„Guutip inuunermut aqqutigeqqusaa“ — 1998-imi ataatsimeersuarneq qanillivoq!
UKIOQ manna 1998-imi Jehovap Nalunaajaasui silarsuaq tamakkerlugu ataatsimeersuartitsissapput. Aamma maani nunatsinni ullunik pingasunik sivissusilimmik ataatsimeersuarneqassaaq. Saqqummiussassat ullaat tamaasa nalunaaqutaq 9.30 nipilersornermik aallartittassapput.
Ulloq ataatsimeersuarfik siulleq ullaap-tungaa nunarsuup ilaani assigiinngitsuni Guutip naalagaaffianik oqaluussissutiginninnerup siumukarsimaneranik nalunaaruteqartoqassaaq. Tamatuma kingorna ataatsimeersuarnerup qulequtaa tunngavigalugu oqalugiartoqassaaq: „Jesusip utertitsissutaa — Guutip annannissamut aqqutigeqqusaa“.
Ualikkut oqalugiaatini ataqatigiinni „Angajoqqaat — meeqqasi Guutip aqqutigeqqusaanik ajoqersorsigik“-mik qulequtalinni siunnersuutigineqassaaq meeqqat qanoq ilillutik Jehovamut asanninnissaannut kiffartornissaannullu kajumissaarneqarsinnaasut. Ualikkut naggataarutaasumik ima qulequtalimmik oqalugiaateqartoqassaaq: „Toqup kingorna inuuneqarpa?“
Ullormi tulliuttumi ullaap-tungaa Jehovap nalunaajaasuisa ajoqersuganngortitsinermik sulinerat oqalugiaatini pingasuni makkunani sammineqassaaq: „Inuit aqqummut inuunartumut ikiukkit“, „Qanoq ililluta inuit tamaasa angusinnaagivut“ kiisalu „Ajoqersukkat Jesusip peqqussutaanik tamanik ajoqersukkit“. Ullaap tungaani saqqummiussat naggaserlugit kuisittoqassaaq.
Ualikkut oqalugiaammi siullermi „Inuuneq naassaanngitsoq eqqarsaatigalugu kiffartorpugut“-mi kajumissaarneqassaagut qinunikkut nammineq Guutimut kiffartornitsinnut pissutiginiakkavut misissoqqullugit. Oqalugiaatini „’Inuit tunissutaasut’ Guutip aqqutigeqqusaanik ajoqersuisut pingaartikkit“-mi aamma „Inutoqaq iperassavarput inuttaarlu atillugu“-mi Evfisumiunut agdlagkat-ni kapitali 4 versikkuutaarlugu paasissutissiisumik sammineqassaaq. Kingornalu oqalugiaateqartoqassaaq ima qulequtaqartunik: „Silarsuarmit mingutsinnaveerit“ aamma „Inuusuttut — Guutip aqqutigeqqusaa atuarsiuk“, tassanilu pingaartunik oqaaqqissaaruteqassaaq Biibilimeersunik. Ualeq oqalugiaammik „Pinngortitsisup pissusii aqqutigeqqusaalu“-mik naggaserneqassaaq.
Ullut ataatsimeersuarfiit pingajuanni ullaap-tungaa oqalugiaatini ataqatigiinni pingasuni Hesekielip allagaani kapitalit kingulliit eqquunnissaallu sammineqassapput. Ullup qeqqata missaani Biibilimi Danielip ikinngutaasa pingasut aalajaannerannik oqaluttuaq tunngavigalugu isiginnaagassiaqassaaq. Ataatsimeersuarnerup pingaarnersaa tassaassaaq ualikkut tamanut ammasumik oqalugiaat „Inuunermut naassaanngitsumut aqqutissatuaq“.
Ullut pingasut tamaasa najuukkuit anersaakkut pissarsilluassaatit. Saqqummiussassat tamaasa tusarnaariarnissaannut tikilluaqqusaavutit. Maani nunatsinni ataatsimeersuarneq pissaaq Nuummi tallimanngorneq juulip 31-aniit sapaat aggustip 2-a ilanngullugu. (wE 1/6 98)