Rahab El Okanlah Mwet Kalngeyuck

Ke pacl se ma mwet kalngeyuck luhn mwet Israel inge som nuhke siti Jericho, eltahl muhta ke lohm sin sie muhtwacn suc inel pa Rahab. Tohkohsrah luhn acn Jericho el etwacack ac suhpwaclah mwet solse uh nuh lohm sel Rahab. El okanlah mwet kalngeyuck inge fin lohm sel uh ac suhpwaclah solse luo ah nuhke sie pacna acn. El fahk nuh sin mwet kalngeyuck inge: ‘Nga ac kahsre komtacl mweyen nga etuh lah Jeova el wi komtacl ac komtacl ac fah kuhtanglah muhtuhnfacl se inge. Nuhnak muhnahs wuhlelah nuh sihk lah komtacl ac moliyuclac ac sucu luhk uh.’

Mwet kalngeyuck inge fahk nuh sel Rahab: ‘Kuht wuhlelah nuh sum lah wacngihn mwet in lohm sum an ma ac sun ma upac.’ Eltahl fahk pac: ‘Kapriyac soko sucl sruhsrah an ke winto lom uh ac sucu lom an fah moliyucklac.’

Rahab el lwelah mwet kalngeyuck inge in fani ke sucl soko ah liki winto lal uh. Eltahl som nuhke finohl ah ac wihklac we ke lwen tolu meet liki eltahl fohlohk nuh yohrohl Joshua. Na mwet Israel uh fahsr sahslah ke Infacl Jordan ac ahkolah in sruokyac acn sac. Acn Jericho pa siti se meet ma eltahl kuhtanglah uh. Jeova el fahk nuh seltahl in fahsr rauneack siti sac pacl se ke kais sie lwen ke lusen lwen ohnkohsr. Ke lwen ahkitkohsr, eltahl fahsr rauneack siti sac pacl itkohsr. Na mwet tol uh ukyac mwe ukuk nahtuhltahl uh ac mwet solse inge salah ke puhsracltahl kewa. Pot ke siti uh rahki! Tuhsruhktuh, lohm sel Rahab oasr pacna ke muhtuhn pot uh, tu na kuh ac tiac muhsahllah. Rahab ac sucu lal uh wona ke srihpen el luhlahlfongi Jeova.