Ma Upa Ke Sou Su Oasr Papa Ku Nine Sasu

SOU SU OASR PAPA KU NINE SASU KU IN INSEMWOMWO! FUKA?

Sou su oasr papa ku nine sasu el mutamwauk in pengpeng ke sou in an nu kemwa fwin fwalu. Aok, oasr ma upa ke sou puspis su oasr papa ku nine sasu. Wangin alollo orekma in liaung tulik pa ma upa yok emeet. Tusruktu, oanu me lutlut luo toko el srike in aketeye, kutangla in kurunganang tulik ku in sikyuk ke sou su oasr papa ku nine sasu.

KE MUTAMWAUK ME, PAPA SASU KE SOU A NINE SASU KE SOU SRAMSRAMKINYUK KE OIYE kulok lalos. Ke pal se kut srakna tulik srisrik, pus inmaslosr long sramsram polinfong ke Cinderella, su arulanu keok ke paon nine sasu lal su arulanu silolel. Tulik srisrik fwin an Europe, elos ouyepa etu, sramsram polinfong ke Snow White and the Seven Dwarfs. Nine sasu lal Snow White el sie met inutnut su arulanu koluk a silolel!

Ya sramsram polinfong inge nu kemwa el akkalemye ma sikyuk na paye ke sou nu kemwa su oasr papa ku nine sasu? Ya papa ku nine sasu nu kemwa elos koluk na paye? Mo. Pukanten selos elos nunku na ke ma mwo su ku in akinsemwomwoye tulik su elos usrui ke pal in payuk lalos. Tusruktu elos enenu na paye in sun kutu ma upa ke sou su oasr papa ku nine sasu.

Ma Upa Su Tuku ke Kurungin Tulik

Ke pal se payuk se meet el musalla, srupon ma inge pa wangin kapek mwo lun papa a nine. Ke payuk se akluo, orekma in kurunganang tulik sang ma upa ke futoto lun papa a nine. Kutu record akkalemye la sou 4 inmaslon sou 10 su oasr papa ku nine sasu el safla ke fwasrelik meet liki saflaiyen yiu limekosr.

Saap seanyen payuk sasu elos tianu akilen ma upa ke inse, alollo ke oaru, lemta a koskosrok su papa ku nine sasu el purakak nu sin tulik nutin mutan kiel ku mokul tumal. Saap tulik inge el nunku la futoto lun papa ku nine paye lal nu sin papa ku nine sasu inge yok liki futoto lal nu sel. Sayen ma inge, papa ku nine su mutan kielos a mokul tumalos el sisilla saap el konaok la arulanu upa nu sel in kalem ke futoto lun tulik nutul nu sin mokul tumal ku mutan kiel meet. Tulik mokul se el srike in aketeye nu sin nine kiel efu el tafwela na in futoto nu sin papa na paye lal, el fwak, “Mom, Nga etu la papa el oru ma koluk nu sum meet, tusruktu el mwo nu sik!” Kain in kas inge, fwinne akkalemyeyuk ke oaru, el ku in oru nine in pulakin koskosrok nu sin papa na paye lun tulik nutul.

Sie papa sasu ke sou se el fwak: “Nga tia akola na paye ke ma upa su tuku ke orekma in kurunganang tulik nutin mutan kiuk nu sin mokul tumal meet. Oasr pal Nga nunku la meyen Nga payuk tari nu sin nine kiel, paenang Nga pa papa tumal ingenu. Nu sik sifwanu, luman wangin ma upa ka! Nga tianu akilen futoto lun tulik nu sin papa tumal na paye, a nga orala ma tafongla puspis.”

Ma upa ku in sikyuk yokna ke pal in sang kai. Tulik nu kemwa elos enenu kai ke inkanek lun lungse, tusruktu pal nu kemwa elos tia lungse ma inge fwinne ma inge tuku ke papa ku nine na paye lalos. Fuka lupan ma upa fwin ma inge el tuku ke papa ku nine sasu ke sou! Pal nu kemwa, elos fwin sun kain in kai inge su tuku sin papa sasu, sie tulik el fwak kas inge, “Tia kom pa papa tumuk na paye!” Kas upa yok na paye pa inge nu sin papa sasu ke sie sou su kaifweung na in sang kasru!

Ya tulik srisrik elos ku in kapek mwo ke sie sou su oasr papa ku nine sasu? Ya papa ku nine sasu elos ku in sang kasru mwo in musaiyuk sou sasu lal? Topuk ke kusensiyuk luo inge pa aok fwin met nu kemwa ke sou inge elos fwasr tokin kai su tuku ke Kas lun God su etuku ke ngun, pa Baibel.

[Picture on page 3]

“Tia kom pa papa tumuk na paye!”