Jeova El Sulacllah Joshua

Moses el kol muhtuhnfacl Israel ke lusen yac pucspucs, ac ingena el apkuhranyang nuh in misac. Jeova el fahk nuh sel: ‘Tiac kom pa mwet se ma ac uslah mwet Israel inge nuhke Facl Wuhlelah uh. Tuhsruhk, nga ac lwelah kom in liye acn se inge.’ Na Moses el siyuck sin Jeova elan sulaclah sie mwet kol sasuc ma ac karihngihn mwet inge. Jeova el fahk nuh sel: ‘Som nuh yohrohl Joshua ac fahk nuh sel lah el pa sollac uh.’

Moses el fahk nuh sin mwet uh lah ke kihtin pacl na el ac misac, ac Jeova el sulacllah Joshua elan kohluhltahl nuhke Facl Wuhlelah. Na Moses el fahk nuh sel Joshua: ‘Nikmet sahngweng. Jeova el ac fah kahsre kom.’ Kihtin pacl tukun ma inge, Moses el utyak nuh Finohl Nebo, yen se ma Jeova el ahkkahlwemye nuh sel acn se ma el wuhlelah nuh sel Abraham, Isaac ac Jacob. Moses el yac 120 ke pacl se ma el misac.

Jeova el fahk nuh sel Joshua: ‘Fahsr sahslah Infacl Jordan ac som nuh Canaan. Nga ac fah kahsre kom in oacna ke nga kahsrel Moses. Esam kom in riti masap luhk uh ke lwen nuhkewa. Nikmet sahngweng. Oruh kom in puhlaik. Som ac oruh ma nga sapkihn nuh sum uh.’

Joshua el suhpwaclah mwet kalngeyuck luo nuhke siti Jericho. Ke mwe sramsram se tok uh, kuht ac fah lotwelah kuhtuh pac ma sikyak ke acn we. Ke eltahl fohlohk uh, eltahl fahk lah pa inge pacl wo in utyak nuh Canaan. Ke lwen tohkoh ah, Joshua el sap nuh sin mwet uh eltahl in apweni. Na el suhpwaclah mwet tol suc ac fah us tucptucp in wuhleacng uh nuhke Infacl Jordan. Infacl sac sronot. Tuhsruhk, ke pacl se na ma niacn mwet tol inge puhsrallah kof uh, infacl sac tui ke sohrohr uh ac sa na mwesrlah! Mwet tol inge fahsr ke infacl soko ma paholah inge ac tulac infulwac uh tuh mwet nuhkewa ke muhtuhnfacl Israel kuh in fahsr sahslah ke infacl soko ah nuhke lacyen se sahyac ah. Kom nuhnkuh muh mwenmwen se inge ahkacsmakihnyacltahl ke ma Jeova el oruh ke Meoa Sruhsrah ah?

Tukun yac pucspucs, mwet Israel inge sun Facl Wuhlelah uh. Eltahl kuh in muhsah lohm ac siti. Eltahl kuh in orek imac, oraclah acn in yok grape ac acn in yok fukun sahk pucspucs. Facl se inge kahk ke milk ac honey.