Fuka in Ekla sie Papa Mwomwo

“Papa tuma, nik komwos akkasrkusrakye tulik nutumwos, tu elos in tia aktoasryeyuk.”​—Kolosse 3:21, The Holy Bible—​New International Version.

FUKA sie papa el ku in tia aktoasrye tulik nutul? Arulana yok sripe el an akilen ke yok sripaeyen kunokon lal oana sie papa. “Orekma oana sie Papa el oru orekma na yok sripe se a wangin ma lumeyuk oana nu ke kapkapek lun tulik nu ke nunak a pulakin lalos,” sie me rid ke oiyen karunginyen nunak el akkalemye.

Mea kunokon lun sie papa? Ke sou puspus papa pa sang me kai. Oasr nine puspus su fwak nu sin tulik natulos su likkeke, ‘Sano nu ke papa tumom el tuku, el fwa sang kai nu sum!’ Paye la, tulik elos enenu me kai mwo a fwal a papa a nine elos enenu in tu ku in akpayeye me kai fwin elos lungse tulik nutalos in mwo oiya ke elos matula. Tusruktu, sayen ma inge, oasr ma puspus enenu in orek sin sie met fwin el lungse in oana sie papa mwomwo.

Oasr sie me asor, meyen tia papa nukewa elos liye me srikasrak mwomwo ka su elos ku in etawi ke pal se elos tulik srisrik. Kutu mokul elos matula ke sie sou su wangin papa tumalos. Tusruktu, mokul puspus su pulakin ma upa puspus sin papa tumalos ke elos tulik srisrik, saap elos oru pa oiya upa puspus nu sin tulik natulos ke pal inge. Fuka sie papa su akkalemye kain in oiya inge el ku in ekulla inkanek koluk inge a suk in akpayeye la el ku in orala sie papa su mwo a kulang?

Oasr sropon kas in kasru mwomwo nu ke inkanek in akpayeye kunokon lun sie papa. Baibel el akkalemye ke kas in kasru su mwo emeet nu ke moul in sou. Kas in kasru su oasr in Baibel el akpayeyuk tari la mwo a sumwos, a ma inge el tia akkolukye kut ke kutena pal. Kas in kasru lun Baibel el akkalemye ke inkanek lalmetmet a etauk mwomwo lun Jeova God, su orala akwuk nu ke moul in sou. (Efesus 3:14, 15) Fwin kom sie papa, arulanu mwo kom fwin lutlutkin ma Baibel el akkalemye ke kunokon mwomwo lun papa a nine.a

Fwin sie met el akpayeye la el sie papa mwomwo, ma inge el yok sripe nu ke kapkapek lun tulik nu ke mano a pulakin lalos, a ma inge sang kasru yok nu selos in akkeye fototo lalos nu sin God. Fwin sie papa el kulang a oasr akwuk fototo mwomwo lal nu sin tulik nutul, ma inge ku in sang kasru yok nu sin tulik nutul in akkeye fototo lal nu sin God. Aok, Baibel el akkalemye la Jeova el Met Orekutla, a sie Papa nu sesr. (Isaia 64:8) Lela kut in akuteye ingena ke ma onkosr su tulik enenu sin papa tumalos. Ke inkanek onkosr inge, kut fwa tuni yok ke inkanek in orekmakin akwuk mwomwo lun Baibel su ku in kasru sie papa in akpayeye ma enenu nukewa inge.

1 Tulik Elos Enenu Lungse lun Papa Tumalos

Jeova el akkalemye me srikasrak mwomwo oana sie Papa. In akkalemye la mea pulakin lun God kel Jisus, su Mwen se meet natul, Baibel el akkalemye: “Papa el lungse Mwen.” (Jon 3:35; Kolosse 1:15) Ke pal puspus, Jeova el akkalemye lungse lal nu sin Mwen nutul a insemwomwo lal nu sel. Ke pal se Jisus el baptaisla, Jeova el kaskas in kosrao me, a el fwak: “Kom Mwen kulu nutik; Nga insemwomwo keyum.” (Luk 3:22) Pal nukewa Jisus el lulalfongi la Papa tumal el lungsel. Mea papa nukewa elos ku in lotela ke me srikasrak lun God?

Kom in fwakak nu sin tulik nukewa nutum la kom lungse elos. Kevin, su oasr tulik limekosr nutul, el fwak: “Nga kafweang pal nukewa in fwak nu in tulik nukewa nutik la nga lungse elos a nga akkalemye pa insemwomwo luk nu sin kais sie selos. Nga wi pa in aolla diapers lalos a in taenulosla.” In wekunang ma inge, tulik nutum elos enenu in etu la kom lela elos in oru ma puspus. Ke ma inge kom tia enenu in akkalemye na ma tafongla lalos, ke kom aksumwosyelos pal nukewa. A, kaksakinelos pal nukewa. Mokul se inge su pangpang Donizete, su oasr tulik mutan luo natul, el fwak, “Sie papa el enenu in kafweang yok in suk pal mwomwo in sang kaksak nu sin tulik nukewa natul.” Fwin elos etu la kom insemwomwo kelos ma inge ku in kasru tulik nutum in pula la elos yok sripe. A, ma inge ku in kasrelos in akfototoyelos nu sin God.

2 Tulik Elos Enenu Me Srikasrak Mwomwo

Jisus el ku in oru ‘ma el liye ma papa tumal el oru,’ Jon 5:19 el akkalemye. Loang akmwoye nu ka la fus inge el akkalemye la Jisus el liye a oru ma Papa tumal el “oru.” Tulik srisrik elos ku in oru pa ma inge. Ke sie me pupulyuk, fwin sie papa el akkalemye sunak a oiya mwomwo nu sin mutan kiyel, tulik natul ku in akkalemye pa sunak a oiya mwomwo nu sin mutan nukewa ke el matula. Tia oiyen tulik mokul mukena akkeyeyuk ke me srikasrak lun papa tumalos, tulik mutan elos ku pa in akkalemye sunak nu sin mokul ke sripen me srikasrak lun papa tumalos.

Ya upa nu sin tulik nutum in siyuk ke nunak munas ke ma tafongla su elos oru? Ke oiya se inge, me srikasrak lun papa el yok sripe. Kevin el esam ke sie pal tulik mokul luo nutul elos kunausla sie camera natul su arulanu yok molo. El arulanu foloyak ka paenang el liksreni na fuskiye sie tebu se su orek ke sak a ma inge musalla. Tokin ma inge Kevin el asor a toasr yok ke ma el orala a el siyuk ke nunak munas nu sin met in sou lal nukewa, a nu sin mutan kiyel, ke sripen el tia kutongye mulat lal ke ma el orala. El pulakin la orekma lal in siyuk ke nunak munas ke ma el oru el sang kasru yok nu sin tulik nukewa natul; tokin ma inge fusrasrla nu selos in fwak sisla koluk ke ma tafongla lalos.

3 Tulik Srisrik Enenu in Pula Ke Me Insemwomwo lun Sou

Jeova el sie “God su insemwomwo.” (1 Timote 1:11) Tia sie me lut, ke Jisus, Mwen natul, el pulakin insemwomwo yok yurin Papa tumal. Soakas 8:30 el kasre kut in kalem ke fototo mwomwo su oasr inmasrlon Jisus a Papa tumal: “Na nga oasr Yurol [Papa] oana sie met orekma usrnguk, . . . a engun pal e nu kemwa ye mutal.” Paye la akwuk fototo a mwo oasr inmasrlon Papa a Mwen natul!

Tulik nutum elos enenu in pulakin engan a insemwomwo ke moul in sou lom. Orekmakin pal in sritel yurin tulik nutum ku in sang kasru in oasr me insemwomwo ke sou. In tukeni sritel sang kasru nu sin papa a tulik in oasr fototo mwomwo lalos. Sie papa su pangpang Felix el insese ka. Oasr tulik mokul fwusr natul a el fwak: “Orekmakin pal yurin tulik nutik in oru me akengan el yok sripe nu ke inkanek fototo in oasr inmasrlosr. Kut tukeni sritel, asrouki nu sin met kawuk, a muteta nu ke an mwomwo puspus. Ma inge akkeye fototo mwomwo ke sou lasr.”

4 Tulik Srisrik Enenu in Lutiyuk ke Inkanek Mwo in Akfototoyelos nu sin God

Jisus el lutiyuk sin Papa tumal. Ke ma inge Jisus el ku in fwak: “Ma Nga long sel [Papa], ma inge Nga fwak nu sin fwalu.” (Jon 8:26) Ye mutun God, oasr kunokon lun sie papa in luti tulik nutul ke oiyen nasnas a ke etauk lun God. Sie kunokon lom in oana sie papa pa in filiye akwuk mwo a sumwos nu ke insien tulik nukewa nutum. Kain in me akpa inge ku in orek ke pal se tulik elos srakna awowo. (2 Timote 3:14, 15) Felix el mutamwauk in ridi buk se inge me sramsram lun Baibel nu sin tulik mokul srisrik se natul inge ke pal se el srakna srik. Felix el orekmakin kain in me sramsram su oasr petsa puspus a oasr pa tun mwo ka, wekunang ke me sramsram puspus su oasr in Buk in Sramsram lun Baibel Nutik.b Ke tulik mokul se natul inge el kapkapek, Felix el orekmakin kutupa me rid su tuku in Baibel su fwal nu ke matwen tulik natul.

Donizete el fwak: “Paye la upa in oru lutlut lun sou ke Baibel in oasr me akengan ka. Arulanu yok sripe la papa a nine elos akkalemye la elos aksaokye akwuk mwomwo nukewa ke orekma in kulansap nu sin God, meyen tulik elos sa in akilen fwin papa a nine elos tia akpayeye ma elos fwak.” Carlos su oasr tulik mokul tolu natul, el fwak: “Kut tukeni sramsram ke wik nukewa in akutye ma enenu lun kais sie met ke sou. Kais sie met ke sou oasr pal mwomwo lalos in sulela la piya ka me lutlut su fwa akuteyuki.” Kelvin el suk inkanek in sramsram nu sin tulik natul nukewa ke God yen nukewa elos oasr we a ke kutena ma su elos oru. Ma inge akesmakinye kut ke kas lal Moses: “A kas inge, su nga sapkin nu sum misenge, fwa on insiom; a kom fwa alken in luti ma inge nu sin tulik nutum, a kom fwa kaskas ka ke kom muta in loom sum, a ke kom fwasr inkaneku, a ke kom onu, a ke kom tukakek.”​—Duteronomi 6:6, 7.

5 Tulik Srisrik Elos Enenu Me Kai

Tulik srisrik elos enenu me kai tu elos in ku in oru ma mwomwo a sulela sumwos ke elos matula. Kutu papa a nine elos nunku mu orekma in sang me kai nu sin tulik enenu in sang me kai upa, wekunang in uni tulik, ku orekmakin kas in akmwekinyelos. Tusruktu, Baibel el tia akkalemye la papa a nine elos enenu in uni ku orekmakin kaskas koluk ke elos sang kai nu sin tulik. Mo tia oinge, tusruktu papa a nine elos enenu in sang kai ke inkanek lun lungse, oana Jeova el oru. (Hibru 12:4-11) Baibel el akkalemye: “Komwos, papa tuma, komwos in tia angon tulik nutumwos nu ke mulat, a komwos in oakoakelos in kai a kaiyuk lun Leum [“Jeova,” NW].”​—Efesus 6:4.

Saap kutu pal, me kai upa el eneneyuk. Fwinne oinge, tulik srisrik elos enenu in kalem ka la efu ku elos eis me kai. Me kai lun papa a nine tia enenu in oru tulik srisrik natulos in pulakin mu elos tia aksaokyeyuk. Baibel el tia insese nu ke me kai su papa a nine elos oru in uni upa tulik nutulos su ku in kunausla manol. (Soakas 16:32) Kelvin el fwak, “Fwin oasr ma eneneyuk ngan aksumwosye tulik nutik ka ke sie ma koluk, Nga srike ke pal nukewa in akuteye nu selos ke la sripen orekma in aksumwos luk nu selos tuku ke lungse a pakomuta luk nu selos.”

6 Tulik Srisrik Enenu in Karunginyuk

Tulik srisrik enenu in karunginyuk elos liki me akkolukye puspus a liki kutena kain in asrouki koluk puspus. Oasr me asor puspus, ke sripen oasr “met koluk” puspus fwin fwalu su lungse in akkolukye tulik srisrik. (2 Timote 3:1-5, 13) Kom fwa karungin fuka tulik srisrik nutum? Baibel el akkalemye kas in kasru inge: “Sie met lalmetmet liye ma koluk, a sifwana mwukla; a met nukin alukela, a keok ka.” (Soakas 22:3) In loangela tulik nutum liki ongoiye, kom enenu in sa akilen me sensen puspus. Kafweang in sa akilen ma puspus su ku in kol nu ke ma upa puspus, a oru ma eneneyuk nukewa nu ka in karunginelosla liki. Ke sie me pupulyuk, fwin kom lela tulik nutum elos in orekmakin Internet, kom enenu in akpayeye la kom etu ke inkanek mwo in orekmakin ma inge. Mwo kom in filiye computer ke sie an su met nukewa ku in liye ma inge a kom in sa liye ke elos orekmakin ma inge.

Sie papa el enenu in akola a sang me akpa nu sin tulik srisrik natul ke me sensen nukewa su elos ku in sun ke fwal se inge su oasr kutu met su lungse in akkolukyelos. Ya tulik nutum elos etu tari ma elos enenu in oru fwin oasr kutu met su lungse in akkolukyelos ke kom tia welulos?c Tulik nutum elos enenu in etu ke inkanek sumwos a ke inkanek tia fwal in orekmakin laan manolos nu ka. Kelvin el fwak: “Nga sifwana sang akpa nu selos ka, a tia met saye pa in oana met luti lalos. Nga pula a nunku ka la kunokon luk pa inge in luti lutik nutik ke oiya se inge a ke me sensen su orek sin met koluk puspus su lungse in kal laan monin tulik srisrik a akkolukyelos.” Tulik nukewa natul elos karunginyuk nu ke elos matula a ke pal inge elos payukyak tari a insemwomwo.

Suk Me Kasru lun God

Me sang su saok emeet su sie papa el ku in sang nu sin tulik srisrik natul pa in kasrelos in akkeye sie fototo mwomwo lalos nu sin God. Me srikasrak lun papa el arulanu yok sripe. Donizete el fwak: “Papa nukewa elos enenu in akkalemye la elos aksaokye na paye fototo lalos sifwana nu sin God. Ma inge enenu in arulanu kalem yokna ke pal se elos sun ma upa ku me keok puspus. Ke pal oinge, sie papa el enenu in akkalemye la el lulalfongi na paye Jeova. Ke pal se su sou elos tukeni pre, kas in kulo su akkalemyeyuk pal nukewa nu sin God ke kulang a oiya mwomwo lal, fwa lutiyuk nu sin tulik srisrik la yok sripe in oru Jeova oana Met Kawuk lalos.”

Ke ma inge, piya inkanek mwomwo su fwa kasru sie papa su mwo? Siyuk ke kas in kasru lun Jeova God, su etu na paye ke inkanek mwo in sang karunginyen tulik. Kom fwin sang akpa nu sin tulik nutum fwal nu ke kas in kasru ke Kas lun God, paye la kom fwa liye fwako mwomwo oana ke ma akkalemyeyuk in Soakas 22:6: “Ke el matu el fwa tia fwasr liki.”

[Footnotes]

[Picture on page 11]

Sie papa enenu in akkalemye me srikasrak mwomwo nu sin tulik srisrik nukewa natul

[Picture on page 12]

Sie papa el enenu in akfwalye ma enenu lun tulik natul in etu God a in fototo nu sel

[Picture on page 13]

Tulik srisrik komwos enenu in akos me kai