Kas lun Jeova el Akpayeyuk Pal Nukewa
“Wangin ma tula liki ma mwo nu kemwa su Jeova God lomwos el fwak keyumwos. Ma nu kemwa akpayeyuk tari nu sumwos.”—JOSUA 23:14.
1. Su Josua, a mea el oru ke pal se el matou tari a apkuran in mise?
EL SIE met kol ke meun su ku a tia sangeng, sie met su yok lulalfongi a sruokye ku oaru a paye lal pal nukewa. El fwufwasryesr welul Moses a suleyukla sin Jeova in kol mutanfwal Israel liki yen mesis nu ke sie fwal su milk a unni surror we. Ke pal se el matou tari a apkuran in mise, mokul se inge Josua su sunakinyuk sin met puspus, el akkalemye me sramsram safla lal su oasr me akkeye yok ka nu sin met Israel su matou nukewa in an Israel. Paye la, me sramsram lal inge sang me akkeye nu ke lulalfongi lun met nukewa su longul. Me sramsram lal inge ku in akkeye pa lulalfongi lom.
2, 3. Ke pal se Josua el sramsram nu sin met matou puspus lun Israel, mea sikyak ke met Israel, a mea Josua el fwak?
2 Nunku yok ke ma sikyak inge, in oana ma akkalemyeyuk in Baibel: “A ma te oru tokin len puspus, ke Jeova el sang mongla nu sin met Israel liki met lokwalok lalos nukewa su raunelosla, a Josua el matu tari a oasr yea puspus lal, Josua el pangonmu met Israel nukewa, met matu lalos, a met leum lalos, a met nununku lalos a met kol lalos, a fwak nu selos: ‘Nga matuo tari a oasr yea puspus luk.’”—Josua 23:1, 2.
3 Josua el apkurun in sun yea 110 matwe, el moul ke lusen pal se su oasr ma mwomwo puspus sikyak nu sin met Israel in oana met lun God. El liye orekma mwolana puspus lun God, a el liye me akpayeye nu ke mwulela puspus lun Jeova. Ke ma inge, meyen el liye ma inge nukewa ke mutal sifwana paenang oasr lulalfongi yok lal ke el fwak: “Komwos etu in insiomwos kemwa a in ngunumwos kemwa tu wangin ma tula liki ma mwo nu kemwa su Jeova God lomwos el fwak keimwos. Ma nu kemwa akpayeyuk tari nu sumwos. Wangin sie ma tula ka.”—Josua 23:14.
4. Mwulela fuka God el akkalemye nu sin met Israel?
4 Kas puspus fuka lun Jeova akpayeyuk in len lal Josua? Kut fwa lutlutkin kas in mwulela tolu su Jeova el akkalemye nu sin met Israel. Ma se meet, God el fwa molelosla liki sruo lalos ke sie mutanfwal. Ma se akluo, el fwa karunginelos. Ma se aktolu, el fwa sang ma enenu lalos. Jeova el akkalemye pa mwulela puspus lal nu sin met kulansap nukewa lal ke pal inge, a kut liye pa la ma inge akpayeyuk ke lusen moul lasr. Tusruktu, meet liki kut akuteye ke ma Jeova el oru ke pal inge, lela kut in akuteye orekma lal in len lal Josua.
Jeova el Molela Met Nukewa Lal
5, 6. Fuka Jeova el molela met Israel liki an Ijipt, a mea ma inge akkalemye?
5 Ke pal se met Israel elos tung a sasao nu sin God ke sripen sruo lalos fwin an Ijipt, Jeova el long ke sasao lalos. (Exodus 2:23-25) Ke pal se ma oasr furrur se sikyak in kupo sa, Jeova el kaskas nu sel Moses: “A Nga oatume tu nga in molelosla liki poun met Ijipt, a in wiselosla liki fwal sa nu sie fwal mwo a sralup, nu sie fwal su milk a unni suror we.” (Exodus 3:8) Sie me insemwomwo yok in liye la Jeova el akpayeye mwulela lal inge! Ke pal se Fero el akkalemye la el srunga in lela met Israel elos in som liki an Ijipt, Moses el fwak nu sel Fero la God el fwa oru kof ke infwal Nile in ekla nu ke sra. Kas lun Jeova el akpayeyuk. Aok, kof ke Infwal Nile el ekla nu ke sra. Ik nukewa we mise, a met elos tia ku in nim kof ke infwal. (Exodus 7:14-21) Ne oinge Fero el srakna srunga in long a el likkeke, a Jeova el sifwilpa orala me keok upa, a ke kais sie me keok inge el akkalemye la mea el e fwa oru. (Exodus, sapta 8-12) Tokin me keok ak sengoul sikyak su uniye mwuonse nukewa lun met Ijipt, Fero el sapkin met Israel elos in som—ke ma inge met Israel elos som liki an se inge!—Exodus 12:29-32.
6 Me molela inge el orala inkanek nu sin Jeova in nutela met Israel oana met sulela lal. El akfulatyel Jeova oana God su ku in Akpayeye mwulela lal, el su kas lal el akpayeyuk pal nukewa. Orekma in molela inge el akkalemye la Jeova el ku liki god nukewa lun mutanfwal nukewa. Orekma lasr in ridi me sramsram ke inkanek in molela inge akkeye lulalfongi lasr. Nunku yok ke pulakinyen me insemwomwo lun met su liye kain in me molela inge! Wangin alolo ka la Josua el liye la Jeova el “Fulatlanu fwin fwalu nufon.”—Sam 83:18.
Jeova el Karungin Met Nukewa Lal
7. Fuka Jeova el sang me karungin nu sin met Israel liki met meun lal Fero?
7 Fuka mwulela akluo lal la Jeova el fwa karungin met nukewa lal? Ma inge el kalem a oasr ke mwulela lal la el fwa molelosla liki an Ijipt a el fwa lela nu selos in ilyuk nu in Fwal Mwulela. Fero su arulana kasrkusrak wi met meun nukewa lal, su oasr ke sariot in meun lalos su piselos oasr ke foko foko puspus, a elos ukwe met Israel. Fero su fulang nakanten a insefulat el lulalfongi na paye la el ku in kunausla met nukewa inge, yokna ke pal se met Israel elos sun tari sie an in masrlon eolu a mwea a ke nunak lalos wangin inkanek su met Israel elos ku in kaengla ka! Inge God el orala inkanek in sang me karungin nu sin met kulansap nukewa lal inge ke el filiye sie pukunyeng lulap in masrlon u luo inge. Ke leyen lun met Ijipt elos arulanu losr; tusruktu ke leyen lun met Israel oasr kalem mwomwo ka. Ke pal se pukunyeng el kosrala met Ijipt elos in tia ku in kasrusr, Moses el srukak sikel lal a Mwea Srusra el mangelik, a ma inge sang inkanek tu met Israel elos ku in kaengla, tusruktu el sang me sruf ku me kosrala nu sin met Ijipt nukewa. Jeova el kunausla met meun nukewa lal Fero, a sang me karungin nu sin met kulansap nukewa lal elos in tia kuf ke meun inge.—Exodus 14:19-28.
8. Kain in me karungin fuka met Israel elos pulakin (a) yen mesis a (b) ke pal se elos ilyuk nu in Fwal Mwulela?
8 Tokin elos sasla liki Mwea Srusra, met Israel elos fwufwasryesr ke an su akkalemyeyuk mu “yen mesis lulap a me aksangeng, yen oasr serpent we a skorpion we, a fwal malu wangin kof we.” (Duteronomi 8:15) Jeova el karungin pa met lal in an se inge. Fuka ke elos ilyuk tari nu ke Fwal Mwulela? U puspus lun met meun fwin an Kenan elos lainelos. Tusruktu, Jeova el fwak nu sel Josua: “Tukakek inge a alukela Jordan se inge, kom, a met inge nu kemwa, nu ke fwal se su Nga sang nu selos, aok nu sin tulik natul Israel. Wangin sie met fwa ku in tu ye mutom in len in moul lom nu kemwa. Oana Nga oelul Moses, oinge Nga fwa wi kom. Nga fwa tia siskomla, ku som liki kom.” (Josua 1:2, 5) Kas inge lun Jeova akpayeyuk. Ke lusen yea onkosr kutu, Josua el kutangla Togusra 31 a sruokye an yok puspus fwin Fwal Mwulela. (Josua 12:7-24) Orekma lalos in sruokye an se inge el tia ku in orek fwin wangin me karungin lun Jeova.
Jeova El Sang Ma Enenu lun Met Kulansap Lal
9, 10. Fuka Jeova el kasru met nukewa lal yen mesis?
9 Inge nunku ke mwulela aktolu—la Jeova el fwa sang ma enenu lun met kulansap lal. Tia pat tokin molela lalos liki an Ijipt, God el mwulela nu sin met Israel: “Nga fwa sisye bred in kosrao me nomwos; a metu fwa illa a esani ma nelos len nu kemwa.” God el sang ‘bred in kosrao me.’ “A ke tulik nutul Israel elos liye, elos fwak nu sin sie sin sie: ‘Mea se inge?’” Manna pa inge, bred su Jeova el mwulela ka nu selos.—Exodus 16:4, 13-15.
10 Ke lusen yea 40 yen mesis, Jeova el karungin met Israel, a el sang nu selos me mongo nelos a me nim nimelos. El akpayeye pa nu selos la nuknuk lalos fwa tia mai a niyelos fwa tia fwafak. (Duteronomi 8:3, 4) Josua el liye la mwulela nukewa inge akpayeyuk. Jeova el molela, sang me karungin, a sang me enenu lun met nukewa lal, oana ke ma el mwulela nu selos ka.
Molela Ke Pal Inge
11. Me fwakak fuka akkalemyeyuk in Bethel fwin an Brooklyn, New York, in October 1914, a mea kalmen ma inge?
11 Fuka ke pal inge su kut oasr ka? Ke lututang in Friday, October 2, 1914, met lili se inge su pangpang Charles Taze Russell, su oru kunokon in kol Bible Student nukewa, el utyak nu ke niyen mongo lun Bethel fwin an Brooklyn, New York. “Tu mwo, nu sumwos nukewa,” el insemwomwo in fwak. Meet liki el muta fwin siya lal el engan in akkalemye sie me fwakak: “Pal lun met Pegan aksafyeyukla; togusra nukewa lalos eis tari pal a len lalos.” Ke ma inge, pal summu tari nu sin Jeova, Met Kol Fulatlanu in kosrao a fwin fwalu, in oru orekma in sang kasru nu sin met nukewa lal. A el akpayeye in sang me kasru nu sin met nukewa lal!
12. Kain in me molela fuka sikyak in yea 1919, a mea fwokin ma inge?
12 Tokin yea limekosr, Jeova el molela met kulansap nukewa lal liki “Babulon Lulap,” u pengpeng lun alu kikiap nukewa fwin fwalu. (Fwakyuk 18:2) Supus in masrlosr liye me molela mwomwo inge. Ne oinge kut liye fwako mwomwo puspus lun orekma inge. Jeova el sifwil oakiye alu paye lal a el oru inkanek tu met nukewa su alu nu sel in oasr inse sefwanna lalos. Ma inge palyeyuk tari sel Isaia met palu: “A a fwa te oru in len safla, tu eol lun loom sin Jeova fwa oakiyuki fwin mangon eolu, a a fwa fulat liki toktoku; a mutanfwal nu kemwa fwa suror nu lu.”—Isaia 2:2.
13. Kain in kapkapek fuka kom liye in masrlon met kulansap lun Jeova ke pal inge?
13 Kas palu lal Isaia inge akpayeyuk na paye. In yea 1919 met lula sin met akmusrala elos mutamwauk in oru orekma lo nu ke akfulatyeyen orekma in alu nu sin God paye. Mutamwauk ke yea 1930 fwasru, oasr me akul yok la u lun “sip ngie” elos orekeni ku akkeyeyuk in wi ke alu paye. (Jon 10:16) Ma se meet mutamwauk in oasr tausan puspus, a tok kutu oasr pal foko foko tausan, a ke pal inge oasr million puspus sin met elos wi a sang kasru nu ke alu paye! Ke sie aruruma su itukyang nu sel Jon met sap, met nukewa inge elos akkalemyeyuk oana “sie u lulap, su wangin met ku in oekla, sin mutanfwal nukewa, a sin sruf nukewa, a fwil nukewa, a loa nukewa.” (Fwakyuk 7:9) Mea kom liye ke lusen moul lom? Met Lo lun Jeova ekasr fwin fwalu ke pal se meet kom lotela ma paye? Ke pal inge pisen met nukewa su kulansap nu sin Jeova pus liki 6,700,000. Ke sripen orekma lal in molela met lal liki Babulon Lulap, Jeova el ikasla inkanek in akkapyelik u lal su kut ku in liye ke pal inge fwin fwalu nufon.
14. Kain in me molela fuka el apkurun in orek?
14 Oasr sie pa orekma in molela su Jeova el fwa oru—su met nukewa su muta fwin fwalu elos fwa liye. Ke sie inkanek sakuruk in akkalemye ku lal, Jeova el fwa akwanginyela met nukewa su lainul, a el fwa molela met lal nu ke akwuk sasu su oasr ma sumwosmwos ka. Sie me insemwomwo yok in liye saflaiyen ma koluk nukewa a ke mutamweyen sie pal mwomwo nu ke me sramsram lun metu!—Fwakyuk 1:1-4.
Me Karungin lun Jeova Ke Pal Lasr
15. Efu ku oasr ma eneneyuk nu ke me karungin lun Jeova ke pal inge?
15 Oana ke ma kut akuteye tari, met Israel in len lal Josua elos enenu me karungin lun Jeova. Ya met lun God ke pal inge tia enenu me karungin lun God? Mo, elos enenu pa! Jisus el sang kas in sensen nu sin met tuma lutlut nukewa lal: “Na elos fwa eskomwosyung in akkeokye komwos, a fwa unikomwosi, a mutanfwal nukemwa fwa srungekomwos ke ek.” (Mattu 24:9) Ke lusen yea puspus, Met Lo lun Jeova in an puspus elos muteng ke me lain a me kalyai upa. Ne oinge, Jeova el akpayeye la el wi a sang kasru nu sin met kulansap lal. (Rom 8:31) Kas lal akkalemye nu sesr la ‘wangin kutena me meun lumeyukla in lain kut’ fwa tulokinye orekma in sulkakin a luti peng mwo lun Togusrai.—Isaia 54:17.
16. Me akpayeye fuka kom liye ka la Jeova el karungin met kulansap nukewa lal?
16 Fwinne met puspus fwin fwalu akkalemye srunga yok lalos, met kulansap lun Jeova elos tafwela na in kapkapek a puseni. Met Lo lun Jeova elos yokyokelik ke an 236—me akpayeye fukoko pa inge la Jeova el wi kut in karungin kut liki met lokwalok nukewa su lungse in kunauskutla. Ya kom ku in esam kutu sin met kol lun anu ku lun alu su arulana pengpeng la elos akkolukye met kulansap lun God su sikyak ke lusen moul lom? Mea sikyak nu selos? Elos oasr oya ingena? Elos wanginla, oana ma sikyak nu sel Fero in len lal Moses a Josua. A fuka ke met kulansap puspus lun God su sruokye oaru lalos nu ke elos mise? Jeova el fwa esamelos a el fwa akmoulyelosyak. Pa inge ma mwo emeet nu selos, elos oasr in me esmakin lun God. Aok, ke akwuk lun mwulela nukewa in sang me kasru in karungin, kas lun God el akpayeyuk pal nukewa.
Jeova El Sang Ma Enenu lun Met Nukewa lal Ke Pal Inge
17. Jeova el akkalemye nu sesr kain mwulela fuka ke etauk yok su ku in kasre kut in fototo nu sel?
17 Jeova el sang me enenu lun met nukewa lal yen mesis, a el sang pa ma enenu lalos ke pal inge. Kut eis me kasru yok in akfototoye kut nu sin God ke inkanek lun “met kulansap oaru a lalmetmet.” (Mattu 24:45) Kut eis etauk ke ma paye nukewa ke God su tia eteyuk sin metu ke lusen pal loeloes. Oasr sie lipufan el fwak nu sel Daniel: “Kaliye kas inge, a siliye buku, aok nu ke pal safla. Met puspus fwa kasrot kasrmu, a etauk fwa yokelik.”—Daniel 12:4.
18. Efu ku kut ku in fwak mu etauk paye el yokyokelik ke pal inge?
18 Kut moul ke pal safla, a etauk ke God el yokyokelik na paye. Fwin fwalu nufon, ngun mutal el kol met puspus su lungse ma paye in eis etauk sumwos ke God paye a ke akwuk lal. Oasr Baibel puspus fwin fwalu ke pal inge, a oasr pa me rid puspus su sang kasru nu sin met puspus in eis kalem yok ke ma paye su arulana yok sripe su oasr in Baibel. Ke sie me pupulyuk, nunku ke koanon buk inge What Does the Bible Really Teach? (Mea Baibel el Luti Na Paye?)a su akkalemye ke me lutlut puspus ka. Kutu sin me lutlut ke sapta puspus su oasr ka pa: “Mea Ma Paye Ke God?,” “Met Mise Elos Oasr Oya?,” “Mea Se Inge Togusrai lun God?,” a “Efu ku God el Lela Me Keok?” Met puspus elos nunku yok ke kusensiyuk inge su on ke lusen tausen puspus yea. Ke pal inge me top nu ke kusensiyuk nukewa inge oasr ke me rid puspus su tuku ke kas lun God. Fwinne tokin century puspus metu elos nukin koanon Baibel a alu nukewa lun Kristendom elos luti me luti kikiap, tusruktu Kas lun God el akpayeyuk, a sang kasru nu sin met nukewa su lungse in kulansapu Jeova.
19. Kain in mwulela puspus fuka kom liye la akpayeyuk tari, a mea kom ku in fwak ka?
19 Wangin me alolo nu ka la ma kut liye ke mutasr sifwana, kut ku in fwak: “Wangin ma tula liki ma mwo nu kemwa su Jeova God lomwos el fwak keyumwos. Ma nu kemwa akpayeyuk tari nu sumwos. Wangin sie ma tula ka.” (Josua 23:14) Jeova el molela, sang me karungin, a sang me enenu lun met kulansap nukewa lal. Ya kom ku in akkalemye ke kutena mwulela lal su tia akpayeyuk ke pal pakiyuki lal? Kut tia ku in oru ma inge. Kut lulalfongi na paye ke Kas lun God.
20. Efu ku kut ku in ngetla nu ke pal fwasru wi lulalfongi?
20 Fuka ke pal fwasru? Jeova el akkalemye nu sesr tari la apkurun kut nukewa in eis me fwinsrak nu ke moul fwin fwalu ke pal se su ekulyukla tari nu ke sie paredais. Oasr kutu met in masrlosr oasr fwinsrak lalos in welul Kraist in kosrao in oru me kolyuk lalos. Fwin oasr fwinsrak lasr in moul fwin fwalu ku moul in kosrao, oasr sripe mwomwo lasr in sruokye oiyen oaru lasr oana ma Josua el oru. Len e fwa tuku ke fwinsrak lasr e fwa akpayeyuk. In pal sa, kut fwa ngetla nu tok a esamak ke mwulela nukewa su Jeova el orala, a kut ku in fwak pa: “Ma nukewa akpayeyuk tari.”
[Footnote]
a Orekla sin Met Lo lun Jeova.
Ya Kom Ku In Akuteye?
• Josua el liye me akpayeyen mwulela fuka lun Jeova?
• Mwulela puspus fuka lun God kom liye tari la akpayeyuk?
• Ke mea kut ku in lulalfongi ke kas lun God?