Kasrkuhsrak Lal Oraclah Ahkmas

Tukun Adam ac Eve som liki imac Eden, oasr tuhlihk pucspucs nahtuhltahl. Cain, suc wen se emeet nahtuhltahl el eklac sie mwet imac, ac Abel suc wen se ahkluo el eklac sie mwet liyacacng sheep.

Sie lwen ah, Cain ac Abel orek mwe kihsac nuh sin Jeova. Kom etuh lah meac mwe kihsac? Kalmac pa sie kain in mwe sang sacohk. Jeova el insewowo ke mwe sang lal Abel uh, tuhsruhktuh el tiac insewowo ke mwe sang lal Cain uh. Ma inge oruh Cain elan arlac kasrkuhsrak. Jeova el sensenkuhnuhl Cain muh kasrkuhsrak lal uh ac kuh in moklacl in oruh sie ma na koluk ac. Tuhsruhktuh, Cain el tiac lohng.

Cain el fahk nuh sel Abel: ‘Fahsruh wiyuc kuht som nuh inimac uh.’ Ke pacl se ma eltahl muhkwena inimac uh, Cain el foracng nuh sel Abel ac unilyac. Meac Jeova el ac oruh nuhke ma sikyak inge? Jeova el kael Cain ke el luhsuhllah liki sucu lal ac el tiac kuh in sifwil fohlohk.

Yac oasr ma kuht kuh in lotwelah kac? Sahp kuht ac kasrkuhsrak fin oasr ma tiac fahsr fal nuhke ma kuht luhngse. Kuht fin muhtwacwacack in kasrkuhsrak, kuh fin oasr mwet suc sensenkihn kuht ke srihpen eltahl akihlen kasrkuhsrak lasr uh, kuht enenuh in suhlahklahk tulokihnyac ma inge tuh kuht in tiac oruh ma koluk uh.

Ke srihpen Abel el luhngse Jeova ac el oruh ma suwohs, Jeova el tiac kuh in muhlkuhnuhllah. God el ac sifwil ahkmoulyelack Abel ke pacl se ma El ac oraclah facluh nuhke sie pacruhtais.