Kuht ac Kahsruh In Ahkwoye ac Ahknwacsnwacsye Lohm in Toeni Lasr uh Fuhkah?

Lohm in Toeni nuhkewa luhn Mwet Loh luhn Jeova uh pa acn ma mwet ke acn sacn toeni we in alu nuh sin Jeova. Pwacnacng kuht insese kac lah sie kunohkohn na sacohk ac yohk srihpac nuh ke alu lasr uh pa in wi ahknwacsnwacsye ac karihngihn in wo acn inge. Mwet nuhkewa kuh in wi ke orekma inge.

Sang kahsruh nuh ke ahknwacsnwacs tukun toeni uh. Tukun kais sie toeni, mwet lili uh engan in oruh ahknwacsnwacs srihsrihk ke Lohm in Toeni uh. Oasr pacl in ahknwacsnwacsye ma nuhkewa in wo. Mwet elder se kuh mukul lili suc kahsruh mwet elder uh pa kol orekma nuhkewa nuh ke ahknwacsnwacs uh. El ukwe sie checklist ke orekma pucspucs ma enenuh in orek. Fin fal nuh ke enenuh uh, oasr mwet suc engan in purum, insracl, kuh vacuumelah infohk uh, ituck muhnganguc, tahk siah, ahknwacsnwacsye lohm fahsr, owo window ac selnguhn, sisi kutkut kuh oruh orekma ma enenweyuck nuh lihkihnum uh. Ke pacl se in yac se, oasr lwen se ma sriyucklac nuh ke sie ahknwacsnwacs yohk. Ke kuht us tuhlihk nahtuhsr uh in wi kuht ke orekma inge, kuht lotweltahl in suhnakihn acn in alu lasr uh.​—Ecclesiastes 5:1.

Sang kahsruh nuh ke kuhtwena ma ma enenuh in ahkwoyeyuck. Ke kais sie yac, liyeyuck ma nuhkewa ke Lohm in Toeni uh, acn loac nwe ke lihkihnum uh. In fal nuh ke ma konweyuckyak inge, oasr orekma ma orek in ahkwoye ma pucspucs tuh in tiac yohk mani ma sisilac kac fin oasr ma se muhsahllah na pwacye. (Luo Chronicle 24:13; 34:10) Arlac yohk srihpac in nwacsnwacs ac wo karihngihnyen Lohm in Toeni uh, mweyen ma inge orekmakihnyuck nuh ke alu lasr nuh sin God. Ke kuht wi pac ke orekma inge, kuht ahkkahlwemye luhpan fototo lasr nuh sin Jeova ac luhngse lasr nuh ke acn in alu lasr uh. (Psalm 122:1) Ma inge oacyacpac fahkwack ma wo kacsr nuh sin mwet sahyac uh.​—Luo Corinth 6:3.

• Efuh kuh kuht enenuh in lohacng nuh ke acn in alu lasr uh?

• Meac kuhtuh oakwuck ma oreklac tuh Lohm in Toeni lasr uh in nwacsnwacs pacl nuhkewa?