Anersaakkut siumukarsinnaavutit

PIGISAT piviusumik nalii aalajangeruminaassinnaapput. Diamantit aamma taamaapput. Diamanti silisimasoq qillalaartuuvoq silisimanngitsorli qillertuunani. Diamantilli silineqarsimanngitsup iluaniippoq ujarak pinnersaat kusanartoq.

Kristumiut diamantimut silisimanngitsumut amerlasuutigut assingupput. Naammalluinnartunngorallarnavianngilagut, Jehovalli pingaartitaanik ilutsinniittoqarpoq. Diamantitullu tamatta immikkut aalajangersimasunik pitsaassuseqarlutalu pissuseqarpugut. Tamatta qamannga pisumik kissaatigigutsigu anersaakkut siumukarsinnaavugut. Inuttut pissutsivut silineqarsinnaapput Jehovap ataqqinaatissaanut qillernerulersillugit. — 1 Korintumiut 10:31.

Diamanti silineqareeraangami qillersarneqareeraangamilu sinilerneqartarpoq kusanarneranik ersarinnerulersitsisumik. Taamatuttaaq ’inuttaaq Guuti assilillugu pinngortitaq atigutsigu iluartillugu illernartillugulu ilumoornikkut’ pissutsini suliassaniluunniit assigiinngitsuni Jehovap atorsinnaavaatigut. — Evfisumiut 4:20-24.

Anersaakkut siumukarnerit taamaattut imminit takkunneq ajorput, soorlu diamanti silineqarsimanngitsoq ujaqqatut pinnersaatitut qillalaarneq ajortoq. Immaqa sanngiissutit qaangerniartariaqarpavut, akisussaaffimmik tigusinissamik kissaateqarnermik ineriartortitsisariaqarluta anersaakkulluunniit toqunganeq qaangerniarlugu ilungersortariaqarluta. Ilumulli kissaatigigutsigu siumukarsinnaavugut, Jehova Guutimmi ’pissaanermik angingaartumik’ tunisinnaavaatigut. — 2 Korintumiut 4:7; Filípimiut 4:13.

Jehovap kiffani pissatsittarpai

Diamantinik silisisartuugaanni eqqorluartumik ilisimasaqarnermik aallaaveqartumik imminut tatigisariaqarpoq, diamantimmi ilaa silillugu peerneqarsimasoq taarserneqarsinnaanngilaq. Kissaatigisatut ilusilersorniarlugu ujaqqap ilaa nalilerujussuaq silisariaqarpoq, ilaannilu ujaqqap silisimanngitsup 50 procentia peerneqartariaqartarluni. Inuttut pissutsivut ilusilersorniarlugit anersaakkullu siumukarniarluta aamma eqqorluartumik ilisarsinermik aallaaveqartumik tatiginnittariaqarpugut. Ingammik Jehovap pissatsissagaatigut tatigisariaqarparput.

Naammanngitsutut iliuuseqaqqissinnaanngitsutulluunniit misigisinnaavugut. Itsaq Guutip kiffai aalajaatsut ilaannikkut aamma taamaattarsimapput. (2 Moses 3:11, 12; 1 Kunngit 19:1-4) Jeremias Guutimit ’inuiannut pruffiitinngortinneqarami’, ima oqarsimavoq: „Oqalunnissannut sapiuppunga inuusuppallaarama.“ (Jeremia 1:5, 6) Naak Jeremias tunuarsimaaraluarluni pruffiitinngorpoq sapiitsoq inunnut akeqqersimaartunut toqqaannartunik oqariartuuteqartoq. Qanoq ililluni tamanna pisinnaava? Jehovap tatiginissaa ilikkarsimavaa. Jeremias kingusinnerusukkut allassimavoq: „Pilluaqqunarsili inuk [Jehovamik] tunaarinnittoq.“ — Jeremia 17:7; 20:11.

Aamma ullumikkut Jehovap tatiginnitsini pissatsittarpai. Edwarda, sisamanik meeralik, sivisuumik anersaakkut siumukarsimanngilaq, tamatumali ilumoornera uppernarsisimavaa. Nassuiaavoq: „Ukiuni qulingiluani Jehovap nalunaajaasuusimavunga, anersaakkulli uninngasutut illunga. Piumassusikinneq imminullu tatiginngippallaarneq ajornartorsiutaasimapput. Spaniami ilagiinnut mikisunut ataasiinnarmik utoqqaanertalimmut ataasiinnarmillu ilagiinni kiffartortulimmut nuuppunga. Pisariaqartitsineqarmat utoqqaanertap assigiinngitsunik suliassippaanga. Oqalugiaqqaarama saqqummiusseqqaaramalu sajuppunga. Jehovalli annertoqqutiginissaa ilikkarpara. Utoqqaanertap nersualaartuaannarpaanga pissuserillunilu pitsannguallaatissanik siunnersortarlunga.

Tamanna ilutigalugu kiffartornera annertusivara ilaquttakkalu anersaakkut siulersorluarnerulerlugit. Taamaattumik sallusuissut ilaqutariinnut tamanut pingaarnerulerpoq uangalu nalerisimaarnerulerlunga. Maanna ilagiinni kiffartortuuvunga pissutsillu kristumiut nakkutilliisut ilisarnaatigisaat ineriartortinniarlugit ilungersorlunga.“

’Inutoqaq ileqqui tappullugit iperarsiuk’

Soorlu Edwardip paasisimagaa anersaakkut siumukassagaanni Jehovamik tatiginnittariaqarpoq. Aamma kristumiutut ’inuttaap’ ineriartortinnissaa pingaaruteqarpoq. Qanoq ililluni taamaaliortoqarsinnaava? Siullermik inuttut ileqqutoqqat ’iperarneqartariaqarput’. (Kulorsamiut 3:9, 10) Soorlu diamantip suliarineqarsimanngitsup akui, immaqa aatsitassat allat, peerneqartariaqartut ujaranngussappat pinnersaat qillaalasoq, taamatulli inuttut pissuserput nutaaq ’qillertissapput’ isummat ’silap pii’ iperartariaqarpavut. — Galâsiamiut 4:3.

Isummat taakkua ilaat tassaavoq piumaffigineqarpallaalissasoraluni akisussaaffimmik tigusinaveersaarneq. Ilumoorpoq akisussaaffeqarneq sulinermik nassataqartartoq, sulinerli nalerisimaarnartuuvoq. (Naleqqiuguk apustilit suliait 20:35.) Paulusip nassuerutigisimavaa Guutimik mianerinnissagutta ’erloqisariaqartugut’. Nuannaarluta taamaaliussaagut, oqarpoq, ’Guuti uumasoq neriuffigigatsigu’, kristumioqatitsinnut allanullu iliuuserisatsinnik puiuinngisaannartoq. — 1 Timûtiuse 4:9, 10; Eprîarit 6:10.

Diamantit ilaat pinngornerminnit qajannarfeqartarput iluminniluunniit nutinneqartarlutik sianigeqqissaarlugillu suliarineqartariaqarlutik. Diamantinilli silisisartup polariskopi atorlugu qajannarfii sumiissusersisinnaavai ujarallu suliarilluarsinnaallugu. Immaqa uagut ilutsinni ’nutinneqarpugut’ inuttut sanngiiffeqarluta tunuliaqutatsinnik imaluunniit misigisimasamik ajoqutigisatsinnik pissuteqartumik. Qanoq iliorsinnaavugut? Siullermik ajornartorsiut nassuerutigisariaqarparput taava sapinngisamik qaangerniarniarlugu aalajangerluta. Aammattaaq nanertuutigisavut qinunikkut Jehovamut tunniuttariaqarpavut immaqalu kristumiu utoqqaanertaq anersaakkut ikiortiseralugu. — Tussiaat 55:23; Jâko 5:14, 15.

Nicholas ilumini taamaattunik ’nutinneqarsimavoq’. „Ataataga imerajuttuusimavoq, qatanngutigalu atugarliuutigeqisatsinnik,“ nassuiaavoq. „Atuarunnaarama sakkutuunngorniarpunga, pikitsitsiumatunermali ajornartorsiortittarpaanga. Ikiaroornartunik nioqquteqartarnera pissutigalugu sakkutuut naalagaata paarnaaruppaanga, tassanngaaniillu qimaavunga. Naggataagut sakkutuujujunnaarpunga, sulili ajornartorsiorpunga. Ikiaroornartunik atornerluinera imertarneralu pissutigalugit inuunera torinngeqaaq, Biibilili soqutigisaraara inuunerullu siunertaa paaserusoqalugu. Naggataagut Jehovap nalunaajaasui atassuteqarfigilerpakka, inuunera allangortillugu sallusuissullu ilassillugu.

Inuttulli sanngiissutiga qaangerniarlugu ukiut arlallit atorpakka. Oqartussaasut uumigeqaakka siunnersuisoqarniaraangallu tamatigut akerliusarlunga. Jehovamit atorneqarusuppunga sanngiissutimali tunuarsimaartippaanga. Utoqqaanertalli paasinnillaqqissut marluk ikiortigalugit kiisami ajornartorsiuteqarnera nassuerutigaara asannittumillu unnersuussutit Biibilimeersut malerualerlugit. Ilaannikkut kamaammerlunga misigisaraluarpunga, maannali pikitsitsiumatunera aqussinnaalersimavara. Jehovap nikalluunnanga ikiortarsimammanga utoqqaanertallu ikiortarsimammannga qujamasoqaanga. Anersaakkut siumukarsimanera pissutigalugu qanittukkut ilagiinni kiffartortutut toqqarneqarpunga.“

Soorlu Nicholasip misigisimagaa pissutsit sungiutivissimasat allanngortikkuminaapput. Immaqa assingusunik unamminiagaqarpugut. Immaqa ajuallajavallaarpugut. Immaqa eqqunngitsuliorfigineqarsimanerput puttarsivarput attaviitsoorusunnerluunniit pingaartippallaarlugu. Taamaappat kristumiutut siumukarnissatsinnut akornutigissavavut. Diamantinik silisisartut ujaqqat naats-inik taasatik tamatumunnga assingusumik misigisaqarfigisarpaat. Tassaapput ujaqqat marluk diamantip pinngornerani ataasinngorlutik aassimasut. Taamaattumik naats-it marlunnik imminnut paarlangasunik katitigaapput siliuminaatsuullutik. Uagutsinni anersaaq kajumittoq uinitsinnut ajortiliusumut sorsuttoq nanisinnaavarput. (Matîuse 26:41; Galâsiamiut 5:17) Ilaannikkut immaqa akiuukkunnaarusunnerusarpugut isumaqalersinnaallutalu inuttut pissuserisarput ajortoq soqutaavallaanngitsoq. Immaqa ima eqqarsartarpugut: ’Taamaakkaluartoq ilaquttama ikinngutimalu asavaannga.’

Qatanngutivulli kiffartuutissagutsigik Ataatarpullu qilammiusoq ataqqissagutsigu inuttaap atineratigut ’anersaatsigut isumaqaatitsigullu nutaanngornissarput’ pisariaqarpoq. Tamanna imminut akilersinnaavoq, soorlu Nicholasip allarpassuillu uppernarsarsinnaagaat. Diamantimik silisisartup nalunngilaa equngassutip ataasiinnap diamanti tamaat takussunarsisissinnaagaa. Inuttut pissutsitsinni sanngiissut ataasiinnaq sumiginnarutsigu sanngiissutip tamatuma anersaakkut isikkorput takussunarsisissinnaavaa. Ajornerusumillu sanngiissutip sualuttup anersaakkut nakkartissinnaavaatigut. — Ussatit 8:33.

Soorlu ilutsinni „inneq“

Diamantimik silisisartup diamantimi „inneq“ eqqorniartarpaa. Taamaaliortarpoq maninnersaliartai sililugit neriusaatut malunnaammik taasaq ersersillugu. Qalipaatit assigiinngitsorpassuit diamantimi akisuguttarput innerlu diamantimik qillalaartitsisoq pinngortarluni. Guutip anersaava ilutsinni „innermut“ assersuunneqarsinnaavoq. — 1 Tásalûníkamiut 5:19; apustilit suliait 18:25; Rûmamiut 12:11.

Taavami misigigutta anersaakkut siumukarnissarput pisariaqanngitsoq qanoq iliorsinnaavugut? ’Aqqutigisavut eqqarsaatigeqqissaartariaqarpavut’. (Tussiaat 119:59, 60) Taamaaliussaagut anersaakkut siumukarnissatsinnut akornutivut paasiniarlugit, taava aalajangerlugu anersaakkut suliniutit sorliit iliuuseqarfiginerussanerlugit. Anersaakkut ittunik pingaartitsinerulersinnaavugut nammineq akuttoqatigiissumik atuaqqissaartarnikkut uummammillu pisumik qinusarnikkut. (Tussiaat 119:18, 32; 143:1, 5, 8, 10) Aammattaaq uppernermut tunngasunut eqiasuitsut ilagisarneratigut Jehovamut kiffartornermi aallussilluarniarluta aalajangersimanerput nakussatsissinnaavarput. — Títuse 2:14.

Louise, arnaq kristumiu inuusuttoq, nassuerpoq: „Nalinginnaasumik pioneeritut, piffissaq tamaat oqaluussisartutut, qinnuteqassanerlunga ukiuni marlunni eqqarsaatigereerlugu aatsaat qinnuteqarpunga. Akornutissaqarsimanngilanga, atoruminartumilli inuuneqarsimavunga allangortinniarsimanngisannik. Taava tassanngaannaq ataataga toquvoq. Inuunerup qajannassusia namminerlu inuunera pitsaanerpaamik atornagu paasilerpara. Taamaattumik anersaakkut eriagisassanut isiginnittaasera allanngortippara, kiffartornera annertusillugu nalinginnaasumillu pioneerinngorlunga. Tamatumani immikkut iluaqutigisimavakka anersaakkut qatanngutit kiffartornermut peqataajuartut uannillu ilaserinnittarsimasut. Paasivara atoruminartuni atoruminaatsunilu ilagisartakkatulli anguniagaqarnartartoq pingaartitaqarnartartorlu.“

Saviminermillusooq ipissarneqarneq

Diamantit nunarsuarmi pinngortitat manngernersaraat. Taamaattumik diamanti diamantimik allamik aatsaat silineqarsinnaavoq. Tamatuma immaqa Biibilimik ilisimannittoq ussatini allassimasumik eqqaasissavaa: „Savimineq saviminermik ipissarneqartarpoq, inuillu imminnut ipissaqatigiittarpullusooq.“ (Ussatit 27:17) Qanoq ililluni inuk ’ipissarneqartarpa’? Inuk alla anersaakkut isumakkullu ’ipissarneqarsinnaavoq’ soorlu savissaq saviminiusoq savimineqataanik ipissarneqarsinnaasoq. Assersuutigalugu nikallungagutta pakatsisimaguttaluunniit allap qiimmassaanera qiimmaallannarsinnaavoq. Isumagissaarnerulissaagut nukissaqarnerulerlutalu. (Ussatit 13:12) Biibilimeersunik qiimmassaanikkut iluaqutaasunillu siunnersuuteqarnikkut ingammik ilagiinni utoqqaanertat ’ipissarsinnaavaatigut’. Taakkua najoqqutassiaq Salomonip saqqummiussaa maleruarpaat: „Silassorissoq ilinniartikkukku silassorinnerulissaaq; iluartoq ajoqersorukku ilisimasartunerulissaaq.“ — Ussatit 9:9.

Soorunami anersaakkut ilinniartinneqarneq sivisusarpoq. Ukiut qulit sinnerlugit Paulusip Timoteus misilittakkaminik ilinniartitseriaatsiminillu ilinniartissimavaa. (1 Korintumiut 4:17; 1 Timûtiuse 4:6, 16) Ukiuni 40-ni Mosesip Josuamik annertuumik ilinniartitsisimanera inuiaat Israelikkut kingunerujussuanut allaat iluaqutigisimavaat. (Josva 1:1, 2; 24:29, 31) Elisap pruffiiti Elias ukiuni arfinilinni ilagisarsimavaa taamaalillunilu nammineq kiffartornissaminut tunngaveqarlualerluni, ukiunilu 60-ini kiffartorsimavoq. (1 Kunngit 19:21; 2 Kunngit 3:11) Utoqqaanertat qanilaarlutik allanik ilinniartitsigaangamik Paulusip, Mosesip Eliasillu maligassiuisimanerat malittarpaat.

Allanik ilinniartitsinerup ilaa pingaartoq tassaavoq nersualaarisarneq. Suliassaq naammaginartumik suliarineqarsimagaangat kiffartorluartoqarsimagaangalluunniit pingaartitsinermik ilumoortumik ersersitsisoqartarpat, allat Guutimut kiffartornerminni iliuuseqarnerorusulersinnaapput. Nersualaartinneq imminut tatigilersitsisarpoq, sanngiissutinik sulissutiginnerusulersitsilluni. (Naleqqiuguk Korintumiunut agdlagkat sujugdlît 11:2.) Aamma oqaluussinermik ilagiinnilu suliassanik allanik ulapputeqarluarneq sallusuissummi siumukarnissamut kajumissinartarpoq. (apustilit suliait 18:5) Utoqqaanertat qatanngutit angutit anersaakkut siumukarneri naapertorlugit akisussaaffinnik tunisarpatigik, qatanngutit taakkua pingaaruteqartunik misilittagaqalissapput, qularnanngitsumillu anersaakkut siumukarnerunissartik kissaatiginerulerlugu. — Filípimiut 1:8, 9.

Anersaakkut siumukarnissamut pissutissaqarluarpoq

Diamantit akisuutut isigineqartarput. Ullumikkut Jehovap nalunaajaasuinut nunarsuaq tamakkerlugu ilaqutariissuusunut ilannguttut aamma taamatut isigaavut. Taakku Guutip ’inuiaat erlinnangaartortaattut’ eqqartorpai. (Haggaj 2:7, NV) Siorna 375.923-t Jehovamut nalunaajaasutut kuisipput. Amerliartornerup tamatuma ’toqqup inittornissaa’ pisariaqalersippaa. Siumukarnitsigut kristumiutullu immikkut pisinnaatitaaffinnik noqqaassuteqarnitsigut tamatta immikkut inittuiniarneq tamanna peqataaffigisinnaavarput. — Jesaja 54:2; 60:22.

Diamanterpassuit akisuut aningaaserivinni toqqortaasut takuneqarpiarnerlu ajortut assiginagit anersaakkut erlinnartuutivut qillaalatissinnaavavut. Kristumiutut pissutsitta „silikulaneratigut“ allat iluaqutissaannut „qillaalatillugit“, Jehova Guuti naalannarsisissavarput. Jesusip ajoqersukkani ima kajumissaarsimavai: ’Qaamasorsi qaamali inunnut, ajunngitsuliasi taakkununnga takoqqullugit Ataatarsilu qilammiusoq unnersiutigeqqullugu.’ (Matîuse 5:16) Taamaattumik anersaakkut siumukarnissamut pissutissaqarluarpugut. (wE 15/5 98)

[Quppernerup ataani ilanngussaq]