Taran Ke Simony!
SAIMON el arulanu akfulatyeyuk ke an lal pangpang Samaria. El moul ke century se meet C.E., a met puspis elos arulanu lut ke orek susfwe lal paenang met puspis elos fwak: “Met se inge el ku lun God se su pangpang Yok.”—Orekma 8:9-11.
Tokin Saimon el ekla sie met Kristian baptais, el liye sie ku su yok liki ku lal meet liki el ekla met Kristian. Pa inge ku su etukyung nu sin met tumal lutlut lal Jisus, su kasrelos in kitelik nu sin kutu met me sang ke inkanek lun ngun mutal in orek menmen. Saimon el arulanu lut paenang el lungse in sang mani nu sin met sap a siyuk: “Se nu sik pa ku se inge, tu kutena met Nga filiye pouk nu fwel, el fwa eis ngun mutal.”—Orekma 8:13-19.
Met sap Piter el sang kai upa nu sel Saimon, el fwak: “Silfer lom in wi kom na tula, meyen kom lungse in eis me sang lun God ke mani. Wangin ip ku usru lom in kas inge, tu insiom tia sumwos ye mutun God.”—Orekma 8:20, 21.
Ke me sramsram inge lun Baibel el tuku kas se inge “simony,” su ku in kalmekin oanu “ma koluk su tuku ke orekma in kukakin ku moli mwal ku kunokon ke alu.” Buk inge New Catholic Encyclopedia el aketeye la mutamwauk ke century 9 nu ke century ak11 yokna, oiyen “simony arulanu pengpeng ke an in alu pangpang monasteries, inmaslon met tol, ke episcopacy, a fwinne ke mwal fulat pangpang papacy.” Ke edition ak eu lun The Encyclopædia Britannica (1878) kas se inge simusyukla: “Sie lutlut ke pal in sulela lun Pope sasu arulanu purakak tulik lutlut in lalalfongi la election nu kemwa ke Pope sasu orekla ke inkanek lun simony, pal puspis akmwuk lun simony su elos oru ke pal in election arulanu upa, me mwekin lulap, a eteyuk ye mutun met.”
Met Kristian paye nu kemwa ke len inge enenu in taran ke simony. Ke sie me pupulyuk, saap kutu met elos arulanu sang kaksak alukela ma fwal a oru me sang lulap nu sin met nu kemwa su ku in sang nu selos kunokon ku mwal. In pal se na, elos nu kemwa su oasr ku in sang mwal ku kunokon elos akkalemye srisri a lungse mukena met su ku—a pal nu kemwa insemwomwo—in sang nu selos me sang. Kemwanu elos akkalemye oiyen simony, a Ma Simusla el selngawi kain in oiye se inge. “Ke ma inge kom auliyuk ke ma koluk lom inge,” Piter el kaifwe nu sel Saimon, “a pre nu sin Jeova saap el fwa nunuk munas ke nunuk lun insiom [“kena koluk lun insiom,” New Jerusalem Bible]; tu Nga liye tu kom muta in aa menlanu a in me kapur lun ma koluk.”—Orekma 8:22, 23.
Sie me insemwomwo meyen, Saimon el liye ma koluk upa su tuku ke kena koluk lal. El siyuk ke inse pusisel nu sin met sap: “Komtel pre nu sin Jeova keik, tu wangin ma inge ma komtel kaskas ka fwa tuku nu fwuk.” (Orekma 8:24) Meyen elos loang nu ke me lutlut saok su tuku ke me sramsram inge, paenang met Kristian paye elos arulanu taran ke kutena oiye su oasr simony ka.