ថ្ងៃទី១៣ ដល់ថ្ងៃទី១៩ ខែមេសា ឆ្នាំ២០២៦
ចម្រៀងលេខ៥២ ការប្រគល់ខ្លួនធ្វើជាគ្រិស្តសាសនិក
អត្ថន័យនិងសារៈសំខាន់នៃការជ្រមុជទឹក
«ចូរទៅបង្រៀនមនុស្ស . . . ឲ្យក្លាយជាអ្នកកាន់តាមខ្ញុំ ហើយជ្រមុជទឹកឲ្យពួកគេ»។—ម៉ាថ. ២៨:១៩
ចំណុចផ្ដោត
តើការជ្រមុជទឹកមានន័យយ៉ាងណា សំខាន់យ៉ាងណា ហើយរួមបញ្ចូលអ្វីខ្លះ?
១. ហេតុអ្វីយើងដឹងថាការជ្រមុជទឹកគឺជាសេចក្ដីបង្រៀនដ៏សំខាន់ក្នុងគម្ពីរ?
យើងពិតជាសប្បាយពេលឃើញអ្នកថ្មីទទួលការជ្រមុជទឹក! ពេលគ្រិស្តសាសនិកនៅដើមដំបូងឃើញមនុស្សជាច្រើនទទួលការជ្រមុជទឹកនៅបុណ្យថ្ងៃទី៥០ ឆ្នាំ៣៣ គ.ស. ពួកគេក៏សប្បាយដែរ។ នៅពេលនោះ សាវ័កពេត្រុសបានថ្លែងសុន្ទរកថាដែលពន្យល់ថា ការជ្រមុជទឹកគឺសំខាន់ណាស់។ (សកម្ម. ២:៣៨, ៤០, ៤១) ក្រោយមក សាវ័កប៉ូលបានសរសេរថា៖ «សេចក្ដីបង្រៀនជាមូលដ្ឋានអំពីគ្រិស្ត» រួមបញ្ចូល«សេចក្ដីបង្រៀនអំពីការជ្រមុជទឹក»។ (ហេ. ៦:១, ២) ទោះជាការជ្រមុជទឹកមើលទៅជាសេចក្ដីបង្រៀនបឋមក្ដី យើងត្រូវយល់សេចក្ដីបង្រៀននោះឲ្យបានច្បាស់។ ហេតុអ្វី?
២. ហេតុអ្វីយើងត្រូវយល់ច្បាស់អំពីការជ្រមុជទឹក?
២ ដូចគ្រឹះមាំមួនអាចធ្វើឲ្យផ្ទះរឹងមាំ នោះការយល់ច្បាស់អំពីការជ្រមុជទឹកអាចជួយយើងឲ្យមានជំនឿរឹងមាំ។ មិនថាយើងកំពុងរីកចម្រើនដើម្បីទទួលការជ្រមុជទឹកឬបានទទួលការជ្រមុជទឹកអស់ជាច្រើនឆ្នាំហើយក្ដី យើងត្រូវយល់អំពីសារៈសំខាន់នៃការជ្រមុជទឹក។ ដូច្នេះ ក្នុងអត្ថបទនេះ យើងនឹងឆ្លើយសំណួរដូចតទៅនេះ៖ តើការជ្រមុជទឹកមានន័យអ្វី? តើការជ្រមុជទឹកជាគ្រិស្តសាសនិករួមបញ្ចូលអ្វីខ្លះ? ហេតុអ្វីយើងត្រូវជ្រមុជទឹកក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមឫទ្ធានុភាពបរិសុទ្ធ?
អត្ថន័យនៃការជ្រមុជទឹក
៣. តើការជ្រមុជទឹកបង្ហាញអំពីអ្វី?
៣ ពេលអ្នកទទួលការជ្រមុជទឹកអ្នកបង្ហាញជាសាធារណៈថា អ្នកទទួលសេចក្ដីពិតអំពីព្រះយេហូវ៉ានិងលោកយេស៊ូគ្រិស្ត បានប្រែចិត្តពីការខុសឆ្គង ផ្លាស់ប្ដូររបៀបរស់នៅរបស់អ្នកដើម្បីបម្រើព្រះយេហូវ៉ា ទទួលស្គាល់ថាព្រះប្រើលោកយេស៊ូដើម្បីសង្គ្រោះអ្នក ហើយអ្នកបានសន្យានឹងព្រះក្នុងសេចក្ដីអធិដ្ឋានថា អ្នកចង់ធ្វើតាមបំណងប្រាថ្នារបស់លោកដោយរួបរួមជាមួយនឹងអង្គការរបស់លោក។ ពេលអ្នកសន្យាបែបនោះឬប្រគល់ខ្លួនជូនព្រះ ហើយទទួលការជ្រមុជទឹក អ្នកចាប់ផ្ដើមដើរលើវិថីដែលនាំទៅឯជីវិតដែលគ្មានទីបញ្ចប់។
៤. តើការពន្លិចទៅក្នុងទឹក និងការងើបពីទឹកឡើងវិញមានន័យយ៉ាងណា? (សូមមើលរូបភាពផងដែរ)
៤ ពេលអ្នកទទួលការជ្រមុជទឹក អ្នកនឹងត្រូវពន្លិចទៅក្នុងទឹក ហើយងើបពីទឹកឡើងវិញ។a ជួនកាល នេះបានត្រូវប្រដូចទៅនឹងការកប់មនុស្សស្លាប់ និងការប្រោសឲ្យរស់ឡើងវិញ។ (សូមពិនិត្យបន្ថែម កូឡុស ២:១២) ការជ្រមុជទឹកបង្ហាញអំពីការផ្លាស់ប្ដូរដ៏ធំដែលអ្នកបានធ្វើក្នុងជីវិតរបស់អ្នក។ តើតាមរបៀបណា? ពេលអ្នកបានត្រូវពន្លិចទៅក្នុងទឹក អ្នកបង្ហាញថាអ្នកលែងមានរបៀបរស់នៅដូចពីមុន។ ពេលអ្នកងើបចេញពីទឹកវិញ អ្នកបង្ហាញថាអ្នកចាប់ផ្ដើមជីវិតថ្មីដែលផ្ដោតទៅលើការធ្វើតាមបំណងប្រាថ្នារបស់ព្រះ។
ពេលអ្នកទទួលការជ្រមុជទឹក អ្នកឈប់រស់នៅតាមគន្លងជីវិតចាស់ ហើយចាប់ផ្ដើមជីវិតថ្មីដែលផ្ដោតទៅលើការធ្វើតាមបំណងប្រាថ្នារបស់ព្រះ (សូមមើលវគ្គ៤)
៥. តើអ្វីៗដែលអ្នកធ្វើដើម្បីត្រៀមខ្លួនទទួលការជ្រមុជទឹក ស្រដៀងគ្នាយ៉ាងណាទៅនឹងកិច្ចការដែលណូអេធ្វើដើម្បីសង់ទូកធំ? (ពេត្រុសទី១ ៣:១៨-២១)
៥ សូមអាន ពេត្រុសទី១ ៣:១៨-២១។ យើងអាចប្រដូចអ្វីដែលអ្នកធ្វើដើម្បីត្រៀមខ្លួនទទួលការជ្រមុជទឹក ទៅនឹងកិច្ចការដែលណូអេធ្វើដើម្បីសង់ទូកធំ។ បើអ្នកទើបតែចាប់ផ្ដើមរៀនអំពីព្រះយេហូវ៉ា អ្នកប្រហែលជាមានអារម្មណ៍ថាអ្វីដែលអ្នកត្រូវធ្វើដើម្បីមានគុណសម្បត្តិគ្រប់គ្រាន់ឲ្យទទួលការជ្រមុជទឹកគឺពិបាកណាស់ ដូចដែលការសង់ទូកធំគឺពិបាកណាស់សម្រាប់ណូអេ។ តើពិតជាចាំបាច់ឲ្យអ្នកធ្វើកិច្ចការទាំងអស់នេះឬទេ? គឺចាំបាច់មែន។ ហេតុអ្វីយើងនិយាយដូច្នេះ? សូមគិតអំពីណូអេ។ ព្រះផ្ទាល់ជាអ្នករចនាប្លង់ទូកធំ ហើយណូអេត្រូវធ្វើតាមប្លង់នោះយ៉ាងដិតដល់ដើម្បីរួចជីវិតពីទឹកជំនន់។ ដោយមានជំនឿនិងការគាំទ្រពីព្រះ ណូអេបានស្ដាប់បង្គាប់ ហើយសង់ទូកធំ។ ដូចណូអេ អ្នកអាចធ្វើតាម«បង្គាប់របស់ព្រះ . . . សព្វគ្រប់ទាំងអស់»។—ដក. ៦:២២
៦. តើការជ្រមុជទឹកអាចសង្គ្រោះអ្នកក្នុងន័យយ៉ាងណា?
៦ នៅខ២១ សាវ័កពេត្រុសបានសរសេរថាការជ្រមុជទឹកគឺជាអ្វីដែល«កំពុងសង្គ្រោះអ្នក»។ តើនេះមានន័យថាការពន្លិចទៅក្នុងទឹកនាំមកនូវការសង្គ្រោះ ហើយធ្វើឲ្យអ្នករួចពីការខុសឆ្គងឬទេ? មិនមែនទេ។ មានតែឈាមរបស់លោកយេស៊ូប៉ុណ្ណោះដែលអាចសម្អាតអ្នកពីភាពខុសឆ្គង។ (១យ៉ូន. ១:៧) ប៉ុន្តែ ការជ្រមុជទឹកគឺសំខាន់ចាំបាច់ ដោយសារព្រះយេហូវ៉ាបានបង្គាប់យើងឲ្យទទួលការជ្រមុជទឹក។ ម្យ៉ាងទៀត ពេលអ្នកទទួលការជ្រមុជទឹក អ្នកកំពុងសុំលោកឲ្យ«ផ្ដល់នូវសមត្ថភាពវិនិច្ឆ័យដែលមិនផ្ដន្ទាទោស»ដល់អ្នក។ ព្រះយេហូវ៉ាពេញចិត្តធ្វើតាមសំណូមពររបស់អ្នក។ យ៉ាងនេះ ការជ្រមុជទឹក«កំពុងសង្គ្រោះអ្នក» គឺថាការជ្រមុជទឹកបើកឱកាសឲ្យអ្នកអាចរស់ជារៀងរហូត។
តើការជ្រមុជទឹកជាគ្រិស្តសាសនិករួមបញ្ចូលអ្វីខ្លះ?
៧. តើការជ្រមុជទឹកគួរធ្វើឡើងតាមរបៀបណា?
៧ ក្រៅពីការពន្លិចទៅក្នុងទឹក គម្ពីរមិនបានរៀបរាប់យ៉ាងច្រើនអំពីរបៀបដែលត្រូវធ្វើការជ្រមុជទឹកទេ។ ទោះជាយ៉ាងនោះក៏ដោយ គោលការណ៍គម្ពីរជួយយើងឲ្យដឹងអំពីអ្វីដែលសមរម្យពេលជ្រមុជទឹក។ ជាឧទាហរណ៍ គោលការណ៍គម្ពីរជួយបុគ្គលដែលនឹងទទួលការជ្រមុជទឹកឲ្យដឹងអំពីរបៀបស្លៀកពាក់ ហើយជួយអ្នកមើលកម្មវិធីនោះឲ្យដឹងអំពីរបៀបដែលពួកគេគួរប្រព្រឹត្ត។ (១កូ. ១៤:៤០; ១ធី. ២:៩) នៅសព្វថ្ងៃនេះ តាមធម្មតា ការជ្រមុជទឹកធ្វើឡើងដោយអ្នកចាស់ទុំ។ ប៉ុន្តែ យើងមិនលើកតម្កើងអ្នកចាស់ទុំដែលបំពេញភារកិច្ចនោះទេ។ (១កូ. ១:១៤, ១៥) ម្យ៉ាងទៀត បុគ្គលម្នាក់អាចទទួលការជ្រមុជទឹក ទោះជាអ្នកមើលមានគ្នាតិចឬច្រើនក្ដី។—សកម្ម. ៨:៣៦
៨. តើអ្នកថ្លែងសួរបុគ្គលដែលនឹងទទួលការជ្រមុជទឹកនូវសំណួរអ្វីខ្លះ ហើយហេតុអ្វី? (សកម្មភាព ២:៣៨-៤២) (សូមមើលរូបភាពផងដែរ)
៨ គម្ពីរបង្ហាញថាយើងគួរ«ប្រកាសជាសាធារណៈអំពីជំនឿ[របស់យើង ហើយនោះ]នាំឲ្យបានសេចក្ដីសង្គ្រោះ»។ (រ៉ូម ១០:៩, ១០) ដូច្នេះ គឺសមត្រឹមត្រូវឲ្យយើងប្រកាសប្រាប់អំពីជំនឿរបស់យើងពេលទទួលការជ្រមុជទឹក ព្រោះនេះគឺសំខាន់ចាំបាច់ដើម្បីទទួលសេចក្ដីសង្គ្រោះ! ហេតុនេះ អ្នកថ្លែងសួរបុគ្គលដែលនឹងទទួលការជ្រមុជទឹកនូវសំណួរពីរយ៉ាង។ សំណួរទី១គឺ «តើអ្នកបានប្រែចិត្តពីអំពើខុសឆ្គងរបស់អ្នក បានប្រគល់ខ្លួនអ្នកជូនព្រះយេហូវ៉ា ហើយបានទទួលយកសេចក្ដីសង្គ្រោះដែលលោកផ្ដល់ឲ្យតាមរយៈលោកយេស៊ូគ្រិស្តឬទេ?»។ សំណួរនេះផ្ដោតទៅលើអ្វីដែលបុគ្គលដែលនឹងទទួលការជ្រមុជទឹកបានធ្វើរួចហើយដើម្បីត្រៀមខ្លួនទទួលការជ្រមុជទឹក ហើយនេះស្រដៀងនឹងអ្វីដែលពេត្រុសបានប្រាប់បណ្ដាជនឲ្យធ្វើនៅបុណ្យថ្ងៃទី៥០។ សំណួរទី២គឺ «តើអ្នកយល់ថាការជ្រមុជទឹករបស់អ្នកនឹងសម្គាល់ថាអ្នកជាសាក្សីព្រះយេហូវ៉ា ដោយរួបរួមជាមួយអង្គការរបស់ព្រះយេហូវ៉ាឬទេ?»។ សំណួរនេះរំលឹកយើងថា យើងរស់នៅសមស្របតាមការប្រគល់ខ្លួនជូនព្រះដោយធ្វើតាមការណែនាំដែលអង្គការព្រះយេហូវ៉ាផ្ដល់ឲ្យ ហើយបម្រើលោកជាមួយនឹងបងប្អូនរួមជំនឿដូចពួកអ្នកកាន់តាមនៅសតវត្សរ៍ទី១បានធ្វើ។ (សូមអាន សកម្មភាព ២:៣៨-៤២) បុគ្គលដែលអាចឆ្លើយយ៉ាងស្មោះពីចិត្តថា«បាទ»ឬ«ចាស»ចំពោះសំណួរទាំងពីរនេះ បង្ហាញថាគាត់មានគុណសម្បត្តិគ្រប់គ្រាន់ដើម្បីទទួលការជ្រមុជទឹក។
ការជ្រមុជទឹករបស់អ្នក រួមបញ្ចូលការ«ប្រកាសជាសាធារណៈអំពីជំនឿ[របស់យើង ហើយនោះ]នាំឲ្យបានសេចក្ដីសង្គ្រោះ» (សូមមើលវគ្គ៨)d
៩. តើយើងគ្រប់គ្នាត្រូវធ្វើអ្វីខ្លះដើម្បីធ្វើឲ្យព្រះពេញចិត្ត?
៩ មុនរៀនសេចក្ដីពិត អ្នកប្រហែលជាមិនមែនជាមនុស្សអាក្រក់ ឬមិនបានប្រព្រឹត្តអំពើខុសឆ្គងធ្ងន់ធ្ងរទេ។ មួយវិញទៀត អ្នកប្រហែលជាបានត្រូវចិញ្ចឹមអប់រំដោយឪពុកម្ដាយជាគ្រិស្តសាសនិកដែលជួយអ្នកឲ្យស្រឡាញ់ព្រះយេហូវ៉ាដែរ។ បើដូច្នេះ តើអ្នកនៅតែត្រូវប្រែចិត្ត ហើយទទួលការជ្រមុជទឹកដើម្បីទទួលការពេញចិត្តពីព្រះឬទេ? មែន អ្នកនៅតែត្រូវធ្វើដូច្នេះ។ មិនថាយើងមានប្រវត្តិបែបណាក៏ដោយ យើងទាំងអស់គ្នាបានឆ្លងភាពខុសឆ្គងដែលធ្វើឲ្យយើងដាច់ឆ្ងាយពីព្រះ។ (ចសព. ៥១:៥) ប៉ុន្តែ ពេលយើងរៀនកាន់តែច្រើនអំពីព្រះយេហូវ៉ា យើងចង់មានចំណងមិត្តភាពជាមួយលោក ហើយតាំងចិត្តធ្វើតាមបំណងប្រាថ្នារបស់លោក មិនមែនតាមបំណងប្រាថ្នារបស់យើងទេ។ នេះជំរុញចិត្តយើងឲ្យប្រែចិត្តពីរបៀបរស់នៅពីមុន ហើយវិលមកវិញ ពោលគឺចាប់ផ្ដើមមានរបៀបរស់នៅដែលបិតានៅស្ថានសួគ៌របស់យើងពេញចិត្ត។ រួចមក យើងអាចទទួលការជ្រមុជទឹក។—សកម្ម. ៣:១៩
១០. តើអ្នកគួរធ្វើអ្វីបើអ្នកធ្លាប់ទទួលការជ្រមុជទឹកនៅក្នុងសាសនាផ្សេង?
១០ បើអ្នកធ្លាប់ទទួលការជ្រមុជទឹកនៅក្នុងសាសនាផ្សេង អ្នកនៅតែត្រូវទទួលការជ្រមុជទឹកជាសាក្សីព្រះយេហូវ៉ា។ ហេតុអ្វី? ដោយសារពីមុនអ្នកមិនបានយល់សេចក្ដីពិតយ៉ាងត្រឹមត្រូវអំពីព្រះយេហូវ៉ានិងលោកយេស៊ូទេ។ ម្យ៉ាងទៀត សូម្បីតែអ្នកបានអធិដ្ឋានប្រគល់ខ្លួនជូនព្រះហើយក៏ដោយ សេចក្ដីសន្យានោះមិនមានមូលដ្ឋានលើចំណេះត្រឹមត្រូវអំពីបំណងប្រាថ្នារបស់លោកទេ។ សូមគិតអំពីសាវ័កប៉ូល។ ពេលគាត់ជួបពួកបុរសនៅក្រុងអេភេសូរដែលធ្លាប់ទទួលការជ្រមុជទឹកដោយមិនយល់សេចក្ដីពិតអំពីលោកយេស៊ូ គាត់បានរៀបចំឲ្យពួកគេទទួលការជ្រមុជទឹកម្ដងទៀត។b (សកម្ម. ១៩:១-៥) ស្រដៀងគ្នាដែរ នៅសព្វថ្ងៃនេះ ព្រះយេហូវ៉ាទទួលយកតែការជ្រមុជទឹករបស់បុគ្គលដែលមានចំណេះត្រឹមត្រូវអំពីបំណងប្រាថ្នារបស់លោកប៉ុណ្ណោះ។
«ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមឫទ្ធានុភាពបរិសុទ្ធរបស់លោក»
១១. តើការទទួលការជ្រមុជទឹក«ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមឫទ្ធានុភាពបរិសុទ្ធរបស់លោក»មានន័យយ៉ាងណា? (ម៉ាថាយ ២៨:១៨-២០)
១១ លោកយេស៊ូបានបង្គាប់ថា ពួកអ្នកកាន់តាមថ្មីត្រូវទទួលការជ្រមុជទឹក«ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមឫទ្ធានុភាពបរិសុទ្ធរបស់លោក»។ (សូមអាន ម៉ាថាយ ២៨:១៨-២០) តើប្រសាសន៍របស់លោកយេស៊ូមានន័យយ៉ាងណា? ក្នុងគម្ពីរ ពាក្យ«នាម»ច្រើនតែសំដៅទៅលើកេរ្ដិ៍ឈ្មោះរបស់បុគ្គលណាម្នាក់ ហើយក៏អាចសំដៅទៅលើឋានៈនិងអំណាចដែលបុគ្គលនោះមានដែរ។ ដូច្នេះ ពេលយើងធ្វើអ្វី«ក្នុងនាម»របស់បុគ្គលណាម្នាក់ឬអ្វីណាមួយ យើងទទួលស្គាល់អំណាចរបស់បុគ្គលនោះឬអ្វីនោះ។ សូមគិតអំពីរបៀបដែលអ្នកអាចទទួលស្គាល់ឋានៈនិងអំណាចរបស់បិតានៅស្ថានសួគ៌ និងបុត្ររបស់លោក ព្រមទាំងតួនាទីនៃឫទ្ធានុភាពបរិសុទ្ធរបស់ព្រះ។
១២. តើយើងទទួលការជ្រមុជទឹកក្នុងនាមបិតាដែលស្ថិតនៅស្ថានសួគ៌យ៉ាងដូចម្ដេច? (ការបើកបង្ហាញ ៤:១១) (សូមមើលរូបភាពផងដែរ)
១២ ក្នុងនាមបិតាដែលស្ថិតនៅស្ថានសួគ៌។ យើងទទួលស្គាល់ថាព្រះយេហូវ៉ាជាបិតានៅស្ថានសួគ៌ ឬជាអ្នកផ្ដល់ជីវិតឲ្យយើង។ លោកជាព្រះដ៏មានឫទ្ធានុភាពខ្លាំងក្លាបំផុតនិងជាអ្នកបង្កើតអ្វីៗទាំងអស់។ (សូមអាន ការបើកបង្ហាញ ៤:១១) យើងក៏ទទួលស្គាល់ដែរថា លោកជាព្រះដែលស្ដាប់សេចក្ដីអធិដ្ឋាន។ យើងប្រើនាមរបស់លោកដោយការគោរពនិងដោយសេរី ពេលយើងអធិដ្ឋានទៅលោក និងនិយាយប្រាប់អ្នកឯទៀតអំពីលោក។ (ចសព. ៦៥:២) ប៉ុន្តែ ការទទួលការជ្រមុជទឹកក្នុងនាមបិតាដែលស្ថិតនៅស្ថានសួគ៌រួមបញ្ចូលអ្វីដែលលើសពីនេះ។ បុគ្គលដែលស្ដាប់ពេត្រុសនៅបុណ្យថ្ងៃទី៥០បានស្គាល់អំពីព្រះយេហូវ៉ារួចហើយ តែពួកគេត្រូវទទួលស្គាល់ថាលោកជាអ្នកផ្ដល់សេចក្ដីសង្គ្រោះដែលគ្មានទីបញ្ចប់តាមរយៈលោកយេស៊ូគ្រិស្ត។—រ៉ូម ៥:៨
ក្រោយពីអ្នកទទួលការជ្រមុជទឹករួចហើយ ចូរបន្ដទទួលស្គាល់ឋានៈនិងអំណាចរបស់បិតានៅស្ថានសួគ៌ (សូមមើលវគ្គ១២)
១៣. តើយើងទទួលការជ្រមុជទឹកក្នុងនាមបុត្ររបស់លោកតាមរបៀបណា? (សូមមើលរូបភាពផងដែរ)
១៣ ក្នុងនាមបុត្ររបស់លោក។ នេះមានន័យថាយើងទទួលស្គាល់ថាលោកយេស៊ូគឺជាបុត្រតែមួយរបស់ព្រះ។ ម្យ៉ាងទៀត លោកយេស៊ូគឺ«ជាផ្លូវ»ក្នុងន័យថា លោកគឺជារបៀបតែមួយគត់ដែលអាចជួយយើងឲ្យមានចំណងមិត្តភាពជាមួយនឹងព្រះយេហូវ៉ា។ (យ៉ូន. ១៤:៦) លោកយេស៊ូក៏ជាអ្នកលោះយើងដែរ ព្រោះលោកបានស្លាប់សម្រាប់យើងដើម្បីយើងអាចបានជីវិត។ នេះជាមូលហេតុដែលយើងចង់ធ្វើតាមគំរូរបស់លោកជារៀងរាល់ថ្ងៃក្នុងជីវិតរបស់យើង មិនគ្រាន់តែពេលដែលយើងទទួលការជ្រមុជទឹកនោះទេ។ (១យ៉ូន. ២:៦) ដូច្នេះ យើងផ្សព្វផ្សាយយ៉ាងខ្នះខ្នែងដូចដែលលោកបានធ្វើ ហើយមិនឲ្យអ្វីរារាំងយើងពីការផ្សព្វផ្សាយឡើយ។ (លូក. ៤:៤៣) យើងថែមទាំងសុខចិត្តរងការបៀតបៀន ដោយសារយើងបម្រើព្រះយ៉ាងស្មោះភក្ដី។ (២ធី. ៣:១២) ម្យ៉ាងទៀត ដោយសារយើងគោរពលោកយេស៊ូជា«ប្រមុខនៃក្រុមជំនុំ» នោះយើងសប្បាយធ្វើតាមការណែនាំពីពួកអ្នកដែលលោកបានប្រគល់ភារកិច្ចដើម្បីនាំមុខនិងថែរក្សាពួកអ្នកកាន់តាមរបស់លោក។—អេភ. ៤:៨, ១១, ១២; ៥:២៣
ក្រោយពីអ្នកទទួលការជ្រមុជទឹក សូមបន្តទទួលស្គាល់ឋានៈនិងអំណាចរបស់បុត្រព្រះ (សូមមើលវគ្គ១៣)
១៤. (ក) តើយើងទទួលការជ្រមុជទឹកក្នុងនាមឫទ្ធានុភាពបរិសុទ្ធរបស់លោកយ៉ាងដូចម្ដេច? (សូមមើលរូបភាពផងដែរ) (ខ) តើពួកអ្នករើសតាំងទទួលការជ្រមុជទឹកអ្វីផ្សេងទៀត? (សូមមើលប្រអប់ដែលមានចំណងជើងថា «តើពួកអ្នករើសតាំងទទួលការជ្រមុជទឹកអ្វីខ្លះ?»)
១៤ ក្នុងនាមឫទ្ធានុភាពបរិសុទ្ធរបស់លោក។ យើងទទួលស្គាល់ការពិតអំពីឫទ្ធានុភាពបរិសុទ្ធរបស់ព្រះថា នោះមិនមែនជាបុគ្គលម្នាក់ឬជាផ្នែកនៃព្រះបីរួមគ្នាជាព្រះតែមួយនោះទេ តែគឺជាកម្លាំងឬឫទ្ធានុភាពរបស់ព្រះ។ យើងទទួលស្គាល់ថាឫទ្ធានុភាពបរិសុទ្ធបានដឹកនាំពួកអ្នកប្រកាសទំនាយនិងពួកអ្នកសរសេរគម្ពីរ ដូច្នេះយើងអានគម្ពីរជាទៀងទាត់ ហើយធ្វើតាមសេចក្ដីបង្រៀនក្នុងគម្ពីរ។ (២ពេ. ១:២០, ២១) ម្យ៉ាងទៀត យើងជៀសវាងពីការប្រព្រឹត្តអំពើខុសឆ្គងធ្ងន់ធ្ងរ ព្រោះនេះអាចរារាំងយើង ហើយថែមទាំងអាចរារាំងក្រុមជំនុំពីការទទួលឫទ្ធានុភាពបរិសុទ្ធរបស់ព្រះ។—អេភ. ៤:៣០
ក្រោយពីអ្នកទទួលការជ្រមុជទឹក សូមបន្តទទួលស្គាល់តួនាទីនៃឫទ្ធានុភាពបរិសុទ្ធរបស់ព្រះ (សូមមើលវគ្គ១៤)
១៥. តើយើងគួរតាំងចិត្តធ្វើអ្វី?
១៥ បើអ្នកជាគ្រិស្តសាសនិកដែលបានទទួលការជ្រមុជទឹករួចហើយ សូមតាំងចិត្តស្វែងយល់ឲ្យបានច្បាស់អំពី«សេចក្ដីបង្រៀនអំពីការជ្រមុជទឹក»c ហើយរស់នៅសមស្របតាមពាក្យសន្យារបស់អ្នកពេលអ្នកប្រគល់ខ្លួនជូនព្រះយេហូវ៉ានិងទទួលការជ្រមុជទឹក។ ប៉ុន្តែ ចុះបើអ្នកមិនទាន់ទទួលការជ្រមុជទឹក? តើមានអ្វីរារាំងអ្នកពីការធ្វើដូច្នេះឬទេ? នៅក្នុងអត្ថបទបន្ទាប់ យើងនឹងពិចារណាអំពីរបៀបដែលអ្នកអាចបន្តរីកចម្រើនរហូតដល់ទទួលការជ្រមុជទឹក។
ចម្រៀងលេខ១៦១ ខ្ញុំពេញចិត្តធ្វើតាមព្រះប្រាថ្នា
a ពាក្យភាសាក្រិចបាធីស្មាដែលបានត្រូវបកប្រែថា«ជ្រមុជទឹក» មានន័យថា«ពន្លិចទៅក្នុងទឹក»។ ដូច្នេះ ការជ្រមុជទឹកសំដៅទៅលើបុគ្គលម្នាក់លិចចូលទៅក្នុងទឹក មិនមែនប្រោះទឹកពីលើគាត់ដូចសាសនាខ្លះបានបង្រៀននោះទេ។
b បុរសទាំងនោះនៅក្រុងអេភេសូរបានទទួល«ការជ្រមុជទឹករបស់យ៉ូហាន»។ (សកម្ម. ១៩:៣) យ៉ូហានដែលជាអ្នកជ្រមុជទឹក បានលើកទឹកចិត្តជនជាតិយូដាឲ្យប្រែចិត្តចំពោះអ្វីដែលពួកគេធ្វើខុសពីច្បាប់ម៉ូសេ ហើយយ៉ូហានបានជ្រមុជទឹកពួកអ្នកដែលបានប្រែចិត្ត។ (ម៉ាក. ១:៤, ៥) ប៉ុន្តែ ការជ្រមុជទឹករបស់យ៉ូហានលែងមានសុពលភាពទៀត ក្រោយពីច្បាប់ម៉ូសេបានទៅជាមោឃ។ ចាប់ពីពេលនោះមក ព្រះពេញចិត្តតែ«ការជ្រមុជទឹកតែមួយ»ដែលនាំទៅដល់សេចក្ដីសង្គ្រោះ។—អេភ. ៤:៥
c សូមមើលអត្ថបទដែលមានចំណងជើងថា «តើការជ្រមុជទឹកគឺជាអ្វី?» ក្នុងអត្ថបទតភាគ«សំណួរនិងចម្លើយពីគម្ពីរ»នៅគេហទំព័រjw.org/km និងកម្មវិធីJWបណ្ណាល័យ។
d ការពណ៌នាអំពីរូបភាព៖ នៅសន្និបាត បុគ្គលដែលនឹងទទួលការជ្រមុជទឹកក្រោកឈរដើម្បីប្រកាសជាសាធារណៈអំពីជំនឿរបស់ពួកគេ។