In Moulkin Moul Fwal Nu Ke Ma Sap Lal Kraist
“Komwos in wis me toasr lun sie sin sie, a ou inge komwos fwa akpayeye ma sap lun Kraist.”—GALETIA 6:2.
FWIN an Rwanda, Met Lo lun Jeova ke sruf lun Hutu a Tutsi elos kurunganang sie sin sie liki akmas na upa su sikyuk fwin an we. Met Lo lun Jeova fwin an Kobe, Japan, su tula sou lalos ke kusrusr na upa arulanu asor ke mise lalos. Tusruktu, elos inge mokleyuk in kasru kutu met su sun pa ongoiye. Aok, me srikasrak mwo inge su ku in liyeyuk fwin fwalu nu fon akkalemye la ma sap lal Kraist el orekma misinge. Sie me purakak yok nu ke ma mwo.
2 In akpayeye, sie kas in palu ke Baibel ke len in ongoiye ke “len safla” se inge. Met puspis elos akkalemye “luman sumwosmwos, a ‘lafwekin ku lun sumwosmwos insielos.’ (2 Timote 3:1, 5) Yokna ke alu lun Kristendom, pal nu kemwa alu lalos oru oanu me na luma, a tia tuku ke insielos. Ya ma inge sikyuk meyen arulanu upa in moulkin moul fwal nu ke ma sap lal Kraist? Mo. Jisus el tia wise nu sesr sie ma sap su kut tia ku in oru. Sripe pa, Kristendom elos tianu akilen ma sap su el lungse in akkalemye. El tia loang nu ke kas inge su tuku sin God: “Komwos in wis me toasr lun sie sin sie, a ou inge komwos fwa akpayeye ma sap lun Kraist.” (Galetia 6:2) Kut “akpayeye ma sap lun Kraist” kut fwin wis me toasr lun sie sin sie, tia etawi met Farisi a tia toeni me toasr nu sin met lili wiesr.
3 Wikin ma sap lal Kraist pa ma nu kemwa su Jisus Kraist el sapkin nu sesr in oru—orekma lun forfor a luti, kurunganang mutasr in nasnas a fwal, kaifweung in oasr misla lasr nu sin met atalani, ku in sisila liki congregation kutena ma fokfok. (Mattu 5:27-30; 18:15-17; 28:19, 20; Fwakyuk 2:14-16) Paye, oasr kunokon lun met Kristian nu kemwa in akos ma sap nu kemwa in Baibel su sapkinyuk nu sin met tumal lutlut lal Kraist. A oasr ma pukanten ka. U lun Jeova, wekunang kais sie congregation, enenu in oakiye akmwuk a inkanek in oru ma se tu in kurunganang misla a ma nu kemwa in fwal a takla. (1 Korint 14:33, 40) Efu ma inge eneneyuk? Meyen fwin wangin akmwuk lun met Kristian ke an in orek, ma nge, su a fuka, elos tia ku in tukeni nu sie in orala meeting lalos! (Hibru 10:24, 25) In akesrui nu ke akmwuk sumwos su met liaung lun u elos oru ma inge sie inkanek pa in akpayeye ma sap lal Kraist.—Hibru 13:17.
4 Ou inge, met Kristian paye elos tia lela inkanek in alu lalos in oanu sie alu su nenela ke ma sap puspis su wangin sripe a fos. Elos tia kulansap nu sin Jeova meyen kutu met ku u sapkinyuk nu selos in oru ou inge. A, me purakak ke alu lalos pa lungse. Poul el fwak: “Tu lungse lun Kraist kaifwe.” (2 Korint 5:14, footnote) Jisus el sapkin nu sin met tumal lutlut lal in lungse sie sin sie. (Jon 15:12, 13) Lungse su wangin kutusrik ka pa inge foundeson ke ma sap lal Kraist, a ma inge purakak a kaifwe met Kristian paye in an nu kemwa, ke sou a in congregation. Lela kut in liye fuka.
Ke Sou
5 Met sap Poul el simusla: “Mokul tuma, komwos in lungse mutan kiomwos, oanu Kraist el ouyepa lungse surs, a sifwanu esalang ka.” (Efesus 5:25) Ke pal se ma sie mokul tuma el etawi Kraist a akkalemye lungse a nunku mutan kiel, el akpayeye sie ip yok ke ma sap lal Kraist. Sayen ma inge, Jisus el akkalemye futoto lal nu sin tulik srisrik, el sruklalosyuk in paul, el filiye paul nu fwelos, a akinsemwomwoyelos. (Mark 10:16) Papa a nine su akpayeye ma sap lal Kraist elos ouyepa akkalemye futoto nu sin tulik nutulos. Paye oasr papa a nine su upa nu selos in etawi me srikasrak lal Jisus ke oiye se inge. Kutu selos tianu akkalemye ma inge. Papa a nine nik mwet lela nunuk lomwos ke ma saye in kutongye komwos in tia akkalemye lungse su komwos pulakin nu sin tulik nutumwos! Tia fwal nu sum mukena in etu la kom lungse tulik nutum. Elos enenu pa in etu ma inge. A elos tia ku in etu ma inge kom fwin tia suk inkanek in akkalemye nu selos lungse lom.—Srike liye Mark 1:11.
6 In pal se na, lela tulik nutusr nu kemwa enenu in etu la oasr safla lun sukosok lalos, su kalmen ma inge pa, papa a nine enenu in oakiye akmwuk a ma sap a kutupal elos enenu in sang ma sap inge ke inkanek lun kai. (Hibru 12:7, 9 11) Ke sripe, tulik nu kemwa elos enenu in eis kasru tu in kalem nu selos efu ma sap a akmwuk inge orekla: ke sripen papa a nine lungselos. A elos enenu in akilen la lungse pa sripe yok paenang elos enenu in akos papa a nine kielos. (Efesus 6:1; Kolosse 3:20; 1 Jon 5:3) Sie nien sun lun papa a nine lalmetmet pa in luti tulik fwusr nutulos in “orekma fwal nu ke ngun lalos” ma inge kasrelos in oru sulela lalos sifwanu su arulanu mwo. (Rom 12:1; srike liye 1 Korint 13:11) Tusruktu, tia enenu in oasr ma sap pukanten ku kai su arulanu upa. Poul el fwak: “Papa tuma, nik komwos akkoskusrokye tulik nutumwos, tu elos in tia tasek.” (Kolosse 3:21; Efesus 6:4) Fwin ma sap lal Kraist el orekmakinyuk in loom, kaskas koluk a mulat na upa su akngalye met tia ku in liyeyuk in loom. Ke kain in loom se inge, tulik nu kemwa elos pulakin inse misla a musaiyuk, elos tia pulakin toasr ku asor.—Srike liye Sam 36:7.
7 Met puspis su muteta ke Bethel puspis fwin fwalu nu fon elos fwak la pa inge an se ma me srikasrak mwo fuka in akfwalye akmwuk a ma sap ke sie loom. Fwinne wangin tulik srisrik we, tusruktu an in muta lalos inge tukeni muta oanu sie sou na paye.a Orekma ke Bethel tia fwusesr paenang enenu akmwuk puspis—paye pus liki akmwuk ke sou. Tusruktu, met elder su kol ke orekma ke Bethel home, ofus, a factory elos kaifweung in orekmakin ma sap lal Kraist. Tia in orala fwal a takla mukena kunokon lalos a kunokon pa lalos in akkapye ma lun ngun a “engun lun Jeova” inmaslon met orekma wiel. (Niemaia 8:10) Ke ma inge elos kaifweung in oru ma nu kemwa ke sie inkanek mwo a me akkeye a elos kaifweung pa in srukye sie nunuk sumwos. (Efesus 4:31, 32) Pasis sou lun Bethel arulanu pengpeng ke ngunin insemwomwo!
In Congregation
8 Oupanu in congregation kunokon lasr in musaiyuk met ke ngun lun lungse. (1 Tessalonika 5:11) Ke ma inge met Kristian nu kemwa enenu in taran in tia oru kutena ma toasr nu sin kutu met ke elos oru sulela lalos sifwanu ke ma a liksreni in kaifwe ma inge nu sin kutu met in oru fwinne oasr sukosok pe lalos in oru sulela. Kutupal, oasr kutu met su sim nu sin Watch Tower Society a siyuk ke akmwuk a kasru ke sulela su elos enenu in oru ke pitse, buk, a me sritel. Tusruktu, wangin sukosok lun Society in tuni ku orek nununku nu ke ma inge. Pal nu kemwa, kais sie met ku sifwen sou pa enenu in oru sulela, fwal nu ke lungse lun kais sie ke ma sap lun Baibel. Kutu met elos orekmakin ma Society el kaifwe oanu sie ma sap. Ke sie me pupulyuk, ke The Watchtower lasr ke malem lun March 15, 1996, oasr sie me lutlut mwo su kaifwe nu sin met elder in oru muteta nu sin met in congregation pal nu kemwa. Ya ma se inge in paenang Society in orala ma sap ka? Mo. Elos nu kemwa su ku in fwasr tukun kas in kaifwe inge eis me insemwmwo puspis, tusruktu kutu sin met elder elos tia ku in oru ou inge. Sie me lutlut inge “Kusensiyuk nu Sin Met Rid” ke April 1, 1995, lun The Watchtower el sang kas in sensen taran orekma su alukela a kunausla oiye mutal ke pal in baptais, oanu orek party su alukela ma fwal, ku orala kutena me engun sufwal. Kutu sin met elos orekmakin kai se inge alukela ma fwal, a kutu selos akkalemye la fwinne in supwela sie card in akkeye tianu mwo ke pal in baptais!
9 Nunku pa, fwin “ma sap sumwosmwos lun sukosok” el sikyuk inmaslosr, na kut enenu in akilen la ella lasr oanu sie met Kristian ku tia oanu sie. (Jemes 1:25) Ya kut enenu in torkaskas fwin oasr sumwos lun kutu met in oru kain in sulela puspis su tianu kunausla ma sap lun Baibel? Mo. Meyen kut fwin oru ou inge kut orekma srelik inmaslosr. (1 Korint 1:10) Ke pal se ma el sang kas in sensen nu sesr ke oiye koluk tu in tia oru nununku koluk nu sin kutu met, Poul el fwak: “El tuyuk ku ikori yurin leum lal sifwanu. Aok, el fwa tulokonulak, tu oasr ku yurin Jeova in tolukunulak.” (Rom 14:4) Kut filiye moul lasr ke me sensen in tia eis insemwomwo lun God kut fwin torkaskas lain sie sin sie ke ma puspis su tianu kunausla ma sap lun Baibel a oasr sulela lun kais sie met fwal nu ke ella lalos.—Jemes 4:10-12.
10 Lela kut in esam pa la, met elder nu kemwa pakiyuki in kurunganang u lun God. (Orekma 20:28) Elos wi kut in sang kasru. Kut enenu in pulakin sukosok in sunolos ke kasru, meyen elos met lutlut ke Baibel a elos pula ke ma se ma sramsramkinyuk ke me rid lun Watch Tower Society. Fwin met elder elos liye sie kain in oiye su ku in kol nu ke orekma in kunausla ma sap lun Baibel, elos tia tui ku sangeng in sang kai su eneneyuk. (Galetia 6:1) Met nu kemwa in congregation elos fwasr tukun ma sap lal Kraist fwin elos akesrui nu sin met seperd kulu inge, su kol inmaslolosr.—Hibru 13:7.
Met Elder nu Kemwa Elos Orekmakin Ma Sap lal Kraist
11 Met elder nu kemwa elos insemwomwo in akpayeye ma sap lal Kraist in congregation. Elos kol ke orekma in luti ke peng mwo, elos luti ke Baibel in sun inse a, oanu met seperd kulang, elos akpulaikyelos “su munas inse.” (1 Tessalonika 5:14) Elos fwasr liki kain in oiye koluk puspis su oasr ke kain in alu nu kemwa lun Kristendom. Paye, fwalu se inge yokyokelik ke ma koluk, a oanu Poul met elder elos pulakin fosrnga ke u; tusruktu elos srukye na nunuk sumwos ke elos oru orekma lalos ke ma se inge.—2 Korint 11:28.
12 Ke sie me pupulyuk, saap sie met Kristian el lungse in siyuk nu sin sie met elder ke sie ma yok sripe su Ma Simusla tianu fwak fwin mwo ku koluk a enenu na sulela lun kais sie met fwal nu ke akmwuk lun met Kristian. Saap ma ke kelukyuk lal ke orekma su kasrel in eis mani yok tusruktu oasr kunokon yok lal. Ku sie papa tuman tulik mokul Kristian fwusr se papa tumal tia lalalfongi el siyuk nu sel ke ma se su ku in oru orekma lun forfor lal in srikeni. Ke kain in luma inge nu kemwa, met elder enenu in taran in tia sang ma elos sifwanu nunku ke ma se inge. A, el ikasla Baibel a sang kasru nu sin met se in akilen sulela sumwos lal sifwanu fwal nu ke akmwuk. Saap el ku in orekmakin Watch Tower Publication Index, fwin oasr, in suk mea “met kulansap oaru a lalmetmet” el fwak ke sifwe se inge ke The Watchtower a kutu me rid. (Mattu 24:45) Fuka fwin met Kristian se el oru sulela lal toko a sulela lal luman tianu arulanu mwo ye mutun met elder. Fwin sulela lal tia kunausla na paye ma sap a akmwuk lun Baibel, met Kristian se el e fwa konaok la met elder el akilen sumwos lun met se met se in oru sulela, meyen elos etu la “kais sie met fwa sifwanu wis me toasr lal.” Tusruktu, met Kristian enenu in esam la “kutena ma sie met el taknelik, ma inge el fwa kosrani ouyepa.”—Galetia 6:5, 7.
13 Efu met elder su yok experience lal el oru orekma lal ke inkanek inge? Ke sripa luo. Ma se meet, Poul el fwak nu ke sie congregation la ‘el tia leum fwin lalalfongi lalos.’ (2 Korint 1:24) Sie met elder, su kasru met lili wiel in tuni a sifwanu oru sulela lal fwal nu ke Ma Simusla, etawi oiye lal Poul. El akilen la oasr ma kunokon lal el tia enenu in oru, oanu Jisus su akilen pa la oasr ma kunokon lal el tia ku in oru. (Luk 12:13, 14; Jud 9) Tusruktu met elder nu kemwa elos akola in sang kasru, a kai sumwos su tuku ke Ma Simusla fwin eneneyuk. Ma se akluo, el sang akpa nu sin met lili Kristian wiel. Met sap Poul el fwak: “A mongo upa fwal nu sin met matu, aok nu selos su pala ka, a ku in akilen ma mwo a ma koluk.” (Hibru 5:14) Ke ma inge, tu in kapkapek nu ke na kut matu in ngun, kut enenu in orekmakin ku lasr in akilen ma, a tia sano pal nu kemwa kutu met in sang topuk nu ke me siyuk lasr. Met elder, su akkalemye nu sin met Kristian wiel fuka in sang topuk fwal nu ke Ma Simusla, ma inge mwo tu elos kasrel in kapkapek.
14 Kut ku in lalalfongi la ke inkanek lun ngun mutal Jeova God el ku in purakak insien met su alu paye nu sel. Ke ma inge, met Kristian su matu in ngun elos purakak insien met lili wielos, kaifwe nu selos, oanu met sap Poul el oru. (2 Korint 8:8; 10:1; Failimon 8, 9) Poul el etu la met sesumwos mukena enenu ma sap srisrik puspis tu elos in tia mulkunla, tusruktu met suwmosmwos tia enenu ou inge. (1Timote 1:9) El akkalemye, lalalfongi nu sin met lili wiel, a el tia nunuk koluk ku silalalfongi nu selos. Ke sie congregation el sim nu se: “A kut lalalfongi Leum keyumwos.” (2 Tessalonika 3:4) Lalalfongi lal Poul, fwinsrak, a tapan, arulanu purakak na paye met Kristian ingo. Met elder a met fwafwasryesr ke len lasr elos oru oupanu. Met inge nu kemwa sang mongle, ke elos kulang a lungse in kurunganang sip lun God!—Isaia 32:1, 2; 1 Piter 5:1-3.
Moulkin Moul Fwal Nu Ke Ma Sap Lal Kraist
15 Kut nu kemwa enenu in tuni pal nu kemwa moul lasr sifwanu kut fwin moulkin moul fwal a akkeye ma sap lal Kraist. (2 Korint 13:5) Paye kut nu kemwa ku in eis ma lane ke kut siyuk kusensiyuk inge: ‘Ya Nga lungse in musaiyuk met ngie ku Nga lungse in suk pal nu kemwa ma tafongla lalos? Ya Nga fwal in ma nu kemwa ku Nga alukela ma fwal? Ya Nga akkalemye la Nga nunku kutu met ku Nga tia tui in liksreni na in oru na ma Nga lungse ku sumwos luk sifwanu?’ Sie met Kristian tia enenu in sapsap nu sin met lili wiel in oru ma se ku tia oru ma se fwin ma inge tia sramsramkinyuk in Baibel.—Rom 12:1; 1 Korint 4:6.
16 Ke len in ongoiye se inge, arulanu yok sripe nu sesr in suk inkanek in akkeye sie sin sie. (Hibru 10:24, 25; srike liye Mattu 7:1-5.) Ke pal se ma kut loang nu sin met lili wiesr, ya kut konaok la oiye mwo lalos pa yok sripe nu sesr a tia ma munas lalos? Nu sin Jeova, kais sie sesr yok sripe. Sie me asor meyen tia met nu kemwa pulakin ou inge, fwinne ke moul lalos sifwanu. Met puspis mokleyuk in tuni munas lalos sifwanu a ma sesumwos su elos oru. In akkeye kain in met inge—a kutu met—ya fwal kut in srike sramsram nu sin sie ku luo met ke kais sie meeting, a akkalemye nu selos la kut aksaokye tuku lalos a kasru su elos oru ke congregation? Fuka sie me insemwomwo lulap in akfwusesrye me toasr lalos ke inkanek inge a in pal se na akpayeye ma sap lal Kraist!—Galetia 6:2.
Ma Sap Lal Kraist Orekma Ingenu!
17 Ma sap lal Kraist orekma ingenu ke congregation lun met Krisrtian. Kut ku in liye ma inge len nu kemwa—ke pal se ma met lili wiesr su Met Lo elos kaifweung in sulkakin peng mwo, ke pal se ma elos akpwarye a akkeye sie sin sie, ke pal se ma elos kaifweung in kulansap nu sin Jeova ye ma upa puspis, ke pal se ma papa a nine elos kaifweung in kasru tulik nutulos in kapek a lungse Jeova ke insemwomwo nu kemwa, ke pal se ma met liaung lun congregation elos luti ke Kas lun God ke lungse a engun, a purakak met ke u in akkalemye moniyuk na paye in kulansap nu sin Jeova ma patpat. (Mattu 28:19, 20; 1 Tessalonika 5:11, 14) Fwin kais sie sesr fulela ma sap lal Kraist in orekma ke moul lasr, fuka yokiyen insemwomwo lun Jeova! (Soakas 23:15) El lungse met nu kemwa su akos ma sap sumwosmwos lal in eis moul ma patpat. Ke Paredais su apkurun in tuku, ku fwa liye sie pal su met nu kemwa sumwosmwos, sie pal su wanginla met kunausla ma sap, a sie pal su kut ku in kurunganang kena nu kemwa lun insiesr. Fuka sie me sang mwolanu pa inge su tuku ke moulkin moul fwal nu ke ma sap lal Kraist!
[Footnote]
a Loom inge tia oanu monastery lun Kristendom. Wangin “abbot” ku “papa” ka. (Mattu 23:9) Met lili su oasr kunokon elos eis akfulat su fwal, tusruktu orekma lalos kolyuk ke akmwuk siefwunnu su kol met elder nu kemwa.
Mea Kom Nunku?
◻ Efu Kristendom el tia akilen nien sun lun ma sap lal Kraist?
◻ Fuka kut ku in orekmakin ma sap lal Kraist ke sou?
◻ Kut fwin orekmakin ma sap lal Kraist in congregation, mea kut enenu in fwasr liki, a ma kut enenu in oru?
◻ Fuka met elder elos ku in orekmakin ma sap lal Kraist ke pal in orekma lalos in congregation?
[Study Questions]
1. Efu kut ku in fwak la ma sap lal Kraist sie me purakak yok ke orekma mwo misinge?
2. Fuka Kristendom elos tia akilena nien sun lun ma sap lal Kraist, a mea kut enenu in oru in akpayeye ma sap inge?
3. (a) Mea kutu nu ke ma sap su toeni nu ke ma sap lal Kraist? (b) Efu tianu sumwos in fwak la tia enenu in oasr akmwuk ku kas in esmakin ke congregation lun met Kriatian sayen ma sap lal Kraist?
4. Mea ma inge su me purakak yok ke alu nasnas?
5. (a) Fuka papa a nine elos ku in akpayeye ma sap lal Kraist in loom selos? (b) Mea tulik nu kemwa elos enenu nu sin papa a nine kielos, a mea me srifwe su papa a nine elos enenu in oru in akpayeye ma inge?
6. (a) Ya tulik nu kemwa enenu akmwuk a ma sap su tuku nu sin papa a nine, a efu pa inge topuk lom? (b) Kain in sripe fuka ke akmwuk a ma sap in loom tulik nu kemwa enenu in kalem? (c) Kain in me sensen fuka kut ku in fwasr liki fwin ma sap lal Kraist el kutangla in loomu?
7. Ke inkanek fuka Bethel home el akkalemye me srikasrak mwo fwin kut sramsram ke akmwuk in loom?
8. (a) Mea nien sun lasr pal nu kemwa in congregation?(b) Ye luma a ma sikyuk fuka oru kutu met in sang akmwuk ku ma sap lalos sifwanu?
9. Efu arulanu yok sripe in fwasr liki oiye koluk in suk ma tafongla lun kutu met a in orek nununku sie sin sie?
10. Su pakiyuki in kurunganang congregation, a fuka kut ku in sang kasru nu selos?
11. Fuka met elder elos orekmakin ma sap lal Kraist in congregation?
12. Fwin sie met Kristian el osun nu sin met elder in siyuk kasru, mea met elder saap el oru?
13. Efu met elder elos enenu in kasru kutu met in tuni a oru sulela lalos sifwanu, liki in sang topuk nu ke kais sie kusensiyuk ku sang ma elos nunku sifwanu ke ma se?
14. Fuka sie met su matu in ngun elos akkalemye la elos lalalfongi Jeova?
15. Mea kusensiyuk puspis su kut ku in siyuk sesr sifwanu tu kut in etu fwin kut orekmakin ma sap lal Kraist ke futoto lasr nu sin met lili wiesr?
16. Fuka kut ku in kasrelos su nunuk koluk kelos sifwanu, ke ma inge akpayeye sie ip saok ke ma sap lal Kraist?
17. Ke kain in inkanek puspis fuka ma sap lal Kraist orekma nu ke congregation lom?