Len Lun Jeova Apkurun

“Long ma inge, komwos met matu, a lipsre, komwos met muta in fwal se inge nu fon.”​—JOEL 1:2.

“WE nu sesr ke len sa; tu len lun Jeova apkurun me, a a fwa tuku oanu kunausten liki El su Ku Liki Ku! Sie me fwakak sakuruk pa inge! Pa inge kas lun God nu sin met lal su met palu Joel el fwakak nu selos.

² Kas se inge su tuku in Joel 1:​15 simusyukla fwin an Juda, apkurun nu ke 820 B.C. Infwalfwal su arulanu pukanten sak akkatoye an’u. Fwokinsak a me mongo pukanten. Oasr an srulap a maa folfol lun kosro. Fwinne ou inge, srakna oasr ma tafongla na yok. Alu lun Beal arulanu kapkapek fwin an Jerusalem a ke an Juda. Metu elos sremla nu ke nimnim alukela ma fwal in akfulatye god kikiap inge. (Srike liye 2 Kronikel 21:​4-6, 11.) Ya Jeova el lela ma inge nu kemwa in tafwela?

³ Wangin alollo buk lal Joel in Baibel el sang topuk nu ke kusensiyuk inge. Jeova God el akkalemye sumwos lal in kol a el akmutalye e mutal lal. Len lulap lun Jeova apkurun. Ke pal ingo God el oru nununku lal lain mutanfwal nu kemwa ke “infwalfwal lal Jehosefat.” (Joel 3:12) Lela elos in akola ke meun lain El su Ku Liki Ku, Jeova. Kom ouyepa enenu in sun len lulap lun Jeova. Ke ma inge lela kut in tuni mwo kas palu lal Joel ke len lasr a in pal meeta.

Meun lun Mwon Srisrik

⁴ Ke inkanek lun met palu lal, Jeova el fwak: “Long ma inge, komwos met matu, a lipsre komwos met muta in fwal se inge nu fon. Ya ma se inge sikyuk in len lomwos, ku in len lun papa tumomwos? Komwos fwakak ma se inge nu sin tulik nutumwos, a lela tulik nutumwos in fwakak nu sin tulik nutulos, a tulik nutulos nu ke siepa pal.” (Joel 1:​2, 3) Met matu a met nu kemwa elos ku in sano ma se su sonna sikyuk in len lalos ku in len lun papa matu tumalos. Ma sakuruk pa inge meyen ma inge enenu in fwakak pa nu ke fwil se aktulo! Mea ma sakuruk inge su akola in sikyuk? Kut fwin lungse in etu, na lela kut in nunku oanu kut folokla nu ke len lal Joel.

⁵ Long! Joel el long sie kain in pusra su tuku ke an loes. Yen engyengu arulanu losr, a pusra in aksangeng inge yokyokelik in pal se na yen engyengu yokyokelik losr lal. Na sie pukunyeng su oanu kulas el putati. Mwon srisrik puspis pa inge su piselos oasr ke milllion puspis a elos oanu un met meun. A kain in kunausten fuka ma elos oru! Tuni Joel 1:⁠4. Mwon inge su oanu un met meun tia lokus mukena su po soksok a etu in fwafwasyesr ke an loes. Mo! tia ou inge mukena. Toeni nu selos pa lokus su mwurak ke sripen wangin po soksok lalos a elos arulanu musrensral. Eng el wisla ma inge nu kemwa paenang elos sa na tuku, a pusra su elos oru oanu pusren kasrusr lun sariot puspis. (Joel 2:5) Ke sripen million puspis inge lungse in mongo a arulanu musrensral paenang sie an kato su oanu paredais el sa na ekla nu ke yen mwesis.

⁶ Ouyepa ma welolos orekma pa mwet-palmer​—ku mwet su sonna ekla seliki ku mwon srisrik. Un mwet-palmer su oanu un met meun el ku in kunausla sran sak a fwokinsak nu kemwa nu ke na wanginla ma folfol lalos. Ma lula su elos tia kang lokus el kangla. A kutena ma su lokus el tia kang, waten su pisrpisr ke mokuikui elos kangla a aksafyela na paye. Tuni ma inge: In Joel sapter 2, fus 11, God el pangon lokus oanu “met meun lal.” Aok, el pa Srupon ongoiye su tuku ke lokus su e fwa kunausla an’u a orala sral lulap. Nge? Meet liki “len lulap lun Jeova,”

“Ngutalik, Komwos Met Srui”!

⁷ Sie un me srungeyuk, met kol lun alu fwin an Juda akkulokyeyuk ke pal se ma kas se inge akkalemyeyuk: “Ngutalik, komwos met srui, a tung; a wowoyuk, komwos met nim wain nu kemwa, meyen wain emem, tu mwotla liki oalumwos.” (Joel 1:⁠5) Aok, sapkinyuk nu sin met srui in ngun fwin an Juda in “ngutalik,” elos in nunuk sumwos. Lela kut in tia nunku la ma inge sikyuk mukena ke me sramsram in pal meeta. Ke pal inge lasr, meet liki len lulap lun Jeova, ke kas pupulyuk, met kol lun alu lun Kristendom elos arulanu srui ke wain emem paenang elos tia loang nu ke ma sap inge lun El su Fulat Liki nu kemwa. Fuka sie me lut lulap nu selos elos ngutalik liki srui lalos in ngun ke len in me aksangeng lulap lun Jeova!

⁸ Liye un solse lulap lun lokus! “Tu sie mutanfwal utyuk nu fwin fwal sik, ku, a koflanu oekyuk; mwusel mwusin soko laion, a oasr yurol mwusin srin-oalin soko laion mutan. El kunausla fain luk, a etongak sak fig luk. El tukleala, a sisla. Laa ka orek in fwosrfwosr. Eoksra oanu sie mutan virgin su losilye ke nuknuk yok eou ke mokul tumun pal fwusr lal.”​—Joel 1:​6-8.

⁹ Ya ma inge sie kas palu na ke “sie mutanfwal” lun lokus, un lokus su kunausla an Juda? Mo, oasr kalme yok lun kas palu se inge. In Joel 1:6 a Fwakyuk 9:7, el akkalemye la met lun God nu kemwa elos aoliyen lokus. Un solse lun lokus ke len inge pa met meun lun Jeova oanu met akmusrala lokus, su ke pal inge oasr 5,600,000 kutu sin “sip ngie” lal Jisus wilultal. (Jon 10:16) Ya kom tia engun in wi ipen u lulap inge lun met kulansap lun Jeova?

¹⁰ In Joel 1:​9-​12, kut ku in rid fwokin me keok su lokus el orala. Sie u tokin siepa u arulanu kunausla na paye an’u. Meyen wanginla me mongo, wine a oil, paenang met tol suoaru elos tia ku in tafwela in oru orekma lalos. Fwinne fok’u el wowoyuk ke sripen lokus el kunausla me mongo su kapek ka, a fwokinsak nu kemwa wanginla fwako. Ke sripen fain el musalla, paenang wanginla wain nu sin met su alu nu sel Beal su lungse nimnim a srui pal nu kemwa ke ma lun ngun.

“Eoksra, Komwos Met Tol”

¹¹ Long kas lun God nu sin met tol koluk inge: “Sifwanu loskomwosi ke nuknuk yok eou, a eoksra, komwos met tol. Wowoyuk, komwos met kulansap nu ke loangu.” (Joel 1:​13) Ke akpayeye se meet lun kas palu lal Joel, met tol Livai elos kulansap nu ke loangu. Tusruktu, fuka akpayeye safla lal? Ke len inge, met kol lun Kristendom elos eis selos sifwanu ku in kulansap nu ke loang lun God, elos ekin met kulansap lal, “met tol” lal. Tusruktu, mea sikyuk misinge paenang lokus lun God ke pal inge elos oru orekma lalos?

¹² Ke pal se ma “met tol” lun Kristendom elos liye orekma lun met lun Jeova a long kas in sensen lalos ke nununku mutal, elos sangeng. Elos eoksra ke keok a koskosrok ke me kunausten su tuku ke peng mwo lun Togusrai. A elos wowoyuk ke pal se ma met lalos som lukelos. Ke sripen wanginla koanon an in kurunganang met lal, paenang elos motul ke nuknuk yok eou, elos tung meyen srikeni mani su elos ku in eis. Tia pat toko elos ku in tula pa orekma lalos! Ke ma paye, God el fwak nu selos in tung fong fon se meyen safla lalos apkurun.

¹³ Fwal nu ke Joel 1:​14, fwinsrak lalos mukefwunnu pa in auliyuk a tung nu sin “Jeova ke kasru.” Ya kut ku in fwinsrak la met kol nu kemwa lun Kristendom elos forla nu sin Jeova? Mo! Saap ma ekasr selos ku in loang nu ke kas in sensen lun Jeova. Tusruktu, sral in ngun inmaslon met kol lun alu a met nu kemwa su muta ye koko lalos el tafwela. Met palu Emos el palye: “ ‘Liye! Len e fwa tuku, Leum Jeova el fwak, ‘Nga fwa supwela sie sral fwin fwal se inge, tia sral ke bred, ku sie malu ke kof, a ke long kas lun Jeova.” (Emos 8:​11) Tusruktu, kut arulanu sang kulo ke kofwo in ngun su God el ase nu sesr ke inkanek lun “met kulansap oaru a lalmetmet”!​—Mattu 24:45-​47.

¹⁴ Ongoiye su tuku ke lokus el ikasla inkanek lun ma se. Lun mea? Joel el aketeye nu sesr, el fwak: “We nu sesr ke len sa; tu len lun Jeova apkurun me, a a fwa tuku oanu kunausten liki El Su Ku Liki Ku!” (Joel 1:​15) Meun su lokus lun God el oru misinge fwin fwalu nu fon akkalemye la len lulap a me aksangeng lun Jeova arulanu apkurun. Paye, met nu kemwa su oasr inse sumwos elos sano na paye len saok inge ke nununku mutal lun God lain met koluk nu kemwa, a Jeova el kutangla na paye oanu sie Met Kol in kosrao a fwalu.

¹⁵ Oanu Joel 1:​16-​20 el akkalemye, me mongo mwotla liki an Juda in pal meeta. Wekunang insemwomwo. Nien witu sikeyukla nien ma nun kosro musalsallu. Meyen lokus el kunausla ma folfol nu kemwa paenang, un cow fwefwela a un sipu kaiyuk. Fuka sie ongoiye lulap pa inge! Ye ma upa inge nu kemwa, mea sikyuk nu sel Joel? Fwal nu ke fus 19 el fwak: “O Jeova Nga pang nu sum.” Ke len inge, met puspis elos ouyepa loang nu ke kas in sensen mutal a elos tung nu sin Jeova God in lalalfongi.

“Len lun Jeova Tuku”

¹⁶ Long ma sap se inge su tuku sin God: “Ukye ukuk in Saion, a sala ke sa lun meun in eol mutal sik. Lela met muta in fwal se inge nu kemwa in rarrar.” (Joel 2:1) Efu elos enenu in pulakin ou inge? Kas palu se inge el topuk: “Tu len lun Jeova tuku, tu paye apkurun me! Sie len in losr a ok, sie len in pukunyeng a losr matoltol, oanu lenelik elakelik fwin eola.” (Joel 2:1, 2) Oasr oiye silaklak na paye su kapsreni nu ke len lulap lun Jeova.

¹⁷ Nunku ke me purakak yok su tuku ke arurumu lun met palu ke pal se ma lokus el ekulla imae kato su oanu imae lun Eden nu ke ma musallu. Long ke aketeye ke luman un lokus: “Lumalos oanu luman orsu, a oanu met kasrusr fwin ors, ou inge elos kasrusr. Oanu kusan sariot fwin mangon eolu ou inge elos srola, oanu kusan furur in e su kangla sruin maa. Oanu sie mutanfwal su takla nu ke meun. Mutanfwalu mwaiok ke elos tuku. Muta nu kemwa areyukla. (Joel 2:​4-6) Ke lusen pal in ongoiye inge su tuku ke lokus in len lal Joel, met nu kemwa su alu nu sel Beal arulanu fosrnga, a ma upa ku in liyeyuk ke mutalos.

¹⁸ Wangin kutena ma su ku in kutongye orekma takla a sumwos lun lokus su tia pulakin totola. Elos kasrusr “oanu met ku” elos fwanyuk nu fwin potu. Fwin ‘kutu selos ikori ke sripen me meun, na ma lula elos tafwela na ke orekma lalos.’ (Joel 2:​7, 8) Fuka sie me pupulyuk mwo pa inge nu sin un solse lun God ke len inge su lumeyuk nu ke lokus! Ke len inge, un solse lun Jeova su lumeyuk nu ke lokus elos tia tui ke orekma. Wangin “pot” ku oanu me lain su ku in kosroila orekma lalos. Elos tia fuleak ke oaru lalos nu sin God a elos akola in sun mise, oanu ma sikyuk nu sin tausen puspis lun Met Lo lun Jeova su ‘ikori ke sripen me meun” meyen elos srunga in fwak heil Hitler ke lusen pal in kolyuk lun Nazi fwin an Germany.

¹⁹ Un solse lun God ke len inge su lumeyuk nu ke lokus elos sang ma lo na paye ke “siti” lun Kristendom. (Joel 2:⁠9) Elos oru ou inge fwin fwalu nu fon. Elos fwanyuk nu fwin me kutong nu kemwa, elos ilyuk nu ke loom puspis su piselos oasr ke million puspis, elos osun nu sin met ke inkaneku, elos sramsram nu sin met ke telefon, a elos srike in sunolos ke inkanek nu kemwa ke elos fwakak kas lun Jeova. Paye, elos kitelik billion puspis ke me rid su tuku ke Baibel a akola pal nu kemwa in kitakut me rid ke pal in orekma lun forfor lalos su tia tui​—elos oru ou inge ye mutun met nu kemwa a loom nu ke loom.​—Orekma 20:20, 21.

²⁰ Joel 2:​10 el fwak la u lulap inge lun lokus oanu pukunyeng su orala fwat, malem, a itue in losrla. (Srike liye Isaia 60:8.) Ya oasr kutena alollo fwin ke sie met su kol ke un solse inge? Yok liki pusren mwon srisrik inge nu kemwa, kut ku in long kas inge lun Joel 2:11: “A Jeova el fwakak pusral ye mutun met meun lal, tu nien aktuktuk lal arulanu yok. Tu el ku su akpayeye kas lal; Tu len lun Jeova pengpeng a arulanu me aksangeng, a su ku in tu ye mutal, tia sangeng?” Aok, Jeova God el supwela met meun lal su lumeyuk nu ke lokus ke pal inge.

“Jeova El Tia Patla”

²¹ Oanu Joel, met sap Piter el sramsram ke len lulap lun Jeova. El simusla: “A len lun Jeova a tuku oanu met pusrapasr, in su kosrao a fwa wanginla wikin ngurngur lulap, a ma in kosrao a fwa kofelik ke fwol lulap, a fwalu a fwa fururyuk a ma su on lu. (2 Piter 3:​10) Ye koko lun Setan su Devil, guferment koluk su lumeyuk nu ke “kosrao” el kol “fwalu,” el su lumeyuk nu ke met nu kemwa su tia pusisel nu sin God. (Efesus 6:​12; 1 Jon 5:​19) Kosrao a fwalu inge su oasr ma elos pitse ka, elos tia ku in sasla liki fol lun koskosrok mutal ke lusen len lulap lun Jeova. A, elos inge fwa ayaola nu ke “kosrao sasu a fwalu sasu su kut sano, yen sumwosmwos on we, oanu ma el mwolela nu sesr.​—2 Piter 3:​13.

²² Ke sripen oasr me kutong a me srifwe puspis ke lalalfongi ke len inge, paenang kut fwin tia taran kut ku in tula liki kut oiyen silaklak ke pal lasr. Tusruktu ke kut liye la un lokus elos tafwela na ke orekma lalos, na met puspis elos loang nu ke peng mwo lun Togusrai. Fwinne God el sang pal ke ma se inge, lela kut in tia fos ke mongfwusesr lal oanu kut nunku la el patla. “Jeova el tia patla ke mwoleung lal, oanu kutu nunku patla, tu el mongfwusesr nu sumwos, meyen el tia lungse tu kutena in tula, a tu met nu kemwa in auliyuk.”​—2 Piter 3:9.

²³ Ke kut sano len lulap lun Jeova, lela kut in filiye ke insiesr kas lal Piter su simusyukla in 2 Piter 3:​11, 12: “Meyen ma inge nu kemwa fwa kunausyukla on inge, yen met su fwa fwal nu sumwos in muta in moul mutal a sumwosmwos, in sano a tawi ke tuku lun len lun God, in su kosrao elos fwa wanginla ke e, a ma nu kemwa elos fwa kofelik ke fwol lulap!” Wikin orekma mutal a sumwosmwos inge pa kaifweung lasr in akesrui ke un solse lun Jeova su lumeyuk nu ke lokus ke kut wi pal nu kemwa ke orekma in luti mwo ke peng mwo lun Togusrai meet liki safla el tuku.​—Mark 13:10.

²⁴ Un solse lun God su lumeyuk nu ke lokus el tia tui ke orekma lal nu ke na len lulap a me aksangeng lun Jeova el tuku. Lokus inge wekunang orekma lalos su wangin kutena met ku in kutongye sie me akpayeye la len lulap lun Jeova arulanu apkurun. Ya kom tia engun in kulansap wikin lokus akmusrala lun God a met puspis su akesrui nu sel ke sie meun safla meet liki len lulap a me aksangeng lun Jeova tuku?

²⁵ Arulanu yok na paye len lun Jeova su e fwa tuku! Tia me lut sie kusensiyuk sikyuk: “Su ku in tu?”(Joel 2:​11) Kusensiyuk inge a kutupa kusensiyuk e fwa sramsramkin ke me lutlut luo toko.

Ya Kom Ku In Aketeye?

◻ Efu Jeova el sang kas in sensen ke me keok su tuku ke mwon srisrik su e fwa tuku fwin an Juda?

◻ Fwin ke akpayeyuk lun kas palu lal Joel ke len inge, lokus lun Jeova el lumeyuk nu sin su?

◻ Oiye fuka met kol lun Kristendom elos akkalemye ke me keok su tuku ke lokus, a fuka kutu selos kaengla liki me keok su tuku ka?

◻ Fuka lupan me keok su tuku ke lokus ke lusen century ak20, a ma inge el tafwela nu nge?

[Study Questions]

1, 2. Mea ma sikyuk fwin an Juda paenang Jeova el moklel Joel in fwakak kas palu fukoko lal?

3. Jeova el sang kas in sensen ke mea, a ke mea mutanfwal nu kemwa elos enenu in akola?

4. Fuka lupan ma sikyuk ke kas in sensen su Joel el fwak?

5, 6. (a) Aketeye me keok su Joel el palye. (b) Su Sropon me keok inge?

7. (a) Oiye fuka met kol lun alu fwin an Juda elos akkalemye? (b) Fuka luman ma sikyuk nu sin met kol lun Kristendom misinge oanu sie ke ma sikyuk nu sin met kol lun alu fwin an Juda?

8, 9. (a) Fuka Joel el aketeye luman lokus a fwokin me keok su elos orala? (b) Ke len inge, lokus el lumeyuk nu ke mea?

10. Mea fwokin me keok su tuku ke lokus fwin an Juda?

11, 12. (a) Su met inge su ekin met tol lun God ke len inge? (b) Fuka met kol ke alu lun Kristendom ke len inge elos sun me keok su tuku ke lokus?

13. Ya alu nu kemwa lun Kristendom elos akola in loang nu ke kas in sensen lun Jeova?

14. Ke inkanek fuka lokus inge el oanu akola inkanek se?

15. Meyen elos nunku ke ma musalla su e fwa tuku ke an, paenang mea met nu kemwa su loang nu ke kas in sensen elos oru?

16. Efu “met nu kemwa su muta ke an” elos rarrar?

17. Mea me keok su tuku ke lokus el oru nu ke an a nu sin met nu kemwa fwin an Juda?

18, 19. Fuka orekma lun met kulansap lun God ke len inge oanu me keok su tuku ke lokus?

20. Su sang kasru nu sin lokus ke len inge, a mea fwokin ma inge?

21. Mea e sikyuk fwin ‘len lun Jeova el tuku oanu sie met pusrapasr’?

22, 23. (a) Oiye fuka kut enenu in akkalemye ke oiye pakoten lun Jeova in akkalemye mongfwusesr? (b) Oiye fuka kut enenu in akkalemye ke len lun Jeova su futotoeni?

24, 25. (a) Oiye fuka kom enenu in akkalemye ke pal mwo lom in akesrui ke orekma lun un lokus su oanu solse lun Jeova? (b) Kain in kusensiyuk yok fuka Joel el siyuk?

[Picture on page 16]

Ongoiye su tuku ke mwon srisrik el akola inkanek lun ma se su upa liki

[Credit Line]

Barren tree: FAO photo/G. Singh

[Picture on page 17]

Jehovah God pa orala me keok su tuku ke lokus ke len lasr

[Picture Credit Lines]

Locust: FAO photo/G. Tortoli; locust swarm: FAO photo/Desert Locust Survey