Kaifweung In Fwafwasryesr Yurin God
“Komwos in fwafwasryesr ke ngun, a komwos fwa tia akpayeye lung lun ikwe.”—GALETIA 5:16.
BAIBEL el aketeye nu sesr la “Inuk el fwafwasyesr yurin God. Fwinne met puspis su muta ke len lal elos orekmakin kas koluk pal nu kemwa a akkalemye oiye koluk, tusruktu el kaifweung in fwafwasryesr yurin God nu ke pal el mise ke el sun 365 matwe. (Genesis 5:23, 24; Jud 14, 15) Oupanu Noa el “fwafwasryesr yurin God.” El oru ou inge in pal se na el liaung ke ma enenu lun sou lal, el muteng ke fwalu su muta ye me purakak lun lipufon koluk a tulik silolel nutulos, a el ouyepa kurungin ma enenu nu kemwa ke orekma in musa oak lulap su yok liki kutena oak in pal meeta. El tafwela in fwafwasyesr yurin God tukun Sronot, fwinne me lain nu sin Jeova sifwil sikyuk in Babel. Paye, Noa el tafwela in fwafwasyesr yurin God nu ke pal el mise ke el yiu 950 matwe.—Genesis 6:9; 9:29.
2 Ke pal se ma srumonyuk la mokul lalalfongi inge nu kemwa elos “fwafwasryesr” yurin God, Baibel el orekmakin sie kas in pupulyuk. Kalmen ma inge pa, Inuk a Noa elos moulkin moul ke sie inkanek su akkalemye lalalfongi fukoko nu sin God. Elos oru ma nu kemwa Jeova el sapkin nu selos in oru a akfwalye moul lalos ke ma elos etu ke inkanek lun God in liaung metu. (Srike liye 2 Kronikel 7:17.) Elos tia insese mukena ke ma God el fwak a oru a elos oru ma nu kemwa God el siyuk selos—tia kutu na ke ma el siyuk a ma nu kemwa el siyuk elos oru ke ku lalos oanu sie met sumwosmwos. Ke sie me pupulyuk, Noa, el oru ma nu kemwa God el sapkin nu sel in oru. (Genesis 6:22) Noa el tia oru orekma alukela liki ma el siyuk sel, a tia pa oru in patla orekma lal. Oanu sie met su arulanu insemwomwo ke futoto lal nu sin Jeova, su pulakin sukosok in pre nu sin God a arulanu aksaokye kolyuk mutal, el fwafwasyesr yurin God. Ya kom oru pa ou inge?
Sie Orekma Pal Nu Kemwa ke Inkanek lun Moul
3 Sie me insemwomwo in liye kutu met su mutamwauk in fwafwasyesr yurin God. Ke pal se ma elos oru orekma sumwos fwal nu ke ma lungse lun Jeova, elos akkalemye me akpayeye ke lalalfongi, fwin wangin ma inge, wangin kutena met su ku in akinsemwomwoye God. (Hibru 11:6) Fuka yokiyen insemwomwo lasr meyen ke kais sie yiu, ke sie average ke lusen yiu limekosr, pus liki 330,000 tausen met elos mwolela moul lalos nu sin Jeova a baptaisla! Tusruktu, arulanu yok sripe nu selos nu kemwa a kut nu kemwa in tafwela in fwafwasyesr yurin God.—Mattu 24:13; Fwakyuk 2:10.
4 In len lal Moses, enenu lalalfongi nu sin sou lun Israel nu kemwa in akfulatye Kofwen Alukela fwin an Ijipt a filiye sra fwin sru sisken mutunoaoa in loom selos. (Exodus 12:1-28) Tusruktu, lalalfongi lun met puspis wanginla ke pal se ma elos liye met solse lal Fero elos fwasr tukolos ke Mwea Srasra. (Exodus 14:9-12) Sam 106:12 el akkalemye la tukun elos som nu ke infulwen mwea ke sie an pao a liye fuka kof el sifwil foloko in uniye met solse lun Ijipt, elos sulpa “lalalfongi [Jeova] ke kas lal.” Tusruktu, tia pat toko, ke pal se ma elos muta ke yen mesis, met Israel elos mutamwauk in torkaskas ke kof in nimnim, me mongo, a akmwuk in kol. Peng koluk su tuku sin met kalngeyuk 10 lun met 12 su tuku ke Fwal Mwolela arulanu aksangenyelos. Ye ma upa inge nu kemwa, oanu Sam 106:24 el fwak, “elos tia lalalfongi kas lun God.” Elos lungse in folokla nu Ijipt. (Oekyuk 14:1-4) Kutena lalalfongi su oasr yurolos, ma inge sikyuk na ke pal se ma elos liye orekma sakuruk mutal. Elos tia tafwela in fwafwasyesr yurin God. Ke sripe se inge, met Israel ingo tia ilyuk nu ke Fwal Mwolela.—Sam 95:10, 11.
5 Baibel el kaifwe nu sesr: “Komwos in sifwanu srike komwos, komwos fwin muta in lalalfongi, akpayeye komwos sifwanu.” (2 Korint 13:5) Kalmen in muta na “in lalalfongi” pa fwasr tukun lalalfongi nu kemwa lun met Kristian. Ma inge arulanu yok sripe kut fwin lungse in kutangla ke fwafwasyesr lasr yurin God ke lusen moul lasr nu fon. Kut fwin lungse in fwafwasyesr yurin God, kut enenu in orekmakin ma mwo su tuku ke lalalfongi, in lalalfongi Jeova pal nu kemwa. (Soakas 3:5, 6) Oasr me sruf a luf puspis su ku in oru met nu kemwa su wangin lalalfongi in putatla a sremla ka. Mea kutu nu ke ma inge?
Fwasr Liki Me Sruf Su Tuku ke Lalalfongi Sifwanu
6 Met nu kemwa su lutlut Baibel, su mwolela moul lalos nu sin Jeova, a baptaisla, elos etu la Kas lun God el selngawi orekma lun kosro inmaslon met lolap a met payuk. (1 Tessalonik 4:1-3; Hibru 13:4) Elos inge nu kemwa insese la ma sap inge arulanu sumwos. Elos lungse in moul fwal nu ka. Tusruktu, orekma lun kosro el tafwela in orekma oanu me sruf fukoko lal Setan. Efu?
7 Ke mutamwauk, elos nu kemwa su sremla ke kain in orekma koluk inge saap elos tia nunku in oru ou inge. Saap ma inge arulanu paye pa nu sin met Israel su muta ke an tupaspas lun Moab. Nu sin mokul Israel su arulanu totola ke moul lalos ke yen mwesis, me solsol lun mutan Moab a mutan Media luman sie oiye kulang a lungse na in kamwuk selos. Tusruktu mea sikyuk ke pal se ma met Israel elos eis me solsol in asrouki nu sin met su kulansap nu sel Beal a tia nu sin Jeova, kain in met [kutupal met pengpeng] su fulela tulik mutan nutulos in orek kosro nu sin mokul su elos tia payuk nu sa? Ke pal se ma mokul Israel elos mutamwauk in liye kain asrouki se inge oanu luman mwo, na elos mutamwauk in oru orekma su elos nunku tari meet la koluk, a ma inge kol nu ke mise lalos.—Oekyuk 22:1; 25:1-15; 31:16; Fwakyuk 2:14.
8 Mea ma inge su ku in oru sie met in putatla ke kain in me sruf inge ke len lasr? Fwinne el etu ma koluk upa lun kosro, el fwin tia insese ke me sensen su tuku ke lalalfongi sifwanu, na saap el lela moul lal in putatla nu ke sie luma su me purakak in oru ma koluk a afwunye nunuk sumwos lal.—Soakas 7:6-9, 21, 22; 14:16.
9 Ke sie inkanek sumwos, Kas lun God el sang kas in sensen nu sesr tu kut in tia tafongla in nunuk la kut arulanu fukoko a asrouki koluk tia ku in akkulokye kut. Wikin ma inge pa, in liye television su akkalemye moul fokfok lun met koluk a in ridi a liye magasin su purakak kena in kosro. (1 Korint 10:11, 12; 15:33) Fwinne asrouki lasr nu sin met lili wiesr in lalalfongi ke sie pal sufwal ku in kol nu ke ma upa yok. Me purakak inmaslon mokul a mutan arulanu fukoko. Ke sripen nunuk yok, paenang u lun Jeova el sang kas in sensen lain asrouki nu sin mokul ku mutan su kut tia payuk nu sa ku tia sou lasr, a wilul muta ku som ke sie an su wangin met saye su liye kut. Tu in tafwela na in fwafwasyesr yurin God, kut enenu in fwasr liki me sruf su tuku ke lalalfongi sifwanu a kut enenu in loang nu ke kas in kai su el ase nu sesr.—Sam 85:8.
Nikmet Lela Sangeng Sin Met in Kutongkowi
10 Siepa me sensen akkalemyeyuk in Soakas 29:25, su fwak: “Sangeng sin met wise me sruf.” Pal nu kemwa, me sruf lun sie met sruokosro su el orekmakin pa, me kaisrip su liksreni na in sremla ke inkewe ku sie sruf su liksreni na in srukilye nien kosro. (Job 18:8-11) Sangeng sin met ku in ouyepa kutongye ku a sukosok lun sie met in sramsram a in oru orekma ke sie inkanek su akinsemwomwoye God. Kena lun sie met in akinsemwomwoye kutu met arulanu sumwos, a keke lun sie met in tia loang nu ke ma kutu met elos nunku tia oiyen Kristian pa inge. Tusruktu oiye fwal in ma nu kemwa eneneyuk. Fwin nunuk yok ke ma kutu met elos nunku purakak sie met in oru ma God el srunga ku el tia oru ma Kas lun God el sapkin nu sel lan oru, kain in met su ou inge el sremla tari.
11 Me loeyuk lain kain in me srifwe se inge, oakiyuki tia ke lalmetmet lun sie met, a ke “lalalfongi nu sin Jeova.” (Soakas 29:25b) Ke lalalfongi nu sin God, fwinne sie met su mwekin ku in ekla pulaik a oaru. Meyen me purakak koluk su tuku ke akmwuk koluk inge lal Setan srakna raunikutla, paenang kut enenu in kurunganang moul lasr pal nu kemwa lain me sruf su tuku ke sangeng sin met. Fwinne oasr sie record mwomwo lal met palu Elaija ke orekma pulaik, tusruktu ke pal se ma Jesebel el srike in unilye, el sangeng a kaeng (1 Togusra 19:2-18) Ye me srifwe upa, met sap Piter el lafwekin Jisus Kraist ke sripen sangeng, a tukun yiu ekasr sangeng lal nu sin met moklel in oru orekma tia fwal nu ke lalalfongi. (Mark 14:66-71; Galetia 2:11, 12) Tusruktu Piter a Elaija elos kemwanu eis kasru ke ma lun ngun, wikin lalalfongi nu sin Jeova, a elos tafwela in kulansap nu sel ke inkanek su akinsemwomwoyel.
12 Pus ke met kulansap lun Jeova ke len inge elos ouyepa lotela in kutangla liki me sruf su tuku ke sangneg sin met. Sie mutan fwusr Met Lo fwin an Guyana el akilen ou inge: “In loom lutlut, meun in lain me purakak koluk su tuku sin kutu met fwusr arulanu fukoko.” Tusruktu el tafwela: “Oupanu lalalfongi luk nu sin Jeova, arulanu fukoko pa.” Ke pal se ma met luti lal el akkolukyel ye mutun tulik lutlut wiel nu fon ke sripen lalalfongi lal, el pre nu sin Jeova ke misla. Tok ke pal se ma el mukena a met luti lal muta a wangin kutu met el sang ma lo nu sin met luti lal ke inkanek kulang. Ke lusen pal in muteta ke mura lal fwin an Benin, sie mokul fwusr su lutlut ke ma Jeova el siyuk sel in oru el srike in kunausla sie me srulela su papa tumal el srulela tu in ma lal. Mokul fwusr inge el etu la wangin moul lun me srulela inge, a el tia sangeng ka, tusruktu el etu la met ke mura lal fwa ku in koskosrok a elos ku in srike in unilye. El pre nu sin Jeova, a ke fong se el wisla me srulela nu ke insak a sisla ma inge. (Srike liye Met Nununku 6:27-31) Ke pal se ma sie mutan fwin an Dominican Republic el mutamwauk in kulansap nu sin Jeova, mokul tumal el aksangengyel a fwak la el sisilla. Ya sangeng sin met ku in moklel in sisla lalalfongi lal? El fwak: “Fwin Nga orek kosro, Nga arulanu mwekin, tusruktu Nga tia mwekin in kulansap nu sin Jeova God!” El tafwela in fwafwasyesr yurin God, tia pat toko mokul tumal el welul in oru ma lungse lun Jeova. Lalalfongi fukoko lasr nu sin Papa tumasr in kosrao, ku in kasru kut pa in tia lela sangeng sin met in kutongkuti in oru ma kut etu su akinsemwomwoye Jeova.
Taran in Tia Pilesru Kai
13 Fwinne kutu nu ke me sruf su met sruokosro el orekmakin orekla in srukye kosro elos fwin sasla nu ke an se, tusruktu kutu nu ke me sruf, orekla in oanu pa su arulanu mwo. Nu sin met puspis, me kasrup oanu ou inge. (Mattu 13:22) In 1 Timote 6:8, 9, Baibel el kaifwe nu sesr in srukye inse misla fwin oasr yurosr me mongo a nuknuk. Tukun ma inge el sang kas in sensen: “A elos su lungse tu elos in kasrup, elos putatyung nu in me sruf a me kaisrip a lung in ikwe puspis su lalfon a me fosrnga, su akmwalomye met in kunausten a nien tula.”
14 Fwinne oasr tari kain in kas in sensen inge, met puspis elos srakna sremla ke me sruf inge meyen elos tia orekmakin kai se inge ke moul lalos. Efu? Saap insefulat pa moklelos in liksreni in srukye sie kain moul su lungse ma puspis sayen “mongo a nuknuk” su Baibel el kaifwe kut in inse misla nu ka? Ya elos tianu arle nunku yok ke kas in sensen lun Baibel meyen elos nunku la me kasrup na paye oasr yurin met su arulanu kasrup? Baibel el akkalemye la met su lungse tu elos in kasrup siena liki met su inse misla ke mongo a nuknuk. (Srike liye Hibru 13:5.) Ke ma inge, “kena lun muta”—kena in eis ma puspis su elos liye, fwinne ma inge ku in akmunasyelos in ngun—ya ma inge moklelos in filiye ma enenu nu kemwa ke alu paye in akluo ke moul lalos? (1 Jon 2:15-17; Haggeai 1:2-8) Fuka sie me insemwomwo na paye oasr yurolos nu kemwa su filiye ke insielos kai lun Baibel a fwafwasyesr yurin God ke pal se ma elos filiye orekma lalos nu sin Jeova in ma yok emeet ke moul lalos!
Kutangla Liki Me Fosrnga lun Moul
15 Sie oiye su pengpeng liki oiyen lungse in kasrup pa, fosrnga yok in eis ma enenu yok ke moul. Pukanten sin met kulansap lun Jeova elos moul wikin ma enenu srisrik su oasr yurolos. Elos oru orekma ke lusen aur puspis tu elos in ku in eis nuknuk su elos arle enenu, sie an in mutol lun sou lalos ke eku, a me mongo fwal ke len se. Kutu selos mongfwusesr in keok ke ma upa puspis ke sripen mas ku matuo, fwin tia elos saap sou lalos. Ke sripen ma sikyuk inge nu kemwa, arulanu fwusesr in kunausla pwar lun sie met ke ma lun ngun!—Mattu 13:22.
16 Ke sripen lungse, Jeova el fwakak nu sesr me insemwomwo nu kemwa su e fwa tuku ye koko lun Togusrai lun Messaia. (Sam 72:1-4, 16; Isaia 25:7, 8) El ouyepa kasru kut in kutangla liki ma upa puspis misinge ke pal se ma el ase nu sesr kai fuka kut ku in suk meet ma enenu yok emeet. (Mattu 4:4; 6:25-34) Ke inkanek lun ma simusla puspis su aketeye fuka el kasru met kulansap lal in pal meeta, Jeova el akkeye kut. (Jeremaia 37:21; Jemes 5:11) El akkeye kut meyen kut etu la, fwinne oasr kutena ma upa su sun kut, lungse lal nu sin met kulansap lal tia ekla a el onnu. (Rom 8:35-39) Nu selos nu kemwa su filiye lalalfongi lalos nu sin Jeova, el fwak nu selos: “Nga tiunu filikomla, a Nga tiunu som liki kom.”—Hibru 13:5.
17 Ke sripen elos akkeyeyuk ke etauk se inge, paenang met Kristian paye elos tafwela in fwafwasyesr yurin God a elos tia forla nu ke inkanek lun fwalu. Sie oiye pengpeng inmaslon met sikasrup in an puspis pa, in eis mani ku kutena ma nu sin met kasrup tu elos in kite sou lalos, ma inge tia pusrapasr se. Tusruktu elos nu kemwa su fwafwasyesr in lalalfongi elos fwasr liki kain in nunuk inge. Elos arulanu aksaokye insemwomwo lun God yok liki kutena ma a elos ngetuk nu sel ke me sang ke sripen oaru lalos. (Soakas 30:8, 9; 1 Korint 10:13; Hibru 13:18) Sie mutan katinmas fwin an India el konaok la engun in oru orekma wikin etu in akfwalye moul lalos arulanu kasrel in kutangla. El tia asor ke ma sikyuk nu sel, a el etu la el fwin suk meet ke moul lal Togusrai lun God a ma sumwosmwos lal, Jeova el akinsemwomwoye kaifweung lal in eis ma enenu lal a ma enenu lun mwen nutul. (Mattu 6:33, 34) Tausen puspis sin met fwin fwalu nu fon elos akkalemye kain in oiye se inge, ye kain in ma upa puspis elos sun, Jeova pa nien molela a nien mwukla lalos. (Sam 91:2) Ya ma inge paye nu sum?
18 Oasr me sruf puspis su kut enenu in fwasr liki meyen kut srakna moul ke akmwuk koluk se inge. (Jon 5:19) Baibel el akkalemye nu sesr mea me sruf inge a el kasru kut fuka kut ku in fwasr liki ma inge. Elos nu kemwa su lungse na paye Jeova a srunga na paye in akasoryel elos ku in kutangla liki me sruf inge nu kemwa. Elos fwin tafwela in “fwafwasyesr ke ngun,” na elos fwa tia sremla ke inkanek lun fwalu. (Galetia 5:16-25) Nu selos nu kemwa su musaiyuk moul lalos tu in futoto nu sin Jeova, oasr pal mwo lalos in fwafwasyesr yurin God, a engunkin futoto lalos nu sel ma patpat.—Sam 25:14.
Mea Topuk Lom?
◻ Fuka orekma lun sie met in lalalfongi sifwanu sie me sruf?
◻ Mea ma inge su kurungin kut lain me sruf su tuku ke sangeng sin met?
◻ Mea ma inge su oru kut in pilesru kai ke orekma in sukok me kasrup?
◻ Mea ma inge su oru kut in fwasr liki a tia sremla ke me fosrnga lun moul?
[Study Questions]
1. (a) Ye kain in luma fuka, a ke lusen yiu ekasr Inuk el fwafwasyesr yurin God? (b) Noa el fwafwasryesr yurin God ke lusen yia ekasr, a kain in kunokon yok fuka oasr yurol?
2. Mea kalmen ‘fwafwasryesr yurin God’?
3. Mea ma inge su arulanu yok sripe nu sin met nu kemwa su mwolela tari a met kulansap baptais lun God?
4. Fwinne elos akkalemye kutu lalalfongi, efu met Israel puspis su som liki Ijipt elos tia ilyuk nu ke Fwal Mwolela?
5. Fuka 2 Korint 13:5 a Soakas 3:5, 6 ku in orekmakinyuk nu ke fwafwasryesr lun sie met yurin God?
6. Mea met Kristian nu kemwa elos etu ke orekma lun kosro inmaslon met lolap a orekma lun kosro inmaslon met payuk, a mea elos pulakin ke ma koluk inge?
7. Ke an Tupaspas lun an Moab, fuka mokul Israel elos sremla nu ke sie orekma su elos etu tari la koluk?
8. Mea ma inge su ku in kol met Kristian nu ke orekma lun kosro ke len lasr?
9. Kain kas in sensen fuka su tuku ke Ma Simusla ku in kurungin kut liki orekma lun kosro?
10. Fuka “sangeng sin met” wise me sruf?
11. (a) Mea me loeyuk lain sangeng sin met su ku in oru sie met in sremla nu ka? (b) Fuka Jeova el kasru met kulansap lal su kaifweung in kutangla liki sangeng sin met?
12. Mea me srikasrak ke len lasr su akkalemye fuka met puspis elos eis kasru tu in tia lela sangeng sin met in moklelos in tia akinsemwomwoye God?
13. Ke kain in me sruf fuka 1 Timote 6:9 el kai kut in taran?
14. (a) Mea ma inge su saap ku in oru sie met in tia loang nu ke kai ke inse misla fwinne oasr tari nuknuk a mongo? (b) Fuka nunuk sito ke kalmen me kasrup ku in orala sie met in pilesru kas in sensen su oasr in 1 Timothy 6:9? (c) Ke inkanek fuka “kena lun muta” ku in oru sie met in tia liye me sruf su sanoltal?
15. Kain in ma sikyuk fuka su kut etu la srupon me fosr yok nu sin met kulansap puspis lun Jeova, a ke kain in me sruf fuka kut enenu in taran kut fwin muta ye ma upa inge?
16. Fuka Jeova el kasru kut in kutangla liki ma upa lun moul?
17. Sang me srikasrak, fuka kutu met su sun ma upa yok elos tafwela in fwafwasyesr yurin God.
18. Mea key ke orekma in fwasr liki me sruf ke fwalu lal Setan?
[Picture on page 12, 13]
Met puspis elos fwafwasyesr yurin God ke lusen moul lalos nu fon