ಪ್ರಶ್ನಾ ಚೌಕ
◼ ನಾವು ಯಾವ ಪ್ರಾಯೋಗಿಕ ವಿಧಗಳಲ್ಲಿ ಪಯನೀಯರರಿಗೆ ನೆರವು ನೀಡಬಹುದು?
2009ರ ಸೇವಾ ವರ್ಷದಲ್ಲಿ ಸುಮಾರು 8,00,000 ಸಹೋದರ ಸಹೋದರಿಯರು ರೆಗ್ಯುಲರ್ ಮತ್ತು ಸ್ಪೆಷಲ್ ಪಯನೀಯರರಾಗಿ ಲೋಕದಾದ್ಯಂತ ಸೇವೆಸಲ್ಲಿಸಿದರು. ರಾಜ್ಯದ ಸುವಾರ್ತೆಯನ್ನು ಹಬ್ಬಿಸಲೆಂದು ಈ ಪೂರ್ಣ ಸಮಯದ ಸೇವಕರು ತಮ್ಮ ಸಮಯ, ಶಕ್ತಿ ಮತ್ತು ಭೌತಿಕ ಸಂಪನ್ಮೂಲಗಳ ಪ್ರಥಮಫಲಗಳನ್ನು ಅರ್ಪಿಸುತ್ತಾರೆ. (ಜ್ಞಾನೋ. 3:9) ಅವರ ಪ್ರಯತ್ನಗಳಿಂದ ಯೆಹೋವನಿಗೆಷ್ಟು ಸಂತೋಷವಾಗುತ್ತಿರಬೇಕು! ನಾವು ಯಾವ ವಿಧಗಳಲ್ಲಿ ಯೆಹೋವನ ನೋಟವನ್ನು ಪ್ರತಿಬಿಂಬಿಸಬಹುದು? ತಮ್ಮ ಸೇವೆಯಲ್ಲಿ ಆನಂದ ಕಂಡುಕೊಂಡು ಅದರಲ್ಲಿ ಮುಂದುವರಿಯುವಂತೆ ನಮ್ಮ ಪಯನೀಯರರಿಗೆ ಹೇಗೆ ಸಹಾಯ ಮಾಡಬಹುದು?
ನಾವಾಡುವ ಸಂದರ್ಭೋಚಿತ ಮಾತುಗಳು ಪಯನೀಯರ್ ಸೇವೆಯನ್ನು ಮುಂದುವರಿಸುವಂತೆ ಖಂಡಿತ ಅವರನ್ನು ಪ್ರೇರಿಸಬಹುದು. (ಜ್ಞಾನೋ. 25:11) ಶುಶ್ರೂಷೆಯಲ್ಲಿ ಅವರೊಂದಿಗೆ ಕೆಲಸಮಾಡಲು ಸಾಧ್ಯವಾಗುವಂತೆ ನಾವು ನಮ್ಮ ಶೆಡ್ಯೂಲ್ನಲ್ಲಿ ಹೊಂದಾಣಿಕೆಗಳನ್ನು ಮಾಡಬಲ್ಲೆವೊ? ಜೊತೆಯಾಗಿ ಸೇವೆ ಮಾಡಲಿಕ್ಕಿರುವಾಗ, ಅವರ ವಾಹನದಲ್ಲಿ ಹೋಗುವ ಬದಲು ನಿಮ್ಮ ವಾಹನದಲ್ಲಿ ಹೋಗಬಹುದು ಅಥವಾ ಅವರ ಪ್ರಯಾಣದ ವೆಚ್ಚಗಳನ್ನು ನೀವೇ ಭರಿಸಬಹುದು. ಒಂದುವೇಳೆ ನಾವು ಅವರ ವಾಹನದಲ್ಲಿ ಪ್ರಯಾಣಿಸುವುದಾದರೆ, ಅವರ ಖರ್ಚುವೆಚ್ಚಗಳನ್ನು ಭರಿಸಲಿಕ್ಕಾಗಿ ಹಣದ ಸಹಾಯ ಸಹ ಮಾಡಬಹುದು. (1 ಕೊರಿಂ. 13:5; ಫಿಲಿ. 2:4) ಅಲ್ಲದೆ ಪಯನೀಯರರಿಗೆ ಅತಿಥಿಸತ್ಕಾರ ತೋರಿಸುವ ಮೂಲಕ ಹಾಗೂ ಕೆಲವೊಮ್ಮೆ ಅವರನ್ನು ಊಟಕ್ಕೆ ಕರೆಯುವ ಮೂಲಕ ನಮ್ಮ ಪ್ರೀತಿಪೂರ್ವಕ ಬೆಂಬಲವನ್ನು ವ್ಯಕ್ತಪಡಿಸಬಲ್ಲೆವು.—1 ಪೇತ್ರ 4:8, 9.
ತನ್ನ ರಾಜ್ಯವನ್ನು ಪ್ರಥಮವಾಗಿ ಹುಡುಕುವವರ ಆವಶ್ಯಕತೆಗಳನ್ನು ಯೆಹೋವನು ಪೂರೈಸುವನು ಎಂಬ ಖಾತ್ರಿಯನ್ನು ಶಾಸ್ತ್ರಗ್ರಂಥ ಕೊಡುತ್ತದೆ. (ಕೀರ್ತ. 37:25; ಮತ್ತಾ. 6:33) ಆತನದನ್ನು ಮಾಡುವ ಒಂದು ವಿಧವು ನಮ್ಮ ಪ್ರೀತಿಯ ಕ್ರೈಸ್ತ ಸಹೋದರತ್ವದ ಮೂಲಕವೇ. (1 ಯೋಹಾ. 3:16-18) ಆದರೆ ತಮ್ಮ ಆರ್ಥಿಕ ಅಗತ್ಯಗಳನ್ನು ಇತರರು ಪೂರೈಸಬೇಕೆಂದು ಪಯನೀಯರರು ಖಂಡಿತ ನಿರೀಕ್ಷಿಸುವುದಿಲ್ಲ. ಅಲ್ಲದೆ ನಿರ್ದಿಷ್ಟ ವಿಷಯಗಳು ತಮಗೆ ಬೇಕಾಗಿರುವಾಗ ಅವರು ಅವುಗಳ ಬಗ್ಗೆ ಇತರರಲ್ಲಿ ಹೇಳಿಕೊಳ್ಳಲಿಕ್ಕಿಲ್ಲ. ಆದಾಗ್ಯೂ ನಂಬಿಗಸ್ತ ಪಯನೀಯರರಿಗೆ ನಾವು ಸಹಾಯ ಮಾಡಬಹುದು ಮತ್ತು ಗಮನಿಸುವವರಾಗಿರುವ ಮೂಲಕ ಪ್ರಾಯೋಗಿಕ ವಿಧಗಳಲ್ಲಿ “ಅವರ ಕೊರತೆಯನ್ನು ನೀಗಿಸಬಹುದು.”—2 ಕೊರಿಂ. 8:14, 15.
ಮೊದಲನೇ ಶತಮಾನದ ಕೆಂಕ್ರೆಯ ಸಭೆಯಲ್ಲಿದ್ದ ಹುರುಪಿನ ಸೌವಾರ್ತಿಕಳಾದ ಫೊಯಿಬೆ ರೋಮ್ಗೆ ಹೋದಾಗ ಪೌಲನು ಅಲ್ಲಿರುವ ಸಹೋದರರನ್ನು ಪ್ರೋತ್ಸಾಹಿಸುತ್ತಾ, “ಅವಳನ್ನು ಪವಿತ್ರ ಜನರಿಗೆ ತಕ್ಕ ಹಾಗೆ ಕರ್ತನಲ್ಲಿ ಬರಮಾಡಿಕೊಂಡು ಅವಳಿಗೆ ಅಗತ್ಯವಿರುವ ಯಾವುದೇ ಸಹಾಯವನ್ನು ಮಾಡಿರಿ” ಅಂದನು. (ರೋಮ. 16:1, 2) ನಮ್ಮ ಸಭೆಯಲ್ಲೂ ಎಡೆಬಿಡದೆ ಸುವಾರ್ತೆಯನ್ನು ಸಾರುತ್ತಿರುವ ರೆಗ್ಯುಲರ್ ಮತ್ತು ಸ್ಪೆಷಲ್ ಪಯನೀಯರರಿಗೆ ಅಂಥದ್ದೇ ಪ್ರೀತಿಪೂರ್ವಕ ಬೆಂಬಲವನ್ನು ಕೊಡುವ ಅವಕಾಶ ನಮಗೂ ಇದೆ.—ಅ. ಕಾ. 5:42.