សាសន៍ដែលរក្សាចិត្តស្មោះគ្រប់ល័ក្ខណ៍
«ចូរបើកទ្វារ ដើម្បីឲ្យសាសន៍សុចរិត ដែលរក្សាសេចក្ដីស្មោះត្រង់បានចូលមកចុះ»។—អេសាយ ២៦:២
១. ហេតុអ្វីក៏សេចក្ដីថ្លែងរបស់អេសាយអំពី«សាសន៍សុចរិត»អាចធ្វើឲ្យមានការភ្ញាក់ផ្អើល?
នៅសព្វថ្ងៃនេះ មានសាសន៍គ្រប់ប្រភេទ។ សាសន៍ខ្លះ ជាប្រជាធិបតេយ្យ ហើយខ្លះទៀតមានអ្នកគ្រប់គ្រងប្រើអំណាចផ្ដាច់ការ។ សាសន៍ខ្លះមានស្តុកស្តម្ភ តែសាសន៍ខ្លះទៀតក្រ។ អ្វីមួយដែលសាសន៍ទាំងនេះមានដូចគ្នាគឺ៖ ទាំងអស់ជាផ្នែកនៃលោកីយ៍ ដែលសាតាំងជាព្រះរបស់គេ។ (កូរិនថូសទី២ ៤:៤) ចំពោះរឿងនេះ ពាក្យដែលចែងមកនៅសៀវភៅអេសាយ ប្រហែលជាធ្វើឲ្យអ្នកខ្លះមានការភ្ញាក់ផ្អើល នៅពេលដែលលោកអេសាយមានប្រសាសន៍ថា៖ «ចូរបើកទ្វារ ដើម្បីឲ្យសាសន៍សុចរិត ដែលរក្សាសេចក្ដីស្មោះត្រង់បានចូលមកចុះ»។ (អេសាយ ២៦:២) តើមានសាសន៍សុចរិតមួយមែនឬ? ត្រូវហើយ សាសន៍សុចរិតគឺមានមែន ពីព្រោះទំនាយចង្អុលប្រាប់អំពីវត្តមាននៃសាសន៍សុចរិតនៅសម័យយើងនេះ។ តើតាមរបៀបណាដែលបុគ្គលម្នាក់អាចសម្គាល់ថាសាសន៍មួយណា ជាសាសន៍សុចរិតនោះ?
២. តើសាសន៍សុចរិតជាអ្វី? តើអាចសម្គាល់បានយ៉ាងណា?
២ នៅក្នុងសមាគមខ្មែរនៃព្រះគម្ពីរបរិសុទ្ធ អេសាយ ២៦:២ត្រូវបានបកប្រែថាសាសន៍ដែល«រក្សាសេចក្ដីស្មោះត្រង់»។ សេចក្ដីបកប្រែព្រះគម្ពីរឃីងជេម្ស បកប្រែខនេះថា «សាសន៍សុចរិតដែលរក្សាសេចក្ដីពិត»។ សេចក្ដីបកប្រែទាំងពីរនេះជាការសមត្រឹមត្រូវណាស់។ តាមការពិត សាសន៍សុចរិតអាចសម្គាល់ឃើញបានយ៉ាងស្រួល ពីព្រោះនេះជាសាសន៍តែមួយគត់នៅលើផែនដី ដែលចុះចូលនឹងព្រះគ្រីស្ទជាស្តេច ដូច្នេះមិនមែនជាផ្នែកនៃលោកីយ៍របស់សាតាំងទេ។ (យ៉ូហាន ១៧:១៦) ម្ល៉ោះហើយបានជាសមាជិកនៃសាសន៍សុចរិតនេះ ត្រូវបានល្បីចំពោះការ‹រក្សាចរិយារបស់គេដ៏ល្អក្នុងចំណោមសាសន៍ទាំងឡាយ›។ ពួកគេដឹកនាំជីវភាពបែបដែលលើកតំកើងដល់ព្រះ។ (ពេត្រុសទី១ ២:១២) ម្យ៉ាងវិញទៀត ទោះបីជាគេនៅទីកន្លែងណាក៏ដោយក្នុងពិភពលោកនេះ ពួកគេជាផ្នែកនៃ«ពួកជំនុំនៃព្រះដ៏មានព្រះជន្មរស់ ដែលជាសសរ ហើយជាជើងថ្កល់របស់សេចក្ដីពិត»។ (ធីម៉ូថេទី១ ៣:១៥) ក្នុងការគាំទ្រសេចក្ដីពិតនេះ ពួកគេបដិសេធទស្សនៈវិជ្ជានៃពាហិរជនដែលបានបង្រៀនដោយពិភពគ្រីស្ទសាសនា ហើយពួកគេគាំទ្រ«ទឹកដោះសុទ្ធ ខាងឯព្រលឹងវិញ្ញាណ»—គឺព្រះគម្ពីរដែលជាពាក្យបន្ទូលរបស់ព្រះ។ (ពេត្រុសទី១ ២:២) ថែមទៀតនោះ ពួកគេខំខ្នះខ្នែងផ្សាយដំណឹងល្អ«ទៅដល់គ្រប់ទាំងមនុស្ស ដែលកើតក្រោមមេឃ»។ (កូល៉ុស ១:២៣) តើអាចមានការសង្ស័យណាអំពីសាសន៍នេះដែលបានផ្គុំឡើងពីពួកអ្នកសំណល់«អ៊ីស្រាអែលនៃព្រះ»ជាក្រុមជំនុំនៃជនគ្រីស្ទានចាក់ប្រេងតាំងទេ? គឺគ្មានការសង្ស័យសោះឡើយ។—កាឡាទី ៦:១៦
សាសន៍មួយបានប្រសូតមក
៣. សូមពិពណ៌នាអំពីរបៀបដែលសាសន៍សុចរិតបានប្រសូតមក។
៣ តើ«សាសន៍សុចរិត»នេះបានចាប់កំណើតមកនៅពេលណា? ការចាប់ផ្ដើមនៃសាសន៍សុចរិតនេះ ត្រូវបានទាយមកនៅក្នុងសៀវភៅអេសាយ។ នៅអេសាយ ៦៦:៧, ៨ យើងអានថា៖ «មុនដែល[ក្រុងស៊ីយ៉ូន]ឈឺពោះ នោះបានសំរាលកូនមក មុនដែលកើតឈឺចាប់ នោះបានបង្កើតកូនប្រុស១ហើយ . . . ដ្បិតវេលាដែលក្រុងស៊ីយ៉ូនបានឈឺចាប់ នោះក៏បានសំរាលកូនទាំងប៉ុន្មានមកភ្លាម»។ ជាការគួរឲ្យចំឡែកមែន ក្រុងស៊ីយ៉ូនដែលជាអង្គការសួគ៌ារបស់ព្រះនឹងបង្កើត«កូនប្រុស១» មុននឹងនាងឈឺពោះទៅទៀត។ នៅឆ្នាំ១៩១៤ ព្រះរាជាណាចក្រនៃព្រះមេស្ស៊ីបានកើតមានឡើងនៅក្នុងស្ថានសួគ៌។ (វិវរណៈ ១២:៥) ក្រោយពីកូនប្រុសនេះបានប្រសូតមក សាសន៍ជាច្រើនបានចូលប្រយុទ្ធក្នុងសង្គ្រាមលោកលើកទីមួយ ហើយជនគ្រីស្ទានចាក់ប្រេងតាំងបានរងទុក្ខការទុក្ខព្រួយនិងការបៀតបៀន។ នៅទីបំផុត ក្នុងឆ្នាំ១៩១៩ សាសន៍ខាងវិញ្ញាណ«កូនប្រុស»បានប្រសូតឡើងនៅលើផែនដី។ ដូច្នេះ ក្រុងស៊ីយ៉ូន‹បានសម្រាលកូនប្រុសទាំងប៉ុន្មាន›—ជាសមាជិកចាក់ប្រេងតាំងនៃ«សាសន៍សុចរិត»ថ្មី ហើយកូនទាំងនេះត្រូវបានរៀបចំសំរាប់កិច្ចការផ្សាយដែលកំពុងតែរីកចំរើនជានិច្ច។—ម៉ាថាយ ២៤:៣, ៧, ៨,១៤; ពេត្រុសទី១ ២:៩
៤. ហេតុអ្វីក៏សាសន៍សុចរិតរបស់ព្រះ ត្រូវតែខំតស៊ូដើម្បីរក្សាចិត្តស្មោះគ្រប់ល័ក្ខណ៍?
៤ តាំងពីកំណើតមក សាសន៍នេះបានជួបប្រទះការសាកល្បងជាខ្លាំងចំពោះចិត្តស្មោះគ្រប់ល័ក្ខណ៍។ ហេតុអ្វី? នៅពេលដែលព្រះរាជាណាចក្រសួគ៌ាបានប្រសូតមក សាតាំងនិងពួកបិសាចរបស់វាត្រូវបានទម្លាក់ចេញពីស្ថានសួគ៌មកលើផែនដីនេះ។ សម្លេងមួយយ៉ាងខ្លាំងបានប្រកាសថា៖ «ឥឡូវនេះ សេចក្ដីសង្គ្រោះ ព្រះចេស្ដា នឹងរាជ្យរបស់ព្រះនៃយើងរាល់គ្នា ហើយអំណាចរបស់ព្រះគ្រីស្ទនៃទ្រង់ បានមកដល់ហើយ ដ្បិតអានោះដែលចោទប្រកាន់ពីពួកបងប្អូនយើងរាល់គ្នា ដែលចេះតែចោទពីគេ នៅចំពោះព្រះទាំងយប់ទាំងថ្ងៃ វាត្រូវបោះទំលាក់ទៅហើយ គេបានឈ្នះវា។ ដោយសារព្រះលោហិតនៃកូនចៀម ហើយដោយសារសេចក្ដីបន្ទាល់របស់គេ ក៏មិនបានស្ដាយជីវិតខ្លួនដរាបដល់ស្លាប់»។ សាតាំងបានប្រតិកម្មចំពោះព្រឹត្ដិការណ៍ដែលបានផ្លាស់ប្ដូរនេះ ដោយមានកំហឹងយ៉ាងខ្លាំង «ហើយចេញទៅច្បាំងនឹងសំណល់ពូជនាងទាំងប៉ុន្មាន ជាពួកអ្នកដែលកាន់តាមបញ្ញត្តព្រះ ហើយមានសេចក្ដីបន្ទាល់ពីព្រះយេស៊ូវ»។ ថ្វីបើបានជួបប្រទះនឹងការប្រយុទ្ធរបស់សាតាំងដ៏សាហាវក្ដី ជនគ្រីស្ទានចាក់ប្រេងតាំងបានឈរយ៉ាងមាំមួន។ មកដល់សព្វថ្ងៃនេះ សមាជិកដែលមានចិត្តខ្នះខ្នែងនៃសាសន៍សុចរិតរបស់ព្រះ អនុវត្តជំនឿទៅលើការលោះនៃលោហិតរបស់ព្រះយេស៊ូ ហើយបន្តផ្ដល់ចម្លើយទៅព្រះយេហូវ៉ាចំពោះសាតាំង ដោយរក្សាចិត្តស្មោះគ្រប់ល័ក្ខណ៍«ដរាបដល់ស្លាប់»។—វិវរណៈ ១២:១, ៥ ៩-១២,១៧; សុភាសិត ២៧:១១
៥. តើអាកប្បកិរិយាដ៏ប្រសើរអ្វីនៃស្មរបន្ទាល់នៅសម័យថ្មី ដែលបានជួយពួកគេឲ្យរក្សាចិត្តស្មោះគ្រប់ល័ក្ខណ៍?
៥ ក្នុងឆ្នាំ១៩១៩ នៅពេលដែលកិច្ចការផ្សាយនៅសម័យថ្មីអំពីព្រះរាជាណាចក្ររបស់ព្រះបានចាប់ផ្ដើមឡើង សិស្សព្រះគម្ពីរ ដែលជាឈ្មោះនៃស្មរបន្ទាល់ព្រះយេហូវ៉ាពីដើម មានចំនួនតិចមែន ប៉ុន្តែពួកគេមានជំនឿយ៉ាងខ្លាំងមាំមួន។ ពួកគេបានក្លាយទៅជាសមាជិកគ្រឹះនៃ‹ទីក្រុង១ដ៏មាំមួន ដែលសេចក្ដីសង្គ្រោះទុកជាកំផែង ហើយជាទីការពារ›។ ពួកគេទុកចិត្តទៅលើ«ព្រះយេហូវ៉ា[ដែល]ទ្រង់ជាថ្មដាដ៏នៅអស់កល្បជានិច្ច»។ (អេសាយ ២៦:១, ៣, ៤) ដូចលោកម៉ូសេដែរ ពួកគេបានប្រកាសថា៖ «ទ្រង់ជាថ្មដា ការរបស់ទ្រង់សុទ្ធតែគ្រប់ល៍ក្ខណ៍ ដ្បិតអស់ទាំងផ្លូវទ្រង់ សុទ្ធតែប្រកបដោយយុត្ដិធម៌ ទ្រង់ជាព្រះដ៏ស្មោះត្រង់ ឥតមានសេចក្ដីទុច្ចរិតណាឡើយ ទ្រង់ក៏ត្រឹមត្រូវ ហើយទៀងត្រង់»។—ចោទិយកថា ៣២:៣, ៤
៦. តើតាមវិធីណាខ្លះ ដែលព្រះយេហូវ៉ាបានប្រទានប្រសិទ្ធពរដល់ប្រជារាស្ត្ររបស់ទ្រង់នៅថ្ងៃជាន់ក្រោយបង្អស់នេះ?
៦ តាំងពីពេលនោះមក ទ្វារនៃព្រះរាជាណាចក្ររបស់ព្រះបានបើកចំហដល់មនុស្សទាំងឡាយ។ ជាមុនដំបូង ពួកអ្នកសំណល់នៃជនគ្រីស្ទានចាក់ប្រេងតាំងដែលមានចំនួន១៤៤.០០០នាក់ ត្រូវបានប្រមូលមក ហើយឥឡូវនេះ មនុស្សមួយហ្វូងធំនៃ«ចៀមឯទៀត»កំពុងតែចូលរួមក្នុងការប្រកាសគោលបំណងនៃព្រះរាជាណាចក្ររបស់ព្រះយេហូវ៉ា។ (យ៉ូហាន ១០:១៦) ដូច្នេះ គេអាចប្រកាសដោយអំណរថា៖ «ទ្រង់បានចំរើនសាសន៍នេះ ឱព្រះយេហូវ៉ាអើយ ទ្រង់បានចំរើនសាសន៍នេះហើយ គេលើកដំកើងទ្រង់ឡើង ទ្រង់បានវាតព្រំស្រុកឲ្យធំទូលាយទៅ»។ (អេសាយ ២៦:១៥) កាលដែលយើងពិនិត្យមើលស្រែលោកីយ៍នៅសព្វថ្ងៃនេះ យើងឃើញថាពាក្យទាំងនេះគឺពិតណាស់! តាមរយៈឫទ្ធានុភាពនៃព្រះវិញ្ញាណបរិសុទ្ធ ការផ្សាយអំពីរាជាណាចក្ររបស់ព្រះគ្រីស្ទដែលនឹងមកដល់ឆាប់ៗនេះ ត្រូវបានធ្វើឡើង«រហូតដល់ចុងផែនដីបំផុត»។ (កិច្ចការ ១:៨) ទំហំនៃការពង្រីកនេះ អាចស្ទង់ឃើញនៅក្នុងរបាយការណ៍នៃកិច្ចបំរើប្រចាំឆ្នាំ១៩៩៤នៃស្មរបន្ទាល់ព្រះយេហូវ៉ានៅក្នុងពិភពលោក។
ចំនួនខ្ពស់ថ្មីនៃពួកអ្នកផ្សាយ
៧, ៨. តើមានទីសំអាងណាខ្លះ ដែលថាប្រជារាស្ត្ររបស់ព្រះ បាន‹ពង្រីកខ្សែត្រសាលរបស់គេនោះ›?
៧ ចូរពិចារណាអំពីគោលសំខាន់ខ្លះៗនៃរបាយការណ៍នេះ។ ចំនួនខ្ពស់នៃអ្នកផ្សាយព្រះរាជាណាចក្របានឡើងដល់ ៤.៩១៤.០៩៤នាក់! ជាការគួរឲ្យរំភើបណាស់ ក្នុងការឃើញ«មនុស្ស១ហ្វូងយ៉ាងធំ . . . ពីគ្រប់ទាំងសាសន៍ គ្រប់ទាំងពូជមនុស្ស គ្រប់ទាំងគ្រួសារ ហើយគ្រប់ទាំងភាសា ក៏ឈរនៅមុខបល្ល័ង្ក នឹងកូនចៀមទាំងពាក់អាវសវែង»ដែលកំពុងតែប្រមូលចូលជានិច្ច! ត្រូវហើយ ពួកគេក៏បានបង្ហាញថាជាអ្នករក្សាចិត្តស្មោះគ្រប់ល័ក្ខណ៍ដែរ។ ពួក«គេបានបោកអាវ ហើយធ្វើឲ្យឡើងសក្នុងឈាមរបស់កូនចៀម» គឺត្រូវបានចាត់ទុកជាអ្នកសុចរិត ពីព្រោះពួកគេបានអនុវត្តជំនឿទៅលើយញ្ញបូជាលោះរបស់ព្រះយេស៊ូ។—វិវរណៈ ៧:៩, ១៤
៨ ជាពិសេស តាំងពីឆ្នាំ១៩១៩ សេចក្ដីប្រកាសនេះបានបន្លឺឡើងទៅដល់អង្គការរបស់ស្មរបន្ទាល់ព្រះយេហូវ៉ា គឺថា៖ «ចូរពង្រីកទីដំឡើងត្រសាលឯងឲ្យធំឡើង ហើយឲ្យវារាល់គ្នាសន្ធឹងសំយាយសំពត់ត្រសាលរបស់ឯងទៅ កុំឲ្យសំចៃឡើយ ត្រូវឲ្យបន្តខ្សែឲ្យវែង ហើយបោះចំរឹងឲ្យមាំឡើងចុះ»។ (អេសាយ ៥៤:២) ក្នុងការតបឆ្លើយ កិច្ចការផ្សាយបានបន្តទៅមុខឥតចុះថយឡើយ រហូតដល់តំបន់យូកុនដ៏ត្រជាក់ ដែលនៅជិតព្រំដែននៃរដ្ឋអាឡាស្កា ដែលពួកអ្នកត្រួសត្រាយមួយក្រុមមិនចាញ់ធាតុអាកាសត្រជាក់ បានស៊ូទ្រាំរហូតដល់៤០ឬ៥០អង្សាក្រោមសូន្យជាច្រើនសប្ដាហ៍។ នៅឆ្នាំថ្មីៗនេះ មានមនុស្សជាច្រើនបានប្រមូលគ្នាមកចូលក្នុងសាសន៍ដែលរក្សាចិត្តស្មោះគ្រប់ល័ក្ខណ៍របស់ព្រះយេហូវ៉ា។ ទ្វារបានបើកចំហយ៉ាងធំដើម្បីទទួលមនុស្សពីប្រទេសអាស៊ី ដែលនៅខាងក្រៅនៃពិភពគ្រីស្ទសាសនា ពីប្រទេសកុម្មុយនិស្តពីមុន ពីប្រទេសអាហ្វ្រិកផ្សេងៗ និងពីប្រទេសដែលសាសនាកាតូលិកត្រួតត្រា ដូចជាប្រទេសអ៊ីតាលី អេស្ប៉ាញ ព័រទុយហ្គេល និងទ្វីបអាមេរិកខាងត្បូង។ អាណិកជនជាច្រើនបានរើទៅនៅប្រទេសផ្សេងៗ ហើយនេះបានបើកតំបន់ផ្សាយសំរាប់ភាសាបរទេសជាច្រើន។ ជាឧទាហរណ៍ នៅប្រទេសអង់គ្លេស ស្មរបន្ទាល់កំពុងតែថែរក្សាសេចក្ដីត្រូវការនៃពួកអាណិកជន១៣ក្រុម។
«ចូរធ្វើកិច្ចនេះ»
៩. តើចំនួនមនុស្សមកធ្វើពិធីបុណ្យរំឭកនៅឆ្នាំ១៩៩៤បញ្ជាក់អ្វី?
៩ គោលសំខាន់មួយទៀតនៃរបាយការណ៍ប្រចាំឆ្នាំ គឺចំនួនមនុស្សដែលបានមកពិធីបុណ្យរំឭក។ មុននឹងទ្រង់បានទទួលមរណភាព ព្រះយេស៊ូបានតែងតាំងពិធីធ្វើបុណ្យមួយ សំរាប់រំឭកដល់មរណភាពរបស់ទ្រង់ ហើយបានមានបន្ទូលប្រាប់ពួកអ្នកកាន់តាមទ្រង់ថា៖ «ចូរធ្វើកិច្ចនេះ ទុកជាសេចក្ដីរំឭកពីខ្ញុំចុះ»។ (កូរិនថូសទី១ ១១:២៤) ជាការគួរឲ្យរំភើបចិត្តណាស់ ដោយឃើញមានមនុស្ស១២.២៨៨.៩១៧នាក់ក្នុងឆ្នាំ១៩៩៤—ជាច្រើនមួយជាពីរនៃចំនួនអ្នកផ្សាយដ៏សកម្មទៅទៀត—ដែលបានប្រមូលគ្នាមក ក្នុងការគោរពបញ្ជានេះ ជាអ្នកទទួលទាន ឬជាអ្នកទស្សនៈ។ នៅក្នុងប្រទេសខ្លះ អនុបាតនៃមនុស្សដែលមកពិធីបុណ្យរំឭកគឺមានច្រើនជាងអ្នកផ្សាយទៅទៀត។ ពួកអ្នកផ្សាយដែលមានចំនួន៤០៤៩នាក់នៅប្រទេស អេសស្ទនញ៉ា ឡាតវា និងលីហ្សូអេនញ៉ា មានសេចក្ដីសប្បាយរីករាយណាស់ ដែលមានមនុស្ស១២.៨៧៦នាក់បានមកពិធីបុណ្យរំឭក ដែលមានជាងមួយជាបីនៃពួកអ្នកផ្សាយនៅទីនោះ។ ហើយនៅប្រទេសបិននិន ចំនួនមនុស្សដែលបានមកពិធីបុណ្យរំឭក១៦.៧៨៦ គឺតំណាងចំនួនជិតមួយជាប្រាំដងនៃចំនួនអ្នកផ្សាយ។ នៅក្នុងក្រុមជំនុំមួយ ដែលមានអ្នកផ្សាយប្រមាណ៤៥នាក់ មានមនុស្សមកធ្វើបុណ្យរំឭកដល់ទៅ៨៣១នាក់!
១០. (ក) តើចំនួនមនុស្សជាច្រើនដែលបានមកពិធីបុណ្យរំឭក បានធ្វើឲ្យយើងមានភារកិច្ចអ្វី? (ខ) សូមរៀបរាប់ពីហេតុការណ៍ដែលអាចកើតឡើង នៅពេលបុគ្គលម្នាក់ដែលបានមកបុណ្យរំឭក បានទទួលជំនួយទៀតនោះ។
១០ ស្មរបន្ទាល់ព្រះយេហូវ៉ាសប្បាយរីករាយណាស់ ដែលមានមនុស្សចំណូលចិត្តជាច្រើនបានចូលរួមជាមួយគេក្នុងពិធីដ៏ប្រសើរនេះ។ ឥឡូវនេះ ពួកគេចង់ជួយពួកទាំងនេះឲ្យរីកចំរើនតទៅមុខទៀត ក្នុងការយល់និងការស្រឡាញ់សេចក្ដីពិត។ មនុស្សខ្លះប្រហែលជាបានតបឆ្លើយដូចអាឡានៅប្រទេសរុស្សីដែរ។ អាឡាបានរៀនព្រះគម្ពីរជាមួយបងស្រីម្នាក់ដែលជាអ្នកត្រួសត្រាយពិសេស ប៉ុន្តែពុំបានមានការរីកចំរើនទេ ដូច្នេះក៏បានឈប់ការរៀនព្រះគម្ពីរទៅ។ ប៉ុន្តែ អាឡាបានយល់ព្រមមកពិធីបុណ្យរំឭក។ កិច្ចប្រជុំដ៏សំខាន់នេះ បានធ្វើឲ្យនាងមានចិត្តរំភើបណាស់។ នៅពេលត្រឡប់មកផ្ទះវិញ នាងក៏បានបោះចោលរូបសំណាកទាំងអស់ ហើយបានអធិស្ឋានទៅព្រះយេហូវ៉ាឲ្យជួយ។ ពីរថ្ងៃក្រោយមក បងស្រីដែលជាអ្នកត្រួសត្រាយក៏បានមកជួបអាឡា ដើម្បីចង់ដឹងថាតើនាងយល់យ៉ាងណាអំពីពិធីបុណ្យរំឭកនោះ។ ការពិភាក្សារវាងអ្នកទាំងពីរ ក៏បានទទួលលទ្ធផលដ៏ល្អ។ អាឡាក៏ចាប់ផ្ដើមរៀនព្រះគម្ពីរឡើងវិញ។ មិនយូរប៉ុន្មាននាងក៏បានចូលរួមក្នុងកិច្ចការផ្សាយដែរ។ ការពិសោធន៍នេះបង្ហាញនូវសារៈសំខាន់នៃការត្រឡប់ទៅជួបអស់អ្នកដែលបានមកពិធីរំឭក។ មនុស្សជាច្រើននឹងច្បាស់ជាតបឆ្លើយដូចអាឡាដែរ។
‹មិនត្រូវលះបង់ការប្រជុំគ្នា›
១១-១៣. (ក) តើផ្នែកនៃចរិយាដ៏ស្មោះត្រង់នៃសាសន៍សុចរិតជាអ្វី? (ខ) ហេតុអ្វីក៏ពួកគ្រីស្ទានត្រូវការមកប្រជុំជាចាំបាច់?
១១ ពិធីបុណ្យរំឭកជាកិច្ចប្រជុំដ៏សំខាន់បំផុតក្នុងប្រក្រតីទិននៃស្មរបន្ទាល់ព្រះយេហូវ៉ា ប៉ុន្តែនេះមិនមានសេចក្ដីថា មានកិច្ចប្រជុំតែមួយប៉ុណ្ណោះទេ។ ជារៀងរាល់សប្ដាហ៍ ពួកស្មរបន្ទាល់មករួបរួមគ្នា ក្នុងការស្ដាប់បង្គាប់តាមពាក្យរបស់សាវ័កប៉ុល៖ «ត្រូវឲ្យយើងពិចារណាមើលគ្នាទៅវិញទៅមកដែរ ដើម្បីនឹងបណ្ដាលឲ្យមានសេចក្ដីស្រឡាញ់ ហើយឲ្យប្រព្រឹត្តការល្អផង។ ឥតលែងប្រជុំគ្នា ដូចជាអ្នកខ្លះធ្លាប់នោះឡើយ ត្រូវឲ្យកំឡាចិត្តគ្នាវិញ ឲ្យកាន់តែខ្លាំងឡើងផង តាមដែលឃើញថាថ្ងៃនោះជិតមកដល់ហើយ»។ (ហេព្រើរ ១០:២៤, ២៥) ពួកគេចូលរួមជាមួយនឹងសាសន៍សុចរិតរបស់ព្រះយេហូវ៉ា ដែលអាចសម្គាល់បានតាមរយៈចរិយាដ៏ស្មោះត្រង់។ ចរិយាដ៏ស្មោះត្រង់ រួមបញ្ចូលទាំងការមកប្រជុំដ៏ទៀងទាត់ដែរ។
១២ នេះត្រូវបានឃើញយ៉ាងជាក់ស្តែងនៅក្នុងប្រទេសហ្វីលីពិន ដែលចំនួនមនុស្សជាមធ្យមមកប្រជុំនៅថ្ងៃអាទិត្យមាន១២៥ភាគរយនៃចំនួនពួកអ្នកផ្សាយ។ ចំពោះក្រុមស្មរបន្ទាល់និងបុគ្គលចំណូលថ្មីនៅប្រទេសអារ្សងទីន ពួកគេក៏យល់ច្បាស់អំពីសេចក្ដីបង្គាប់នេះដែរ។ ពួកគេរស់នៅប្រមាណ២០គីឡូម៉ែត្រពីសាលព្រះរាជាណាចក្រ។ យ៉ាងណាក៏ដោយ អ្នកត្រួតពិនិត្យមណ្ឌលបានរាយការណ៍មកថា គ្មានអ្នកណាមួយខានមកកិច្ចប្រជុំឡើយ លើកលែងតែនៅពេលឈឺប៉ុណ្ណោះ។ ពួកគេធ្វើដំណើរជិះរទេះសេះឬក៏ជិះសេះអស់រយៈបួនម៉ោង ហើយក្នុងកំឡុងរដូវត្រជាក់ ពួកគេធ្វើដំណើរទៅផ្ទះទាំងយប់។
១៣ កាលដែលទីបញ្ចប់នៃប្រព័ន្ធនេះកាន់តែជិតមកដល់ ជីវិតរឹតតែពិបាកឡើងៗ បញ្ហារឹតតែមានច្រើនឡើងៗ ហើយការមកឯកិច្ចប្រជុំឲ្យបានទៀតទាត់ក៏អាចជាកិច្ចការដ៏ពិបាកមួយដែរ។ ប៉ុន្តែនៅក្រោមកាលៈទេសៈបែបនេះ យើងត្រូវការម្ហូបអាហារខាងវិញ្ញាណនិងមិត្តភាពដ៏កក់ក្ដៅជាច្រើន ដែលអាចរកបាននៅឯកិច្ចប្រជុំតែប៉ុណ្ណោះ។
«ទទូចជំរុញផង»
១៤. ហេតុអ្វីក៏ស្មរបន្ទាល់ព្រះយេហូវ៉ាដឹងនូវភាពបន្ទាន់នៃកិច្ចបំរើរបស់គេ ហើយតើលទ្ធផលអ្វីដែលសម្ដែងអំពីរឿងនេះ?
១៤ ឆ្នាំមុននេះ សាសនាកាតូលិកនៅក្នុងប្រទេសអ៊ីតាលី បានសំដៅទៅកិច្ចការរបស់ស្មរបន្ទាល់ព្រះយេហូវ៉ាជា«ការបញ្ចុះបញ្ចូលយ៉ាងគឃ្លើននិងទ្រគោះ»។ ប៉ុន្តែ គឺគ្មានអ្វីដែលពិតជាគឃ្លើននិងទ្រគោះអំពីកិច្ចបំរើរបស់ស្មរបន្ទាល់ទេ។ ផ្ទុយទៅវិញ កិច្ចបំរើរបស់គេ ជាការសម្ដែងនៃសេចក្ដីស្រឡាញ់ដ៏ជ្រាលជ្រៅចំពោះអ្នកជិតខាង។ ហើយនេះក៏ជាការជាក់ស្តែងនៃការស្ដាប់បង្គាប់តាមពាក្យរបស់ប៉ុលដែរ៖ «ចូរឲ្យអ្នកផ្សាយព្រះបន្ទូលចុះ ហើយទទូចជំរុញផង ទោះត្រូវពេល ឬខុសក្ដី»។ (ធីម៉ូថេទី២ ៤:២) ការដឹងនូវភាពបន្ទាន់នៃកិច្ចការនេះ ជំរុញស្មរបន្ទាល់ព្រះយេហូវ៉ាឲ្យមានចិត្តខ្នះខ្នែងក្នុងកិច្ចបំរើរបស់គេ ដូចជាបានឃើញក្នុងការចំណាយពេលសរុបអស់១.០៩៦.០៦៥.៣៥៤ម៉ោងនៅឆ្នាំ១៩៩៤គឺជាការដើរផ្សាយទៅអ្នកជិតខាង ការត្រឡប់ទៅជួប និងការបង្រៀនព្រះគម្ពីរដល់សិស្សចំនួន៤.៧០១.៣៥៧នាក់។ ស្មរបន្ទាល់ជាច្រើនបានចូលរួមក្នុងកិច្ចការត្រួសត្រាយពេញពេល ដែលបង្ហាញនូវគតិនៃការត្រួសត្រាយកំពុងតែចំរើនបានល្អ។ អ្នកត្រួសត្រាយនៅពាសពេញពិភពលោក ដែលជាមធ្យមមាន៦៣៦.២០២នាក់បង្ហាញឲ្យឃើញអំពីការនេះ។
១៥, ១៦. តើមនុស្សក្មេងចាស់បានសម្ដែងគំនិតត្រួសត្រាយតាមរបៀបណា?
១៥ ក្នុងចំណោមពួកអ្នកត្រួសត្រាយទាំងនេះ គឺមានក្មេងជំទង់ជាច្រើន។ នៅសហរដ្ឋអាមេរិក ឥឡូវនេះ ក្មេងជំទង់ខ្លះកំពុងតែបំរើជាអ្នកត្រួសត្រាយពេញពេល នៅកំឡុងមធ្យមសិក្សា ដើម្បីផ្សាយទៅសិស្សគ្នីគ្នា។ យុវជនទាំងនេះបានឃើញថា នេះជារបៀបដ៏ប្រសើរ ក្នុងការការពារខ្លួនគេពីគ្រឿងញៀន អំពើអសីលធម៌ និងអំពើឃោរឃៅដែលរាលដាលពាសពេញសាលានៅក្នុងប្រទេស។ ក្មេងជំទង់ជាច្រើនទៀតមានគោលដៅនឹងត្រួសត្រាយ នៅពេលដែលគេចាកចេញពីសាលា។ អៃរិណាដែលរស់នៅក្នុងប្រទេសអ៊ុយក្រែន បានធ្វើជាអ្នកត្រួសត្រាយជំនួយនៅពេលដែលនាងនៅមធ្យមសិក្សា ដើម្បីរៀបចំខ្លួនសំរាប់ការត្រួសត្រាយពេញពេល ក្រោយពីរៀនចប់។ នៅពេលដែលនាងរៀនចប់ គ្រួសាររបស់នាងបានជួយនាងខាងប្រាក់កាស ដើម្បីឲ្យនាងអាចតំណាងគ្រួសាររបស់នាង ក្នុងកិច្ចបំរើត្រួសត្រាយពេញពេល។ បើនិយាយខាងសេដ្ឋកិច្ចនោះ ប្រទេសអ៊ុយក្រែនមិនជាស្រួលទេ។ ប៉ុន្តែ អៃរិណាបាននិយាយថា៖ ខ្ញុំដឹងថា ខ្ញុំធ្វើការដែលផ្ដល់ឲ្យជីវិត មិនមែនសំរាប់ខ្ញុំតែប៉ុណ្ណោះ ប៉ុន្តែសំរាប់អស់អ្នកដែលខ្ញុំប្រាប់ទៅដែរ»។ ជាការគួរឲ្យសប្បាយរីករាយណាស់ ដោយឃើញក្មេងជំទង់ៗជាច្រើននៅសព្វថ្ងៃនេះកំពុងតែមានគំនិតដូចអៃរិណាដែរ។ ចំពោះពួកគេ គឺគ្មានផ្លូវណាប្រសើរជាង‹ការនឹកចាំពីព្រះជាអ្នកបង្កើតដ៏ខ្ពស់ថ្កើងរបស់គេ ក្នុងកាលនៅយុវវ័យឡើយ›?—សាស្ដា ១២:១
១៦ ពួកអ្នកត្រួសត្រាយពេញពេលជាច្រើន គឺកាន់តែចាស់ទៅហើយ។ បងប្អូនស្រីម្នាក់រាយការណ៍ថា ក្នុងកំឡុងសង្គ្រាមលោកលើកទីពីរ ឪពុកនិងបងប្អូនប្រុសរបស់នាងត្រូវបានស្លាប់ទៅ កាលដែលប្រយុទ្ធនៅក្នុងសង្គ្រាម ចំណែកឯម្ដាយនិងបងប្អូនស្រីរបស់នាងត្រូវបានគេសម្លាប់ក្នុងតំបន់អ្នកទីទ័លក្ររស់នៅ។ ក្រោយមក កូនប្រុសរបស់នាងបានស្លាប់ទៅ។ ឥឡូវនេះ កាលដែលនាងបានកាន់តែចាស់ឡើង ហើយសុខភាពមិនល្អផង ព្រះយេហូវ៉ាបានប្រទានឲ្យនាងនូវគ្រួសារដ៏ធំជាងគ្រួសារដែលនាងបានបាត់បង់ នៅក្នុងក្រុមជំនុំគ្រីស្ទាន ហើយនាងមានអំណរក្នុងការជួយអ្នកឯទៀត ដោយបំរើជាអ្នកត្រួសត្រាយពេញពេល។
១៧, ១៨. ទោះបីជាអ្នកត្រួសត្រាយពេញពេលឬក៏មិនមែន តើយើងម្នាក់ៗ អាចបង្ហាញគំនិតត្រួសត្រាយយ៉ាងណាខ្លះ?
១៧ ប្រាកដហើយ មិនមែនមនុស្សគ្រប់គ្នាអាចត្រួសត្រាយពេញពេលបានទេ។ ព្រះយេហូវ៉ាទ្រង់សព្វព្រះហឫទ័យ ក្នុងការទទួលតង្វាយទាំងមូលរបស់យើង គឺជាអ្វីដ៏ប្រសើរដែលយើងអាចថ្វាយ ទោះជាអ្វីក៏ដោយ។ (ម៉ាឡាគី ៣:១០) ពិតហើយ យើងម្នាក់ៗអាចបណ្ដុះឲ្យមានគំនិតត្រួសត្រាយពីពួកអ្នកត្រួសត្រាយដ៏ខ្នះខ្នែងទាំងនេះ ហើយខំធ្វើយ៉ាងណាដែលយើងអាចធ្វើទៅបាន ដើម្បីផ្សាយដំណឹងល្អឲ្យបានចំរើនទៅមុខ។
១៨ ជាឧទាហរណ៍ នៅប្រទេសអូស្ដ្រាលីក្នុងខែមេសាទី១៦ គេបានជ្រើសរើសទុកជាថ្ងៃដ៏ពិសេសសំរាប់ដើរផ្សាយតាមផ្លូវ។ ពួកអ្នកផ្សាយនិងអ្នកត្រួសត្រាយពេញពេលបានគាំទ្រយ៉ាងច្រើន ដូចជាបានឃើញយ៉ាងជាក់ស្តែងនូវចំនួនខ្ពស់ថ្មីនៃអ្នកផ្សាយដល់៥៨.៧៨០នាក់សំរាប់ខែនោះ។ ម្យ៉ាងវិញទៀត គេបានចែកចាយទស្សនាវដ្ដីបានច្រើនជាងឆ្នាំមុននៅខែដដែល ជាង៩០.០០០ក្បាល។ ក្នុងកំឡុងថ្ងៃពិសេសនោះ បងស្រីម្នាក់បានឲ្យទស្សនាវដ្ដីទៅបុរសម្នាក់ ហើយកាលដែលនាងកំពុងតែកត់ឈ្មោះ និងអាស័យដ្ឋានរបស់គាត់ ដើម្បីនឹងត្រឡប់ទៅជួបវិញនោះ នាងបានដឹងថា គេជាប់សាច់ញាតិនឹងគ្នា! ពួកគេជាបងប្អូនជីដូនមួយ ដែលបានបែកគ្នាអស់រយៈ៣០ឆ្នាំមកហើយ។ នេះច្បាស់ជាធ្វើឲ្យសប្បាយរីករាយណាស់ ពេលត្រឡប់ទៅជួបវិញនោះ!
ចូររក្សាចិត្តស្មោះគ្រប់ល័ក្ខណ៍រហូតដល់ទីបញ្ចប់
១៩. ហេតុអ្វីក៏ជាការបន្ទាន់ដែលសាសន៍សុចរិតរបស់ព្រះយេហូវ៉ា រក្សាចិត្តស្មោះគ្រប់ល័ក្ខណ៍រហូតដល់ចុងបញ្ចប់?
១៩ ជាការបន្ទាន់ណាស់ ដែលសាសន៍សុចរិតរបស់ព្រះរក្សាចិត្តស្មោះគ្រប់ល័ក្ខណ៍ កាលដែលលោកីយ៍របស់សាតាំងជិតធ្លាក់ចូលទីបញ្ចប់នោះ។ មិនយូរប៉ុន្មាន សាសន៍សុចរិតរបស់ព្រះយេហូវ៉ា នឹងឮសេចក្ដីប្រកាសថា៖ «ចូរមក ជនជាតិខ្ញុំអើយ ចូរឲ្យចូលទៅក្នុងបន្ទប់ខ្លួន ហើយបិទទ្វារចុះ ត្រូវឲ្យពួនខ្លួនបន្ដិចសិន ទាល់តែសេចក្ដីក្រោធបានកន្លងហួសទៅ»។ លោកីយ៍ដែលមានទោសខាងការបង្ហូរឈាមនេះ នឹងប្រឈមមុខការជំនុំជំរះរបស់ព្រះ។ «ដ្បិតមើល ព្រះយេហូវ៉ាទ្រង់យាងចេញពីស្ថានរបស់ទ្រង់មក ដើម្បីនឹងសំរេចទោសដល់មនុស្សនៅផែនដី ដោយព្រោះអំពើទុច្ចរិតរបស់គេ ឯដី នឹងបើកបង្ហាញឈាមគេឲ្យឃើញ ឥតគ្របបាំងមនុស្សដែលត្រូវគេសម្លាប់ទៀតឡើយ»។ (អេសាយ ២៦:២០,២១) សូមឲ្យយើងម្នាក់ៗឈរឲ្យបានមាំមួន ជាជនគ្រីស្ទានដែលរក្សាចិត្តស្មោះគ្រប់ល័ក្ខណ៍ ដោយចូលរួមជាមួយសាសន៍សុចរិតរបស់ព្រះយេហូវ៉ា។ រួចមក យើងនឹងមានអំណរទទួលជីវិតអស់កល្បជានិច្ចក្នុងវិស័យនៃព្រះរាជាណាចក្ររបស់ព្រះគ្រីស្ទ។
តើអ្នកនៅចាំទេ?
◻ តើ«សាសន៍សុចរិត»បានចាប់កំណើតមកនៅពេលណា?
◻ ហេតុអ្វីក៏ប្រជារាស្ត្ររបស់ព្រះ ត្រូវការការស៊ូទ្រាំក្នុងកំឡុងថ្ងៃជាន់ក្រោយបង្អស់នេះ?
◻ ការមានអ្នកផ្សាយជាច្រើននិងម៉ោងជាច្រើនដែលបានចំណាយក្នុងកិច្ចបំរើ ដែលបានបង្ហាញមកក្នុងរបាយការណ៍ប្រចាំឆ្នាំ១៩៩៤បញ្ជាក់យ៉ាងណា?
◻ ហេតុអ្វីក៏ការមកប្រជុំជាការសំខាន់ម្ល៉េះ កាលដែលលោកីយ៍នេះជិតមកដល់ទីបញ្ចប់?
◻ ហេតុអ្វីក៏ពួកអ្នកដែលចូលរួមជាមួយសាសន៍សុចរិតរបស់ព្រះ ត្រូវតែរក្សាចិត្តស្មោះគ្រប់ល័ក្ខណ៍?
[រូបភាពនៅទំព័រ១៧]
ពួកអ្នករក្សាចិត្តស្មោះគ្រប់ល័ក្ខណ៍ក្នុងសាសន៍សុចរិតរបស់ព្រះយេហូវ៉ា នឹងទទួលបានជីវិតអស់កល្បជានិច្ចដ៏ល្អឥតខ្ចោះ