Ataatsimeersuarnermut „Guutip oqaasianut upperneq“-mut qaaqquatsigit!
Nunarsuarmi sumi tamaani sumiiffinni hundredelikkuutaani ataatsimeersuarnernut inuit millionilikkuutaat najuutissapput. Kalaallit Nunaanni ataatsimeersuarneq pissaaq Nuummi 1.-3. aggusti 1997, „Atuarfik Samuel Kleinschmidt“-imi.
Ataatsimeersuarneq ullaat tamaasa nalunaaqutaq 9.30 nipilersornermik aallartittassaaq. Biibili tunngavigalugu unnersuussuterpassuit ulluinnarni atoriaannaasut pissarsiffigilluarsinnaassavatit. Tallimanngornerup ullaa’tungaani minuttini 25-ini apersorneqassapput inuit inuunerminnut sunniuteqarsimaqisumik Guutip oqaasianut uppissuseqartut. Tamatuma kingorna ataatsimeersuarnerup qulequtaa tunngavigalugu oqalugiaat „Upperluta saqivugut takunninnata“ saqqummiunneqassaaq.
Tallimanngornermi ualikkut oqalugiaammi siullermi inuusuttut ilagiinni kristumiuni pingaaruteqarnerat eqqartorneqassaaq. Oqalugiaatini ataqatigiinni pingasuni tulliuttuni sammineqassapput Biibilimi najoqqutassiat, kristumiut oqaluttarnikkut, pissusilersortarnikkut avammullu takkorliuttarnikkut ileqqorisaannut atassuserlugit. Tulliussapput oqalugiaatit „Uppernermik amigaateqarneq mianersorfigiuk“ aamma „Guutip oqaasia uumavoq“, Eprîarinut agdlagkat kapitaliisa pingajuanni sisamaannilu unnersuussutinik pitsaasunik sammisaqartut. Tallimanngornermi saqqummiussat naggaserlugit oqalugiaatigineqassaaq „Inunnut tamanut atuagaq“.
Arfininngornermi oqalugiaat siulleq tassaassaaq „Upperneq sulianik ilaqanngitsoq toqungavoq“. Oqalugiaammi pingaarutilimmi allami „Sallusuissut aalajangiusimallugulu sorlaqarfigiuk“-mik qulequtalimmi qanoq ililluni anersaakkut ineriartortoqarsinnaanera sammineqassaaq. Taava ataatsimeersuarnermi persuarsiutaasartoq tullinnguutissaaq, tassa „Guutip oqaasianut upperneq kuisinnermik kinguneqartarpoq“-mik qulequtalik oqalugiaatigineqareerpat ajoqersukkat nutaat kuisinnissaannut periarfissaqassaaq.
Arfininngornermi ataatsimeersuarneq nangillugu oqalugiaatigineqassaaq „Upperneq assoruutigiuk“-mik qulequtalik, Biibilimi Jûtarsip agdlagai-ni unnersuussineq kimittooq sammineqarluni. Oqalugiaatini ataqatigiinni nalunaaquttap-akunneranik ataatsimik sivisussuseqartuni „Guutip illuanukarta“-mik qulequtalinni kristumiut ataatsimiittarnerisa iluaqutaassusiat sammineqassaaq. Ullormi tamatumani saqqummiussat naggaserlugit oqalugiaatigineqassaaq „Maannakkut uppernerit misilinneqarpoq“.
Sapaatip ullaa’tungaani oqalugiaatini ataqatigiinni pingasuni Joelip allagai Biibilimiittut sammineqassapput, ullumikkumut pingaaruteqarnerat ilaatigut eqqartorneqassalluni. Taava isiginnaagassiaq kristumiut qanoq ilillutik annilaanganermik isumakulunnermillu aniguisinnaanerannik ersersitsisoq saqqummiunneqassaaq. Ataatsimeersuarnermi oqalugiaatit pingaarnersaat, tamanut ammasumik oqalugiaat, ualikkut oqalugiaatigineqartussaq qulequtaqarpoq „Uppernerit siunissallu“.
Ulluni pingasuni ataatsimeersuarneq tamaat najuuffigigukku qularnanngivissumik anersaakkut pissarsiaqangaassaatit. Tamatigut tikilluaqqusaangaarputit. Najuunnissat maannangaaq pilersaarusiulereerniaruk. Ataatsimeersuarneq pissaaq Nuummi „Atuarfik Samuel Kleinschmidt“-imi.