Meac Ac Kuh In Konweyuckyak ke Website Lasr uh?

Jesus Christ el tuh fahk nuh sin mwet tuhma lutlut lal ah: “Kowos sang kahlwem lowos in tohlack ye muhtuhn mwet uh, tuh elos in kuh in liye orekma wo lowos, ac kaksakihn Pahpah tomowos suc inkuhsrao.” (Matthew 5:16) Ke srihpac se inge, kuht orekmakihn kain in ma sasuc pucspucs ma mwet uh oraclah, wekuhnacng internet in kahsre kuht oruh ma inge. Website se lasr inge, jw.org, ahkuhtweyac ma pucspucs ke luhlahlfongi ac orekma luhn Mwet Loh luhn Jeova uh. Meac kuhtuh ip kac inge?

Top luhn Bible nuh ke kihsen siyuck ma kwacna siyuckyuck. Kom kuh in konwacack top nuh ke kihsen siyuck yohk srihpac pucspucs ma kom suk top nuh kac uh. Ke sie mwe puhpuhlyuck, mwe rit srihsrihk inge Yac Oasr Sahflahiyen Mwe Kweok? ac Pwacye lah Mwet Misac Kuh in Sifwil Moulyak? oasr pac tari ke internet uh, ahluhkwelah kahs 600. Kom kuh pac in konwacack New World Translation ma ahluhkwelah kahs 130, wi mwe kahsruh nuh ke lutlut Bible. Oasr pac puk ac mwe rit inge pahngpahng Mea Baibel el Luti Na Paye?, wekuhnacng Tower In San ac Awake! Inkaiyen mwe rit inge kuh in ritiyuck kuh lohngyuck ke internet kuh downloadiyac ke kain format ma etweyuck, oacna MP3, PDF, kuh EPUB. Kom kuh pac in printelah kuhtuh sra ke kahs luhn mwet suc luhngse. Video ke mwe rit pucspucs nahtuhsr inge oreklac pac nuh ke kain in sign language pucspucs. Kom kuh in download puhsren mwet ma riti Bible, drama ke Bible, ac on kahto ma kom kuh in engankihn ke pacl kom monglac uh.

Kuhtuh Ma In Etweyuck ke Mwet Loh luhn Jeova uh. Kuhtuh pac ma ituckyang nuh ke Web site inge pa news sasuc, video ke orekma in luti lasr fin facluh nohfohn, ma pucspucs ma sikyak nuh sin Mwet Loh luhn Jeova uh, ac kwacfeacng lasr in kahsruh mwet suc enenuh. Kom kuh in liye kuhtuh mwe ahkuhtweyac nuh ke toeni luhlahp se lasr tok uh wi telefon ac address nuh ke branch ohfuhs lasr uh.

Ke inkacnek inge, kuht ahkkahlwemye ma pwacye uh nuh sin mwet ke acn ma srenglah emeet fin facluh. Mwet ke muhtuhnfacl nuhkewa, wekuhnacng acn se ma loes emeet pahngpahng Antarctica eltahl wi pac engankihn ma inge. Kuht puhruhe “tuh kahs luhn Leum fah sa in pwengelihk” nuh ke acn nuhkewa fin facluh, nuh ke wolacna luhn God.​—Luo Thessalonica 3:1.

• Ke inkacnek fuhkah jw.org kahsruh mwet pucspucs in etwaclah ma pwacye in Bible uh liki meet ah?

• Meac kom luhngse in liye ke website lasr uh?