Jeova El Mongfihsracsr Nuh Sel Jonah

Ke siti Nineveh fin acn Assyria, mwet we uh arlacna koluk. Jeova el fahk nuh sin mwet pahluh se lal inge Jonah elan som nuh Nineveh ac sang kahs in sensen nuh seltahl in ekuhllah ohiyac laltahl uh. Tuhsruhktuh, Jonah el kahinglac nuhke acn sahyac. El sroacng nuh fin oak soko ma ac kahsruhsr som nuh Tarshish.

Ke pacl se ma oak soko ingacn oasr in meoa uh, oasr pahkah na upac se tuhyak. Mwet suc wi ke oak uh arlac sahngweng. Eltahl puhruhe nuh sin god laltahl uh ac siyuck: ‘Efuh kuh ma inge sikyak?’ Ke sahflahiyac ah, Jonah el fahk nuh seltahl: ‘Nga pa pwacnacng uh. Nga kahingkihn ma Jeova el sapkihn nuh sihk in oruh. Sisyuclac nuh in meoa uh, na pahkah uh ac fah tui.’ Mwet suc orekma ke oak inge sruhnga in sisuhllah, tuhsruhktuh el kwacfeltahl in sisuhllah. Ke pacl se ma eltahl sisuhllah ah, pahkah sac tui.

Jonah el nuhnkuh muh el ac misac inkof uh. Ke pacl se ma el tilli, el puhruhe nuh sin Jeova. Na, Jeova el suhpwaclah ik na luhlahp soko. Ik soko ingacn okohmuhllah Jonah, tuhsruhktuh el tiacna unilyac. Jonah el puhruhe ke el muhta insiacn ik soko ah: ‘Nga wuhlelah in ahkos kom pacl e nuhkewa.’ Jeova el karuhnguhnuhl Jonah ke insiacn ik soko ah ke lusen lwen tolu ac el oruh tuh ik soko ah in wihtacllah Jonah nuhke acn paho uh.

Ke srihpen Jeova el molwellah Jonah, yac kalmac pa el tiac enenuh in som nuh Nineveh? Moh. Jeova el sifwilpac na fahk nuh sel Jonah el in som nuh we. Ke pacl se inge, Jonah el ahkos. El som nuh we ac fahk nuh sin mwet koluk we inge: ‘In lwen 40, acn Nineveh ac tuhfah kuhnanuclac.’ Tukun ma inge, ma na usrnguck se sikyak, mwet Nineveh inge lohng ac ekuhllah ohiyac koluk laltahl uh. Tohkohsrah luhn acn Nineveh fahk nuh sin mwet lal uh: ‘Pahng nuh sin God, ac auliyak. Sahp, el ac fah tiac kuhnauskuhtlac.’ Ke Jeova el liye lah mwet uh auliyak, el tiac na kuhnahoslah acn Nineveh.

Jonah el kasrkuhsrak lah siti se inge tiac na kuhnanuclac. Srihke nuhnkuh: Jeova el mongfihsracsr ac pahkotwen nuh sel Jonah, tuhsruhktuh Jonah el tiacna pahkomuhta mwet Nineveh inge. A, el som muhta lihkihn siti uh ye lul ke mah orahk soko ac muhta sroasrol. Na mah orahk soko ah maslah, ac Jonah el kasrkuhsrak. Pwacnacng, Jeova el fahk nuh sel: ‘Kom nuhnkuh yohk ke mah orahk soko ingacn liki na mwet Nineveh ingacn. Nga pahkohmuhtahltahl, ac eltahl moullac.’ Mwe lutlut yohk srihpac fuhkah ma inge ahkkahlwemye? Mwet Nineveh inge yohk srihpac liki na kuhtwena sahk uh.