Jeova—Sie God Su Akkalemye Ma Lukma
“A oasr sie God in kosrao su fwakak ma lukma.”—DANIEL 2:28.
JEOVA, el su fulatlanu a God lungkulng in kosrao a fwalu, el mukena Orala Ma Nu Kemwa, el sie God lalmetmet a nununku sumwos. El tia enenu in okanla kutena ma kel, orekma lal, ku akmwuk lal. Ke pal pakiyuki lal a ke pal su el sulela, el akkalemyel sifwanu. Ke ma inge el siena liki Met Lokwalok lal, Setan su Devil, su srike pal nu kemwa in okanla ma puspis kel a akmwuk lal.
2 Meyen Jeova a Setan elos tia oanu sie, paenang elos nu kemwa su alu nu selos elos oupanu tia oanu sie. Elos nu kemwa su fwasr tukun Setan elos ku in akilen ke kutusrik a kikiap. Elos kaifweung in akkalemyelos sifwanu in kalem, tusruktu in pal se na orekma lalos tuku ke losr. Met Kristian fwin an Korint akismakinyelos in tia lut ke ma se inge: “Tu met su ou inge elos met sap kikiap, met orekma kutusrik, elos sifwanu orelos met sap lun Kraist. A wangin me lut, tu Setan el sifwanu orel sie lipufon lun kalem.” (2 Korint 11:13, 14) Met Kristian nu kemwa, elos tia ou inge, a elos ngetuk nu sel Kraist oanu met kol lalos. Ke pal se ma el muta fwin fwalu el akkalemye me srikasrak sumwosmwos lun Papa tumal, Jeova God. (Hibru 1:1-3) Ke ma inge, ke pal se ma elos fwasr tukun Kraist, met Kristian nu kemwa elos etawi Jeova, God lun ma paye, sukosok a kalem. Elos tia enenu pa in okanla moul lalos, orekma lalos, ku nien sun lalos.—Efesus 4:17-19; 5:1, 2.
3 Ke pal se ma el etu sie pal fwal a mwo, Jeova el akkalemye ke takla akmwuk lal a ma sikyuk ke pal fwasru su tia eteyuk meet sin metu. Ke sripe se inge el sie God su akkalemye ma lukma. Ke ma inge, met nu kemwa su lungse in kulansap nu sel elos eis me solsol—aok mokleyuk—in lutlut ke me lutlut inge su akkalemyeyuk. Ke sie survey ke 1994, pus liki 145,000 Met Lo ke sie an fwin an Europe elos akkalemye la, ke sie average, kais sie selos elos tuni luti lun Met Lo lun Jeova ke lusen yiu tulo meet liki elos sulela in wi ke u lun Met Lo lun Jeova. Elos oru sulela lalos fwal nu ke lungse lalos sifwanu a wangin kutena met su sapkin nu selos in oru ou inge. A elos tafwela in sukosok in akkalemye ma lungse lalos a orekma. Ke sie me pupulyuk, meyen kutu selos tia insese ke oiye fulat lun met Kristian, paenang kutu selos sulela in tui oanu Met Lo. Tusruktu sie ma sakuruk, meyen ke lusen yiu limekosr somla, u lulap lun met inge su wi Met Lo in pal meeta elos sulela in sifwil asrouki a oru orekma lun Met Lo.
4 Paye, tia Met Lo nu kemwa su srola liki in pal meeta elos foloko, a kutu selos oasr kunokon yok ke congregation lun met Kristian in pal meeta. Ma inge tia me lut, meyen fwinne sie sin met tumal lutlut su futoto nu sel Jisus, met sap Judas, el forla liki. (Mattu 26:14-16, 20-25) Ya pa inge sie sripe tu kut in alollo ke moul Kristian? Ya ma inge oru in wangin sripe kakapek su Met Lo lun Jeova ke akmwuk in luti? Mo na mo, fwin orekma koluk lal Judas Iscariot el tia kosroela akmwuk lun God na oupanu ou inge.
Ku Liki Ku Tusruktu El Lungse
5 Jeova God el lung. El nunku met. (1 Jon 4:7-11) Fwinne el arulanu fulat, el insemwomwo in orek kamwuk nu sin met. Ke sie sin met kulansap lal in pal meeta, kut ku in rid: “ ‘Ebream el lalalfongi Jeova, a lanuk nu sel tari oanu sumwosmwos,’ a pangpang el met kamwuk lun God.’ ” (Jemes 2:23; 2 Kronikel 20:7; Isaia 41:8) Oanu met kamwuk luo na paye su epeis ma lukma, Jeova el oru pa ou inge nu sin kamwuk lal. Ke sripe se inge Jisus el etawi Papa tumal, meyen el orek kamwuk pa nu sin met tumal lutlut lal a el epeis nu selos ma lukma. “Nga tia sifwil pangon komwos met kulansap,” el fwak nu selos, “tu sie met kulansap el tia etu ma met kato lal el oru. A Nga pangon komwos met kamwuk, tu ma nu kemwa ma Nga long sin Papa tumuk Nga fwakak tari nu sumwos.” (Jon 15:15) Ma “lukma” se inge su oasr yurin Jeova, Mwen Nutul, a met kamwuk lalos oru elos in ma siefwunnu ke me kapur lun lungse a orekma mwo su tia ku in otelik.—Kolosse 3:14.
6 Kalmen e se inge Jeova pa, “El Oru Tu In Akpayeye,” akkalemye ku lal in oru kutena ma el enenu tu lan ku in akpayeye ma el akmwuki. Tia oanu met, Jeova el tia enenu in okanla kutena ma el akola in oru ke sripen sangeng sin kutu in kutongyel. El tia ku in tia oru ma el akmwuki, ke sripe se inge el akkalemye ma inge ke Kas lal, Baibel, ma puspis ke ma el akola in oru. El mwolela: “Kas luk . . . a fwa tia foloko nu yurok a wangin sripe, a a fwa oru ma Nga lungse, a a kapkapek in ma Nga supwela nu ka.”—Isaia 55:11.
7 Tia pat tukun orekma koluk in Iden, Jeova el akkalemye ke inkanek takla saflaiyen srunga inmaslon el a met lokwalok lal, Setan. Fute se ma God el mwolela e fwa pulakin ngal na upa, a kunausyukla kapinniel, fono Setan, sifwil e fwa kunausyukla. (Genesis 3:15) In yiu 33 C.E., Devil el kunausla na paye kapinnien Fute se inge, Jisus Kraist, ke pal se ma el unilye. Ke ma inge Setan el akpayeye Ma Simusla a ma inge me akpayeye la Jeova el sie God lun ma paye, fwinne tia pa inge ma Setan el lungse na paye in oru. Srunga lal ke ma paye a ma sumwosmwos, wekunang insefulat lal, a oiye su srunga in auliyuk, kolol in oru ma God el palye meet. Aok nu sin met lokwalok nu kemwa lun ma paye, fwinne nu sel Setan, akmwuk se inge arulanu paye: “Tu wangin ku lasr in lain ma paye, a ke ma paye mukena.”—2 Korint 13:8.
8 Meyen Togusrai lun God su tia liyeyuk oakiyuki tari in kosrao ke 1914, paenang Fwakyuk 12:12 arulanu fwal: “Ke ma inge komwos in engunak, O kosrao, a komwos su muta lu! We nu sin fwalu a mwea, tu Devil el oatuwot nu yuromwos, a el mulat ma lulap, tu el etu tu pal lal futoto.” Aok, ya etu inge ke pal futoto lal mokle Setan in ekulla inkanek lal? Fwin el oru ou inge, el akkalemye la Jeova el God lun ma paye a oanu God su Ku Liki Ku, el mukena fwal in eis alu. Tusruktu, Devil el tia engun in eis kuf lal fwinne el etu tari ma inge.
9 Jeova el akkalemye mea e fwa sikyuk ke pal se ma Jisus el tuku in oru nununku lal ke fwalu se inge lal Setan. (Mattu 24:29-31; 25:31-46) Ke ma inge, Kas lal el sramsram ke ma met kol lun fwalu elos oru: “Ke elos fwak misla a nikmet sangeng, na kunausten e fwa sa tuku nu fwelos, oanu mwaiok nu sin sie mutan putete.” (1 Tessalonika 5:3) Elos nu kemwa su fwasr tukun kolyuk lal Setan elos pilesru kas in sensen inge. Elos inge oanu met kun ke sripen inse koluk lalos, a ma inge moklelos in tia auliyuk ke ma koluk lalos a in tia ekulla plan lalos su srike in kunausla plan lun Jeova.
10 Yokna ke 1996, ke pal se ma Yiu lun Misla Fwin Fwalu Nu Fon oakiyuki sin United Nations, fwalu misinge arulanu eteyuk ke sramsram puspis ke misla a nikmet sangeng. Orekma yok orekla tu in oakiye misla fwin fwalu, tusruktu arulanu srik kutangla lalos. Ya pa inge akpayeyen kas palu se inge, ku kut enenu in sano ke sie me fwakak ke inkanek saye? Jeova el akkalemye ma inge ke pal pakiyuki lal. Ke pal inge, lela kut in tia mutol in ngun, “sano a tawi ke tuku lun len lun Jeova.” (2 Piter 3:12) Ke kut liye la pal arulanu pisrpisr a srakna pukanten sramsram ke misla a nikmet sangeng, kutu sin met su etu kas in sensen se inge, su sulela in pilesru ma inge, saap elos akyokye kas in lain lalos a fwak la Jeova el tia ku, el tia ku in oru, in akpayeye kas lal. (Srike liye Ekklisiastis 8:11-13; 2 Piter 3:3, 4.) Tusruktu met Kristian paye elos etu la Jeova el akpayeye ma el akmwuki!
Akfulat Fwal ke U Su Jeova El Orekmakin
11 Ke pal se ma Togusra Nebukadnezzar, met kol lun An Neo-Babylon, el memei sie meme su akfosryel su el tia ku in esam, el siyuk ke kasru. Met tol lal, met megai, a met inutnut elos tia ku in fwakak nu sel mea el meme a kalmen meme lal. Tusruktu, met kulansap lun God pangpang Daniel el ku in oru ou inge, fwinne el sifwanu fwak la in akkalemye meme a kalmen meme se inge tia tuku ke lalmetmet lal sifwanu. Daniel el fwak: “A oasr sie God in kosrao su Fwakak ma lukma, a el fwakak nu sel Togusra Nebukadnezzar ma e fwa sikyuk in len toka,” (Daniel 2:1-30) Century puspis somla meet liki pal inge, Joseph, siepa met palu lun God, el ouyepa akilen la Jeova el sie Met su Fwakak ma lukma.—Genesis 40:8-22; Emos 3:7, 8.
12 Met palu yok emeet lun Jeova su kulansap fwin fwalu pa Jisus. (Orekma 3:19-24) Poul el aketeye: “God su kaskas meet nu sin papa tumasr yurin met palu in tafwu puspis, tia oanu sie, a in oiye puspis, tia oanu sie, in saflaiyen len inge el kaskas nu sesr ke Mwen nutul, su el filiye met usru lun ma nu kemwa, ke su el ouyepa orala fwalu.”—Hibru 1:1, 2.
13 Jeova el sramsram nu sin met Kristian in pal meeta ke inkanek lun Mwen nutul, Jisus, su akkalemye nu selos ma lukma mutal. Jisus el fwak nu selos: “Etukot nu sumwos in etu ma lukma lun togusrai lun God.” (Luk 8:10) Tok Poul el sramsram ke met akmusrala oanu “met tutafpo ke ma lukma lun God.” (1 Korint 4:1) Ke len inge, met Kristian akmusrala elos tafwela in kulansap ou inge, sie u lun met kulansap oaru a lalmetmet su ke inkanek lun Governing Body lal elos kitakut me mongo in ngun ke pal fwal. (Mattu 24:45-47) Kut fwin akfulatye na paye met palu lun God in pal meeta, a yokna Mwen nutul, ya tia fwal pa nu sesr in akfulatye u se inge su Jeova el orekmakin ke len lasr in akkalemye me lutlut ke Baibel su yok sripe nu sin met lal su moul ke pal in ma upa se inge?—2 Timote 3:1-5, 13.
Kalem ku Lukma?
14 Ya oiye se inge lun Jeova in akkalemye ma puspis ku in kalmekin la met Kristian nu kemwa enenu in akkalemye ma elos etu pal nu kemwa ke kutena luma a oiye? Met Kristian nu kemwa elos akos kas in kai lal Jisus nu sin met sap lal, “komwos fwa lalmetmet oanu serpent, a kulang oanu mwulioa.” (Mattu 10:16) Fwin sapkinyuk nu selos in tia alu nu sin God fwinne ellalos moklelos in oru ou inge, na met Kristian elos “akos God,” meyen elos akilen la wangin kutena u lun metu su ku in kutongye alu nu sin Jeova. (Orekma 5:29) Jisus el sifwanu akkalemye sumwos lun oiye se inge. Kut ku in rid: “A tukun ma inge Jisus el fwafwasryesr in Galili, tu el tia lungsel in fwafwasyesr in Judia, meyen met Ju elos suk in unilye. Inge sie kofwo lun met Ju, kofwen imwen aktuktuk, apkurun me. Ke ma inge Jisus el fwak nu selos [ma wiel in ikwe su tia lalalfongi]:. . . ‘Komwos fwasyuk nu ke kofwo; Nga tia fwasyuk inge nu ke kofwo si inge, meyen pal luk sumwena akpayeyuk.’ A ke el fwak tari ma inge nu selos, el srakna muta Galili. A ke met elos fwasyuk nu ke kofwo, na el fwasyuk pa, tia lemtalaiuk, a oanu in lukma.”—Jon 7:1, 2, 6, 8-10.
Ya Kut Enenu in Fwak ku Tia?
15 Ke kutu luma, in srukye sie ma lukma tia sie inkanek lalmetmet mukena a ouyepa inganek in lungse. Ke sie me pupulyuk, mea Josef el oru, papa se inge su nutela Jisus, ke pal se ma el konaok la mutan se su el akola in payuk nu sa, Mary, el putete? Kut ku in rid: “A Josef mokul tumal, su sie met sumwosmwos, el tia lungsel mulunglungalak, a el nunku mu el likilye mwukunla.” (Mattu 1:18, 19) Fuka sie oiye koluk na paye in akmwekinyel ye mutun metu!
16 Sie me sramsram lukma su ku in kol nu ke mwekin ku ngal lun sie met tia enenu in sromunyuk nu sin met su tia fwal in eis ka. Met elder Kristian elos enenu in srukye ma inge ke nunuk lalos ke pal se ma elos sang kas in akkeye ku me pwarak nu sin met lili wielos ku ke pal se ma elos sang kai upa ke sripen orekma koluk lain Jeova. In orekma ke ma se inge fwal nu ke Ma Simusla arulanu yok sripe; in akkalemye me sramsram lukma nu selos su tia fwal in etu ma inge, ma inge wangin sripe a wangin lungse. Arulanu kalem la, met nu kemwa in congregation lun met Kristian elos enenu in tia suk me sramsram lukma nu sin met elder, a elos akfulatye kunokon lun met elder in tia sromon ma lukma. Soakas 25:9 el fwak: “Asekeli ma lom yurin met tulan lom, a tia fwakak ma lukma lun siena.”
17 Akmwuk se inge in tia sromon ma lukma arulanu paye pa inmaslon met kamwuk futoto. In tia sromon ma lukma arulanu yok sripe tu in fwasr liki me fos a me akmunas ke futoto lun kais sie met. “Eng yepang me wise afu; ou inge sie loa sipangkas wise muta srasrol.” (Soakas 25:23) Paye, oaru nu sin Jeova a ke akmwuk sumwosmwos lal, ouyepa lungse nu sin sie met su oru ma tafongla, saap ku in siyuk ke enenu in sromon ma lukma se inge nu sin papa a nine, met Kristian elder, ku kutu met su fwal in etu ma lukma se inge.a Tusruktu in oiye puspis, met Kristian elos tia sromon ma lukma lun kutu met, elos kurungin ma inge oanu ma lukma lalos sifwanu.
18 Ke kas futoto, sie met Kristian el etawi Jeova ke el tia sromon ma lukma fwin eneneyuk, a akkalemye ma inge mukena fwin fwal. Ke pal se ma el etu mea el enenu in sromon a mea ma el tia, na el muta ye koko lun inse pusisel, lalalfongi a lungse. Inse pusisel kutongyel in akkalemyel sifwanu oanu met yok se, su srike in eis kaksak nu sin kutu ke el sromon ma nu kemwa el etu ku ke el purakak insielos ke ma lukma puspis su el tia ku in sromon. Lalalfongi ke Kas lun Jeova a ke congregation lun met Kristian moklel in luti ke me sramsram mutal in Baibel a in pal sena el taran in tia fwak kutena ma su ku in akkoskosrokye kutu met ke saflaiye. Aok, lungse el moklel in akkalemye ma puspis su sang mwolanu nu sin God a ke ma puspis su metu elos enenu in etu tu elos in eis moul ma patpat. Me sramsram lukma, el arulanu taran ka, meyen el akilen la pal nu kemwa fwin sromunyuk ma inge el akkalemye la wangin lungse lal.
19 Oiye fwal inge sie me kasru in akilenyuk met Kristian paye. Elos tia okanla God ke sie ma lukma su wangin e, ke sie luti su tia ku in aketeye pangpang Trinity. God puspis su tia eteyuk elos akilenyuk ke alu kikiap, tia ke alu paye. (Srike liye Orekma 17:22, 23.) Met Lo akmusrala lun Jeova elos engunkin me sang nu selos in ekla “met tutafpo ke ma lukma lun God.” Ke pal se me elos akkalemye ma lukma inge nu sin kutu met, elos kasru met inse fwokpap in suk Jeova a in kamwuk nu sel.—1 Korint 4:1; 14:22-25; Zekaraia 8:23; Malakai 3:18.
[Footnote]
a Srike liye “Lela Kom In Tia Wi Ke Ma Koluk Kutu Met” ke Tauer In San, November 15, 1985.
Fuka Kom Topuk?
◻ Efu Jeova el tia enenu in okanla plan lal?
◻ Nu sin su Jeova el akkalemye ma lukma lal
◻ Kunokon fuka oasr yurin met Kristian fwin ke ma lukma?
◻ Kain in oiye mwo tulo fuka ku in kasru met Kristian ke ma elos enenu in sromon a tia?
[Study Questions]
1, 2. (a) Fuka Jeova el siena liki met Lokwalok lulap lal? (b) Fuka metu elos akkalemye ma tia oanu sie inge inmaslolos?
3. Fuka kut ku in lain kas kikiap su akkalemye la met puspis su ekla Met Lo lun Jeova elos mokleyuk ke ku in wi ke sie “u in lukma”?
4. Mea ma inge su tia enenu in sang alollo nu sin met Kristian oaru, a efu?
5. Efu kut etu la Jeova a Jisus elos lungse metu, a fuka elos akkalemye lungse se inge?
6. Efu Jeova el tia enenu in okanla plan lal?
7. (a) Mea Jeova el palye in Iden, a fuka Setan el akkalemye la God el paye? (b) Fuka akmwuk su oasr in 2 Korint 13:8 pal nu kemwa paye?
8, 9. (a) Mea Setan el etu, tusruktu ya etu lal inge sang me sensen ke akmwuk lun Jeova tu lan tia akpayeye ma inge? (b) Kain in kas in sensen fuka met lokwalok lun Jeova elos pilesru a efu?
10. (a) Mea lupan akpayeye lun ma simusla in 1 Tessalonika 5:3, tusruktu mea pulakin lun met lun Jeova? (b) Efu ku met puspis su wangin lalalfongi saap e yokyokelik orekma in lain lalos nu sin met lun God?
11. Mea Daniel a Josef elos lotela kel Jehovah?
12, 13. (a) Su met palu yok emeet lun God, a efu pa inge topuk lom? (b) Su misinge oru orekma oanu “met tutafpo ke misla lun God,” a fuka kut nunkelos?
14. Nge met Kristian elos oru orekma lalos in lukma, ke ma inge elos etawi me srikasrak lun su?
15. Fuka Josef el akkalemye la in srukye ma lukma kutupal pa inge sie inkanek lun lungse?
16. Mea kunokon lun met elder, a kutupa met in congregation, fwin ke ma lukma?
17. Efu met Kristian ke oiye puspis elos tia sromon ma lukma, tusruktu efu elos tia ku in oru ou inge pal nu kemwa?
18. Kain in oiye tulo fuka lun met Kristian ku in kasru kut in akilen mea ma kut enenu in fwak a mea ma kut tia?
19. Kain in orekma fuka ku in kasru kut in akilen met Kristian paye, a mea fwokin ma inge?
[Pictures on page 22, 23]
Jeova el akkalemye ma lukma ke inkanek lun Kas Lal