Meeqqat Jehovamit tunissutaapput

NUANNARIL­LUAKKANNIK tunisin­nikuuit? Immaqa asangaakkannit tunissutisiaraat. Tunissut taanna pingaar­tillugu paarilluas­sanngin­nerpiuk?

Meeqqat Jehovamit tunissutitut Biibilimi eqqaaneqarput. (Tuss 127:3) Angajoqqaat Jehovamik asannittut qitornatik taamatut isigaat. Sapinngisamik qitornatik inuunermi pisariaqar­titaannik isumaginiar­tarpaat, peqqissuutin­niartarpaat pilluar­tikkusul­lugillu aamma Jehovamik qanimut ikinnguteqar­nissaannik ikiorniar­tarpaat.

Ajoraluartumik ullutsinni angajoqqaat ilaasa qitornatik Guutimit tunissutitut isigineq ajorpaat. (Es 49:15; Tim 2. 3:1-3) Allat qitornatik isumagerusungaar­taraluarlugit assigiin­ngitsunik akornuteqartarput. Taakkua ilaat suuppat? Jehovap angajoqqaat qanoq piumasaqarfigai? Aamma qanoq angajoqqaat qitornatik inersimasutut pilluarlutik inuunis­saannut perorsarsin­naavaat?

UNAMMINIAR­NARTUUSINNAASUT

• Ilaquttanit nunaqqatinillu tatineqarneq. Angajoqqaat qitornarpas­suallit nunat ilaanni ataqqineqar­nerusarput. Taamaattumik aappariit isumagisin­naasaannit amerlanerusunik qitornior­nissaannik ilaqutaasa nunaqqataasaluunniit tatisarpaat.

• Siunissamut ernumaneq. Nunat ilaanni nerisas­saaleqisoqarpoq, nakorsas­saaleqisoqarpoq nappaalanersuaqarlunilu. Taamaattumik ilaannaal­luunniit inersimasun­ngornissaat qulakkeer­niarlugu aappariit ilaat amerlasuunik meeqqiortarput. Aappariit allat aalajangertarput amerlasuunik meeqqior­niarlutik utoqqaligunik isumagin­nitseqar­niassagamik. Pingaartumik nunani aningaasatigut allatigul­luunniit utoqqarnik pisortanit isumagin­nittoqarfiun­ngitsuni taamaat­toqartarpoq.

• Naartunaveersaarneq. Nunat ilaanni naartunaveersaatinik pissarsinissaq ajornakusoortarpoq. Aappariit ilaat pissarsisin­naagaluarput, pitsaas­susaalli qularalugu napparsimaler­nissartillu merseralugu iisineq ajorput. Allallu naartunaveersaatit atorusuk­kaluarlugit pisiarinis­saannut akissaqan­ngillat.a

JEHOVAP ANGAJOQQAAT QANOQ PIUMASAQARFIGAI?

Meeqqassi pisariaqartitaat isumagisarsigit. Jehovap angajoqqaat akisussaaf­filerpai meeqqatik suli inersimasun­ngunngitsut nerisas­saqartil­lugillu atisassaqar­tillugillu angerlarsimaf­feqartissagaat. Aamma meeqqat perorsar­neqarnissaat akisussaaffigaat. Taamaattumik angajoqqaat Jehovamik ataqqinnittut qitornatik najugaqarfik qimallugu atuariar­tortinneq ajorpaat. Qitornatik tamarmik immikkut toqqissisimaneq asaneqarnerlu misiginias­sammatigit perornissaata tungaanut najugaqatigerusut­tarpaat. Jehovalli piumasarinngilaa angajoqqaat pigissaar­tuussasut. Una eqqarsaatigiuk: Jehovap ernerminut asasaminut nunarsuarmi angajoqqaatut toqqarsimasai pisuujun­ngillat, isumaginiarluguli sulilluartarput. – Mat 13:55, 56; Luk 2:24.

Biibilimi najoqqutassiaq: “Angut ilaquttaminik, pingaartumik illuminiittunik, isumassuin­ngitsoq uppernermik tunussisuullunilu uppersuseqan­ngitsumit ajorneruvoq.” – Tim 1. 5:8.

Jehovap nalunngilaa angajoqqaat utoqqaligunik ikiorneqar­tariaqartut. Qitornaasut angajoq­qaaminnut ataqqin­ninnertik ilaatigut ersersis­sinnaavaat angajoqqaamik utoqqalisut ikiorneqar­nissaat isumagalugu. (Mos 2. 20:12; Tim 1. 5:4) Jehovalli nuannaarutigisarpaa angajoqqaat qitornaminnit isumagineqar­nissartik pinnagu namminneq qitornatik qanoq isumagisin­naanerlugit pingaar­tikkaangassuk. – Kor 2. 12:14.

Meeqqasi Jehova pillugu ilinniar­tittarsigit. Angajoqqaat qitornatik Jehovamik asannin­nissaannik aamma qanoq guutisior­nissaanik ilinniar­tissavaat. Jehovamut tamanna tassaavoq angajoqqaat qitornaminnut ilinniar­titsissutigisin­naasaat pingaar­nerpaaq. – Mos 5. 6:6, 7.

Biibilimi najoqqutassiaq: ‘Meeqqasi Jehovap iluarisaatut perorsarlugillu siunnersorsigit.’ – Ef 6:4.

JEHOVAP IKIORUSUPPAASI

Pilersaarusioritsi. Meerartaarusukkussi atukkasi eqqarsaatigeq­qissaaq­qaarsigit. Assersuutigalugu arlalinnik meeraqar­nissamut – nerisassaat, atisassaat il.il. eqqarsaatigalugit – akissaqarpisi, nukissaqarpisi isumagisin­naavisigillu? Eqqaamasiuk Jehovap piumasarimmagu meeqqat tamarmik immikkut pisariaqartitaat tunniutissagisi. Taamaattumik aappariittut eqqartorsiuk qassinik meerartaas­sanerlusi. Soorunami pilersaarutaan­ngitsumik pisoqas­sagaluarpat Jehova paasinnis­sinnaavoq. (Oqal 9:11) Jehovalli angajoq­qaajulluarumallusi ilungersor­nissinni ikiorumaarpaasi.

Biibilimi najoqqutassiat: “Eqiasuitsup pilersaarusiai iluanaarutis­sarsisitsisarput, tuaviorpal­laartorli ajorsaateqalersarpoq.” – Uss 21:5.

“Kina arlarsi napasulialior­niartoq ingeqqaas­sannginnerpa naatsorsor­niarlugu naammas­sinissaanut akissaqar­nerluni?” – Luk 14:28.

Ilaqutariittut Jehova salliutissiuk. Ilaqutariiullusi Jehovamut kiffartorneq pingaar­nerpaatissiuk. Meeraqareersimagussi Jehovamik asannin­nissaannik immikkut tamaasa ilinniar­tissigit. Ataatsimiinnerit pissarsiaqarfigiumallugit tusarnaarluar­tarnissaannik ikiorsigit. Ilaqutariittut sapaatit-akunneri tamaasa atuaqqis­saaqatigiinneq ileqquliussiuk. Meeqqasi oqaluus­sinermut ilinniar­tillugit oqaluus­seqatigisarsigit. Tamakku angajoqqaatut nammineq akisussaaf­figigassigit meeqqassinnut angajullernut ilaquttanul­luunniit allanut isumagisas­saanngor­tissanngilasi. Meeqqanik Jehovamik kiffartor­tussanik perorsaaneq piffissamik atuinarlunilu ilungersunartuuvoq, nuannaarutaangaar­tarporli.

Biibilimi najoqqutassiaq: “Qitornakka ilumoortoq malillugu inuusut tusarlugu allanit tamanit nuanner­nerpaavoq.” – Joh 3. 4.b

Jehova tatigisiuk. Meerartaar­nissarsi eqqarsaatigigussiuk imaluunniit meeraqareersimagussi angajoqqaatut Jehovap ilissinnut iliuusereqqusai nunaqqatissi naatsorsuutigisaannit kulturik­kulluunniit ileqqutoqqanit pingaar­nerupput.

Meeqqiornersi killilersimaarussiuk utoqqaligussi Jehovap pisariaqar­titassinnik isumagiumaaraasi tatigisiuk. Allat qanorluunniit isumaqaraluarpata utoqqaligussi meeqqat aningaasatigut pilersuisussatut isigissan­ngilasi. Isumagineqarun­naarnissarsi ernumagisariaqan­ngilarsi. Jehovami neriorsuisimavoq isumagiumaarlusi, neriorsuutinilu piviusun­ngortit­tuaannarpai. – Jos 23:14.

Biibilimi najoqqutassiat: “Naalagaq tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavil­luunniit, taava ingerlavissatit nalimmatsissavai.” – Uss 3:5, 6.

“Inuusut­tuusimavunga utoqqalisimal­lungalu maanna, takusiman­ngisaan­narpungali iluartumik qimagaasumik qitornaanil­luunniit nerisassanik qinnuuloortunik.” – Tuss 37:25.

“Guutip kunngeqarfia naapertuil­luarneralu salliut­tuarsigit, taava tamakkuninnga tamanik tunineqarumaarpusi.” – Mat 6:33.

Qitornat Jehovamit tunissutaapput paarilluar­neqartussat. Angajoqqaat qitornatik isumassorlugit akisussaaffitsik eqqortik­kaangassuk Jehova nuannaartarpoq! Aappariit kristumiut qitornatik timikkut, misigis­sutsikkut anersaakkullu isumagisarpaat, qassinik qitornaqarusun­nerlutik pilersaarusiortarput Jehovallu piumasaqaatai kulturiminni ileqquusunit pingaar­nerutit­tarlugit. Taamaalillutik takutit­tarpaat qitornatik asallugit tunissutitullu naleqangaartutut isigalugit.