Me Insemwomwo Yok Ke Inkanek Lun Mwoleung Sasu
“Jisus . . . el ouyepa met iumwe nu ke mwoleung mwo liki—HIBRU 8:6.
TOKIN Edam a If elos oru ma koluk, Jeova el oru nununku lal nu sel Setan, su keapela If, el fwak: “A Nga fwa filiye srunga in maslom a mutan se inge, a in maslon fute lom a fute lal. A el fwa kunausla sifwom, a kom fwa kunausla kapiniel. (Genesis 3:15) Ke pal se ma Jisus el baptaisla ke Infwal Jordan ke yiu 29 C.E., Fute se inge su mwoleyukla in Eden el tuku. Ke mise lal ke sak soko ke yiu 33 C.E., ipen kas palu se inge in pal meeta akpayeyuk. Setan el ‘kunausla kapinien’ Fute.
2 Sie me insemwomwo, meyen fwinne kinit se inge su el orala arulanu ngal, tusruktu el tia onnu ma patpat. Jisus el sifwil moulyuk nu ke ngun su tia ku in sifwil mise a el somwak nu yurin Papa tumal in kosrao, a wisla sripen sral su surorla liki manol oanu “me mol in molela met puspis.” Ke ma inge, kas lal sifwanu akpayeye: “Ou inge Mwen nutin met el fwa srukyukyak pa, tu el su lalalfongi fwa ku in eis moul ma patpat in el.” (Mattu 20:28; Jon 3:14-16; Hibru 9:12-14) Mwoleung sasu el orekma yok ke akpayeyen kas palu lal Jisus.
Mwoleung Sasu
3 Tia pat tukun mise lal, Jisus el fwak nu sin met tumal lutlut la sral su surorla liki manol pa “sran mwoleung [sasu].” (Mattu 26:28; Luk 22:20) Len siengoul tukun el somwak nu in kosrao, mwoleung sasu ku in liyeyuk la el mutamwauk in orekma ke pal se ma ngun mutal el okwela nu sin met tumal lutlut 120 su muta tukeni nu sie ke sie infwokil lung fwin an Jerusalem. (Orekma 1:15; 2:1-4) Utukla lun 120 met tumal lutlut inge nu ke mwoleung sasu akkalemye la mwoleung “matu”, su pa inge mwoleung ke Ma Sap, aksafyeyukla.—Hibru 8:13.
4 Ya mwoleung matu se inge koluk? Mo na mo. Paye, ke sripen mwoleung matu ayaola tari, paenang Israel in ikwe el tille met sulosola lun God. (Mattu 23:38) Tusruktu ma inge sikyuk ke sripen seakos lun met Israel a srunga lalos in eis Sie Met Akmusrala lun Jeova. (Exodus 19:5; Orekma 2:22, 23) Aok, meet liki el ayaola Ma Sap, ma inge el orala ma pukanten. Ke lusen century puspis ma inge el sang inkanek in osun nu sin God a el me loeyuk lain alu kikiap. El oanu ngunin mwoleung sasu, ma sap ke me kise su enenu in orek ke pal nu kemwa, akkalemye la oasr enenu na paye lun met ke molela liki ma koluk a mise. Paye, Ma Sap el oanu sie “met liaung lasr in kol kut nu sin Kraist.” (Galetia 3:19, 24; Rom 3:20; 4:15; 5:12; Hibru 10:1, 2) Tusruktu, ke inkanek lun mwoleung sasu mukena, mwolela nu kemwa nu sel Ebream ku in akpayeyuk nu fon.
Mutanfwal nu kemwa Akinsemwomwoyeyuk ke Inkanek lun Futen Ebream
5 Jeova el mwolela nu sel Ebream: “A in fute lom mutanfwal nu kemwa fwin fwalu fwa insemwomwo.” (Genesis 22:18) Ye koko lun mwoleung matu, metsa puspis akinsemwomwoyeyuk ke asrouki lalos nu sin met Israel, su futen Ebream. Tusruktu ke akpayeye lal in ngun, Fute se inge lal Ebream el sramsram ke sie mokul sumwosmwos. Poul el aketeye ma inge ke pal se ma el fwak: “A mwoleung fwakyuk nu sel Ebream, a nu sin fute lal. El tia fwak: ‘A nu sin fute, oanu lun ma puspis, a oanu lun sie: ‘A nu sin fute lom,’ su Kraist.”—Galetia 3:16.
6 Aok, Jisus el Futen Ebream, a ke inkanek Lal mutanfwal nu kemwa elos fwa eis insemwomwo yok liki insemwomwo su tuku ke inkanek lun Israel in ikwe. Tia pat tokin Pentekost 33 C.E., met sap Piter el fwak nu sin sie u lun met Ju: “Komwos mwen nutin met palu a nutin mwoleung se su God el oru nu sin papa tumomwos, a fwak nu sel Ebream, a sou nu kemwa lun fwalu fwa akinsemwowoyeyuk in fute lom.’ Nu sumwos meet, God el akmoulyeak Met Kulansap lal, a supalmu in akinsemwowoye komwos, in furokkomwosla nu kemwa liki ma koluk lomwos.—Orekma 3:25, 26.
7 Tis pat toko me insemwomwo se inge etukyung pa nu sin met Samaria a met Pegan. (Orekma 8:14-17; 10:34-48) Ke sie pal inmaslon 50 a 52 C.E., Poul el simusla leta nu sin met Kristian in Galetia fwin an Asia Minor: “A ma simusla, ke liye meet tu God el fwa aksumwosye met Pegan ke lalalfongi, el luti mwosasu meet nu sel Ebream a fwak: ‘In kom mutanfwal nu kemwa fwa akinsemwowoyeyuk.’ Na ou inge elos su lalalfongi elos insemwomwo yurol Ebream su lalalfongi.” (Galetia 3:8, 9; Genesis 12:3) Fwinne met Kristian puspis fwin an Galetia “elos tuku sin met Pegan” tusruktu elos inge akinsemwowoyeyuk ke inkanek lal Jisus ke sripen lalalfongi lalos. Ke inkanek fuka?
8 Poul el fwak nu sin met Kristian fwin an Galetia, elos fwinne met Ju ku met Pegan: “A komwos fwin sran Kraist, na komwos futel Ebream, a met usru fwal nu ke mwoleung.” (Galetia 3:29) Nu sin met Galetia, wikin me insemwomwo ke inkanek lun futen Ebream pa, ilyuk lalos ke mwoleung sasu a in ekla met usru wiel Jisus, a met wilul Jisus oanu futen Ebream. Kut tianu etu pisen met Israel nu kemwa in pal meeta. Ma kut etu na pa, elos “pus oanu puk mweanu ke pus.” (1 Togusra 4:20) Tusruktu, kut etu pise safla lun met nu kemwa su wilul Kraist ke fute in ngun—144,000. (Fwakyuk 7:4; 14:1) Met inge su piselos oasr ke 144,000 elos tuku sin “mutanfwal nu kemwa, a sin sruf nu kemwa, a fwal nu kemwa” lun metu a elos wi in oru orekma in akinsemwowoye kutu met ke me insemwomwo su tuku ke mwoleung lal Ebream.—Fwakyuk 5:9.
Sie Kas Palu Su Akpayeyuk
9 Ke pal se ma el palye ke mwoleung sasu, Jeremaia el simusla: “ ‘A pa inge mwoleung se su Nga fwa oru yurin loom sel Israel tokin len ingo,’ Jeova el fwak. ‘Nga fwa filiye ma sap luk insielos, a Nga fwa simusla insielos.” ’ (Jeremaia 31:33) Sie oiye lun met nu kemwa su wi ke mwoleung sasu pa in kulansapu Jeova ke lungse. (Jon 13:35; Hibru 1:9) Ma sap lun Jeova simusyukla ke insielos, a elos moniyuk pal nu kemwa in oru ma lungse lal. Paye, kutu sin met Israel in pal meeta elos arulanu lungse na paye ma sap lun Jeova. (Sam 119:97) Tusruktu pukanten selos tia ou inge. Fwinne ou inge elos srakna wi ipen mutanfwal sa. Wangin kutena met su ku in muta na ke mwoleung sasu fwin ma sap lun God tia simusyukla nu ke insielos.
10 Jeova el tafwela in sramsram nu selos nu kemwa su wi ke mwoleung sasu: “A Nga fwa God lalos, a elos fwa met srak.” (Jeremaia 31:33) Pukanten sin met fwin an Israel in pal meeta elos alu nu sin god puspis lun met Pegan, tusruktu elos tafwela na in sie sin met Israel. Ke inkanek lun mwoleung sasu, Jeova el orala sie mutanfwal sasu in ngun, “Israel lun God,” in ayaola Israel in ikwe. (Galetia 6:16; Mattu 21:43; Rom 9:6-8) Aok, wangin kutena met su ku in wi ipen mutanfwal sasu se inge elos fwin tui in alu nu sin Jeova a elos fwin tia alu nu sel mukena.
11 Jeova el ouyepa fwak: “Tu elos nu kemwa fwa ete yu, liki el su arulanu pusisel selos nu sin el su arulanu yok selos.” (Jeremaia 31:34) Fwin an Israel, met puspis elos pilesru Jeova, oanu elos fwak: “Jeova el fwa tia oru ma mwo a el fwa tia oru ma koluk.” (Zefenaia 1:12) Wangin kutena met su tafwela na in wi ipen Israel lun God elos fwin pilesru Jeova ku akfokfokye alu nasnas. (Mattu 6:24; Kolosse 3:5) Israel in ngun inge elos “met su etu God lalos.” (Daniel 11:32) Elos insemwomwo in ‘eis etauk ke God paye mukefwunnu a Jisus Kraist.’ (Jon 17:3) Etauk lalos nu sel Jisus kasrelos in akyokye etauk lalos nu sin God meyen, ke sie inkanek sakuruk, Jisus “El fwakulak [God].”—Jon 1:18; 14:9-11.
12 Ke saflaiye Jeova el mwolela: “Tu Nga fwa nunuk munas nu ke ma koluk lalos, a ma koluk lalos Nga fwa tia sifwil esam.” (Jeremaia 31:34b) Wikin Ma Sap lal Moses pa akmwuk fukofoko su simusyukla a ma inge nu kemwa sapkinyuk nu sin met Israel nu kemwa in akos ka. (Duteronomi 28:1, 2, 15) Elos nu kemwa su kunausla Ma Sap elos orek kise in afwunye ma koluk lalos. (Livitikus 4:1-7; 16:1-31) Tok met Ju puspis elos lalalfongi la elos ku in ekla met sumwosmwos ke inkanek in orekma lalos ke Ma Sap. Tusruktu, met Kristian elos akilen la elos tia ku in eis ke kutena pal moul sumwosmwos ke orekma lalos sifwanu. Meyen elos tia ku in fwasr liki in tia oru ma koluk. (Rom 5:12) Ye koko lun mwoleung sasu, moul sumwosmwos ye mutan God ku in oasr yurin sie met mukena ke ku lun me kise lal Kraist. Tusruktu kain in moul sumwosmwos inge oanu sie me sang, me sang su tuku ke lungkulang lun God. (Rom 3:20, 23, 24) Jeova el srakna siyuk ke akos nu sin met kulansap lal. Poul el fwak la elos nu kemwa su muta ye koko lun mwoleung sasu elos muta “ye ma sap nu sin Kraist.”—1 Korint 9:21.
13 Ke ma inge, ouyepa nu sin met Kristian oasr pa sie me kise lalos ke ma kulok, tusruktu me kise se inge saok liki me kise ye koko lun mwoleung lun Ma Sap. Poul el simusla: “A paye met tol nu kemwa elos tu len nu len in orekma a kise pal puspis ke me kise sana, su koflanu ela ma koluk. A El, [Jisus] ke El kise tari ke sie me kise ke ma koluk ma patpat, El muta lepo leyut sin God.” (Hibru 10:11, 12) Ke sripen met Kristian nu kemwa ke mwoleaung sasu elos akkalemye lalalfongi ke me kise lal Kraist, paenang Jeova el aksumwosyelos, wangin ma koluk lalos, ke ma inge oasr pal mwo lalos in ekla met sulosola oanu mwen nutul in ngun su akmusrala. (Rom 5:1; 8:33, 34; Hibru 10:14-18) Ke pal se ma elos oru ma koluk ke sripen moul sesumwos lalos oanu sie met, elos ku in siyuk nunuk munas lun Jeova, ke inkanek lun me kise lal Kraist, Jeova el nunuk munas nu selos. (1 Jon 2:1, 2) Tusruktu, elos fwin sulela in oru ma koluk ke lungse lalos, na elos tula moul sumwosmwos lalos ye mutun God a pal mwo lalos oanu sie met su wi ke mwoleung sasu.—Hibru 2:2, 3; 6:4-8; 10:26-31.
Mwoleung Matu a Mwoleung Sasu
14 Mokul nu kemwa ke mwoleung matu elos enenu in eis kosroila oanu sie akul la elos muta ye Ma Sap. (Livitikus 12:2, 3; Galetia 5:3) Tukun congregation lun met Kristian el mutamwauk, kutu met elos pula a nunku la met Kristian nu kemwa su tia met Ju elos enenu pa in eis kosroila. Tusruktu met sap a met elder fwin an Jerusalem, su muta ye koko lun Kas lun God a ngun mutal, elos akilen la ma inge tia eneneyuk. (Orekma 15:1, 5, 28, 29) Tokin yiu ekasr, Poul el fwak: “Tu el tia sie met Ju su oanu met Ju in ma lik mukena, a ouyepa tia paye kosroila se ma lun ikwe mukena. Tu el sie met Ju, su sie in insiel, a kosroila ma su lun inse, in ngun, a tia in ma simusla.” (Rom 2:28, 29) Kosroila na paye, fwinne nu sin met Ju, wangin ma lane in ngun su tuku ka ye mutun Jeova. Nu selos nu kemwa su muta ke mwoleung sasu, insielos a ikwe pa enenu in eis kosroila. Ma nu kemwa in nunuk lalos, kena, a me purakak koluk a ma fokfok ye mutun Jeova elos enenu in sisla.a Met puspis misinge elos moul oanu sie me akpayeye ke ku lun ngun mutal lun God in ekulla nunuk ke inkanek se inge.—1 Korint 6:9-11; Galetia 5:22-24; Efesus 4:22-24.
15 Ke akmwuk lun mwoleung lun Ma Sap, Jeova pa Togusra lun Israel, a oasr pal el akkalemye kolyuk lal ke inkanek lun met su el pakiye oanu togusra fwin an Jerusalem. (Isaia 33:22) Jeova el ouyepa Togusra lun Israel lun God, su Israel in ngun, a mutamwauk 33 C.E., el kol ke inkanek lal Jisus Kraist, su eis “ku e nu kemwa . . . in kosrao a fwin fwalu.” (Mattu 28:18; Efesus 1:19-23; Kolosse 1:13, 14) Ke len inge, Israel lun God el akilen la Jisus pa Togusra ke Togusrai lun God in kosrao, su oakiyuki ke 1914. Jisus el sie Togusra su mwo liki togusra oanu Hezekaia, Josia, a kutu pa togusra oaru nu kemwa lun an Israel in pal meeta.—Hibru 1:8, 9; Fwakyuk 11:15.
16 Israel el tia sie togusrai mukena, a, oasr pa yurol met tol akmusrala. In yiu 33 C.E. Israel lun God el ayaola Israel in ikwe a elos ekla “met kulansap” a “met lo” lal. (Isaia 43:10) Ke ma inge, kas lun Jeova nu sin Israel su simusyukla in Isaia 43:21 a Exodus 19:5, 6 orekmakinyuk nu sin Israel lun God in ngun. Mutanfwal sasu lun God in ngun el ekla “sie fwil sulela, met tol leum, mutanfwal mutal, met su ma lun God mukena,” su oasr kunokon in ‘fwakak mwo lun Jeova in an nu kemwa.’ (1 Peter 2:9) Met nu kemwa su wi ke Israel lun God, mokul a mutan, elos un met tol. (Galetia 3:28, 29) Oanu ip se akluo ke futen Ebream, elos fwakak ke pal inge: “Engunak, O komwos mutanfwalu, wi met sral.” (Duteronomi 32:43) Elos nu kemwa su wi ke Israel in ngun su srakna muta fwin fwalu elos pa “met kulansap oaru a lalmetmet.” (Mattu 24:45-47) Asrouki nu selos mukena pa ku in oru orekma mutal lun sie met in akinsemwomwoye God.
Togusrai lun God—Akpayeye Safla
17 Met Israel nu kemwa su isusla tukun yiu 1513 B.C.E. elos wi ke mwoleung lun Ma Sap ke inkanek lun isusla. Elos nu kemwa su Jeova el eisla nu ke mwoleung sasu elos ouyepa sifwil isusla—nu selos su ou inge, elos isusla in ngun. Jisus el sramsram ke ma inge nu sin sie met Farisi pangpang Nicodemus ke pal se ma el fwak: “Payenu, payenu, Nga fwak nu sum, Sie met el fwin tia sifwil isusla, el koflanu liye togusrai lun God.” (Jon 3:3) Met tumal lutlut 120 ke Pentekost 33 C.E. elos inge pa met sesumwos e meet su pulakin kain in sifwil isusla inge. Elos inge aksumwosyeyuk ye mwoleung sasu, elos eis ngun mutal oanu “me akpayeye” ke me usru mwolanu. (Efesus 1:14) Elos inge “isusla ke ngun” tu in ekla oanu mwen nutin God su el nutela, ke ma inge elos ekla ma wiel Kraist a “met usru welul Kraist.” (Jon 3:6; Rom 8:16, 17) “Sifwil isusla” lalos inge ikasla nu selos sie inkanek ke fwinsrak sakuruk.
18 Ke pal se ma el ekla met iumwe ke mwoleung sasu, Jisus el toeni siepa mwoleung nu sin met tumal lutlut lal, el fwak: “A Nga pakiye nu sumwos sie togusrai, oanu Papa tumuk el pakiye nu sik.” (Luk 22:29) Mwoleung inge ke togusrai el akola inkanek nu ke akpayeyen sie arurumu sakuruk su simusyukla in Daniel 7:13, 14, 22, 27. Daniel el liye “sie oanu mwen nutin met” etukyung nu sel ku lun togusra su tuku “Sel su muta omeet me,” Jeova God. Tukun ma inge, Daniel liye la “pal se tuku ke togusrai sa ma lun met mwo.” Jisus pa met su “oanu mwen nutin metu” su ke 1914, el eis togusrai lal in kosrao su tuku sin Jeova God. Met tumal lutlut akmusrala lal pa “met mwo” su akola in welul kol ke togusrai se inge. (1 Tessalonika 2:12) Fuka ma inge sikyuk?
19 Tukun mise lalos, met akmusrala Kristian inge elos oanu Jisus su sifwil moulyuk nu ke ngun su tia ku in sifwil mise a elos welul in kol oanu togusra a met tol in kosrao. (1 Korint 15:50-53; Fwakyuk 20:4, 6) Fuka sie fwinsrak mwolanu pa inge! “Elos fwa kol oanu togusra fwin fwalu,” tia fwin an Kenan mukena. (Fwakyuk 5:10) Ya ‘mutunooa lun met lokwalok lalos’ elos fwa ma lalos? (Genesis 22:17) Aok, ke sie inkanek yok, ke pal se ma elos sang ma lo ke kunanela lun mutan kosro su lumeyuk nu ke alu alu kikiap, Babulon Lulap, a ke pal se ma met akmusrala inge su sifwil moulyuk elos welul Jisus in leum fwelos ke “sikal mwusra” a kunausla sifwel Setan. Ke ma inge oasr ip lalos ke akpayeye lun me sramsram safla in Genesis 3:15 oanu sie kas palu.—Fwakyuk 2:26, 27; 17:14; 18:20, 21; Rom 16:20.
20 Saap kut srakna ku in siyuk, Ya mwoleung inge lal Ebream a mwoleung sasu fwal mukena nu sin 144,000 met oaru inge? Mo, kutu met su tia wi ke mwoleung elos inge akinsemwowoyeyuk pa ke inkanek lalos, oanu ma kut ku in liye ke me lutlut toko.
[Footnote]
a Srike liye Insight on the Scriptures, Volume 1, sra 470, orekla sin Watchtower Bible and Tract Society of New York, Inc.
Ya Kom Esam?
◻ Nge mwoleung sasu el mutamwauk in orekma?
◻ Mea ma inge su akpayeyuk ke inkanek lun mwoleung matu?
◻ Su Fute se meet lal Ebream, a ke inkanek takla fuka mutanfwal nu kemwa akinsemwomwoyeyuk ke inkanek lun fute se inge?
◻ Mea me akpayeye safla ke mwoleung lal Ebream a ke mwoleung sasu nu sin 144,000?
[Study Questions]
1. Su ‘futen mutan’ su mwoleyukla in Eden, a fuka inge ‘kunausyukla kapiniel’?
2. Fwal nu ke kas lal Jisus, fuka mise lal akinsemwowoye metu
3. Nge mwoleung sasu el mutamwauk in orekma meet?
4. Ya oasr ma koluk ke mwoleung matu? Aketeye.
5, 6. Fwin ke akpayeyen mwoleung lal Ebream, su Futen Ebream, a su mutanfwal inge su eis me insemwowo se meet ke inkanek lal?
7. Mutanfwal puspis fuka akinsemwomwoyeyuk ke inkanek lal Jisus, su futen Ebream?
8. Nu sin met Kristian in len lal Poul, tu in akinsemwomwoyeyuk ke inkanek lun futen Ebream elos enenu mea, a met ekasr ke saflaiye elos nu kemwa su eis me insemwomwo inge?
9. Fuka met nu kemwa su oasr ke mwoleung sasu elos srukye ma sap lun Jeova?
10, 11. Nu selos nu kemwa su wi ke mwoleung sasu, ke inkanek fuka Jeova el ekla “God lalos,” a fuka elos nu kemwa fwa ku in etel?
12, 13. (a) Ke inkanek fuka Jeova el sang nunuk munas ke ma koluk lun met nu kemwa su wi ke mwoleung sasu? (b) Fwin ke nunuk munas nu ke ma koluk, efu sumwos in fwak la mwoleung sasu el mwo liki mwoleung matu?
14. Kain in kosroila fuka eneneyuk ke Ma Sap lun mwoleung? Ke mwoleung sasu?
15. Fuka Israel in ikwe a Israel in ngun ku in srikeyuk sie sin sie fwin ke kolyuk lun togusra?
16. Kain in met tol fuka elos nu kemwa su wi ke Israel lun God?
17. Kain in isusla fuka oasr yurin met nu kemwa su wi ke mwoleung sasu elos pula?
18. In sifwil isusla ma inge ikasla srungal nu ke fwinsrak mwolanu fuka nu selos nu kemwa su wi ke mwoleung sasu?
19, 20. (a) Nu selos su wi ke mwoleung sasu, kain in akpayeye mwolanu fuka e fwa orek ke mwolela lal Jeova nu sel Ebream? (b) Mea kutu kusensiyuk su srakna enenu in sramsramkin topuk nu ka?
[Picture on page 22]
Elos nu kemwa su wi ke mwoleung sasu nunuk munas nu ke ma koluk oasr kalme yok su mwo liki kalme nu selos nu kemwa su wi ke mwoleung matu