ថ្ងៃទី២០ ដល់ថ្ងៃទី២៦ ខែមេសា ឆ្នាំ២០២៦
ចម្រៀងលេខ៤៩ ធ្វើឲ្យព្រះយេហូវ៉ាមានចិត្តត្រេកអរ
ចូរបន្តឈានទៅមុខដើម្បីទទួលការជ្រមុជទឹក
«ឥឡូវនេះគឺជាគ្រាដែលលោកពេញចិត្ត»។—២កូ. ៦:២
ចំណុចផ្ដោត
ឥឡូវនេះគឺជាពេលឲ្យយើងបណ្ដុះឲ្យមានចំណងមិត្តភាពជិតស្និទ្ធជាមួយនឹងព្រះយេហូវ៉ា ហើយទទួលការជ្រមុជទឹក។
១. (ក) តើយើងទទួលប្រយោជន៍អ្វីខ្លះពីការទទួលការជ្រមុជទឹក? (ខ) តើយើងនឹងពិចារណាអ្វីក្នុងអត្ថបទនេះ?
តើអ្នកបានប្រគល់ខ្លួនជូនព្រះយេហូវ៉ា ហើយទទួលការជ្រមុជទឹកហើយឬនៅ? បើអ្នកបានធ្វើដូច្នេះមែន នេះមានន័យថាអ្នកបានសុំព្រះរួចហើយផ្ដល់ឲ្យអ្នកនូវសមត្ថភាពវិនិច្ឆ័យដែលមិនផ្ដន្ទាទោស។ (១ពេ. ៣:២១) យ៉ាងនេះ អ្នកបានទុកគំរូល្អដល់បងប្អូនវ័យក្មេង និងអ្នកថ្មីក្នុងក្រុមជំនុំរបស់អ្នក។ នេះគឺជាការសម្រេចចិត្តដ៏ល្អណាស់! ប៉ុន្តែ ចុះយ៉ាងណាបើអ្នកមិនទាន់ទទួលការជ្រមុជទឹក? អ្នកច្បាស់ជាស្រឡាញ់ព្រះយេហូវ៉ា ហើយចង់ធ្វើតាមបំណងប្រាថ្នារបស់លោក។ អ្នកដឹងថា ការទទួលការជ្រមុជទឹកគឺសំខាន់ចាំបាច់ដើម្បីឲ្យអ្នកទទួលការអភ័យទោសចំពោះការខុសឆ្គង ហើយទទួលការពេញចិត្តពីព្រះយេហូវ៉ា។ (សកម្ម. ២:៣៨-៤០) ប៉ុន្តែ អ្នកប្រហែលជានៅតែស្ទាក់ស្ទើរទទួលការជ្រមុជទឹក។ តើអ្វីអាចជួយអ្នក? ក្នុងអត្ថបទនេះ យើងនឹងពិចារណា (១) មូលហេតុដែលបុគ្គលខ្លះស្ទាក់ស្ទើរទទួលការជ្រមុជទឹក (២) មូលហេតុដែលជាការឈ្លាសវៃឲ្យយើងចាំជាប់ជានិច្ចនូវការមកដល់នៃទីបញ្ចប់ និង(៣) ប្រយោជន៍ដែលអ្នកនឹងទទួលពីការខំប្រឹងឈានទៅរកការជ្រមុជទឹកដោយមិនបង្អែបង្អង់។
មូលហេតុដែលបុគ្គលខ្លះស្ទាក់ស្ទើរទទួលការជ្រមុជទឹក
២. ហេតុអ្វីបុគ្គលខ្លះស្ទាក់ស្ទើរទទួលការជ្រមុជទឹក?
២ បុគ្គលខ្លះស្ទាក់ស្ទើរទទួលការជ្រមុជទឹកដោយសារពួកគេភ័យខ្លាច។ ជាឧទាហរណ៍ ទោះជាពួកគេចង់បម្រើព្រះយេហូវ៉ាក្ដី ពួកគេខ្លាចថាពួកគេមិនអាចធ្វើឲ្យព្រះពេញចិត្ត។ បើអ្នកមានអារម្មណ៍បែបនេះ សូមពិនិត្យមើលខគម្ពីរផ្សេងៗដែលអាចធ្វើឲ្យអ្នកជឿជាក់ថា ព្រះយេហូវ៉ាមិនតម្រូវឲ្យអ្នកធ្វើជាមនុស្សល្អឥតខ្ចោះ ហើយថាលោកពេញចិត្តពេលអ្នកខំអស់ពីសមត្ថភាពដើម្បីបម្រើលោក។ (ចសព. ១០៣:១៣, ១៤; កូឡ. ៣:២៣) ម្យ៉ាងទៀត បើអ្នកខ្លាចការប្រឆាំង សូមសុំព្រះយេហូវ៉ាជួយអ្នកឲ្យមានទំនុកចិត្តដូចអ្នកតែងចម្រៀងសរសើរព្រះដែលបានសរសេរថា៖ «ព្រះយេហូវ៉ានៅខាងខ្ញុំ ខ្ញុំនឹងមិនខ្លាចឡើយ។ តើមនុស្សអាចធ្វើអ្វីដល់ខ្ញុំ?»។—ចសព. ១១៨:៦
៣. តើរបៀបគិតគូរអ្វីប្រហែលជារារាំងបុគ្គលខ្លះពីការទទួលការជ្រមុជទឹក? (សូមមើលរូបភាពផងដែរ)
៣ បុគ្គលខ្លះដែលស្រឡាញ់ព្រះយេហូវ៉ាពន្យារពេលទទួលការជ្រមុជទឹក ដោយសារពួកគេគិតថាពួកគេខ្វះចំណេះ។ ប៉ុន្តែ តើអ្នកត្រូវមានចំណេះច្រើនប៉ុនណាដើម្បីទទួលការជ្រមុជទឹក? សូមគិតអំពីឧទាហរណ៍មួយក្នុងគម្ពីរ។ ក្នុងអំឡុងពេលដែលសាវ័កប៉ូលនិងស៊ីឡាសជាប់គុក មានរញ្ជួយដីធ្វើឲ្យគុករង្គោះរង្គើ។ ក្រោយមក សាវ័កប៉ូលនិងស៊ីឡាសបានផ្សព្វផ្សាយដល់ឆ្មាំគុកនិងពួកអ្នកផ្ទះរបស់គាត់។ ឆ្មាំគុកនិងក្រុមគ្រួសាររបស់គាត់ទំនងជាយល់ថា ព្រះបានធ្វើអព្ភូតហេតុដើម្បីរំដោះអ្នកបម្រើរបស់លោក។ នៅយប់នោះ ពួកគេក៏បានរៀនអ្វីដ៏សំខាន់អំពីព្រះយេហូវ៉ានិងលោកយេស៊ូដែរ។ ជាលទ្ធផល នោះបានជំរុញចិត្តពួកគេឲ្យ«ទទួលការជ្រមុជទឹកដោយមិនបង្អែបង្អង់»។ (សកម្ម. ១៦:២៥-៣៣) ចុះអ្នកវិញ? បើអ្នកស្គាល់ព្រះយេហូវ៉ា ស្រឡាញ់លោកអស់ពីដួងចិត្ត មានចំណេះពីសេចក្ដីបង្រៀនបឋមក្នុងគម្ពីរ បានប្រែចិត្តពីការខុសឆ្គង ហើយតាំងចិត្តបន្តរស់នៅស្របតាមខ្នាតតម្រារបស់លោក នេះមានន័យថាអ្នកបានត្រៀមខ្លួនជាស្រេចដើម្បីទទួលការជ្រមុជទឹក។—ម៉ាក. ១២:៣០
ប៉ូលនិងស៊ីឡាសបានផ្សព្វផ្សាយដល់ឆ្មាំគុកនិងក្រុមគ្រួសាររបស់គាត់ ហើយជាលទ្ធផល ពួកគេ«បានទទួលការជ្រមុជទឹកដោយមិនបង្អែបង្អង់» (សូមមើលវគ្គ៣)
៤. តើមានអ្វីផ្សេងទៀតដែលធ្វើឲ្យបុគ្គលខ្លះស្ទាក់ស្ទើរទទួលការជ្រមុជទឹក? (សូមមើលរូបភាពផងដែរ)
៤ បុគ្គលខ្លះចង់ធ្វើឲ្យព្រះពេញចិត្ត តែពួកគេផ្ដោតអារម្មណ៍ទៅលើអ្វីដែលពួកគេត្រូវលះបង់។ ពិតណាស់ គឺជាការឈ្លាសវៃឲ្យអ្នកគិតយ៉ាងដិតដល់អំពីការសម្រេចចិត្តនីមួយៗថានោះនឹងប៉ះពាល់យ៉ាងណាដល់ជីវិតរបស់អ្នក។ (លូក. ១៤:២៧-៣០) ប៉ុន្តែ បុគ្គលខ្លះគិតច្រើនពេកអំពីការលះបង់ដែលពួកគេត្រូវធ្វើដើម្បីបម្រើព្រះ។ នេះជាអ្វីដែលបានកើតឡើងដល់បងស្រីខាន់ឌីស។ ពេលគាត់នៅក្មេង គាត់បានរៀនអំពីអ្វីដែលបុគ្គលម្នាក់គួរធ្វើដើម្បីនាំឲ្យព្រះពេញចិត្ត។ ប៉ុន្តែ គាត់មិនបានធ្វើតាមអ្វីដែលគាត់បានរៀននៅពេលនោះទេ។ ក្រោយមក ពេលគាត់ពេញវ័យ គាត់ចាប់ផ្ដើមសិក្សាគម្ពីរម្ដងទៀត។ បងខាន់ឌីសនិយាយថា៖ «ខ្ញុំដឹងថា ខ្ញុំគួរធ្វើអ្វីដើម្បីឲ្យព្រះយេហូវ៉ាពេញចិត្ត។ ប៉ុន្តែ ខ្ញុំស្ទាក់ស្ទើរដោយសារខ្ញុំចូលចិត្តអ្វីៗដែលខ្ញុំធ្វើក្នុងពិភពលោក។ ដូច្នេះ ការលះចោលអ្វីទាំងនោះនឹងពិបាកណាស់សម្រាប់ខ្ញុំ»។ ចំណែកឯបុគ្គលឯទៀត ពួកគេបារម្ភថាអ្នកដែលទទួលការជ្រមុជទឹកត្រូវមានខ្នាតតម្រាខ្ពង់ខ្ពស់។ ពួកគេបារម្ភថា ក្រោយពីទទួលការជ្រមុជទឹក ពួកគេនឹងប្រព្រឹត្តអំពើខុសឆ្គងធ្ងន់ធ្ងរ ហើយត្រូវដកចេញពីក្រុមជំនុំ។ បើអ្នកបារម្ភអំពីអ្វីទាំងនេះ តើអ្នកអាចធ្វើអ្វី?
បុគ្គលខ្លះដែលចង់ធ្វើឲ្យព្រះពេញចិត្ត បារម្ភអំពីការលះបង់ដែលពួកគេត្រូវធ្វើដើម្បីបម្រើលោក (សូមមើលវគ្គ៤)
៥. តើយើងគួរផ្ដោតអារម្មណ៍ទៅលើអ្វីពេលយើងពិចារណាថាគួរទទួលការជ្រមុជទឹកឬយ៉ាងណា? (ម៉ាថាយ ១៣:៤៤-៤៦)
៥ សូមគិត ពេលយើងចង់ទិញរបស់មួយ យើងមិនគ្រាន់តែមើលតម្លៃដែលត្រូវបង់ដើម្បីបានរបស់នោះប៉ុណ្ណោះទេ តែយើងក៏គិតអំពីប្រយោជន៍ដែលយើងទទួលដែរ។ តាមធម្មតា បើរបស់មួយមានប្រយោជន៍ច្រើនជាងអ្វីដែលយើងត្រូវចំណាយ នោះយើងនឹងចង់ទិញរបស់នោះភ្លាមៗ។ ស្រដៀងគ្នាដែរ ពេលយើងគិតពិចារណាថាគួរជ្រមុជទឹកឬយ៉ាងណា យើងមិនគ្រាន់តែគួរផ្ដោតអារម្មណ៍ទៅលើការលះបង់ដែលយើងត្រូវធ្វើប៉ុណ្ណោះទេ តែយើងក៏ត្រូវគិតអំពីប្រយោជន៍ជាច្រើនដែលមកពីការមានចំណងមិត្តភាពជាមួយនឹងព្រះយេហូវ៉ាដែរ។ លោកយេស៊ូប្រើឧទាហរណ៍ពីរដើម្បីបង្រៀនអំពីចំណុចនេះ។ (សូមអាន ម៉ាថាយ ១៣:៤៤-៤៦) ក្នុងឧទាហរណ៍នីមួយៗ មានបុរសម្នាក់ដែលពេញចិត្តលក់អ្វីៗទាំងអស់ដែលគាត់មានដើម្បីទិញរបស់មានតម្លៃដែលគាត់បានរកឃើញ។ ចុះយ៉ាងណាអ្នកវិញ? អ្នកក៏បានរកឃើញអ្វីដែលមានតម្លៃខ្លាំងណាស់ដែរ ពោលគឺសេចក្ដីពិតអំពីរាជាណាចក្រព្រះ។ ដូច្នេះ បើអ្នកស្ទាក់ស្ទើរធ្វើការផ្លាស់ប្ដូរដែលចាំបាច់ដើម្បីទទួលការជ្រមុជទឹក សូមគិតយ៉ាងដិតដល់អំពីឧទាហរណ៍របស់លោកយេស៊ូ។ អ្នកប្រហែលជាអាចសួរខ្លួនថា ‹តើខ្ញុំពិតជាជឿជាក់ថាដំណឹងល្អអំពីរាជាណាចក្រមានតម្លៃខ្លាំងឬទេ? តើខ្ញុំឲ្យតម្លៃចំណងមិត្តភាពជាមួយនឹងព្រះយេហូវ៉ា សេចក្ដីសង្ឃឹមដែលលោកផ្ដល់ឲ្យខ្ញុំ និងបងប្អូនរួមជំនឿដែលស្រឡាញ់ខ្ញុំឬទេ?›។ ចម្លើយរបស់អ្នកចំពោះសំណួរទាំងនោះអាចជួយអ្នកឲ្យដឹងថា អ្នកត្រូវធ្វើអ្វីដើម្បីសម្រេចចិត្តទទួលការជ្រមុជទឹក។
៦. តើអ្វីនឹងជួយយើងឲ្យធ្វើតាមអ្វីដែលយើងរៀន?
៦ ក្នុងឧទាហរណ៍របស់លោកយេស៊ូស្ដីអំពីអ្នកសាបព្រោះ លោកបញ្ជាក់ថាមនុស្សម្នាក់ៗរីកចម្រើនឬមិនរីកចម្រើនក្នុងសេចក្ដីពិត គឺអាស្រ័យលើចិត្តរបស់ពួកគេ។ លោកយេស៊ូបានបង្ហាញថា បុគ្គលខ្លះនឹង«មានចិត្តល្អនិងស្មោះត្រង់» ហើយស្ដាប់តាមដំណឹងល្អអំពីរាជាណាចក្រព្រះ។ (លូក. ៨:៥-១៥) បើអ្នកបារម្ភថាអ្នកមានចិត្តពីរ សូមកុំឈប់ព្យាយាមឡើយ។ ដោយមានជំនួយពីព្រះ អ្នកអាច«មានចិត្តថ្មី»គឺចិត្តដែលនឹងធ្វើតាមការណែនាំពីលោក។ ក្នុងការអធិដ្ឋាន សូមសុំព្រះយេហូវ៉ាជួយអ្នកកុំឲ្យមានចិត្តរឹងដូចថ្ម ដើម្បីឲ្យដំណឹងល្អអំពីរាជាណាចក្រអាចដុះលូតលាស់ឡើងក្នុងចិត្តរបស់អ្នក។—អេគ. ១៨:៣១; ៣៦:២៦
៧-៨. ហេតុអ្វីបុគ្គលវ័យក្មេងខ្លះមិនរីកចម្រើនរហូតដល់ទទួលការជ្រមុជទឹក? (សូមមើលរូបភាពផងដែរ)
៧ បុគ្គលវ័យក្មេងខ្លះដែលស្រឡាញ់ព្រះយេហូវ៉ាមិនបានរីកចម្រើនរហូតដល់ទទួលការជ្រមុជទឹកទេ ដោយសារឥទ្ធិពលពីអ្នកឯទៀត។ ជាឧទាហរណ៍ គ្រូខ្លះនៅសាលាប្រហែលជាឲ្យយោបល់សិស្សឲ្យមានទស្សនៈទូលំទូលាយអំពីខ្នាតតម្រាសីលធម៌ សូម្បីតែនោះបំពានខ្នាតតម្រារបស់ព្រះក៏ដោយ។ ប៉ុន្តែ យោបល់បែបនោះអាចនាំឲ្យមានអន្តរាយ។ (ចសព. ១:១, ២; សុភ. ៧:១-៥) អ្នកអាចជៀសវាងពីគ្រោះថ្នាក់នេះ ដោយធ្វើតាមគំរូរបស់អ្នកតែងចម្រៀងសរសើរព្រះដែលបានប្រាប់ព្រះយេហូវ៉ាថា៖ «ខ្ញុំមានគំនិតយល់ធ្លុះជ្រៅច្រើនជាងគ្រូទាំងអស់របស់ខ្ញុំ ព្រោះខ្ញុំរំពឹងគិតអំពីសេចក្ដីរំលឹករបស់លោក»។—ចសព. ១១៩:៩៩
៨ តាមមើលទៅ ឪពុកម្ដាយខ្លះដែលជាសាក្សីបានធ្វើឲ្យកូនរបស់ពួកគេស្ទាក់ស្ទើរទទួលការជ្រមុជទឹក។ ជាឧទាហរណ៍ ឪពុកម្ដាយខ្លះផ្ដោតអារម្មណ៍ខ្លាំងពេកទៅលើការអប់រំនិងអាជីពរបស់កូន ឬពួកគេប្រហែលជាមិនបានជួយកូនរបស់ពួកគេឲ្យកំណត់គោលដៅក្នុងកិច្ចបម្រើព្រះទេ។ ចុះយ៉ាងណាប្អូនវិញ? តើប្អូនមានអារម្មណ៍ថាឪពុកម្ដាយរបស់ប្អូនអាចជួយប្អូនឲ្យរីកចម្រើនច្រើនជាងឬទេ? បើដូច្នេះ សូមនិយាយជាមួយនឹងពួកគេ។ សូមចាំថា មិនថាប្អូនមានអាយុប៉ុនណាក៏ដោយ ប្អូនអាចទៅជាមិត្តសម្លាញ់របស់ព្រះយេហូវ៉ា។—សុភ. ២០:១១
សូមមានអារម្មណ៍ស្រួលនិយាយជាមួយនឹងឪពុកម្ដាយរបស់អ្នកអំពីការទទួលការជ្រមុជទឹក (សូមមើលវគ្គ៨)
៩. ហេតុអ្វីបុគ្គលខ្លះបង្អែបង្អង់ទទួលការជ្រមុជទឹក?
៩ បុគ្គលខ្លះដែលមានគុណសម្បត្តិគ្រប់គ្រាន់ដើម្បីទទួលការជ្រមុជទឹក ប្រហែលជាបង្អែបង្អង់ដោយសារពួកគេមានអារម្មណ៍ថាត្រូវចាំសិន។ ជាឧទាហរណ៍ មិត្តភក្ដិឬសមាជិកក្រុមគ្រួសាររបស់ពួកគេប្រហែលជាសុំពួកគេឲ្យចាំទទួលការជ្រមុជទឹកនៅថ្ងៃដូចគ្នា។ ពិតមែនតែអ្នកអាចទទួលការជ្រមុជទឹកនៅថ្ងៃដំណាលគ្នានឹងបុគ្គលដែលអ្នកស្រឡាញ់ តែតើនោះគួរធ្វើឲ្យអ្នកបង្អែបង្អង់ទទួលការជ្រមុជទឹកឬទេ? សូមចាំថា ការប្រគល់ខ្លួនជូនព្រះគឺជាសេចក្ដីសន្យាដែលអ្នកផ្ទាល់ធ្វើជាមួយនឹងលោក។ ការជ្រមុជទឹករបស់អ្នកមិនគួរផ្អែកលើអ្វីដែលអ្នកឯទៀតធ្វើនោះទេ។—រ៉ូម ១៤:១២
ហេតុអ្វីគឺសំខាន់ឲ្យយើងចាំជាប់ជានិច្ចនូវការមកដល់នៃទីបញ្ចប់?
១០. ហេតុអ្វីបុគ្គលខ្លះមិនធ្វើការផ្លាស់ប្ដូរដែលចាំបាច់ដើម្បីទទួលការជ្រមុជទឹក?
១០ បន្ថែមទៅទៀត បុគ្គលខ្លះប្រហែលជាស្ទាក់ស្ទើរក្នុងការធ្វើការកែប្រែផ្សេងៗដើម្បីទទួលការជ្រមុជទឹក ដោយសាពួកគេគិតថា ពួកគេនៅមានពេលច្រើនមុនទីបញ្ចប់មកដល់។ ប៉ុន្តែ តើការគិតដូច្នេះគឺត្រឹមត្រូវឬទេ? លោកយេស៊ូបានព្រមានពួកអ្នកកាន់តាមលោកថា៖ «អ្នករាល់គ្នាត្រូវត្រៀមខ្លួនជានិច្ច . . . ពីព្រោះកូនមនុស្សនឹងមកនៅម៉ោងដែលអ្នករាល់គ្នាមិននឹកស្មាន»។—លូក. ១២:៤០
១១. យោងទៅតាមចម្រៀងសរសើរព្រះ ១១៩:៦០ កាលដែលយើងកាន់តែស្គាល់ព្រះយេហូវ៉ា តើយើងមានអារម្មណ៍យ៉ាងណាចំពោះបញ្ញត្តិរបស់លោក?
១១ ការប្រគល់ខ្លួនជូនព្រះយេហូវ៉ាត្រូវតែផុសចេញពីសេចក្ដីស្រឡាញ់។ កាលដែលយើងកាន់តែស្គាល់ព្រះដែលប្រកបដោយសេចក្ដីស្រឡាញ់ យើងនឹងកាន់តែស្រឡាញ់បញ្ញត្តិរបស់លោក ហើយធ្វើតាមបញ្ញត្តិនោះដោយមិនបង្អែបង្អង់។ (សូមអាន ចម្រៀងសរសើរព្រះ ១១៩:៦០) យ៉ាកុបបានលើកឡើងអំពីមូលហេតុសំខាន់មួយទៀតឲ្យយើងធ្វើតាមបញ្ញត្តិរបស់ព្រះយេហូវ៉ាដោយមិនបង្អែបង្អង់។ គាត់និយាយថា គ្មានយើងណាម្នាក់ដឹងអំពីអ្វីដែលនឹងកើតឡើងនៅថ្ងៃស្អែកនោះទេ។ ដូច្នេះ យើងត្រូវ«ធ្វើអ្វីដែលត្រឹមត្រូវ»ជារៀងរាល់ថ្ងៃ គឺថាធ្វើអ្វីដែលយើងដឹងថាព្រះយេហូវ៉ាចង់ឲ្យយើងធ្វើ។—យ៉ា. ៤:១៣-១៧
១២. តើយើងអាចរៀនអ្វីពីឧទាហរណ៍របស់លោកយេស៊ូស្ដីអំពីចម្ការទំពាំងបាយជូរ?
១២ សូមគិតអំពីឧទាហរណ៍របស់លោកយេស៊ូស្ដីអំពីចម្ការទំពាំងបាយជូរ។ ក្នុងឧទាហរណ៍នោះ លោកបានពន្យល់ថា កម្មករខ្លះធ្វើការត្រឹមតែមួយម៉ោងប៉ុណ្ណោះ ហើយនៅតែទទួលប្រាក់ឈ្នួលដូចកម្មករដែលបានធ្វើការពេញមួយថ្ងៃ។ ហេតុអ្វីកម្មករដែលធ្វើការតែមួយម៉ោងមិនបានមកធ្វើការមុនម៉ោងនោះ? ពួកគេនិយាយថា៖ «ពីព្រោះគ្មានអ្នកណាជួលយើងទេ»។ ដូច្នេះ កម្មករទាំងនោះមិនមែនមិនចង់ធ្វើការពេញមួយថ្ងៃទេ គ្រាន់តែមិនមានអ្នកណាជួលពួកគេឲ្យធ្វើការប៉ុណ្ណោះ។ ពេលពួកគេបានត្រូវហៅឲ្យធ្វើការ ពួកគេចូលធ្វើការភ្លាមៗ។ (ម៉ាថ. ២០:១-១៦) នៅសព្វថ្ងៃនេះ លោកយេស៊ូបានអញ្ជើញយើងឲ្យធ្វើជាអ្នកកាន់តាមលោក ហើយចូលរួមក្នុងកិច្ចការរាជាណាចក្រ។ ដូច្នេះ កាលដែលយើងឮសំណូមពររបស់លោក យើងគួរធ្វើតាមភ្លាមៗ។
១៣. តើយើងអាចរៀនអ្វីពីប្រពន្ធរបស់ឡុត?
១៣ បុគ្គលខ្លះបង្អែបង្អង់ធ្វើការផ្លាស់ប្ដូរផ្សេងៗដើម្បីបម្រើព្រះយេហូវ៉ា ដោយសារពួកគេគិតថាពួកគេអាចធ្វើការផ្លាស់ប្ដូរទាំងនោះភ្លាមៗមុនទីបញ្ចប់មកដល់។ ប៉ុន្តែ បើអ្នកបង្អែបង្អង់យូរ អ្នកនឹងកាន់តែពិបាកធ្វើការផ្លាស់ប្ដូរដើម្បីបម្រើព្រះយេហូវ៉ា។ លោកយេស៊ូដឹងអំពីរឿងនេះ ហើយលោកបានព្រមានពួកអ្នកកាន់តាមលោកថា៖ «ចូរនឹកចាំអំពីប្រពន្ធរបស់ឡុត»។ (លូក. ១៧:៣១-៣៥) ប្រពន្ធរបស់ឡុតដឹងថា ព្រះយេហូវ៉ានឹងបំផ្លាញក្រុងសូដុមនិងក្រុងកូម៉ូរ៉ាភ្លាមៗ។ ប៉ុន្តែ តាមមើលទៅ គាត់មិនសុខចិត្តលះចោលទ្រព្យសម្បត្តិរបស់គាត់ទេ។ (ដក. ១៩:២៣-២៦) កំណត់ហេតុនេះក៏រំលឹកយើងថាឱកាសឲ្យមនុស្សទទួលសេចក្ដីសង្គ្រោះគឺមានកំណត់។ ពេលថ្ងៃកំណត់របស់ព្រះមកដល់ ពួកគេលែងមានឱកាសទៀតហើយ។—លូក. ១៣:២៤, ២៥
១៤. តើទំនាយក្នុងគម្ពីរអំពីទីបញ្ចប់គួរមានឥទ្ធិពលយ៉ាងណាមកលើអ្នក?
១៤ ពីមួយថ្ងៃទៅមួយថ្ងៃ ព្រឹត្តិការណ៍ដែលកើតឡើងក្នុងពិភពលោកនេះកំពុងសម្រេចទំនាយក្នុងគម្ពីរអំពីទីបញ្ចប់នៃរបៀបរបបពិភពលោកនេះ។ ទោះជាអ្នកមិនទទួលឥទ្ធិពលចំៗពីព្រឹត្តិការណ៍ទាំងនោះក្ដី ការឃើញអ្វីដែលកំពុងកើតឡើងពីកន្លែងមួយទៅកន្លែងមួយ គួរជំរុញចិត្តអ្នកឲ្យធ្វើការផ្លាស់ប្ដូរដែលចាំបាច់ដើម្បីទទួលការជ្រមុជទឹកដោយមិនបង្អែបង្អង់។ សូមគិតអំពីអ្វីដែលបានកើតឡើងនៅសតវត្សរ៍ទី១។ សាវ័កពេត្រុសបានដាស់តឿនគ្រិស្តសាសនិកឲ្យ«ដឹងខុសត្រូវជានិច្ច»។ ហេតុអ្វីបានជាគាត់និយាយដូច្នោះ? ពីព្រោះ«ទីបញ្ចប់នៃអ្វីៗទាំងអស់គឺជិតដល់ហើយ»។ (១ពេ. ៤:៧) ពាក្យ«ទីបញ្ចប់»ក្នុងខនោះ ទំនងជាសំដៅទៅលើទីបញ្ចប់នៃរបៀបរបបជនជាតិយូដា។ គ្រិស្តសាសនិកដែលបានទទួលសំបុត្រពីពេត្រុស រស់នៅឆ្ងាយពីក្រុងយេរូសាឡិម ដូច្នេះពួកគេមិនទទួលឥទ្ធិពលចំៗពីការបំផ្លាញក្រុងនោះទេ។ (១ពេ. ១:១) ប៉ុន្តែ កាលដែលពួកគេឃើញទំនាយនោះសម្រេច នោះពង្រឹងទំនុកចិត្តពួកគេថា សេចក្ដីសន្យាទាំងអស់ទៀតរបស់ព្រះយេហូវ៉ានឹងសម្រេច។ ស្រដៀងគ្នាដែរ កាលដែលអ្នកឃើញទំនាយដែលជាប់ទាក់ទងនឹងទីបញ្ចប់កំពុងសម្រេច នេះនឹងជំរុញចិត្តអ្នកឲ្យឈានទៅរកការជ្រមុជទឹក។
១៥. តើយើងអាចត្រៀមខ្លួនយ៉ាងដូចម្ដេចសម្រាប់ថ្ងៃរបស់ព្រះយេហូវ៉ា? (ពេត្រុសទី២ ៣:១០-១៣)
១៥ ក្នុងសំបុត្រទីពីររបស់ពេត្រុស គាត់ពន្យល់អំពីរបៀបដែលយើងអាចត្រៀមខ្លួនសម្រាប់«ថ្ងៃរបស់ព្រះយេហូវ៉ា» ពោលគឺទីបញ្ចប់នៃរបៀបរបបពិភពលោកនេះ។ ចំពោះគ្រិស្តសាសនិកនៅសតវត្សរ៍ទី១ ថ្ងៃនោះគឺនៅយូរទៀត។ ទោះជាយ៉ាងនោះក៏ដោយ ពេត្រុសបានប្រាប់ពួកគេឲ្យ«ចាំជាប់ជានិច្ច»ឬ«ចង់ឃើញ[ថ្ងៃនោះ]យ៉ាងខ្លាំង»។ (សូមអាន ពេត្រុសទី២ ៣:១០-១៣; កំ.ស.) យើងអាចចាំជាប់ជានិច្ចនូវថ្ងៃនោះ ដោយប្រុងប្រៀបនិងទន្ទឹងរង់ចាំឲ្យថ្ងៃនោះមកដល់។ យើងបង្ហាញថាយើងទន្ទឹងរង់ចាំថ្ងៃនោះ ដោយធ្វើជា«មនុស្សដែលមានការប្រព្រឹត្តបរិសុទ្ធ ហើយធ្វើអ្វីដែលបង្ហាញពីភក្ដីភាពចំពោះព្រះ»។ សូមគិតទៅមើលថា ព្រះយេហូវ៉ាសប្បាយចិត្តយ៉ាងណាពេលឃើញអ្នក«ធ្វើអ្វីដែលបង្ហាញពីភក្ដីភាពចំពោះព្រះ»! លោកនឹងកាន់តែសប្បាយចិត្ត ពេលឃើញអ្នកប្រគល់ខ្លួនជូនលោក ហើយទទួលការជ្រមុជទឹក។
ប្រយោជន៍ដែលមកពីការចាត់វិធានការនៅឥឡូវនេះ
១៦. តើពេលណាជាពេលដ៏ល្អបំផុតឲ្យឈានទៅដល់ការជ្រមុជទឹក? (កូរិនថូសទី២ ៦:១, ២) (សូមមើលរូបភាពផងដែរ)
១៦ ឥឡូវគឺជាពេលល្អបំផុតឲ្យរីកចម្រើនដើម្បីទទួលការជ្រមុជទឹក។ (សូមអាន កូរិនថូសទី២ ៦:១, ២) មន្ត្រីជាន់ខ្ពស់ជនជាតិអេត្យូពីដែលភីលីពបានជួប ទទួលស្គាល់ថាគាត់ត្រូវចាត់វិធានការភ្លាមៗ។ ពេលគាត់យល់ដំណឹងល្អ ហើយមានឱកាសទទួលការជ្រមុជទឹក គាត់មិនបានគិតក្នុងចិត្តថា ‹ចាំខ្ញុំរៀនថែមទៀតសិន ឬចាំទៅដល់កន្លែងមួយទៀតដែលមានទឹកច្រើន សឹមខ្ញុំទទួលការជ្រមុជទឹក›។ ផ្ទុយទៅវិញ គាត់បានសួរភីលីពថា៖ «តើមានអ្វីដែលរារាំងខ្ញុំមិនឲ្យទទួលការជ្រមុជទឹក?»។ (សកម្ម. ៨:២៦, ២៧, ៣៥-៣៩) នោះគឺជាគំរូល្អណាស់! ក្រោយពីមន្ត្រីនោះទទួលការជ្រមុជទឹកហើយ គាត់ក៏«បន្តដំណើរទៅមុខទៀតទាំងមានចិត្តត្រេកអរ»។
គំរូរបស់មន្ត្រីជាន់ខ្ពស់ជនជាតិអេត្យូពីបង្រៀនយើងនូវមេរៀនដ៏សំខាន់ថា ឥឡូវនេះគឺជាពេលដ៏ល្អបំផុតឲ្យរីកចម្រើនដើម្បីទទួលការជ្រមុជទឹក (សូមមើលវគ្គ១៦)a
១៧. តើយើងអាចជឿជាក់អំពីអ្វី?
១៧ បើអ្នកស្ទាក់ស្ទើរទទួលការជ្រមុជទឹក សូមជឿជាក់ថាព្រះយេហូវ៉ាត្រៀមខ្លួនជាស្រេចដើម្បីជួយអ្នកឲ្យមានចំណងមិត្តភាពជិតស្និតជាមួយនឹងលោក។ (រ៉ូម ២:៤) លោកអាចជួយអ្នកឲ្យយកឈ្នះនូវការភ័យខ្លាច ការខ្វល់ខ្វាយ ឬឥទ្ធិពលពីអ្នកឯទៀតដែលរារាំងអ្នកពីការជ្រមុជទឹក។ ពេលអ្នកទទួលការជ្រមុជទឹក អ្នកនឹងមានអំណរក្រៃលែងដែលមកពីការធ្វើឲ្យព្រះយេហូវ៉ាពេញចិត្ត ហើយអ្នកទំនងជានឹងឃើញថា«អ្វីៗដែលនៅខាងក្រោយ» គឺលែងសំខាន់ចំពោះអ្នកទៀតហើយ។ (ភី. ៣:៨, ១៣) ពេលនោះ អ្នកអាចទន្ទឹងរង់ចាំ«អ្វីៗដែលនៅខាងមុខ» ពោលគឺការសម្រេចនៃសេចក្ដីសន្យារបស់ព្រះយេហូវ៉ាចំពោះពួកអ្នកដែលប្រគល់ខ្លួនជូនលោក ហើយទទួលការជ្រមុជទឹក។—សកម្ម. ៣:១៩
ចម្រៀងលេខ៣៨ លោកនឹងធ្វើឲ្យអ្នកខ្លាំងក្លា
a ការពណ៌នាអំពីរូបភាព៖ ដូចមន្ត្រីជាន់ខ្ពស់ជនជាតិអេត្យូពីប្រាប់ភីលីពថាគាត់ចង់ទទួលការជ្រមុជទឹក នោះសិស្សគម្ពីរម្នាក់ប្រាប់អ្នកចាស់ទុំថាគាត់ចង់ទទួលការជ្រមុជទឹក។