„Eqqissineq isumannaassuserlu“ inuit pilersitaannit pitsaanerusoq

Ilumut inuup kialuunniit eqqissineq ataavartussaq pilersissinnaanavianngilaa. Sooq? Inuit tassarpiaanngimmata eqqissiviilliortitsisut, naak oqaluttuarisaanermut aagasattumut akisussaaqataagaluartut. Eqqissiviilliortitsisoq piviusoq inunnit pissaaneqarneroqaaq. Tassaavoq Satan Diaavulu, Bibelip oqarneratut ’inuit najugaanni nunalinnik tamanik tammartitsiniartoq’. — sarĸúmersitat 12:9.

BIBELIMI allassimavoq: „Ilisimavugut Guutimit pisugut, silarsuarli tamaat ajortup [Satanip] pissaaneqarfigaa.“ (1 Juánase 5:19, NV) Taamaattumik aatsaat Satan taassumalu silarsuarmik aaqqissuussaa peerneqarpata piviusumik eqqissineqassaaq isumannaassuseqartualissallunilu. (Naleqqiukkit Jesaja 48:22; Rûmamiut 16:20.) Inuit tamanna pilersinneq saperpaat.

Eqqissineq isumannaassuserlu qanoq ilillutik pilersinneqarsinnaagamik? Tamanna atsaat pisinnaavoq Guutip akuliunneratigut. Guuti ajugaqanngitsoq Satanimit pissaaneqarnerungaarpoq, taassumalu inuit akornanni Satanip suliniutaa piffissamik killissaqartippaa. Piffissanngorpat ’taava perlussap tassanngaannaq’ silarsuaq Satanip pissaaneqarfigisaa tikikkumaarpaa. (1 Tásalûníkamiut 5:3-7) Tamanna qularnanngivissumik erniinnaq pissaaq!

Maannakkut eqqissineq isumannaassuserlu!

Maannakkulli qanoq iliortoqarsinnaava? Ullumikkut ilaatigut eqqissineq isumannaassuserlu piviusut killeqartumik anguneqarsinnaapput. Qanoq ililluni? Upperisarsiornikkut pisortat ilarpassuisa misiliisarsimanerigaluattut silarsuarmi politikkimut akuliunnikkut pinnani, Guutilli inatsisaanik ajoqersuutaanillu maleruaanikkut.

Tamanna eqqissinermik piviusumik kinguneqassava? Aap. Assersuutigalugu, Jehovap nalunaajaasuisa misigisarpaat Guutip inassutai maleruaraanni eqqissineq piviusoq ilaatigullu isumannaassuseq anguneqarsinnaasut. Inatsisit taakku, Bibelimi allassimasut, ikiortigalugit inuiannit tamalaanit peqatigiiffittut ataasiussuseqarlutik eqqisseqatigiipput ammip qalipaataa, sumiuussuseq oqaatsillu apeqqutaatinnagit. — Tussiaat 133:1.

Guutip inassutaa naalallugu assersuutaasumik ’saffiortarpaat panatik assallatserummut savissaliaralugit, sakkunillu atuinissamut sungiusarunnaarlutik’. (Jesaja 2:2-4) Guutip asanninnera pissutigalugu toqqissisimapput anersaakkullu qatanngutimik imminnut isumassuinerat tatigalugu. (Rûmamiut 8:28, 35-39; Filípimiut 4:7) Tamanna qularigukku, nammineerlutit takusinnaaniassagakku rigssaliisa ilaannut pulaarnissannut tikilluaqqusaavutit.

Silarsuaq tamakkerlugu eqqissineq isumannaassuserlu

Tamannali tassaanngilaq Bibelip eqqissinermik isumannaassutsimillu piviusunik neriorsuutaata eqquunnera! Inuilli tamarmik Guutip inatsisai maleruaraluarpatigik silarsuaq taama pissuseqassagaluarpoq. Tamanna erniinnaq piviusunngussaaq.

Apustili Paulus ima oqarsimavoq: ’[Guutimut kiffaanngitsut] oqarpata: „Eqqissinarpoq, siooranartoqanngilaq!“ [isumaqarlutik kiisami piumasartik malillugu eqqissineq isumannaassuserlu pilersissimallugit] taava perlussap tassanngaannaq tikikkumaarpai.’ (1 Tásalûníkamiut 5:3) Guutip isaani Satanip sivisuallaamik inuit tammarsimatissimavai. Taava taassuma silarsuullu ajortunngorsimasup taassuma pissaaneqarfigisaata peerneqarnissaanut piffissanngussaaq. Aammattaaq Danielip siulittuutaata matuma eqquunnissaanut piffissanngussaaq: „Naalagaaffinnguit taakkua kunngii inuutillugit Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ — Daniel 2:44.

Guutip taamaaliornissaa naapertuilluanngitsuliornerussava? Naamerluinnaq. Guutip eqqartuussutai najoqqutassiaalu naapertorlugit taama pisassaqartut kisimik suujunnaarsinneqassapput. Pinngortitsisup naapertuilluartumik eqqartuussisussaanera tatigaajuk? Isumalluarluta eqqartuussinissaq taassumunnga suliassaatissinnaavarput. Eqqartuussutaata kinguneri Ussatit 2:21, 22-mi ima allaatigineqarput: „Peqqusersuitsut nunami najugaqartuassapput, assuarnaatsut aamma tamaaniissapput. Kisianni guutiitsut piiagaassapput tunussisullu nunaminnit aallarunneqarlutik.“ Guutiitsut piiagaappata kia aliasuutigissavaa?

Eqqissiviilliortitsisut peerneqarsimalerpata, nunarsuaq tamakkerlugu Guutip naalagaaffiata siulersuinerata iluaqutaasup ataani eqqissineqarlunilu isumannaassuseqassaaq. „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ (Jesaja 11:9) Neriorsuut tamanna Bibelimeersoq upperaajuk? Qularinngiliuk tamanna ungasinngitsukkut pissasoq? Qularigukku kajumissaarniarpatsigit tamanna misissorneroqqullugu. Guutip piumasaa naapertorlugu aatsaat eqqissineq isumannaassuserlu erinigisatik inuit angusinnaassavaat. (wD 1/9 91)

[Qupp. 8-mi assiliartat]

Jehovap innuttaasa akornanni ullumikkut eqqissineq isumannaassuserlu piviusut atuupput