Orekmakihn Mwe Srihkasrak luhn Mwet Pahluh Oacna Joel
1. Kuht kuh in etahwi fuhkah inse puhsisacl lal Joel ke kuht oruh orekma in forfor?
1 Suc mwet pahluh se inge Joel? El ahkkahlwemye muhkwena lah el pa “wen natul Pethuel.” (Joel 1:1) Mwet pahluh inse puhsisacl se inge ahkkahlwemye yohk ke mwe fwahk luhn Jeova, ac tiac ke kunohkohn in mwet fahkwack se ma el oruh. Ouinge, ke orekma in forfor lasr, kuht tiac pac suk in eis kaksak nuh sesr sifacna, tuhsruhktuh kuht sang kaksak nuh sin Jeova ac Bible. (1 Corinth 9:16; 2 Corinth 3:5) Wekuhnacng ma inge, kuht eis kuh ke kahs ma kuht fahkwack. Kahs pahluh lal Joel kuh in use nuh sesr fuhkah moniyuck ac finsrak in pacl inge?
2. Meac kuht enenuh in oruh ke srihpen fototo me sahflahiyen oakwuck se inge?
2 “Len lun LEUM GOD Apkuranme.” (Joel 1:15): Fwinne kahs inge sihmlac yac tausin kuhtuh somlah tari ah, kuht moul ke pacl ma sahflahiyen ma inge ahkpwacyeyuck na pwacye. Koluklaciyen ohiyen facluh ac suhnuhnkuh ac kahs kohu ke acn in forfor lasr ahkkahlwemye na pwacye lah lwen sahflah luhn oakwuck koluk inge, orek tari. (2 Timothy 3:1-5; 2 Peter 3:3, 4) Ke kuht nuhnkuh ke sahflah apkuhran me, ma inge oruh kuht in fihliyac orekma in forfor lasr in pa yohk srihpac emeet in moul lasr.—2 Peter 3:11, 12.
3. Efuh kuh orekma in forfor arlacna yohk srihpac ke kuht apkuhranyang nuhke lwen in ongaiyac luhlahp?
3 Jeova El Fwah Loangwelah Mwet Lal. (Joel 3:16): Kusrusr se ma sruhmuhnyuck in fuhs se inge pa pacl se Jeova elac oruh nuhnuhnkuh lal ke pacl in ongaiyac luhlahp. Kuht is insewowo ke kuht etuh lah Jeova elac molwelah mwet kuhlwacnsap oaru lal in pacl sac. (Fwackyuk 7:9, 14) Ke kuht oruh orekma in forfor ac liye ke Jeova el karihngihn ac ahkkweye kuht, luhlahlfongi ac muhtweng lasr ac yohkwelik, oayacpac ma inge ac kahsre kuht ke pacl in ongaiyac luhlahp.
4. Efuh kuht kuh in engan ac ngetlah nuhke pacl fahsruh uh ke luhlahlfongi?
4 Fwinne kuhtuh mwet uh fwahk muh pweng lal Joel oruh sie ma ahsor ac koluk, ma inge sang finsrak wowo nuh sin mwet luhn God in moliyucklac. (Joel 2:32) Kuht in kacfweacng ngetlah nuh ke pacl fahsruh uh ke luhlahlfongi ac moniyuck in fahkwack pweng wo ke Tohkohsrahi luhn God ke kuht ahkos kahs lal in Joel 2:23: “Kowos in insewowo, Ac engankin . . . LEUM GOD lowos.”