Library ke Lohm in Toeni uh ac Kahsre Kuht Fuhkah?

Yac kom luhngse in research ac ahkyohkye etwacack lom ke Bible uh? Yac oasr fuhs, mwet, acn kuh kuhtwena ma in Bible ma kom nuhnkuh kac? Yac oasr pacl kom nuhnkuh lah Kahs luhn God ac kuh in kahsre kom ke ma upac lom an? Kom kuh in som liye ac orekmakihn library ke Lohm in Toeni uh.

Ma inge kuh in usot kahsruh nuhkewa ma kom enenuh in research kac. Pwacye lah tiac oasr yurum mwe rit nuhkewa ma tuhkuh in Bible me sin Mwet Loh luhn Jeova ma oreklac ke kahs lom sifacna uh. Tuhsruhktuh, inkaiyen mwe rit nahtuhsr ke pacl inge oasr ke library ke Lohm in Toeni uh. Kuhtuh sin ma kac inge pa Bible ke kain in lweng, dictionary wo se, ac kuhtuh pac puk kuh mwe kahsruh sahyac ma kom suk ac enenuh. Kom sukohsohk in tuhkuh orekmakihn library uh meet liki ac tukun toeni uh. Fin oasr computer se oakiyucki ke library inge, sahp oasr Watchtower Library se kac. Ma inge pa sie program ke computer ma oracni mwe rit nuhkewa nahtuhsr uh ac fihsracsr in orekmakihn in suk sihfac, kahs kuh kuhtwena fuhs in Bible.

Yohk kahsruh kac nuh sin mwet lili suc oasr ma kunac (students) ke toeni se inge, Moul in Christian ac Orekma in Luti. Kom kuh in orekmakihn mwe kahsruh ke library ke Lohm in Toeni uh ke pacl ma kom ac ahkolah in oruh mwe sramsram lom. Mukul lili suc kol ke toeni luhn Moul in Christian ac Orekma in Luti uh pa karihngihn library inge. El pa enenuh in liye lah mwe rit nuhkewa uh oasr tari we weacng ma sasuc ma tuhfahna tuhkuh ac ma inge in tahklac wo. El kuh mwet se ma lutlut Bible nuh sum an ac kuh in ahkkahlwemye nuh sum lah kom ac konwacack fuhkah ma kom enenuh in suk an. Tuhsruhktuh, wacngihn kuhtwena puk fihlfihllac in utuck tufoki liki Lohm in Toeni uh. Ma na kahlwem se pac lah kuht ke orekmakihn ahkwoyac puk nuhkewa ac tiac kuhret kuh sihm kac.

Bible uh ahkuhtweyac lah in eis ‘etwacack ke God,’ kuht enenuh in arlacna suk oacna “ma sacohk suc oan wihklac.” (Soakas 2:1-5) Library ke Lohm in Toeni uh ac kuh in kahsre kom in muhtwacwacack ke ma kom suk an.

• Mwe kahsruh fuhkah nuh ke research kom kuh in orekmakihn ke library ke Lohm in Toeni uh?

• Suc ac kuh in kahsre kom in etwaclah orekmakihnyacn library inge?