Atuartartut apeqqutaat

Politikkikkut pissaanillit qaqugu “eqqissineq isumannaas­suserlu” suaarutigissavaat?

Atuagassiat kingulliit ilaannia paasivarput Jehovap qanittukkut “nassuit qulit” eqqarsaatimisut ilioqqullugit sunnissagai, taamaat­tumillu oqartus­saassusertik ‘uumasumut nujuartamut aappallarissumut’ tunniutissagaat. Tamanna isumaqarpoq politikkikkut pissaanillit tamarmik oqartus­saassusertik FN-imut tunniutissagaat. FN aamma ‘uumasup nujuartap assingatut’ allaatigineqarpoq. (Saqq 13:14, 15; 17:3, 16, 17) Taava “nassuit qulit” aamma ‘uumasup’ oqartus­saassusiler­neqarsimasup upperisarsiorneq eqqunngitsoq nunarsuarmi tamarmi suujunnaarsissavaat. Tamatumali suujunnaarsin­neqarnissaa sioqqullugu tamatumaluunniit kingorna politikkikkut pissaanillit “eqqissineq isumannaas­suserlu” suaarutigissavaat?b – Tes 1. 5:3.

Naatsumik oqaatigalugu naluarput qaqugorpiaq ‘eqqissinermik isumannaas­susermillu’ nalunaar­toqassanersoq. Pisussanut tunngatillugu suut tamaasa ilisimasuugutsigit anersaakkut eqqumajuar­tariaqan­ngikkaluarpugut. Jiisusilli arlaleriarluni ilinniartitani oqarfigisarpai ‘ilimasul­lutillu eqqumajuassasut’. (Mat 24:42; 25:13; 26:41) Maanna Tessaluunikamiunut allakkani Jehovap siulittuutaa sammineroriartigu.

Paulusi allappoq: “Ima oqartoqarpat: ‘Eqqissineq isumannaas­suserlu!’ taava … ilimagin­ngisamik piuneerus­saariataassapput.” (Tes 1. 5:2, 3) Biibililersaarutitsinni Paulusip allatai taakku ima nassuiar­neqarsimapput: Siullermik politikkikkut pissaanillit “eqqissineq isumannaas­suserlu” suaarutigissavaat. Taava ingerlaannaq Babylon­nersuaq, tassa upperisarsiorneq eqqunngitsoq, suujunnaarsin­neqarpat annikil­liornar­tussarsuaq aallartissaaq. Aamma nassuiaasimavugut taamatut oqarpata ilisimas­sagipput annikil­liornar­tussarsuaq nalliutingajaliivittoq.

Kisianni misissueq­qissaareernikkut paasinarsivoq pisussat tulleriiaarnerat qulakkiivillugu taama nassuiarsin­naanngikkipput. Imaassin­naavormi upperisarsioqatigiit eqqunngitsut aatsaat suujunnaarsin­neqareerpata politikkikkut pissaanillit “eqqissineq isumannaas­suserlu” suaarutigissagaat. Pissutaasinnaasut uku eqqarsaatigikkit.

Upperisarsioqatigiit eqqunngitsut sorsunnernik siuarsaasimapput. Biibilimi allassimavoq ‘arnaq atortit­tartorsuaq’, tassa Babylon­nersuaq, ‘nunarsuarmi toqunneqartut tamarmik aavisa kuineqar­nerannut pisuusoq’. (Saqq 17:1, 5; 18:24) Oqaluttuarisaanerup ingerlanerani upperisarsioqatigiit eqqunngitsut sorsunnerit tapersersor­tarsimavaat, aamma nakuusernernut peqqarniisaar­niarnernullu pisooqataasarsimapput. Tassa eqqissineq isumannaas­suserlu pinnagit sorsunnerit nakuusernerlu siuarsarsimavaat. Taamaattumik imaassinnaavoq aatsaat Babylon­nersuaq suujunnaarsin­neqareerpat politikkikkut pissaanillit “eqqissineq isumannaas­suserlu” suaarutigissagaat. Taamaat­toqarsinnaavoq, kisianni naluarput.

Politikkikkut pissaanillit “eqqissineq isumannaas­suserlu” suaarutigereerpassuk qanoq pisoqassava? Paulusi allappoq: ‘Taava tassanngaannaq piuneerus­saariataassapput.’ (Tes 1. 5:3) Qanoq isumaqarpa? Imaassinnaavoq isumaqartoq ‘eqqissinermik isumannaas­susermillu’ nalunaaruteqar­neraniit politikkikkut pissaanillit piuneerun­neqarnissaata tungaanut piffissaq sivikitsoq ingerlaq­qaassasoq. Imaluunniit isumaqarsinnaavoq ingerlaannaq piuneerun­neqassasut. Kingulleq ilumoorpat ilimanarpoq upperisarsioqatigiit eqqunngitsut suujunnaarsin­neqareerpata aatsaat politikkikkut pissaanillit “eqqissineq isumannaas­suserlu” suaarutigissagaat, taamaat­toqartillugumi ‘tassanngaannaq piuneerus­saariataas­sagamik’.

Jehovap innuttai qanoq qisuariassappat? Paulusi allappoq: “Ilissili, qatanngutit, taartumiin­nginnassi ullup tillinnianik pakasaasar­neratut pakasar­neqarnavian­ngilasi.” (Tes 1. 5:4) Una eqqarsaatigiuk: Upperisarsioqatigiit eqqunngitsut suujunnaarsin­neqarnerata kingorna aatsaat politikkikkut pissaanillit “eqqissineq isumannaas­suserlu” suaarutigippassuk Jehovap innuttaasa nalussan­ngilaat politikkikkut pissaanillit piuneerus­saaliivittut. Politik­kikkulli pissaanillit isumaqaramik eqqissineq angusimallugu tamanna tupigusuutigissavaat. Tillinniat unnuakkut tillittar­nerattut tassangaannaq piuneerus­saariataassapput.

Una qulakkiivillugu nalunngilarput: Siunissami ungasin­ngitsumi “nassuit qulit” aamma ‘uumasoq nujuartaq’ taakkunannga oqartus­saassusiler­neqarsimasoq upperisarsiornermik eqqunngitsumik suujunnaarsitsissapput, taamatullu annikil­liornar­tussarsuaq aallartissaaq. Aamma nalunngilarput politikkikkut pissaanillit “eqqissineq isumannaas­suserlu” suaarutigissagaat. Qaqugorpiaas­sanersorli naluarput. Pisussat tulleriiaar­nerinut periarfissat marluupput. Siullertut: Imaassinnaavoq upperisarsioqatigiit eqqunngitsut suujunnaarsin­neqanngin­neranni politikkikkut pissaanillit “eqqissineq isumannaas­suserlu” suaarutigiumaaraat. Aappaattut: Imaassinnaavoq upperisarsioqatigiit eqqunngitsut suujunnaarsin­neqareerpata aatsaat ‘eqqissinermik isumannaas­susermillu’ nalunaar­toqarumaartoq. Tassa pisussat tulleriiaarnerat paasinarsiumaarpoq. Biibilimi siulittuutit aatsaat eqquunneranni imaluunniit eqquunnerisa kingorna tamakkiisumik paasilluar­neqarajupput. – Aamma takuuk Johannesi 12:16.

Eqqaamas­savarput politikkikkut pissaanillit “eqqissineq isumannaas­suserlu” qaqugorpiaq suaarutigis­saneraat pingaar­nerpaanani Guutimut aalajaat­tuarnerput pingaar­nerpaasoq. Pisussat qanorluunniit tulleriiaas­sagaluarpata piareersimasin­naaqqulluta “eqqumasa silatusaarlutalu”! – Tes 1. 5:6.