Puhlaik lal Jehoiada

Oasr tuhlihk muhtwacn se nahtuhl Jezebel pahngpahng Athaliah, suc oacna ninac kiacl uh arlacna koluk. Athaliah el pahyuck nuh sin tohkohsrah luhn acn Judah. Ke pacl se ma mukul tuhmwacl ah misac, tuhlihk mukul se nahtuhl ah muhtwacwacack in kol. Tuhsruhktuh, ke pacl se tuhlihk mukul se nahtuhl ah misac, Athaliah el sifacna sulacllah tuh in el pa kol acn Judah uh. Na, el srihke elan kuhnahoslah mwet in sucu in tohkohsrah uh nohfohn, uniyac mwet suc ac fal in eklac mwet kol liki sahyacl, finne nuhke tuhlihk nuhtin tuhlihk nahtuhl. Mwet nuhkewa sahngweng sel.

Jehoiada, sie Mwet Tol Fuhlwact ac Jehosheba, muhtwacn kiacl uh, eltahl etuh lah ma Athaliah el oruh inge arlacna koluk. Eltahl pihlesraclah moul laltahl in okanlah sie sin tuhlihk nuhtin tuhlihk nahtuhl Athaliah inge, ac inen tuhlihk srihsrihk se ingacn pa Jehoash. Eltahl tuhfahllah ke tempuhl.

Ke pacl se Jehoash el sun yac itkohsr, Jehoiada el oracni mwet kol ac mwet Levi ac fahk nuh seltahl: ‘Karihngihn sruhnguhl nuhke tempuhl an ac nikmet lwelah kuhtwena mwet in utyak.’ Na Jehoiada el oruh tuh Jehoash elan eklac tohkohsrah luhn acn Judah ac el fihliyac tefuroh nuh fin sifacl. Mwet Judah wowoyak: ‘In paht moul lal tohkohsrah!’

Kasra Athaliah el lohngack puhsren wohwohn luhn mwet uh ac suhlahklahk som nuhke tempuhl uh. Ke pacl se el liye tohkohsrah sasuc se inge, el wowoyak: ‘Tuhnyuhna! Tuhnyuhna!’ Mwet kol luhn un mwet inge eltahl sruokyac kasra koluk sac, usacllah, ac unilyac. Tuhsruhktuh, ac fuhkah mwe kihfaslah koluk lal nuh sin mwet uh?

Jehoiada el kahsruh muhtuhnfacl se inge in oraclah sie wuhlelah laltahl nuh sin Jeova, eltahl wuhlelah in alu nuh sel muhkwena. Jehoiada el sapkihn eltahl in kuhnahoslah tempuhl lal Baal ac fukulyac ma sruhloaclah uh nuhke ip pucspucs. El srihsrngiyac mwet tol ac mwet Levi in orekma ke tempuhl uh tuh mwet uh in muh kuh in sifwilpac alu we. El fihliyac mwet topang in karihngihn tempuhl in muh wacngihn mwet suc tiac nwacsnwacs in utyak nuh we. Na, Jehoiada ac mwet kol inge usacllah Jehoash nuhke lohm sin tohkohsrah ac fihlilyac fin tron uh. Mwet Judah inge arlacna engan. Ke sahflahiyac ah, eltahl kuh in kuhlwacnsuhpuh Jeova ac sukohsohklah luhkwel Athaliah ac liki alu nuh sel Baal. Yac kom kuh in liye lah fuhkah puhlaik lal Jehoiada inge kahsruh mwet pucspucs?