Oak Okoacl Noah

Tok kuhtuh, puhseni mwet fin facluh uh. Inkaiyen mwet inge koluk. Oasr pac lipufacn ma muhta inkuhsrao suc eklac koluk. Eltahl som liki acn seltahl inkuhsrao ac tuhkuh nuh facluh. Kom etuh efuh? Mweyen eltahl luhngse in eklac mwet ac pahyuck nuh sin muhtwacn.

Lipufacn ac muhtwacn inge orek tuhlihk. Tuhlihk mukul nahtuhltahl inge mahtuhlah ac eltahl arlacna fokoko, ac eltahl fuhnmweti mwet sahyac uh. Eltahl ahkngalye pac mwet uh. Jeova el tiac kuh in lwelah ma inge in fahsr na. Pwacnacng, el sulaclah in kuhnahoslah mwet koluk inge ke sie sronot.

Tuhsruhktuh, oasr mukul se ma siena liki mwet inge. El luhngse Jeova. Inel pa Noah. Oasr muhtwacn se kiyacl ac wen tolu nahtuhl, ineltahl pa Shem, Ham, ac Japheth, ac kais sie seltahl oasr muhtwacn kiac. Jeova el fahk nuh sel Noah elan muhsahelah soko oak luhlahp, tuh el ac sucu lal uh kuh in moullac liki Sronot se inge. Oak soko uh ac oacna atacn sie pohk luhlahp ma kuh in pahtpaht fin kof uh. Jeova el oacyacpac fahk nuh sel Noah elan usack kain in ma orahkrahk pucspucs nuh luun oak soko inge tuh eltahl in wi pac moullac.

Noah el sa na in muhtwacwacack in muhsahi oak soko inge. Noah ac sucu lal uh muhsahi oak soko inge ke lusen yac 50. Eltahl muhsahelah oak soko inge oacna ke ma Jeova el sapkihn nuh seltahl in oruh. Ke puhlan pacl sacpacna, Noah el som sensenkihn mwet we inge ke Sronot sac. Tuhsruhktuh, wacngihn mwet lohngohl.

Pacl se ma eltahl enenuh in utyak nuh luun oak soko ah tuhkuh. Kuht liye lah meac sikyak tohkoh.