr misla su ku in kurunganang nunuk lasr liki me fosrnga su wangin sripe.—Jeremaia 17:7, 8; Mattu 6:25-34.
Tusruktu, in orekma fwal nu ke pre lasr, kut tia enenu in sifwanu srella mano a nunuk. (Soakas 18:1) A, arulanu mwo kut fwin tuni ma sap a kolyuk lun Baibel su fwal nu ke ma upa lasr, ke ma inge kut fwasr liki lalalfongi ke lalmetmet lasr sifwanu. (Soakas 3:5, 6) Met fwusr a met matu kemwanu ku in forla nu ke Baibel a ke me rid lun Watch Tower fwin ke me kasru mwo puspis in oru sulela a in aksumwosye ma upa. Sayen ma inge, ke congregation lun met Kristian, kut nu kemwa akinsemwomwoyeyuk ke met elder su yok etauk a experience a kutupa met Kristian matu su akola pal nu kemwa in sramsram nu sesr. (Soakas 11:14; 15:22) Elos nu kemwa su tia wi ke ma upa lasr, elos su etu inkanek lun God ke ma sa pal nu kemwa ku in kasru kut tu kut in liye ma upa lasr ke inkanek saye. A fwinne tia elos pa oru sulela lasr, tusruktu elos ku in srupon me akkeye a me kasru.
“Sano ke God”
Met nu kemwa ku in fwak la me fosrnga su kut eis ke sripen ma upa su kut sun ke len nu kemwa fwal tari fwinne kut tia toeni nu ka me fosrnga ke nunuk lasr sifwanu ke sripen nunuk sesumwos. Fwin fosrnga lasr ke ma se su kut nunku mu el sun kut el oru kut in toasr a nunuk yok, na lela kut in forla nu sin Jeova ke pre. Suk kasru lun Kas Lal a u lal ke kolyuk, lalmetmet a etauk sumwos. Kut ku in konaok la ke kutena luma su sikyuk, oasr me kasru su fwal nu ka.
Ke pal se ma el toasr ke insiel a fosrnga, met sim lun Sam el on: “Efu kom ku sumwoli ke toasr, O ngunik, a efu kom ku tia misla insiuk? Kom fwinsrak in God, tu Nga a fwa kaksakunul pa, su moul lun mutuk a God luk.” (Sam 42:11) Lela kut in pulakin pa ou inge.
Aok, orala plan ke ma e sikyuk na paye, a fulela ma se su kom tia arle etu el fwin sikyuk na paye nu sin Jeova. “A komwos in likiye nu kemwa sensen lomwos nu fwel, tu el kurungin komwos.”—1 Piter 5:7.
[Picture on page 20]
Ya kom, oanu Devid, kom filiye me utuk a me fosrnga lom fwin Jeova?