Ya Oasr Sie Lipufon Su Kurungin Kom?
YA KOM lalalfongi la oasr sie lipufon su kurungin kom? Met puspis elos lalalfongi ou inge. Ke sripe se inge sie mutan fwin an Roto lun an Canada el fwak la oasr sie me sang su etukyung nu sel ke lipufon. Kom fwin sang nu sel em wikin tala $200, el ku in kasru kom in osun ke lipufon su kurungin kom, pa inge ma el fwak. Ma se meet su el oru pa, el liksreni in nunuk yok a liye e ke sie candle. Na, el mutamwauk in liye sie arurumu ke lipufon lom su sang nu sel sie kas tu lan ku in tafweang nu sum. Oanu sie me sang nu sum, mutan se inge el simusla ke sie pepu mea aten lipufon lom.
Nu sin met puspis, ma inge luman oanu sie ke sie me sramsram ke sie Togusra lun an France pangpang Louis IX. El molela une puspis su arulanu yok molo meyen elos fwak la une inge el putatla liki po soksok lun lipufon inge Archangel Michael. Fwinne met puspis elos alollo ke me sramsram inge, tusruktu elos tia alollo fwinne ma srisrik ke ma mutan Canada sa el fwak.
Me Purakak ke Lipufon
Ke lusen yiu ekasr somla oasr me purakak yok ke lipufon. Ke television a ke pitse mokuikui, ke buk puspis, ke magasin puspis, a ke ma simusla puspis pangpang newsletter, ma inge nu kemwa aketeye nu sesr ke lipufon puspis su akpwarye met puspis su mas, met su sou lalos mise, a elos sang lalmetmet, a elos molela moul lun met. Fwin an United States, apkurun 20 million sin met elos liye pitse ke television su orek ke wik nu kemwa su akkalemye orekma lun lipufon ke moul lun met. Sie sto su kuka buk el kukakin ke kain in buk angfoko kutu su sramsramkin lipufon.
Sie buk sasu el aketeye ke experience puspis fuka lipufon inge su kurunganang moul lun met el molela met solse puspis ke pal in meun. Sticker puspis ke bumper lun sitosa elos akkalemye la driver ke sitosa el muta ye liaung lun lipufon. U puspis, toeni lun met puspis, a siminar puspis elos akkeye lutlut ke lipufon a elos fwak la elos kasru met puspis in sramsram nu selos.
Eileen Freeman el sie met sim ke buk tulo su sramsramkin lipufon a el sie met su orala a kitakut sie me rid su sramsramkin lipufon mukena. El fwak: “Nga lalalfongi la pisen lipufon in kosrao oanu sie ke pisen lipufon su oasr fwin Fwalu, sie ma orekla su kunokon lalos tia in sang kaksak mukena nu sin God in kosrao, a in ouyepa kurunganang met a kutupa luman ma moul fwin Fwalu. Sie lipufon pakiyuki nu sin kais sie sesr ke pal se ma kut mutamwauk in moul ke insien nine kiesr a el kurungin kut ke kut yokelik ke insien nine kiesr, nu ke na kut isusla, ke lusen moul lasr nu fon fwin fwalu se inge, nu ke na lipufon el kol kut ke saflaiyen moul lasr fwin fwalu se inge nu ke mwolanu in kosrao.” Ma inge el aketeye ke nunuk pengpeng ke lipufon su kurungin met.
Ke pal in me asor a ma upa inge, sie me purakak na paye ke inse in lalalfongi la oasr sie lipufon su kurungin kut, su oasr kunokon in molikutla. Mea Kas lun God, ku Baibel el aketeye ke ma se inge? Ya kut enenu in srike in osun nu ke lipufon? Ya elos loang nu ke oiyen moul lasr a lalalfongi lasr ke alu? Kain in kasru fuka kut ku in eis selos? Kusensiyuk inge nu kemwa e fwa eis topuk ke me lutlut toko.